Jueces 20:1-48
-
Nuxmijná gajmiún benjaminitas (1-48)
20 Ga̱jma̱a̱ numuu dí nirígá rígi̱, nigájnún mbá xúgíinʼ xa̱bekha bi̱ kúwá náa Israel bi̱ nikúwá náa mbaaʼ Dan asndu náa Beer-Seba ga̱jma̱a̱ bi̱ kúwá náa ku̱ba̱ʼ Galaad. Mbá xúgíinʼ xa̱bu̱ xuajin nigimbúmíjná mbá kambájxu̱u̱n náa inuu Jeobá náa Mizpá.
2 Bi̱ kuya̱ edxu̱u̱ náa xuajin ga̱jma̱a̱ mbá xúgíinʼ bi̱ kúwá náa xuajin majkhaʼ* dí rígá náa Israel nikúwá ikhí náa nigimbúmíjná xa̱bu̱ xuajñuu Dios. Ninindxu̱ún mbá 400,000 soldado bi̱ kuda espada.
3 (Bi̱ benjaminitas nidxawíín rí xa̱bu̱ Israel nitsimún náa Mizpá).
Ikhú xa̱bu̱ Israel nirajxu̱u̱n bi̱ kúwá ikhí: “Guthu̱xu xú káʼnii nirígá dí ra̱ʼkhá tháán xkawiʼ rígi̱”.
4 Levita ajmbio̱o̱* a̱ʼgu̱ bi̱ nikháñuu, niriʼñúún: “Ni̱ʼkhánú náa Guibeá dí rígá náa mbañúúnʼ bi̱ naguwáʼ náa Benjamín gajmuʼ a̱ʼgú ñawunʼ* mu munuʼxu ikhí.
5 Ga̱jma̱a̱ xa̱bu̱* bi̱ kúwá náa Guibeá niguwáʼ ga̱jma̱a̱ niruguama̱ʼa̱a̱n guʼwá náa niguanúxu mbruʼun rúʼko̱. Nindúún muxiñún, mú ikhaa dí muxiñún ikhúún, ikhaa nibúúnʼ gajmiún a̱ʼgú ñawúnʼ. Ga̱jma̱a̱ ikhaa nikháñúu.
6 Ikha jngóo nirujkuri̱ga̱a̱ a̱ʼgú ñawunʼ ga̱jma̱a̱ nikuʼmá mambá náa mbá xúgíʼ ku̱ba̱ʼ rí nikhánaaʼ xuajin Israel, numuu dí náa Israel nirígá mbá dí xkawiʼ kayuuʼ ga̱jma̱a̱ mbá dí ra̱ʼkhá tháán majthi̱ʼ.
7 Ikha jngóo mbá xúgiáanʼlá ikháanʼ xa̱bu̱ Israel, xú káʼnii e̱ya̱a̱ ga̱jma̱a̱ ndiéjunʼ gúraʼwíí mu̱nila”.
8 Mbá kambájxu̱u̱n mbá xúgíinʼ nitujxu̱u̱n ga̱jma̱a̱ nithi: “Nimbáa dí ikháánʼlú xáʼga̱a̱ náa goʼwóo xúgi̱.
9 Rígi̱ dí muʼnilú: Muríya̱ʼ suerte* mu mbuʼyáá tsíín ñajúúnʼ bi̱ gátsimún mu muxmijná gajmiún xa̱bu̱ Guibeá,
10 náa mbá xúgíʼ xuajin majkhaʼ dí rígá náa Israel, muraʼwíinlú gu̱wi̱i̱nʼ xa̱bu̱ náa mbá 100 xa̱bekha, mbá 100 náa mbá 1,000 xa̱bekha ga̱jma̱a̱ mbá 1,000 náa mbá 10,000 xa̱bekha mu dí mbuyáʼ dí muda gágún soldado, mu xúʼko̱ soldado makuwá xawii magún guxmijná gajmiún xa̱bu̱ Guibeá bi̱ nindxu̱ún benjaminitas ga̱jma̱a̱ numuu mbá dí ra̱ʼkhá tháán majthi̱ʼ dí ikhiin nini̱ náa Israel”.
