Jueces 17:1-13
-
Xándú ga̱jma̱a̱ ndxajkiuun Miqueas (1-13)
17 Náa kúbá Efraín nixtáa mbáa xa̱bu̱ bi̱ mbiʼyuu Miqueas.
2 Ikhaa niʼthúu̱n ru̱dúu̱:* “Narmáʼáan a̱jkia̱a̱nʼ eʼni 1,100 mbújkha̱a̱ plata dí nigajta káyáaʼ ga̱jma̱a̱ dí nidxawuun dí niratátsríguíi bi̱ ni̱jkha̱ kagu̱u̱ ráʼ. Ikhúún gúʼdoo. Ikhúún ni̱jkhá ka̱gu̱ʼ plata”. Índo̱ ru̱dúu̱ niʼdxawuun rígi̱, ikhú niʼthí: “Jeobá gáʼni tsajkurámaaʼ a̱ʼdióʼ”.
3 Ikhaa nixnáa ru̱dúu̱ mbá 1,100 mbújkha̱a̱ plata. Mú ru̱dúu̱ niʼthúu̱n: “Na̱xna̱ ajngóʼ dí ma̱ni̱ wájíʼ plata rígi̱ mu maxnu̱u̱ Jeobá. Nandoʼ dí majmaaʼ mu matani̱i̱ mbáa xándú bi̱ nagumaa ga̱jma̱a̱ itsí, ma̱ngaa mbáa bi̱ nagumaa ga̱jma̱a̱ ajua̱nʼ. Ikha jngóo plata rígi̱ nindxu̱u̱ ndrígáaʼ ikháán”.
4 Índo̱ ikhaa nixnáala plata ru̱dúu̱, ikhú ru̱dúu̱ niruiʼta̱a̱ mbá 200 mbújkha̱a̱ plata ga̱jma̱a̱ nixnúu bi̱ maʼnii xándú, ikhaa niʼnii mbáa xándú bi̱ nagumaa ga̱jma̱a̱ itsí ga̱jma̱a̱ i̱mba̱a̱ bi̱ nagumaa ga̱jma̱a̱ ajua̱nʼ. Nixudi̱i̱nʼ náa goʼwóo Miqueas.
5 Miqueas gíʼdoo mbá guʼwá náa ndaʼyamajkhún xándú. Ikhaa niʼni mbá efod* ga̱jma̱a̱ tikhuun xándú,* ma̱ngaa nigíiʼ mbáa a̱ʼdióo mu mani̱ndxu̱u̱ ndxajkun.
6 Nákha mbiʼi rúʼko̱ ndawa̱a̱ rey náa Israel. Ikha jngóo mámbáa naʼni xó má májánʼ eʼyoo.
7 Ikhí xtáa mbáa dxámá bi̱ na̱ʼkha̱ náa Belén dí kaʼyoo Judá, na̱ʼkha̱ náa bi̱ naguwáʼ náa goʼwóo Judá. Nindxu̱u̱ levita ikhaa nixtáa ikhí mbá nguáthá tiempo.
8 Dxámá bugi̱ niniñuuʼ Belén dí kaʼyoo Judá mu maʼga gáyáʼ náa maxtáa. Ni̱jkha̱nú náa kúbá Efraín, náa goʼwóo Miqueas.
9 Miqueas nirajxu̱u̱: “Náá lá edxa̱ʼ rá.” Ikhaa niriʼñuu: “Nindxu̱ʼ levita na̱ʼkhá náa Belén dí kaʼyoo Judá. Jngruigoʼ raʼyáʼ náa maxtáá”.
10 Ikhú Miqueas niʼthúu̱n: “Aguanáaʼ mu mani̱ndxa̱a̱ʼ bi̱ maxnúʼ consejo* ga̱jma̱a̱ ndxajkun ndrígióʼ. Maxna̱a̱ gu̱wa̱ʼ mbújkha̱a̱ plata dí mbá tsiguʼ, mbá edi̱i̱ xtíin mataguʼwáanʼ ga̱jma̱a̱ ganitsu”. Ikhú levita nito̱ʼo̱o̱ náa goʼwóo.
11 Xúʼko̱ niʼni dí dxámá levita nigruigú maguanúu ga̱jma̱a̱ Miqueas, ga̱jma̱a̱ ni̱jkha̱nú ninindxu̱u̱ xóo mbáa a̱ʼdióo.
12 Miqueas nigíiʼ levita mu mani̱ndxu̱u̱ ndxajkun ndrígio̱o̱, ma̱ngaa niguanúu mu maxtáa náa goʼwóo.
13 Ikhú Miqueas niʼthí: “Dí xúgi̱ nda̱yo̱o̱ dí Jeobá maʼniuʼ dí májánʼ, numuu dí levita nindxu̱u̱ ndxajkun ndrígióʼ”.
