Jueces 16:1-31
16 Mbá miʼtsú, Sansón ni̱jkha̱ Gaza. Ikhí ndiʼyoo mbáa a̱ʼgu̱ bi̱ nagujuamínáʼ ga̱jma̱a̱ nito̱ʼo̱o̱ náa goʼwóo.
2 Xtáa mbáa bi̱ niʼthúún xa̱bu̱ Gaza: “¡Sansón xtáa gi̱i̱!” Ikhú niruguama̱ʼa̱a̱n náa xtáa, ga̱jma̱a̱ nigi̱ʼi̱i̱n kañiiʼ mbruʼun náa riejuun xuajin mu muguáʼthi̱i̱n. Kañiiʼ mbruʼun nigi̱ʼi̱i̱n numuu rí nindxaʼwamíjna̱: “Índo̱ gágajnúu a̱jkha̱ʼ, muxiyáaʼlú”.
3 Mú Sansón niguanúu niʼgu asndu tikhu nduʼun, tikhu nduʼun nitu̱jxu̱u̱ ga̱jma̱a̱ nixkudiriya̱a̱ʼ xkrugoo xuajin, ga̱jma̱a̱ mbá nájma̱ ixi̱ dí wájun níjniúu, ma̱ngaa ixi̱ dí kraʼa tungayuu. Nda̱wa̱á nitámáʼ xpajpoo ga̱jma̱a̱ ni̱jkha̱ kagu̱u̱, nikráʼáan asndu náa inuu kúbá, náa ridoo Hebrón.
4 Nda̱wa̱á ninigu̱u̱ʼ kaʼyoo mbáa a̱ʼgu̱ bi̱ xtáa náa Sorec, bi̱ mbiʼyuu Dalila.
5 Ikhú bi̱ nutañajúúnʼ filisteos nigún gútamijná gajmiún a̱ʼgu̱, nitháán: “Atani̱ nduwaaʼ mu maʼtháanʼ náá eríyaʼ tsiaki̱i̱ dí ra̱ʼkhá tháán mba̱a̱ gíʼdoo. Ataniminaʼ ma̱ta̱ya̱a̱ xú káʼnii gándoo maʼngulú mu̱ʼni̱ gajmiúlú ga̱jma̱a̱ muruʼwáálú. Á mu natani̱, mámbáa dí ikháanʼxu̱ maxnáaʼ mbá 1,100 mbújkha̱a̱ plata”.
6 Nda̱wa̱á, Dalila niʼthúu̱n Sansón: “Mbá péñu,* arathúnʼ, náá etríyaʼ tsiaki̱i̱ dí ra̱ʼkhá tháán mba̱a̱ dí xtaʼdáá, ga̱jma̱a̱ ndiéjunʼ gándoo gáxtuʼwaaʼ ga̱jma̱a̱ rá.”
7 Sansón niriʼñuu: “Á mu dí nuroʼoʼ ga̱jma̱a̱ mbá juwan cuerda* dí nuxi̱ʼ, dí xóó tséjndooʼ, maʼni wabúnʼ xó má xúgíinʼ xa̱bekha”.
8 Ikha jngóo bi̱ nutañajúúnʼ filisteos, nigún kudúún mbá juwan cuerda dí nuxi̱ʼ, dí xóó tséjndooʼ. Dalila niroʼóo ga̱jma̱a̱ cuerda rúʼko̱.
9 Xó má filisteo nirkaʼwumijná náa cuarto dí awúún. Ikhú Dalila nindxa̱ʼwá: “¡Sansón, gi̱i̱ kúwá filisteo!”. Mbá nacha̱ nixkuʼtungaa cuerda dí kaxtoʼóo ga̱jma̱a̱, xóo etungaa gúmúu lino dí káaʼ ndaʼyoo aguʼ. Ga̱jma̱a̱ tájuiʼyáá náá e̱ʼkha̱ tsiaki̱i̱ dí gíʼdoo.
10 Dalila niʼthúu̱n Sansón: “¡Naratsíin ga̱jma̱á nindxu̱ʼ ráʼ.! ¡Nitani̱ nduwúúnʼ! Mbá péñu, arathúnʼ. Ndiéjunʼ gándoo gáxtuʼwaaʼ ga̱jma̱a̱.”
11 Ikhaa niʼthúu̱n: “Á mu nuroʼoʼ ga̱jma̱a̱ ñuñuu dí nuxi̱ʼ, dí xóó tséjmún náa nuñajunʼ, maʼni wabúúnʼ, xó má xúgíinʼ xa̱bekha”.