11 Ikha jngóo mbá xúgíinʼ xa̱bekha bi̱ kúwá náa Israel nigimbúmíjná mbóó mu magún guxmijná gajmiún xa̱bu̱ bi̱ kúwá náa xuajin rúʼko̱.
12 Mbá xúgíʼ xuajin majkhaʼ dí rígá náa Israel nixuʼma ajngáa mu muthún benjaminitas: “Náá numuu rí tikhuun bi̱ kúwá náa ikháanʼla nini̱ rí xkawiʼ kayuuʼ dí xígi̱ kaʼnii rá.
13 Ikha jngóo guxnajxíinʼla xa̱bekha bi̱ ra̱míjíinʼ buʼko̱ bi̱ kúwá náa Guibeá mu muradíinʼxu ga̱jma̱a̱ xúʼko̱ murígúu dí xkawiʼ náa Israel”. Mú benjaminitas na̱nguá nindúún gudxawún a̱ngiu̱ún israelitas.
14 Ikha jngóo bi̱ benjaminitas nigájnún náa xuajñún mu mugimbúmíjná náa Guibeá ga̱jma̱a̱ muxmijná gajmiún xa̱bu̱ Israel.
15 Mbiʼi rúʼko̱, bi̱ benjaminitas nigimbíin mbá 26,000 xa̱bekha bi̱ kuda espada, ma̱ngaa mbá 700 soldado bi̱ itháán kijmaratiin bi̱ kúwá náa Guibeá.
16 Náa soldado bugi̱ kúwá mbá 700 bi̱ itháán kijmaratiin, xúgíinʼ ikhiin najmún ñawun xti̱ʼ, mambáa dí ikhiin najmaa nadaʼ itsí ga̱jma̱a̱ xkrajtsí, á mu nagíminaʼ maxnúu mbá tásu̱u̱n naʼngo̱o̱.
17 Wájíʼ bi̱ benjaminitas, xa̱bu̱ Israel niʼngu̱u̱n nigimbíin mbá 400,000 xa̱bekha bi̱ kuda espada xúgíinʼ ikhiin nindxu̱ún soldado bi̱ najmiin nuxmijná.
18 Nigájnún ga̱jma̱a̱ nitsimún náa Betel mu magún gúrajxi̱i̱ Dios. Xa̱bu̱ xuajin Israel nirajxi̱: “Tsáá dí ikháanʼxu̱ gáwi̱ji̱ ginii maʼga náa muʼguá guxmijná gajmiúxu̱ benjaminitas rá.” Jeobá niriʼñúún: “Judá gáwi̱ji̱ ginii maʼga”.
19 Nda̱wa̱á dí nini̱ rúʼko̱ miʼcha̱ nitujxu̱u̱n israelitas ga̱jma̱a̱ nigún gúgi̱ʼi̱i̱n mu muxmijná gajmiún xa̱bu̱ Guibeá.
20 Xa̱bekha bi̱ kúwá náa Israel, nigájnún mu muxmijná gajmiún benjaminitas niguájun xawii náa ridoo Guibeá mu muxmijná.
21 Mbiʼi rúʼko̱, benjaminitas nigájnún náa Guibeá ga̱jma̱a̱ niradíin mbá 22,000 israelitas.
22 Mú soldado israelitas támiñún muxmijná ga̱jma̱a̱ nitangiín niguájun xawii náa má niguájun dí timbá mbiʼi mu muxmijná.
23 Israelitas nitsimún náa Betel ga̱jma̱a̱ nimbi̱ya̱ʼ náa inuu Jeobá asndu índo̱ niʼni kína ga̱jma̱a̱ nirajxi̱i̱ Jeobá: “Lá mbaʼyóoʼ mu̱ʼguáxu mbu̱júu̱ gúxmijná gajmiúxu a̱ngiu̱xu̱ benjaminitas ráʼ.” Jeobá niʼthún: “Gaʼgua, gúxmijná gajmiála”.
24 Dí maʼni ragajma mbiʼi, israelitas nixuʼmamijná náa xa̱bu̱ benjaminitas.
25 Benjaminitas nigájnún rí maʼni a̱jma̱ mbiʼi mu muraʼnumijná gajmiún asndu náa Guibeá ga̱jma̱a̱ niradíin i̱mba̱ 18,000 israelitas bi̱ kuda espada.
