Jueces 21:1-25
-
Naguma kríya̱a̱ʼ xuajin chíʼgíiʼ ndrígóo Benjamín (1-25)
21 Xa̱bu̱ Israel nixna ajngún náa Mizpá: “Nimbáa dí ikháanʼxu̱ xáxnáa mbáa wáxióo* mu mbayáa xa̱bu̱ Benjamín”.
2 Ikha jngóo xa̱bu̱ xuajin nigún náa Betel ga̱jma̱a̱ nitri̱gi̱i̱n náa inuu Dios bi̱ gajkhun, nundxa̱ʼwa̱ ma̱ngaa nimbi̱ya̱ʼ ngínún asndu wakhíʼ.
3 Ga̱jma̱a̱ nithi: “Jeobá Dios ndrígóo Israel, náá numuu dí nirígá rígi̱ náa Israel rá. Náá numuu rí ndayóoʼ mbá xuajin chíʼgíiʼ* ndrígóo Israel rá.”
4 I̱mba̱ néjtsuu, miʼcha̱ nitujxu̱u̱n xa̱bu̱ xuajin ga̱jma̱a̱ nini̱ mbá náa mikarámáʼ tsigijñaʼ, náa mixnájxi̱ tsigijñaʼ dí nakarámáʼ, ma̱ngaa tsigijñaʼ dí tsímáá.*
5 Israelitas nithi: “Náa dí mbá xúgíʼ xuajin chíʼgíiʼ ndrígóo Israel, tsáá lá bi̱ na̱nguá nitsimuu náa inuu Jeobá rá.” Numuu rí nixna ajngún rí munimbaníí tsiaki̱i̱, á mu mbáa xátsimuu náa Mizpá náa inuu Jeobá gíʼmaa rí makhañúu.
6 Israelitas nigáwíinʼ a̱jkiu̱ún ga̱jma̱a̱ numuu rí nigíʼnuu giʼtiún Benjamín. Nithi: “Xúgi̱ niguma gámbáa mbá xuajin chíʼgíiʼ ndrígóo Israel.
7 Náá lá gákániúlú gu̱ʼu̱ mu muxniúún mudiin benjaminitas bi̱ xóó naguanún rá. Ikháanʼ nixná ajngúlú ga̱jma̱a̱ numuu Jeobá rí xúxniún wáʼxiulú mu mudiin”.
8 Ga̱jma̱a̱ niraximíjna̱: “Náa mbá xúgíʼ xuajin majkhaʼ dí rígá náa Israel, tsáá lá bi̱ na̱nguá nixnáximinaʼ náa inuu Jeobá náa Mizpá rá.” Ikhú ndiyáá rí náa gíi̱nʼ náa nigimbíin mbá xúgíinʼ, na̱nguá nixnáximinaʼ nimbáa bi̱ na̱ʼkha̱ náa Jabés-Galaad.
9 Numuu rí índo̱ niráxnii xa̱bu̱, ndiyáá rí na̱nguá ni̱ʼkha̱ nimbáa náa Jabés-Galaad.
10 Ikha jngóo xa̱bu̱ xuajin nixuʼmiin mbá 12,000 xa̱bekha bi̱ itháán mixkujiinʼ. Nitañajúúnʼ rígi̱: “Gaʼguala, ma̱ngaa guradíin ga̱jma̱a̱ espada xa̱bu̱ bi̱ kúwá náa Jabés-Galaad, asndu gu̱ʼu̱ mangiin e̱ji̱n.
11 Rígi̱ dí gíʼmaa mu̱nila: Gíʼmaa muradíin xúgíinʼ xa̱bekha ga̱jma̱a̱ xúgíinʼ gu̱ʼu̱ bi̱ nibúúnʼ má gajmiún xa̱bekha”.
12 Náa majñu̱únʼ xa̱bu̱ bi̱ kúwá náa Jabés-Galaad nixkamiin mbá 400 wa̱ʼxa̱ʼ* bi̱ xóó tsébúúnʼ gajmiún xa̱bekha. Ikha jngóo nigúun kudiin náa Siló náa dí gíi̱nʼ náa ku̱ba̱ʼ ndrígóo Canaán.
13 Nda̱wa̱á xa̱bu̱ xuajin nixuʼma ajngáa náa benjaminitas bi̱ kúwá náa tsíñu rí mbiʼyuu Rimón ga̱jma̱a̱ nithúún rí makuwá tsímáá gajmiún.