12 Ikha jngóo Dalila niguajthun ñuñuu nuxi̱ʼ niruʼoo ga̱jma̱a̱. Ikhú nindxaʼwá: “¡Sansón, gi̱i̱ kúwá filisteo!”. Mbá nacha̱ nixkuʼtu ñuñuu dí kaxtoʼóo ga̱jma̱a̱, xóo gúmá ndiʼyoo. (Índo̱ Dalila xtáa raʼni rígi̱, filisteo bi̱ guáʼthi̱i̱n kajtiin má xúʼko̱ náa cuarto dí awúún).
13 Nda̱wa̱á, Dalila niʼthúu̱n Sansón: “Natani̱ nduwúúnʼ má xúʼko̱, narathúnʼ dí ragájkhun, arathúnʼ ndiéjunʼ gándoo maxtuʼwaaʼ ga̱jma̱a̱.” Ikhaa niʼthúu̱n: “Ndayóoʼ dí matani̱ mbá juwan lazo edxu̱ʼ ga̱jma̱a̱ gúmá dí najmaa mu miʼxmí ga̱jma̱a̱”.
14 Ikha jngóo índo̱ niguámbóo niroʼóo láziúu náa stáka dí najuiʼxmí, ikhaa nindxa̱ʼwá: “¡Sansón, gi̱i̱ kúwá filisteo!”. Ikhaa mbá nacha̱ ndijui̱i̱ ga̱jma̱a̱ nixmátri̱ya̱ʼ stáka ga̱jma̱a̱ gúmá dí kaxtoʼóo ga̱jma̱a̱.
15 Ikhaa niʼthúu̱n: “Xú káʼnii rathá dí nandaaʼ xtayoʼ á mu dí tsétambáʼtáá a̱jkia̱a̱nʼ rá. Niʼni má ajtsú nuthu dí natani̱ nduwúúnʼ ga̱jma̱a̱ na̱nguá rathúnʼ náa e̱ʼkha̱ tsiaki̱i̱ dí ra̱ʼkhá tháán mba̱a̱ dí xtaʼdáá”.
16 Numuu dí niskoo eʼni dí tsejtsi natsudaa, niʼni néʼngo̱o̱ rí asndu nindoo makhañúu.
17 Ikhú ikhaa nimbáʼtoo a̱jkiu̱u̱n ga̱jma̱a̱ niʼthúu̱n: “Nditháan túrujthu tátsun edxu̱ʼ, numuu dí nindxu̱ʼ nazareo* ndrígóo Dios asndu nákha ku̱ʼu̱u̱n awáán. Á mu dí xúʼko̱ gúrujthu tátsun edxu̱ʼ mandátigo̱ʼ tsiaki̱i̱ ga̱jma̱a̱ maʼni wabúúnʼ xó má xúgíinʼ xa̱bekha”.
18 Índo̱ Dalila ndiʼyoo rí Sansón nimbáʼtoo a̱jkiu̱u̱n, mbá nacha̱ nindxaʼwúún bi̱ nutañajúúnʼ filisteo, niʼthúún: “Aguwaʼla rá, xúgi̱ dí nimbáʼtoo a̱jkiu̱u̱n xá”. Ga̱jma̱a̱ bi̱ nutañajúúnʼ filisteo nigún kudúún mbújkha̱a̱ náa ikhaa.
19 Nda̱wa̱á dí niʼni dí Sansón mambumuu migu náa ragómiúu. Dalila nindxa̱ʼóo mbáa xa̱bu̱ mu marujthu mbá juwan láziúu. Ikhú ikhaa niʼngo̱o̱ niʼni ga̱jma̱a̱. Numuu dí na̱jkha̱ raguámbá tsiaki̱i̱ rí gíʼdoo.
20 Ikhú a̱ʼgu̱ nindxa̱ʼwá: “¡Sansón, gi̱i̱ kúwá filisteo!”. Ikhaa ndijui̱i̱ ga̱jma̱a̱ niʼtáminaʼ: “Maʼngo̱ʼ ma̱ni̱ kríyamínáʼ xó má ni̱ni̱ nákhá ginii”. Mú ikhaa na̱nguá eʼyoo dí Jeobá niniñuuʼ.
21 Ikha jngóo filisteo nirtuwiin, nirawíi iduu ga̱jma̱a̱ niguájthan kuya̱a̱ náa Gaza. Ikhí nirajmaa ga̱jma̱a̱ a̱jma̱ cadena dí ajua̱nʼ. Ikhí nixtumaa dí maʼni majngutuáʼan itsúu molino náa guʼwá ejua̱a̱nʼ.