26 Xúgíinʼ xa̱bekha bi̱ kúwá náa Israel nitsimún náa Betel, ikhí nimbi̱ya̱ʼ ga̱jma̱a̱ nitri̱gi̱i̱n náa inuu Jeobá. Mbiʼi rúʼko̱ na̱nguá nipiʼtsu asndu índo̱ niʼni kína ga̱jma̱a̱ nixnajxi̱ náa inuu Jeobá tsigijñaʼ gamajkhu dí nakarámáʼ, ma̱ngaa tsigijñaʼ dí tsímáá.*
27 Nda̱wa̱á dí nini̱ rúʼko̱, israelitas nirajxi̱i̱ Jeobá, numuu dí arca* dí nimbánuu ndrígóo Dios bi̱ gajkhun rígá ikhí nákha ikhú.
28 (Finehás, a̱ʼdióo Eleazar, a̱ʼdióo Aarón, naʼni ñajunʼ náa inuu arca nákha ikhú). Ikhiin nirajxi̱: “Lá mbaʼyóoʼ muʼguáxu̱ mbu̱júu̱ gúxmijná gajmiúxu̱ a̱ngiu̱xu̱ benjaminitas, o muniʼñúnʼxu̱ má xúʼko̱ dxe̱ʼ.” Jeobá niriʼñúún: “Gaʼguala, gájtsíí maxnajxíin náa ñawánla”.
29 Ikha jngóo xa̱bu̱ Israel nirkaʼwumijná náa mbájndi xuajin Guibeá.
30 Dí maʼni ajtsú mbiʼi israelitas nitangiín nitsimún mu magún gúxmijná gajmiún benjaminitas. Niguájun xawii mu muxmijná gajmiún xa̱bu̱ Guibeá xó má nini̱ nákha ginii.
31 Índo̱ benjaminitas nigájnún mu muxmijná gajmiún soldado Israel, bi̱ israelitas nini̱ dí matsígu̱u̱nʼ náa xuajin. Xó má nini̱ nákha ginii, benjaminitas nigíʼdi̱i̱ nixmijná gajmiún ga̱jma̱a̱ niradíin tikhuun xa̱bu̱ Israel náa kamba̱a̱ mba̱a̱ (mbáa natsimuu náa Betel ga̱jma̱a̱ i̱mba̱a̱ náa Guibeá). Niradíin mbá 30 israelitas náa xanáá.
32 Benjaminitas nithi: “Naʼngulú nu̱ʼni̱ gajmiúlú xó má nákha ginii”. Mú israelitas nithi: “Guʼgua̱á ga̱jma̱a̱ xúʼko̱ mu̱ʼni̱ dí matsíngu̱u̱nʼ náa xuajin, ga̱jma̱a̱ mu̱ʼni̱ dí magún náa kamba̱a̱ mba̱a̱”.
33 Ikha jngóo xúgíinʼ xa̱bu̱ Israel nigájnún ga̱jma̱a̱ niguájun náa kaʼñún mu magún gúxmijná náa Baal-Tamar. Ga̱jma̱a̱ ikhú má israelitas bi̱ nirkaʼwumijná náa mijngii Guibeá nigájnún náa tri̱ʼi̱i̱n ga̱jma̱a̱ nixmijná gajmiún.
34 Ikha jngóo mbá 10,000 soldado bi̱ kijmaratiin itháan májánʼ bi̱ kúwá náa Israel niguánú náa ridoo Guibeá, ra̱ʼkhá tháán gakhi̱i̱ nixmijná. Mú benjaminitas na̱nguá ndiyáá á mu dí ra̱ʼkhá tháán mba̱a̱ gamiéjunʼ e̱ʼkha̱ maguáʼníí.
35 Jeobá niʼni gámbíin benjaminitas náa inún xa̱bu̱ Israel. Mbiʼi rúʼko̱ israelitas niradíin mbá 25,100 xa̱bekha benjaminitas, xúgíinʼ ikhiin kuda espada.
36 Índo̱ benjaminitas ndiyáá dí xa̱bu̱ Israel nagúun, nindxaʼwamíjna̱ dí maʼngu̱u̱n muni̱ gámbíin. Mú israelitas nagúun numuu dí nduyáá má dí kúwá bi̱ nirkaʼwumijná náa mijngii Guibeá.
