Jueces 2:1-23
2 Ikhú ángel ndrígióo Jeobá nitsimuu náa Guilgal, náa Bokim ga̱jma̱a̱ niʼthí: “Ikhúún nigúwáanʼla náa Egipto, ga̱jma̱a̱ ni̱ni̱ rí matsimala náa ku̱ba̱ʼ rí nikuʼdáminaʼ maxnu̱u̱n wajin xiʼñála, ga̱jma̱a̱ ni̱thu̱u̱n: ‹Manimbánuu xó má nimbánulú
2 ga̱jma̱a̱ ikháanʼla ragíʼmaa mambanála gajmiála xa̱bu̱ bi̱ kúwá náa ku̱ba̱ʼ rígi̱ dí makuwáanʼ gajmiála. Gíʼmaa dí munigámbáa náa nutsikarámáʼ tsigijñaʼ›. Mú ikháanʼ túdxawíín dí ni̱tha̱la. Ndíjkha dí xúʼko̱ ni̱nila rá.
3 Ikha jngóo ma̱ngaa ni̱tha̱la: ‹Xáxkawíin xa̱bu̱ buʼko̱ náa ikháanʼla. Ikhiin mani̱ndxu̱ún mbá tsáʼkhá náa ikháanʼla. Ga̱jma̱a̱ dioses ndrígu̱ún muni̱ rí mbuyamajkúnla›”.
4 Índo̱ ángel ndrígióo Jeobá niʼthúún ajngáa rígi̱ mbá xúgíinʼ israelitas, ikhú ikhiin nigíʼdi̱i̱ nimbi̱ya̱ʼ ngínún.
5 Ikha jngóo nixna mbiʼíí mbaaʼ rúʼko̱ Bokim* ga̱jma̱a̱ ikhí nixnajxi̱ tsigijñaʼ gamajkhu náa inuu Jeobá.
6 Índo̱ Josué niguámbóo niʼtángawún xa̱bu̱ xuajin, ikhú mámbáa israelita ni̱jkha̱a̱ gáxtáa náa mbaaʼ rí nikhánáá.
7 Xa̱bu̱ xuajin nini̱ ñajuunʼ Jeobá mbá xúgíʼ mbiʼi rí nixtáa Josué ga̱jma̱a̱ mbá xúgíʼ mbiʼi rí nikúwá xabuanii bi̱ nikúwá nda̱wa̱á rí nikháñuu Josué. Ga̱jma̱a̱ bi̱ ndiyáá xúgíʼ rí niʼni Jeobá ga̱jma̱a̱ numuu Israel.
8 Josué a̱ʼdióo Nun, xa̱bi̱i̱ Jeobá, nikháñuu índo̱ nigiʼdoo 110 tsiguuʼ.
9 Nidi̱i̱ náa ku̱ba̱ʼ rí ikhaa má nigruigúu náa Timnat-Heres, dí rígá náa kúbá Efraín, xígií náa norte náa kúbá Gaas.
10 Índo̱ xúgíinʼ xa̱bu̱ nikháñún, ga̱jma̱a̱ nikúwá eʼwíinʼ bi̱ tséniʼniiʼ Jeobá ni má túyáá xúgíʼ dí niʼni ga̱jma̱a̱ numuu Israel.
11 Israelitas nini̱ dí ra̱májánʼ náa iduu Jeobá ga̱jma̱a̱ ndiyamajkhún Baal.
12 Niniña̱a̱nʼ Jeobá Dios ndrígu̱ún anu̱ún, bi̱ niguwíin náa Egipto ga̱jma̱a̱ ndiyamajkhún eʼwíinʼ dioses bi̱ kúwá náa xuajin dí rígá mijngii náa kúwá, nismbati̱gu̱u̱n inún ga̱jma̱a̱ nini̱ rí makiʼnáa Jeobá.