14 Ikha jngóo benjaminitas nitangiín ga̱jma̱a̱ israelitas nixniúún gu̱ʼu̱ mu mudiin bi̱ naguwáanʼ kudiin náa Jabés-Galaad bi̱ na̱nguá niradíin. Mú na̱nguá nixkamiin mbaʼin mu muxniúún mudiin xúgíinʼ.
15 Xa̱bu̱ xuajin nigáwíinʼ a̱jkiu̱ún ga̱jma̱a̱ numuu rí nigíʼnuu xuajin chíʼgíiʼ ndrígóo Benjamín, numuu rí Jeobá niʼni wájíʼ náa i̱ʼwáʼ xuajin majkhaʼ dí rígá náa Israel.
16 Xa̱bu̱ bi̱ kuya̱ edxu̱u̱ náa xuajin niraximíjna̱: “Náá lá gúʼñíi̱nʼ gu̱ʼu̱ mu mudiin xa̱bekha bi̱ xóó naguanún rá. Numuu rí gu̱ʼú benjaminitas niguma gámbíin mbá xúgíinʼ”.
17 Ikhú niriʼña̱a̱: “Benjaminitas bi̱ xóó naguanún gíʼmaa dí marigá má xúʼko̱ náa ikhiin dí nindrigúu mu xúʼko̱ xándáti̱ga̱a̱ mbá xuajin chíʼgíiʼ ndrígóo Israel.
18 Mú ikháánʼlú xándoo gúxniún wáʼxiulú mu mudiin, numuu rí xa̱bu̱ Israel nixna ajngún: ‹Gájuiʼthá tsríguíi bi̱ gáxniúu wáxióo mbayáa mbáa xa̱bu̱ Benjamín›”.
19 Ikhú nithi: “¡Gudxawíínʼla! Xúgíʼ tsiguʼ nagumariya̱a̱ʼ mbá ndxa̱a̱ náa Jeobá náa Siló, dí rígá náa Betel xígií náa norte, xígií náa nagájnuu a̱jkha̱ʼ* náa kamba̱a̱ mba̱a̱ dí natsimuu náa Betel, náa Siquem asndu náa Leboná xígií náa sur”.
20 Ikha jngóo nitañajúúnʼ muni̱ rígi̱ benjaminitas: “Gaʼguala ga̱jma̱a̱ gurkaʼwumijná náa ixu̱u̱ uva.
21 Índo̱ gúñu̱u̱n dí nagájnún nutsia mbájndi wa̱ʼxa̱ʼ náa Siló, ikhú gagajnálá náa ixu̱u̱ uva ga̱jma̱a̱ gaʼgua kuya̱a̱ mámbáa dxáʼgú mu maʼni a̱ʼgia̱la, nda̱wa̱á gatangaánʼ náa mbayala.
22 Á mu anu̱ún o a̱ngiu̱ún naguwáʼ gúxiéʼkhá, ikháanʼxu̱ muthu̱u̱n: ‹Nunixuʼ rígi̱ ga̱jma̱a̱ numún xa̱bu̱ Benjamín, gakruaʼla ku̱yuxu̱, numuu rí táʼngo̱o̱ gúxkamiin mbaʼin gu̱ʼu̱ mu muxniu̱u̱n mudiin mbá xúgíinʼ ikhiin ga̱jma̱a̱ numuu guerras dí nirígá. Ikháanʼla na̱nguá nixni̱i̱n waʼxiala numuu rí nandala, numuu rí á mu xúʼko̱ gúni̱ maguaʼdáá aʼkhála náa rí mbá xúgiáanʼ ni̱xna̱ ajngúxu̱ʼ muni̱›”.
23 Ikha jngóo benjaminitas nini̱ xó má nijuiʼthúún. Mámbíin dí ikhiin ni̱jkha̱ garíya̱a̱ʼ wáxá bi̱ xtáa raʼtsia mu maʼni a̱ʼgiu̱u̱. Nda̱wa̱á nitangiín náa ku̱ba̱ʼ dí nindrigúu, nini̱ májáanʼ xuajin ga̱jma̱a̱ ikhí má nikúwá.
24 Ikhú má israelitas nigadríʼiín, mámbáa ni̱jkha̱a̱ náa xuajin chíʼgíiʼ ga̱jma̱a̱ náa bi̱ kúwíi̱n náa goʼwóo. Mámbáa ni̱jkha̱a̱ náa ku̱ba̱ʼ dí nigruigúu.
25 Nákha mbiʼi rúʼko̱, ndawa̱a̱ rey náa Israel. Ikha jngóo mámbáa naʼni xó má májánʼ eʼyoo.