37 Soldado bi̱ nirkaʼwumijná nigájnún mbá nacha̱ ga̱jma̱a̱ nitu̱ʼu̱u̱n náa xuajin Guibeá. Nigadríʼiin ma̱ngaa niradíin ga̱jma̱a̱ espada mbá xúgíinʼ xa̱bu̱ xuajin rúʼko̱.
38 Xa̱bu̱ Israel nimbánúún gajmiún soldado bi̱ nigún gúrkaʼwumijná dí muni̱ magajnúu gúní náa xuajin, rúʼko̱ mani̱ndxu̱u̱ xóo mbá tsinaʼ.
39 Índo̱ israelitas nigúun náa dí nuxmijná, ikhú benjaminitas nigi̱ʼdi̱i̱ nixmijná gajmiún ga̱jma̱a̱ niradíin mbá 30 israelitas. Nitamijná: “Naʼngulú nuradíin, xó má náa iwáá dí nixmijná gajmiúlú”.
40 Mú ikhú náa xuajin nigíʼdu̱u̱ nigájnuu gúní rí nindxu̱u̱ mbá tsinaʼ. Índo̱ benjaminitas nitangiín niyejxi kidííʼ, ikhú ndiyáá dí náa mbá xúgíʼ xuajin nakha̱a̱ asndu tsídánʼ ejkha̱ riʼyu̱u̱ aguʼ.
41 Ikhú xa̱bu̱ Israel nitangiín xígií ga̱jma̱a̱ benjaminitas ra̱ʼkhá tháán nimíñúún índo̱ ndiyáá dí ni̱ʼkha̱nú gamiéjunʼ rígi̱ náa ikhiin.
42 Ikhú benjaminitas nigáñún túʼúún náa ku̱ba̱ʼ mijxooʼ* nini̱ israelitas, mú tséʼngu̱u̱n gúni̱ kawúmíjná náa dí nuxmijná. Ma̱ngaa xa̱bu̱ bi̱ nagájnún náa i̱ʼwáʼ xuajin nagún ruradíin.
43 Niruguami̱ʼi̱i̱n benjaminitas ga̱jma̱a̱ nigún ruxkúún má xúʼko̱ dí asndu túyáa jxu̱ún. Niradíin náa ridoo Guibeá, xígií náa nagájnuu a̱jkha̱ʼ.*
44 Nikháñún mbá 18,000 benjaminitas. Xúgíinʼ nindxu̱ún soldado bi̱ najmañún nuxmijná.
45 Benjaminitas nitangiín xígií ga̱jma̱a̱ nigájni̱ín ragáñúún náa ku̱ba̱ʼ mijxooʼ, nigún náa tsíñu dí mbiʼyuu Rimón. Israelitas niradíin mbá 5,000 náa kamba̱a̱ mba̱a̱. Nigún ruxkúún má xúʼko̱ asndu náa Guidom, ga̱jma̱a̱ ikhí niradíin i̱mbá 2,000 xa̱bekha.
46 Mbá xúgíinʼ benjaminitas bi̱ nikháñún mbiʼi rúʼko̱ ninindxu̱ún mbá 25,000 bi̱ kuda espada. Xúgíinʼ ikhiin nindxu̱ún soldado bi̱ najmañún nuxmijná.
47 Mú mbá 600 xa̱bekha nigájni̱ín náa ku̱ba̱ʼ mijxooʼ, ga̱jma̱a̱ nigún náa tsíñu dí mbiʼyuu Rimón. Ikhí nikúwá mbá a̱jkhu̱ igu̱nʼ.
48 Xa̱bu̱ Israel nitangiín gúñún benjaminitas, niradíin ga̱jma̱a̱ espada mbá xúgíinʼ bi̱ kúwá náa xuajin, xa̱bekha ga̱jma̱a̱ xujkhúʼ, ma̱ngaa xúgíʼ dí niguanáa. Nigida̱a̱ʼ aguʼ mbá xúgíʼ xuajin dí rígá náa nigún ranújngún.
Mbaʼa nota
^ O “tribu”.
^ O “jmba̱yi̱i̱”.
^ O mbáa “xa̱bu̱ bi̱ mbañúúnʼ ikhí”.
^ O “e̱jna̱”.
^ O “desierto”.
^ O “este”.