22 Mú nda̱wa̱á rí nida edxu̱u̱ ndi̱ʼya̱a̱ mbu̱júu̱.
23 Bi̱ nutañajúúnʼ filisteo nigimbúmíjná mu muxnajxi̱ mbá tsigijñaʼ náa dios ndrígu̱ún Dagón ga̱jma̱a̱ mu muni̱ ndxa̱a̱ rí niʼngu̱u̱n nidaaʼ, nithi: “¡Dios ndrígulú nixnájxi̱i̱ náa ñawúnlú Sansón, xa̱bu̱ sia̱nʼ ndrígulú!”.
24 Índo̱ xa̱bu̱ xuajin ndiyáá,* nigíʼdi̱i̱ nini̱ mba̱a̱ dios ndrígu̱ún, nithi: “Dios ndrígulú nixnájxi̱i̱ náa ñawúnlú xa̱bu̱ sia̱nʼ, bi̱ niʼni gámbóo xúgíʼ dí rígá náa xuajñulú ga̱jma̱a̱ nigudíin mbaʼin xa̱biu̱lú”.
25 Numuu dí gagi kúwá, ikha jngóo nithi: “Aguwaʼla ku̱ya̱a̱ Sansón mu maʼni munduʼwálú mbá xngaa”. Ikha jngóo niriya̱a̱ʼ Sansón náa guʼwá ejua̱a̱nʼ mu maʼni munduʼwa. Nitsijii náa ta̱pho̱o̱ rí wájun rajkhúu guʼwá.
26 Ikhú Sansón niʼthúu̱n dxámá bi̱ na̱jkha̱ kayáa: “Atatsíñuʼ maguajthúun rajkhúu guʼwá mu mambáyúminaʼ”.
27 (Kajtíinʼ xa̱bekha ga̱jma̱a̱ gu̱ʼu̱ náa guʼwá, xúgíinʼ bi̱ nutañajúúnʼ filisteo kúwá ikhí. Náa tsu̱du̱u̱ guʼwá gríguiin mbá 3,000 xa̱bekha ga̱jma̱a̱ gu̱ʼu̱, bi̱ nuyejxi̱i̱ Sansón índo̱ kúwá runduʼwajmaa).
28 Sansón niʼtákáñuu Jeobá: “Tátá Jeobá bi̱ itháán mba̱a̱, mbá péñu, garmáʼáan a̱jkia̱a̱nʼ xtayoʼ. Dios ndrígóʼ. Araxnúʼ tsiaki̱i̱ iwáá má rígi̱, mbá péñu. Atatsíñúnʼ dí ma̱ni̱ gámbíin filisteos ga̱jma̱a̱ numuu mbá iduʼ”.
29 Nda̱wa̱á Sansón nimbáyuminaʼ náa mbá nájma̱ rajkhúu guʼwá dí wájun ta̱pha̱, rí juádooʼ guʼwá. Mbá rajkhúu guʼwá niguajthun ga̱jma̱a̱ ñawún mújúunʼ ga̱jma̱a̱ i̱mba̱ niguajthun ga̱jma̱a̱ ñawún xti̱yu̱u̱ʼ.
30 “¡Gakañúʼ gajmíʼ filisteo!”, nindxa̱ʼwá Sansón. Ikhú nikuʼdingua̱nʼ rajkhúu guʼwá ga̱jma̱a̱ xúgíʼ tsiaki̱i̱ ndrígóo. Guʼwá nijngudiri̱ga̱a̱, ni̱jkha̱a̱ náa tsu̱du̱ún bi̱ nutañajúúnʼ filisteo ga̱jma̱a̱ mbá xúgíinʼ xa̱bu̱ bi̱ kúwá ikhí. Itháan mbaʼin xa̱bu̱ bi̱ nigudíin Sansón índo̱ nikháñuu ki xóo índo̱ nixtáa ndaʼya.
31 Nda̱wa̱á, a̱ngui̱i̱n ga̱jma̱a̱ bi̱ kúwá náa goʼwóo anu̱u̱* niguájthan gúyáaʼ, nitsima̱án kuya̱a̱ ga̱jma̱a̱ nidi̱i̱ náa Zorá ga̱jma̱a̱ Estaol. Náa nijuiʼdi̱i̱ Manóah, anu̱u̱. Sansón niʼnimbánuu numún xa̱bu̱ Israel mbá 20 tsiguʼ.
Mbaʼa nota
^ O “ataniu̱ʼ mbá rí májánʼ”.
^ O “cuérdóo xkamídá”.
^ Nakujmaa dí nandoo gáʼthúu̱n xándú.
^ O “tátée”.
