Jueces 18:1-31
18 Mbiʼi rúʼko̱ ndawa̱a̱ rey náa Israel, ga̱jma̱a̱ nákhá ikhú xa̱bu̱ bi̱ naguwáʼ náa xuajin chíʼgíiʼ* ndrígu̱ún danitas jngruigu̱u̱n ruyáʼ mbaaʼ* náa makuwá. Numuu dí asndu ikhú xóó tákánún náa ma̱ndoo makuwá náa xuajin majkhaʼ dí rígá náa Israel.
2 Bi̱ naguwáʼ náa xuajin chíʼgíiʼ ndrígóo Dan nixuʼmiin mbá witsiin xa̱bekha bi̱ kúwíin náa xuajin chíʼgíiʼ* ndrígu̱ún. Xa̱bekha bi̱ kaʼnii matanimba̱a̱ʼ dí nuthi, bi̱ kúwá náa Zorá ga̱jma̱a̱ náa Estaol, mu magún gúyama ga̱jma̱a̱ muyejxi̱i̱ ku̱ba̱ʼ, nithúún: “Gaʼguala, guyejxi̱i̱ ku̱ba̱ʼ”. Índo̱ ikhiin niguánú náa kúbá Efraín, náa goʼwóo Miqueas, ikhí niguanún ninuʼ.
3 Índo̱ kúwá náa mijngii goʼwóo Miqueas, nini̱ʼnuu aʼwóo dxámá levita, ikha jngóo nigún ga̱jma̱a̱ nirajxi̱i̱: “Tsáá ni̱ʼkha̱ kañán gi̱i̱, ndiéjunʼ tani̱ gi̱i̱, náá numuu dí niguanáa rá.”
4 Dxámá niʼthúún xúgíʼ rí Miqueas niʼni ga̱jma̱a̱ numuu, ga̱jma̱a̱ niʼthúún xóó: “Nigiúúnʼ mu mani̱ndxu̱ʼ ndxajkun ndrígóo”.
5 Ikhú ninda̱ʼa̱a̱: “Mbá péñu,* atrajxi̱i̱ Dios á mu magajnúu májánʼ náa najkuáxu̱ rígi̱”.
6 Ndxajkun niʼthúún: “Gaʼguala tsímáá, Jeobá xtáa ga̱jma̱á nindxa̱la náa ejkua”.
7 Ikha jngóo bi̱ witsiin xa̱bekha nigún má xúʼko̱ asndu niguánú Lais. Ndiyáá dí xa̱bu̱ bi̱ kúwá ikhí, tsémbayúmíjná gajmiún nimbáa, xó má bi̱ sidonio. Kúwá tsímáá ga̱jma̱a̱ nda̱a̱ dí exmiéjúúnʼ eʼni. Ga̱jma̱a̱ ndawa̱a̱ nimbáa xa̱bu̱ ra̱májáanʼ ikhí, bi̱ magruigú mbañúúnʼ ni má bi̱ maʼni xkájkiu̱ún. Ndawi̱i̱n mijngii sidonios ga̱jma̱a̱ tsémbájxu̱u̱n gajmiún i̱ʼwáʼ xuajin.
8 Índo̱ niguáʼnúu náa kúwá a̱ngiu̱ún náa Zorá ga̱jma̱a̱ Estaol, nirajxu̱u̱n: “Xú káʼnii nijkuala rá.”
9 Ikhiin niriʼña: “Guʼgualú, guxmíjná gajmiúlú xa̱bu̱ buʼko̱. Numuu dí ikháanʼxu̱ ndi̱ya̱a̱ dí ku̱ba̱ʼ rúʼko̱ ra̱ʼkhá tháán májánʼ. Ndíjkha rí nu̱ni̱ a̱jma̱ a̱jkia̱la rá. Xúnimbatíga̱ mbiʼi, gaʼguala ga̱jma̱a̱ gundrígúu ku̱ba̱ʼ rúʼko̱.
10 Índo̱ gúʼguanúla, mbu̱ya̱a̱ dí xa̱bu̱ buʼko̱ nda̱a̱ dí exmiéjúúnʼ ga̱jma̱a̱ ku̱ba̱ʼ ra̱ʼkhá tháán ma̱ja̱nʼ. Dios nixnájxi̱ má náa ñawánla ikháanʼ ku̱ba̱ʼ rúʼko̱. Mbá ku̱ba̱ʼ náa rígá má xúgíʼ”.
