Jueces 5:1-31
5 Mbiʼi rúʼko̱ Débora niʼni ajmúú ga̱jma̱a̱ Barac a̱ʼdióo Abinoam:
2 “¡Gu̱ni̱ mba̱a̱ Jeobá!Ga̱jma̱a̱ numuu dí xa̱bu̱ xuajin nixnajxi̱mi̱jna̱ magún gúxmijná.Ga̱jma̱a̱ numuu tásiu̱ún xa̱bu̱ Israel dí xprígú wájííʼ.*
3 ¡Gudxawíín reyes! ¡Guʼgíʼ edxa̱la xa̱bu̱ ñajunʼ!
Ikhúún ma̱ni̱ mbá ajmúú náa Jeobá.
Ma̱du̱u̱ mbá ajmúú náa Jeobá, Dios ndrígóo Israel.
4 Jeobá, índo̱ nigájnaaʼ náa Seír,índo̱ nigájnaaʼ gátaxmínaʼ náa mbaaʼ Edom,ku̱ba̱ʼ ni̱ʼba̱a̱n ga̱jma̱a̱ náa mekhu nijngutígú iyaʼ,du̱u̱n nijuiya̱a̱ʼ ga̱jma̱a̱ niʼni̱i̱ ruʼwa.
5 Nijuiya̱a̱ʼ* kúbá náa inuu Jeobá,asndu kúbá Sinaí nijuiya̱a̱ʼ náa inuu Jeobá, Dios ndrígóo Israel.
6 Mbiʼi dí nixtáa Samgar a̱ʼdióo Anat,mbiʼi dí nixtáa Jael kamba̱a̱ rúʼko̱ niguanáa,xa̱bu̱ bi̱ nagún, nagún náa kamba̱a̱ majkhaʼ.
7 Xa̱bu̱ Israel bi̱ nuñajunʼ xanáá ndáwi̱i̱n,*ndáwi̱i̱n, asndu índo̱ niʼkhá ikhúún, Débora,asndu índo̱ niʼkhá ikhúún xóo ru̱dúu̱* xuajin Israel.
8 Ikhiin niraʼwi̱i̱n eʼwíinʼ nuxi̱i̱nʼ dioses.Ikhú nigiʼdu̱u̱n náa xkrugoo xuajin.
Na̱nguá ekujmaa á mu rígá escudo ni má kudú*náa mbá 40,000 xa̱bu̱ Israel.
9 A̱jkiu̱nʼ xtáa gajmíi̱n bi̱ nutañajúúnʼ soldado náa Israelbi̱ nixnajximijna̱ magún gúxmijná gajmiún xa̱bu̱ xuajin.
¡Gu̱ni̱ mba̱a̱ Jeobá!
10 Ikháanʼla bi̱ nudruwíin búrru café,ikháanʼla bi̱ nutrigáanʼla náa xtíin wabaʼga̱jma̱a̱ ikháanʼla bi̱ najkua náa kamba̱a̱,¡gundxaʼwa̱a̱ tháan e̱dxa̱la!
11 Náa mijngii naʼwa̱a̱n iyaʼ xujkhúʼ niwán ethi bi̱ nurangoo iyaʼ.Ikhí nikúwá rutamijná dí xóo májánʼ naʼni Jeobá,dí májánʼ dí nuni̱ xa̱bu̱ Israel bi̱ nuñajunʼ xanáá.
Ikhú xuajñuu Jeobá nigajtaa náa xkrugoo xuajin.
12 ¡Arajxu̱u̱nʼ Débora, arajxu̱u̱nʼ!
¡Arajxu̱u̱nʼ, arajxu̱u̱nʼ, atani̱ mbá ajmúú!
¡Atujxa̱a̱ʼ Barac a̱ʼdióo Abinoam! ¡Ayuʼ xtiin bi̱ xtaʼdiin preso!
13 Bi̱ niguanún niguájtaan náa kúwá bi̱ kuya̱ edxu̱u̱,xuajñuu Jeobá ni̱ʼkha̱ náa ikhúún mu maxmínaʼ gajmíi̱n bi̱ guáʼdáá tsiaki̱i̱.
14 Bi̱ naguwáʼ náa Efraín, bi̱ kúwá náa mata,*nagún ga̱jma̱á nindxa̱a̱ʼ Benjamín, nagún gajmiún xa̱bia̱a̱ʼ.
Náa Makir niguájtaan bi̱ nutañajúúnʼ soldadoga̱jma̱a̱ náa Zabulón bi̱ kuya̱ bastón mu mugimbíin soldado.*
15 Príncipe bi̱ naguwáʼ náa Isacar nikúwá gajmiún Débora.Xó má nixtáa Isacar xúʼko̱ má nixtáa Barac.
Bi̱ kaxúʼmaa maʼga rajkhúu náa mata.
Bi̱ naguwáʼ náa Rubén nindxaʼwamíjna̱ wéñuuʼ dí muni̱.*
16 Náá numuu dí niguanáaʼ xóo xujkhúʼ bi̱ kri̱ga̱a̱ kagu̱u̱ eʼdooraʼdxawún baxtúu xóo nundií flauta mu mudxuun mugu̱ rá.
Bi̱ naguwáʼ náa Rubén nindxaʼwamíjna̱ wéñuuʼ dí muni̱.
17 Galaad niguanúu náa i̱mba̱ ridoo mañu Jordán.Náá numuu dí Dan niguanúu náa mijngii barco rá.
Aser nda̱a̱ dí niʼni, nigi̱ʼi̱ náa rawuunʼ lamáa,*nditháan tátujxu̱u̱ náa naguájun barco.