13 Niniña̱a̱nʼ Jeobá ga̱jma̱a̱ ndiyamajkuíí Baal ga̱jma̱a̱ xtiʼkúún Astoret.
14 Ikha jngóo Jeobá nikásngañu̱u̱ʼ kaʼñún israelitas ga̱jma̱a̱ niniñúúnʼ* náa ñawúúnʼ kuʼwáʼ, bi̱ nigún kudúún xúgíʼ rí guáʼdáá. Niniñúúnʼ náa ñawúúnʼ xa̱bu̱ sia̱nʼ bi̱ kúwá náa mijngii kúwá ga̱jma̱a̱ nánguá nijmiin gúni̱ gajmiún.
15 Tséʼñuu má náá nigún, Jeobá nikiʼnáa kaʼñún, ga̱jma̱a̱ nikuʼma gamiéjunʼ náa ikhiin, xó má Jeobá niʼthí ga̱jma̱a̱ xó má Jeobá nikudaminaʼ. Ra̱ʼkhá tháán nimíniiʼ.
16 Jeobá nixniún bi̱ nunimbaníí xkujndu mu muni̱ káwíin náa ñawúúnʼ kuʼwáʼ.
17 Táʼndún gúdxawúún bi̱ nunimbaníí xkujndu. Ikhiin nduyamajkhún* má xúʼko̱ eʼwíinʼ dioses ga̱jma̱a̱ nusmbati̱gu̱u̱n náa inún. Mbá nacha̱ nitsíngúunʼ náa kamba̱a̱ rí wajin xiʼñúúnʼ nigún. Wajin xiʼñúúnʼ ninimbu̱u̱n kiʼtáñajunʼ ndrígóo Jeobá, mú ikhiin túnimbu̱u̱n.
18 Mámbá índo̱ Jeobá naxniún mbáa bi̱ naʼnimbánuu xkujndu, Jeobá nambáyúu ga̱jma̱a̱ naʼni káwíin náa ñawúúnʼ xa̱bu̱ sia̱nʼ xúgíʼ mbiʼi dí naxtáa bi̱ naʼnimbánuu xkujndu. Numuu dí Jeobá nagáwíinʼ a̱jkiu̱u̱n kaʼñún índo̱ naʼdxaun dí nuguwanʼ ga̱jma̱a̱ numún bi̱ nuni̱ mumíniiʼ ga̱jma̱a̱ nuni̱ ngíníi.
19 Mámbá dí nakháñuu mbáa bi̱ naʼnimbánuu xkujndu, ikhiin natangiín nuni̱ dí itháan ra̱májánʼ ki xóo anu̱ún, nduyamajkhún eʼwíinʼ dioses ga̱jma̱a̱ nusmbati̱gu̱u̱n náa ikhiin. Tséniña̱a̱ʼ runi̱ dí raʼkhí ga̱jma̱a̱ nuxujximíjna̱ má xúʼko̱.
20 Ikhú Jeobá ra̱ʼkhá tháán nikásngañu̱u̱ʼ kaʼyoo Israel ga̱jma̱a̱ niʼthí: “Xuajin rígi̱ tséʼnimbánuu dí nimbánúʼ gajmíʼ wajin xiʼñúúnʼ ga̱jma̱a̱ tséʼnimbo̱o̱ kaʼyoʼ.
21 Ikha jngóo ikhúún xáxkawíin xa̱bu̱ bi̱ kúwá náa xuajin mba̱ʼu̱ rí Josué niniñuuʼ índo̱ nikháñuu.
22 Xígi̱ kaʼnii gáyóo á mu xa̱bu̱ Israel nagún má xúʼko̱ náa kambo̱o̱ Jeobá ga̱jma̱a̱ najngrui̱gu̱u̱n ikhí xó má nini̱ anu̱ún”.
23 Ikha jngóo Jeobá niniñuuʼ dí xuajin rúʼko̱ maguanún, táxkawíin mbá nacha̱ ni má táxnajxi̱i̱n náa ñawúunʼ Josué.
Mbaʼa nota
^ Rí nandoo gáʼthúu̱n ‹bi̱ numbi̱ya̱ʼ›.
^ Náa ajngáa hebreo naʼthí, “nigujui̱i̱n”.
^ O “nuni̱ a̱ʼkhá gajmiún”.