11 Ikhú mbá 600 xa̱bekha bi̱ naguwáʼ náa xuajin chíʼgíiʼ ndrígu̱ún danitas nigájnún náa Zorá ga̱jma̱a̱ Estaol. Nigún xawii mu muxmijná.
12 Nitsimún náa Judá ga̱jma̱a̱ nigi̱ʼi̱i̱n náa mijngii Quiryat-Jearim. Ikha jngóo náa mbaaʼ rúʼko̱ dí rígá xígií náa narámaaʼ a̱jkha̱ʼ* náa Quiryat-Jearim mbiʼyuu Mahané-Dan* asndu rí mbiʼi xúgi̱.
13 Ikhí nigájnún nigún náa kúbá Efraín ga̱jma̱a̱ niguánú náa goʼwóo Miqueas.
14 Ikhú bi̱ mbá witsiin xa̱bekha bi̱ nigún gúyama náa ku̱ba̱ʼ Lais, nithúún a̱ngiu̱ún: “Ndu̱ya̱a̱la dí náa guʼwá rúʼko̱ rígá mbá efod,* kúwá xándú,* mbáa xándú bi̱ nigumaa ga̱jma̱a̱ itsí ga̱jma̱a̱ i̱mba̱a̱ bi̱ nigumaa ga̱jma̱a̱ ajua̱nʼ ráʼ. Gu̱ya̱a̱ ndiéjunʼ gúnila”.
15 Ikha jngóo ikhiin niguájun ikhí ga̱jma̱a̱ mbá witsiin xa̱bekha nigún náa goʼwóo dxámá levita, dí rígá náa mijngii goʼwóo Miqueas ga̱jma̱a̱ nirajxi̱i̱ xú kaʼnii xtáa.
16 Mú bi̱ mbá 600 xa̱bekha bi̱ naguwáʼ náa Dan, bi̱ kúwá xawii mu magún gúxmijná, niguáʼthi̱i̱n náa riejun.
17 Mbá witsiin xa̱bekha bi̱ nigún gúyama náa ku̱ba̱ʼ, nitu̱ʼu̱u̱n mu murawíin xándú, mbáa xándú bi̱ ki̱ʼni̱i̱ ga̱jma̱a̱ itsí ga̱jma̱a̱ imba̱a̱ bi̱ ki̱ʼni̱i̱ ga̱jma̱a̱ ajua̱nʼ ma̱ngaa efod. Ndxajkun wíji̱ gajmíi̱n náa riejun bi̱ mbá 600 xa̱bekha bi̱ kúwá xawii mu magún gúxmijná.
18 Nitu̱ʼu̱u̱n náa goʼwóo Miqueas, ga̱jma̱a̱ nirawíin xándú, niriya̱a̱ʼ xándú bi̱ nigumaa ga̱jma̱a̱ itsí, ga̱jma̱a̱ bi̱ nigumaa ga̱jma̱a̱ ajua̱nʼ, ma̱ngaa efod. Ikhú ndxajkun nirajxu̱u̱n: “Ndiéjunʼ eni̱la rá.”
19 Ikhiin nitháán: “¡Wíí gáʼni! Atruguáá rawaanʼ. Ayi̱ ga̱jma̱á nindxu̱xu̱ mu mani̱ndxa̱a̱ʼ bi̱ maxnúxu̱ consejo* ga̱jma̱a̱ mani̱ndxa̱a̱ʼ ndxajkun ndrígúxu̱. Ndiéjunʼ dí itháan májánʼ tayáá, dí mani̱ndxa̱a̱ʼ ndxajkun náa goʼwóo mbáwíí xa̱bu̱ ráʼ. O dí mani̱ndxa̱a̱ʼ ndxajkun náa mbá xuajin chíʼgíiʼ ga̱jma̱a̱ náa mba’a gu’wá dí rígá náa Israel dxe̱ʼ.”
20 Rígi̱ ninigu̱u̱ʼ ndxajkun, ikha jngóo índo̱ niguámbóo niríya̱a̱ʼ xándú bi̱ nigumaa ga̱jma̱a̱ itsí, ga̱jma̱a̱ eʼwíinʼ xándú ma̱ngaa efod. Ni̱jkha̱ gajmíi̱n.
21 Ikhú nirajtuun kamba̱a̱ nigún, nitsuajuun magún ginii e̱ji̱n, ga̱jma̱a̱ xujkiún ma̱ngaa dí gíʼdoo numuu.
22 Índo̱ bi̱ danitas, kúwá má ragún tsínguáʼ náa goʼwóo Miqueas, ikhú Miqueas gajmíi̱n bi̱ kúwá náa mijngii goʼwóo nigimbúmíjná ga̱jma̱a̱ nigún ruxkúún. Niʼngu̱u̱n nixkamiin.
