Jueces 19:1-30
-
Benjaminitas nutsijmaa mbáa a̱ʼgu̱ náa Guibeá (1-30)
19 Nákha mbiʼi dí ndawa̱a̱ rey náa Israel, mbáa levita bi̱ xtáa náa xuajin mitsínguánʼ dí naguanúu náa kúbá Efraín ni̱jkha̱ gáyáaʼ mbáa bi̱ maʼni a̱ʼgiu̱u̱, mbáa a̱ʼgú ñawuun* bi̱ xtáa náa Belén dí kaʼyoo Judá.
2 Mú a̱ʼgú ñawuun niʼni nduwaaʼ. Niniñuuʼ ga̱jma̱a̱ ni̱jkha̱a̱ náa goʼwóo anu̱u̱,* náa Belén dí kaʼyoo Judá, ikhí nixtáa mbá a̱jkhu̱ igu̱nʼ.
3 Ikhú ajmbio̱o̱* ni̱jkha̱ gáyáaʼ mu maʼni káñuu mu ma̱ʼkha̱a̱ ga̱jma̱a̱ (ni̱jkha̱ ga̱jma̱a̱ bi̱ nambáyúu ma̱ngaa ni̱jkha̱ gajmíi̱n a̱jmi̱i̱n búrru). Ikhaa niniñuuʼ dí mato̱ʼo̱o̱ náa goʼwóo anu̱u̱, jmégiu̱u̱ ra̱ʼkhá tháán nidxuu índo̱ ndiʼyoo.
4 Ikha jngóo jmégiu̱u̱, anu̱u̱ dxáʼgú niʼni káñuu dí maguanúu ikhí mbá ajtsú mbiʼi. Nipiʼtsu ga̱jma̱a̱ niʼwa̱a̱n, levita niguanúu ikhí niʼgu mbruʼun rúʼko̱.
5 Índo̱ niʼni a̱jkhu̱ mbiʼi, miʼcha̱ niguájxu̱únʼ mu magúun, mú anu̱u̱ dxáʼgú niʼthúu̱n nigiúunʼ: “Atatsiʼtsu mu maraʼdáá tsiaki̱i̱ ga̱jma̱a̱ nda̱wa̱á gúʼguáaʼ”.
6 Ikhú nitri̱gi̱i̱n ga̱jma̱a̱ mbá nájmi̱i̱n nipiʼtsu ma̱ngaa niʼwa̱a̱n. Nda̱wa̱á anu̱u̱ dxáʼgú niʼthúu̱n nigiúunʼ: “Mbá péñu,* aguanáaʼ má gi̱i̱ minuʼ, guʼwáaʼ má rígi̱”.
7 Índo̱ xa̱bu̱ nitujxi̱i̱ mu maʼga̱a̱, jmégiu̱u̱ niʼni káñuu dí maguanúu, ga̱jma̱a̱ ikhaa niguanúu má ikhí niʼgu mbruʼun rúʼko̱.
8 Índo̱ niʼni witsu mbiʼi nákhíí miʼcha̱ nigijxi̱i̱ mu maʼga̱a̱, anu̱u̱ dxáʼgú niʼthúu̱n: “Mbá péñu, atatsiʼtsu mu maraʼdáá tsiaki̱i̱”. Ikhú mbá nájmi̱i̱n nipiʼtsu ga̱jma̱a̱ nini̱ gajyimíjná asndu wakhaʼ.
9 Índo̱ xa̱bu̱ nitu̱jxu̱u̱ mu maʼga̱a̱ ga̱jma̱a̱ a̱ʼgú ñawuun ma̱ngaa bi̱ nambáyúu, ikhú jmégiu̱u̱ niʼthúu̱n: “Na̱jkha̱ raʼni kína má. Mbá péñu, aguanáaʼ má gi̱i̱ minuʼ mbruʼun rígi̱. Na̱jkha̱ rakhíʼ má. Aguanáaʼ gi̱i̱ minuʼ, guʼwáaʼ má rígi̱. Gájtsíí miʼcha̱ gúguájxu̱u̱nʼ mu mu̱ʼgua̱a̱ʼ náa guʼwála”.
10 Mú xa̱bu̱ ní tándoo gáguanúu mi̱gu ikhí mbruʼun rúʼko̱. Ikha jngóo nitu̱jxu̱u̱ mu maʼga̱a̱ náa Jebús, xóo muʼthá Jerusalén. Nájmi̱i̱n búrriu̱u̱ trámáʼ xíliu̱ún ni̱jkha̱a̱ gajmíi̱n, ma̱ngaa a̱ʼgú ñawuun ga̱jma̱a̱ bi̱ nambáyúu.