18 Zabulón nindxu̱u̱ mbá xuajin dí nixtáa xawii makhañúu,xúʼko̱ má Neftalí ma̱ngaa, náa kúbá tsídánʼ.
19 Niguwáʼ reyes ga̱jma̱a̱ nixmijná,nixmijná reyes bi̱ kúwá náa Canaán,náa Taanac, náa mijngii mata Meguidó.
Nditháan túda gágúu̱n plata dí niguanáa.
20 Asndu náa mekhuíí nixmijná a̱ʼgua̱a̱n,asndu náa tri̱gi̱i̱n* nixmijná gajmiún Sísara.
21 Niguxtríyaʼ yambo̱o̱ náa mata Cisón dí ni̱jkha̱ kagui̱i̱n,mata wayúu, mata Cisón.
Ikhúún* ni̱jkhá rajnguprígi̱i̱n bi̱ guáʼdáá tsiaki̱i̱.
22 Índo̱ wáyú bi̱ nagún náa nuxmijná,nagáñún ga̱jma̱a̱ xúgíʼ tsiaki̱i̱ ndrígu̱ún, asndu nawáán ajua̱nʼ dí tra̱ʼa̱ náa tsújún.
23 ‹Xígi̱ niʼthí ángel ndrígióo Jeobá, gutatsríguíila Meroz,gutatsríguíin xa̱bu̱ bi̱ kúwá náa xuajin rúʼko̱,numuu dí táguwáʼ gúmbayíí Jeobá,túmbayíí Jeobá ga̱jma̱a̱ túmbañún soldado bi̱ guáʼdáá tsiaki̱i̱›.
24 Gaguma mba̱a̱ Jael náa mbá xúgíinʼ gu̱ʼu̱,a̱ʼgiu̱u̱ Héber bi̱ nindxu̱u̱ quenita.Gaguma mba̱a̱ náa xúgíinʼ gu̱ʼu̱ bi̱ kúwá náa guʼwá xtíin.
25 Sísara nindo̱ʼo̱o̱ iyaʼ, yáʼdú nixnúu maga̱a̱n.
Mbá xua̱a̱ mba̱a̱ yáʼdú wabooʼ nixnúu maga̱a̱n.
26 Ga̱jma̱a̱ ñawún xti̱yu̱u̱ʼ niguajthun stákóo guʼwá xtíin.Ga̱jma̱a̱ ñawún mújúunʼ niguajthun martillo dí kiwu̱n.
Rúʼko̱ nixnúu ga̱jma̱a̱ Sísara, nikuíʼtá edxu̱u̱,nikúmigu xuwiʼ wabaʼ náa níjniúu iduu, nixkuáʼán jngaa náa edxu̱u̱.
27 Náa rajkhúu nixpátri̱ga̱a̱, nismbri̱ga̱a̱ ga̱jma̱a̱ ikhí má kri̱ga̱a̱.Náa rajkhúu nismbri̱ga̱a̱ ga̱jma̱a̱ ikhí má kri̱ga̱a̱.Náa má nismbri̱ga̱a̱, ikhí má kri̱ga̱a̱ nikháñúu.
28 Náa ventana najnguti̱ya̱ʼ mbáa a̱ʼgu̱.Ru̱dúu̱ Sísara najnguti̱ya̱ʼ ga̱jma̱a̱ náa iñúuʼ:‹Ndíjkha dí xóó tséʼkha̱a̱ cárriu̱u̱,
náá numuu dí xóó tséwáán eguwáa̱nʼ wáyíi̱ xá.›
29 Gu̱ʼu̱ bi̱ itháán najmañún bi̱ kúwá náa goʼwóo nitháán,ga̱jma̱a̱ xúʼko̱ má eʼni ma̱ngaa, nángi eʼni eʼtáminaʼ xígi̱:
30 ‹Kúwíin ruxuiʼtami̱jna̱a̱ dí niguanáa xúgi̱:Mbáa dxáʼgú, a̱jmi̱i̱n wa̱ʼxa̱ʼ,* exniáá mámbáa soldado.Xtíin mitsaanʼ* dí niguanáa nuxnáá Sísara, xtíin dí mitsaanʼ díniguanáa, mbá xtíin dí kiʼxmí. Xúʼko̱, xtíin dí mitsaanʼ,a̱jma̱ xtíin dí kiʼxmí dí majkuáa náa aphúún bi̱ nigún›.
31 ¡Tátá Jeobá! Xúʼko̱ gákháñún xúgíinʼ xa̱bu̱ sia̱nʼ ndrígáaʼ,mú bi̱ nandún kuyaaʼ ganindxu̱ún xóo a̱jkha̱ʼ bi̱ naxpíbíinʼ índo̱ nakráʼáan”.
Ga̱jma̱a̱ ikhú nikúwá tsímáá* israelitas mbá 40 tsiguʼ.
Mbaʼa nota
^ O “ga̱jma̱a̱ numún bi̱ nigún gúxmijná bi̱ xprígú wájííʼ edxu̱ún”.
^ O mbáa “ni̱ʼba̱a̱n”.
^ O “nindátigi̱i̱n”.
^ O “nánée”.
^ O “lanza”.
^ O “bóo”.
^ O “bi̱ najmún dí najmuu mbáa bi̱ naʼnirámáʼ”.
^ Náa ajngáa hebreo naʼthí, “ndiyáá dí gíwánʼ náa a̱jkiu̱ún”.
^ O “mar”.
^ O “náa kambu̱ún”.
^ O “i̱jín go̱ʼo̱”.
^ O “nagui̱i̱”.
^ O “ku̱ba̱ʼ ndiyáa jxu̱u̱ʼ”.