23 Índo̱ nindxa̱ʼwajmiin bi̱ danitas, ikhú ikhiin nitangañi̱ín ga̱jma̱a̱ nirajxi̱i̱ Miqueas: “Kaʼni gíʼdaaʼ, náá numuu nitagímbíin xa̱bu̱ bugi̱ rá.”
24 Ikhaa niʼthúún: “Ikháanʼla nirawí káyúʼ dioses bi̱ ikhúún nini̱i̱, ga̱jma̱a̱ nijkuala kuya̱a̱ ndxajkun ndrígóʼ. Ndiéjunʼ lá xóó eguanúʼ ga̱jma̱a̱ rá. Náá numuu xóó nurajxu̱ʼ dí gíʼdoʼ rá.”
25 Bi̱ danitas nitháán: “Xátaxu̱jxí lá aʼwáaʼ, ra̱ʼkháa gáʼni dí nguáthi̱i̱n xa̱bekha bi̱ nakásngañu̱únʼ matangi̱ín kuñaan, ga̱jma̱a̱ muxiñán ikháán ga̱jma̱a̱ bi̱ kúwíin náa guʼwáaʼ ma̱ta̱ya̱a̱”.
26 Ikhú danitas nirajtuun kamba̱a̱ nigún. Índo̱ Miqueas ndiʼyoo dí itháan mixkujiinʼ ikhiin ki xóo ikhaa, ikhú nitanga̱a̱ ga̱jma̱a̱ ni̱jkha̱a̱ goʼwóo.
27 Nda̱wa̱á dí nigún kudúún dí niʼni Miqueas, ga̱jma̱a̱ dí nigún kuya̱a̱ ndxajkun ndrígóo, nigún náa Lais, náa ndiyáá dí xa̱bu̱ kúwá tsímáá ga̱jma̱a̱ nda̱a̱ dí eʼni maxmiéjúúnʼ. Niradíin xa̱bu̱ buʼko̱ ga̱jma̱a̱ espada ma̱ngaa nitsikajxi̱i̱ xuajin.
28 Ndawa̱a̱ nimbáa tsáa maʼni kríya̱a̱ʼ xuajin rúʼko̱, numuu dí tsínguáʼ gíʼ Sidón (náa mata* dí rígá náa ku̱ba̱ʼ Bet-Rehob) ga̱jma̱a̱ xa̱bu̱ buʼko̱ na̱nguá embájxu̱u̱n gajmiún i̱ʼwáʼ xuajin. Nda̱wa̱á danitas nini̱i̱ xuajin rúʼko̱ ga̱jma̱a̱ ikhí má nikúwá.
29 Ma̱ngaa nixna mbiʼíí xuajin rúʼko̱ xóo mbiʼyuu anu̱ún, Dan, bi̱ nindxu̱u̱ a̱ʼdióo Israel, maski ajndu nákha ginii xuajin rúʼko̱ mbiʼyuu Lais.
30 Nda̱wa̱á dí nirígá rúʼko̱, bi̱ danitas nigún kuya̱a̱ ikhí xándú bi̱ nigumaa ga̱jma̱a̱ itsí. Jonatán, a̱ʼdióo Guersom, a̱ʼdióo Moisés ga̱jma̱a̱ bi̱ naguwáʼ náa ikhiin ninindxu̱ún ndxajkun náa xuajin chíʼgíiʼ ndrígóo Dan asndu mbiʼi dí xa̱bu̱ bi̱ kúwá náa xuajin ni̱jkha̱ kiʼdiin.
31 Ga̱jma̱a̱ nixuda̱a̱ʼ ikhí xándú bi̱ nigumaa ga̱jma̱a̱ itsí bi̱ Miqueas niʼnii. Xándú buʼko̱ nixtáa ikhí mbá xúgíʼ mbiʼi dí goʼwóo Dios bi̱ gajkhun nirígá náa Siló.
Mbaʼa nota
^ O “tribu”.
^ Náa ajngáa hebreo naʼthí, “mbá herencia”.
^ O “lajuíin”.
^ O “atani̱ mbá rí májánʼ”.
^ O “oeste”.
^ Rí nandoo gáʼthúu̱n ‹náa nigi̱ʼi̱i̱n bi̱ naguwáʼ náa Dan›.
^ Náa ajngáa hebreo naʼthí, “terafim”.
^ O “manindxa̱a̱ʼ anu̱xu”.
^ O “bóo”.