11 Índo̱ kúwá má náa mijngii Jebús, na̱jkha̱ má raʼni kína Ikhú bi̱ nambáyúu niʼthúu̱n bi̱ nañejunʼ ga̱jma̱a̱: “Náá numuu dí tsétu̱ʼu̱lú náa xuajñún jebuseos ga̱jma̱a̱ maguanúlúʼ ikhí muʼnuʼ rá.”
12 Mú bi̱ nañejunʼ ga̱jma̱a̱ niʼthúu̱n: “Ragíʼmáánʼ matu̱ʼu̱lú náa xuajñún xa̱bu̱ bi̱ naguwaáʼ, bi̱ na̱nguá nindxu̱ún israelitas. Guʼgua̱ má xúʼko̱ asndu mu̱ʼgua̱nú náa Guibeá”.
13 Ikhú niʼthúu̱n bi̱ nambáyúu: “Guʼgualú, guʼnimíjna̱ mu̱ʼgua̱nú náa Guibeá o náa Ramá. Asndu náá má dí mbá nájma̱ xuajin rígi̱ ma̱ndoo maguanúlúʼ muʼnuʼ”.
14 Ikha jngóo nigún má xúʼko̱ ga̱jma̱a̱ a̱jkha̱ʼ na̱jkha̱ rarámáaʼ má índo̱ nagún maguánú náa Guibeá, náa mbañúúnʼ benjaminitas.
15 Niguájun náa Guibeá ga̱jma̱a̱ nitu̱ʼu̱u̱n ikhí mu maguanún munuʼ. Índo̱ kúwá má náa awúu̱n xuajin nigún gátrigi̱i̱n náa nagi̱ʼi̱ xua̱, mú nimbáa xa̱bu̱ tséʼkha̱ gáʼthúún dí magún náa goʼwóo mu maguanún munuʼ.
16 Iwáá kayuuʼ ni̱ʼkha̱nú mbáa xa̱bu̱ nikhi̱i̱, bi̱ na̱ʼkha̱a̱ náa ni̱jkha̱ gáñajunʼ xanáá. Ikhaa na̱ʼkha̱ náa kúbá Efraín, mú ni̱ʼkha̱ gáxtáa mbá nguáthá mbiʼi náa Guibeá. Xa̱bu̱ bi̱ kúwá náa xuajin rúʼko̱ nindxu̱ún benjaminitas.
17 Índo̱ xa̱bu̱ nikhi̱i̱ nikujxi̱i̱ edxu̱u̱ ga̱jma̱a̱ ndiʼyoo xa̱bu̱ buʼko̱ náa xuáá dí nagi̱ʼi̱ náa xuajin, nirajxu̱u̱: “Náá edxu̱ʼ. Náá xuajñaanʼ rá.”
18 Ikhaa niriʼñuu: “Naguwáaʼxu̱ náa Belén dí kaʼyoo Judá ga̱jma̱a̱ najkuáaʼxu̱ náa xuajin dí naguanúu mitsínguánʼ náa kúbá Efraín náa na̱ʼkhá ikhúún. Ni̱jkhá náa Belén dí kaʼyoo Judá dí xúgi̱ na̱jkháaʼ náa goʼwóo Jeobá,* mú gi̱i̱ nimbáa táʼthúnʼ dí maguanúʼ náa goʼwóo.
19 Kudáxu má rajxa̱ ga̱jma̱a̱ dí mu̱phu̱ búrriuxu̱, ma̱ngaa kudáxu pan ga̱jma̱a̱ vino dí miʼkhu ikhúún, dí mi̱khu̱ a̱ʼgú ñawunʼ ga̱jma̱a̱ bi̱ nambáyúʼ. Nda̱a̱ má dí eyúxu̱”.
20 Ikhú xa̱bu̱ nikhi̱i̱ niʼthúún: “¡Guʼgualú náa goʼwóʼ!* Ikhúún má gáxnáa xúgíʼ dí gáʼyaaʼ. Mú xáguanáaʼ minuʼ gi̱i̱ náa nagi̱ʼi̱ xua̱”.
21 Ikhú xa̱bu̱ nikhi̱i̱ ni̱jkha̱ kagui̱i̱n náa goʼwóo ga̱jma̱a̱ nixníʼtsúún búrriu̱ún. Ikhiin nijña̱a̱ rajkhúún ga̱jma̱a̱ nitri̱gi̱i̱n nipiʼtsu ma̱ngaa niʼwa̱a̱n.
