Jueces 4:1-24
4 Nda̱wa̱á dí nikháñúu Ehúd, israelitas nitangiín nini̱ mbu̱júu̱ dí ra̱májánʼ náa iduu Jeobá.
2 Ikha jngóo Jeobá niniñúúnʼ* náa ñawúunʼ Jabín, rey bi̱ xtáa náa Canaán, bi̱ niʼtáñajunʼ náa Hazor. Sísara mbiʼyuu bi̱ niʼtáñajúúnʼ soldado ndrígóo, bi̱ nixtáa náa Haróset náa kúwá bi̱ na̱nguá nindxu̱ún judíos.*
3 Jabín nigiʼdoo mbá 900 carros dí naxmínaʼ ga̱jma̱a̱ dí juáʼwíi ajua̱nʼ xíníʼ,* niʼni ngíníi israelitas mbá 20 tsiguʼ. Ikha jngóo israelitas ninda̱ʼa̱a̱ Jeobá dí mambáñún.
4 Nákha mbiʼi rúʼko̱, Débora bi̱ nindxu̱u̱ profetisa,* a̱ʼgiu̱u̱ Lapidot, naʼnimbánuu numún xa̱bu̱ Israel.
5 Ikhaa naguʼwuun nagi̱ʼi̱ náa agoo ixi̱ palmeróo, dí rígá náa Ramá ga̱jma̱a̱ Betel, dí naguanúu xígií náa kúbá Efraín. Israelitas nagún náa ikhaa mu mambanúu numún.
6 Ikhaa niʼthúu̱n ma̱ʼkha̱ Barac a̱ʼdióo Abinoam, bi̱ xtáa náa Quedes náa mbaaʼ Neftalí, niʼthúu̱n: “Jeobá, Dios ndrígóo Israel, naʼtáñajuaanʼ matani̱ rígi̱: ‹Atatsimaaʼ gajmiáanʼ mbá 10,000 xa̱bekha bi̱ naguwáʼ náa xuajin chíʼgíiʼ* ndrígóo Neftalí ga̱jma̱a̱ Zabulón náa kúbá Tabor mu muxmijná.
7 Ikhúún ma̱ʼkhá ka̱ya̱a̱ Sísara náa mata Cisón, bi̱ naʼtáñajúúnʼ soldado ndrígóo Jabín, ga̱jma̱a̱ carros dí naxmínaʼ ga̱jma̱a̱, mangiin soldado ndrígóo maxnajxíinʼ náa ñawáanʼ›”.
8 Índo̱ Barac niʼdxuun rígi̱, ikhú niʼthúu̱n: “Á mu na̱dxu̱ʼ maʼgá, mú á mu tsédxúʼ xáʼgá má mangúún”.
9 Débora niriʼñuu: “Káa mu̱ʼgua̱ má. Mú dí mataxmína̱ʼ gajmiáanʼ soldado ndrígia̱a̱ʼ xátadrigú gamajkhu ikháán, numuu dí Jeobá maxnájxi̱i̱ Sísara náa ñawúunʼ mbáa a̱ʼgu̱”. Ikhú Débora nitu̱jxu̱u̱ ni̱jkha̱ ga̱jma̱a̱ Barac náa Quedes.
10 Barac nindxaʼwún bi̱ naguwáʼ náa xuajin chíʼgíiʼ* ndrígóo Zabulón ga̱jma̱a̱ Neftalí náa Quedes, mbá 10,000 xa̱bekha ni̱jkha̱ gajmíi̱n. Ni̱jkha̱ ma̱ngaa Débora.
11 Héber bi̱ nindxu̱u̱ quenita niʼni wájíminaʼ náa eʼwíinʼ quenitas, bi̱ naguwáʼ náa Hobab, náa jmégiu̱u̱ Moisés. Nigíʼ guʼwá xtíin ndrígóo náa agoo ixi̱ mba̱a̱ dí rígá náa Zaananim, dí naguanúu náa mijngii Quedes.
12 Nijuiʼtháán Sísara dí Barac a̱ʼdióo Abinoam nitsimuu náa kúbá Tabor.
13 Mbá nacha̱ Sísara nigímbóo carros dí naxmínaʼ ga̱jma̱a̱, mbá 900 carros dí juáʼwíi ajua̱nʼ xíníʼ,* ga̱jma̱a̱ soldado ndrígio̱o̱ ni̱ʼkha̱ gajmíi̱n asndu náa Haróset náa xuajin dí kúwá xa̱bu̱ bi̱ na̱nguá nindxu̱ún judíos mu magún náa mata Cisón.