22 Índo̱ ikhiin tri̱gi̱i̱n ruphiʼtsu, niguwáʼ tikhuun xa̱bu̱ bi̱ nuni̱ dí ra̱májánʼ bi̱ kúwá náa xuajin, niruguama̱ʼa̱a̱n guʼwá ga̱jma̱a̱ nigíʼdi̱i̱ nixnán xkrugua. Ikhú nitháán xa̱bu̱ nikhi̱i̱ bi̱ goʼwóo: “¡Atríya̱a̱ʼ xa̱bu̱ bi̱ nito̱ʼo̱o̱ náa guʼwáaʼ mu mu̱buxu̱ gajmiúxu̱!”.
23 Bi̱ goʼwóo nigájnuu gáʼñúún ga̱jma̱a̱ niʼthún: “Xúni̱ xúʼko̱ a̱ngui̱nʼ, mbá péñu, xúni̱la dí ra̱májánʼ kayuuʼ rúʼko̱. Xa̱bu̱ bugi̱ niwi̱ji̱ náa goʼwóʼ. Xúni̱ mbá dí ra̱ʼkhá tháán majthi̱ʼ.
24 Gi̱i̱ xtáa wáxióʼ* bi̱ xóó tsébóoʼ ga̱jma̱a̱ nimbáa xa̱bu̱ ma̱ngaa a̱ʼgú ñawuun ikhaa. Magúwíin mu mutsijmíin á mu xúʼko̱ májánʼ e̱ya̱a̱. Mú xúni̱i̱ mbá dí ra̱ʼkhá tháán ma̱jti̱ʼ xa̱bu̱ bugi̱”.
25 Xa̱bekha túdxawíín dí niʼthún. Ikha jngóo levita niríya̱a̱ʼ a̱ʼgú ñawuun ga̱jma̱a̱ nixnúún xa̱bu̱ buʼko̱. Ikhiin nitsijmaa ga̱jma̱a̱ nibúúnʼ gajmiún kañiiʼ mbruʼun, asndu índo̱ nijtsi. Índo̱ na̱ʼkha̱ rambiʼiti̱ga̱ ikhú niniña̱a̱nʼ maʼga̱a̱.
26 Miʼcha̱ a̱ʼgu̱ ni̱ʼkha̱núu̱ náa goʼwóo xa̱bu̱ nikhi̱i̱, náa niguanúu ajmbio̱o̱, nismbriga̱a̱ náa riejuun guʼwá ga̱jma̱a̱ ikhí má niguanúu asndu índo̱ nijtsi májánʼ.
27 Índo̱ ajmbio̱o̱ nigijxi̱i̱ miʼcha̱ ga̱jma̱a̱ nimbaʼtoo xkrugua mu magajnúu maʼgáaʼ, ikhú ndiʼyoo a̱ʼgú ñawuun kri̱ga̱a̱ náa riejuun xkrugua ga̱jma̱a̱ ñawúunʼ jngújma náa xkrugoo guʼwá.
28 Ikhaa niʼthúu̱n: “Arajxu̱u̱nʼ, guʼgua̱áʼ rá”. Mú a̱ʼgu̱ na̱nguá niriʼña̱a̱. Ikhú xa̱bu̱ nikujxi̱i̱ ga̱jma̱a̱ nitámáaʼ náa búrriu̱u̱ ikhú ni̱jkha̱a̱ náa goʼwóo.
29 Índo̱ ni̱jkha̱núu náa goʼwóo ndiyáʼ mbá chilo, ga̱jma̱a̱ ni̱jkha̱ gáyáaʼ a̱ʼgú ñawuun, ikhú nirujkuii mbá 12 xuíʼtóo. Nda̱wa̱á nikuʼma mámbá xuiʼtóo náa mámbá xuajin dí rígá náa Israel.
30 Xúgíinʼ bi̱ ndiyáá rígi̱ nithi: “Nimbá miʼtsú túʼyáálú xígi̱ kaʼnii asndu mbiʼi dí israelitas nigájnún náa Egipto. Gu̱ya̱a̱la májánʼ dí nirígá, gutamíjnála ga̱jma̱a̱ gu̱tuxu̱ ndiéjunʼ gúʼni̱”.
Mbaʼa nota
^ O “tátée”.
^ O “jmba̱yi̱i̱”.
^ O “atani̱ mbá rí májánʼ”.
^ O mbáa “na̱ni̱ ñajunʼ náa goʼwóo Jeobá”.
^ Náa ajngáa hebreo naʼthí, “garigá tsímáá náa ikháán”.
^ O “a̱ʼdéʼ dxáʼgú”.