14 Débora niʼthúu̱n Barac: “Guʼgua̱, mbiʼi rígi̱ Jeobá maxnájxi̱i̱ Sísara náa ñawáanʼ. Lá tséjkha̱ ginii Jeobá náa ikháán ráʼ.” Ikhú Barac nigajtaa gajmíi̱n 10,000 xa̱bekha náa kúbá Tabor.
15 Jeobá niʼni dí ga̱jma̱a̱ espada ndrígóo Barac mamiñúu Sísara, mangiin xúgíinʼ bi̱ nagún ga̱jma̱a̱ carros dí nuxmijná, ma̱ngaa xúgíinʼ soldado ndrígio̱o̱. Nda̱wa̱á, Sísara nigajtaa náa carro ga̱jma̱a̱ nigáyúu.
16 Barac ni̱jkha̱ raxkhúún soldado ga̱jma̱a̱ carros dí nuxmijná ga̱jma̱a̱ asndu náa Haróset, ga̱jma̱a̱ xúgíinʼ soldado ndrígóo Sísara nikháñún ga̱jma̱a̱ espada. Nimbáa tákríya̱a̱ʼ.
17 Mú Sísara nigáyúu ni̱jkha̱ náa guʼwá xtíin ndrígóo Jael, a̱ʼgiu̱u̱ Héber bi̱ nindxu̱u̱ quenita, numuu dí bi̱ kúwá náa goʼwóo Héber kúwá tsímáá gajmiún Jabín, rey ndrígóo Hazor.
18 Jael nigájnuu gátsijnuu Sísara ga̱jma̱a̱ niʼthúu̱n: “Ayi̱ gi̱i̱ tátá, ata̱ʼa̱a̱ʼ. Xámíñáaʼ”. Ikhú ikhaa nito̱ʼo̱o̱ náa guʼwá xtíin, ga̱jma̱a̱ Jael nixtrámaaʼ xtíin.
19 Ikhú Sísara nindo̱ʼo̱o̱: “Mbá péñu,* araxnúʼ tháan iyaaʼ ma̱ga̱nʼ, nakándawuʼ”. Ikhú Jael nirmbáʼtoo xtá kulámbra* náa ga̱jnu̱ʼ yáʼdú ga̱jma̱a̱ nixnúu maga̱a̱n. Nda̱wa̱á nixtrámaaʼ mbu̱júu̱ xtíin.
20 Ga̱jma̱a̱ ikhaa niʼthúu̱n: “Aguanáaʼ náa riejuun guʼwá xtíin, á mu mbáa na̱ʼkha̱ ga̱jma̱a̱ narajxa̱a̱ʼ. ‹Lá xtáa mbáa xa̱bu̱ gi̱i̱ ráʼ.› Na̱nguá gáratha̱a̱n”.
21 Mú Jael a̱ʼgiu̱u̱ Héber, niguajtuun stákóo guʼwá xtíin ga̱jma̱a̱ mbá martillo. Índo̱ Sísara nimbumuu niʼgu numuu dí néʼngo̱o̱, ikhú ikhaa tsumáá ni̱ʼkha̱ ga̱jma̱a̱ nixkuaʼán estaca náa níjniúu edxu̱u̱ asndu nindríya̱ʼ mbayííʼ, ga̱jma̱a̱ Sísara nikháñúu.
22 Índo̱ Barac ni̱jkha̱ gáyáaʼ Sísara náa guʼwá xtíin ndrígóo Jael, ikhaa nigájnuu gátsijnuu ga̱jma̱a̱ niʼthúu̱n: “Ayi̱. Masngajmiáanʼ xa̱bu̱ bi̱ jngrui̱ga̱a̱ʼ ratayáaʼ”. Ikhaa nito̱ʼo̱o̱ ga̱jma̱a̱ náa guʼwá xtíin, ndiʼyoo dí Sísara kri̱ga̱a̱ nikháñúu, fráʼa tungaa estaca náa edxu̱u̱.
23 Mbiʼi rúʼko̱ Dios niʼni dí israelitas maʼngu̱u̱n índo̱ nixmijná gajmiún Jabín, rey bi̱ xtáa náa Canaán.
24 Israelitas nixmijná má xúʼko̱ gajmiún Jabín, rey bi̱ xtáa náa Canaán, asndu índo̱ nixiyáa.
Mbaʼa nota
^ Náa ajngáa hebreo naʼthí, “nigujui̱i̱n”.
^ O “Haróset-Ha-Goyim”.
^ Náa ajngáa hebreo naʼthí, “carros dí hierros”.
^ O “gaʼyee, bi̱ naʼthí dí marigá”.
^ O “tribu”.
^ O “lajuíin”.
^ Náa ajngáa hebreo naʼthí, “carros dí hierros”.
^ O “ataniu̱ʼ mbá rí májánʼ”.
^ O “odre”.
