Jueces 7:1-25
7 Ikhú Jerubaal, xóo muʼthá Gedeón, gajmíi̱n mbá xúgíinʼ xa̱bi̱i̱, miʼcha̱ nitujxu̱u̱n dí mbiʼi rúʼko̱ ga̱jma̱a̱ nigún gúgi̱ʼi̱i̱n náa gíʼ iduu iyaʼ Harod. Xa̱bu̱ Madián nigriguíin náa agoo bíjní Moré náa xkua̱ dí naguanúu xígií náa norte.
2 Jeobá niʼthúu̱n Gedeón: “Mbaʼin wéñuuʼ xa̱bu̱ edxu̱ʼ gajmiáanʼ. Ikha jngóo xándoo maxnajxíin madianitas náa ñawánla. Á mu dí na̱ni̱, israelitas ma̱ndoo muni̱ mbaʼumíjna̱, muthi: ‹Niʼngo̱ʼ nidaaʼ ga̱jma̱a̱ tsiaki̱i̱ dí gúʼdoo›.
3 Ikha jngóo mbá péñu* arathún rígi̱ xa̱bu̱: ‹Bi̱ namíñuu dí asndu naguáʼaan ma̱ndoo maʼga̱a̱ goʼwóo›”. Xúʼko̱ kaʼnii niʼni Gedeón mu mbaʼyoo xóo gúni̱. Nigúun mbá 22,000 xa̱bu̱, káaʼ 10,000 niguanún.
4 Jeobá niʼthúu̱n Gedeón: “Kaʼníí xóó kúwá mbaʼin xa̱bu̱. Arathún dí maguajtáan gúwáan iyaʼ, ga̱jma̱a̱ ikhí maraʼwi̱i̱n bi̱ mi̱dxu̱ʼ gajmiáanʼ. Á mu ikhúún natha̱a̱nʼ ‹Bigi̱ maʼga ga̱jma̱á nindxa̱a̱ʼ›, ikhaa bi̱ maʼga. Mú á mu natha̱a̱nʼ ‹Bigi̱ xáʼga ga̱jma̱á nindxa̱a̱ʼ›, ikhaa xáʼga”.
5 Ikha jngóo Gedeón nigajtaa gajmíi̱n xa̱bu̱ náa iyaʼ.
Nda̱wa̱á Jeobá niʼthúu̱n Gedeón: “Bi̱ gúri̱ya̱ʼ iyaʼ muwa̱a̱n* ga̱jma̱a̱ ñawúúnʼ, atani̱ wájíinʼ náa bi̱ gúsmbati̱gu̱u̱n muwa̱a̱n”.
6 Náa mbá xúgíinʼ xa̱bu̱ mbá 300 bi̱ niri̱ya̱ʼ iyaʼ niʼwa̱a̱n ga̱jma̱a̱ ñawúúnʼ. Mú eʼwíinʼ nismbati̱gu̱u̱n mu muwa̱a̱n.
7 Jeobá niʼthúu̱n Gedeón: “Ma̱ni̱ káwáanʼla náa ñawúúnʼ xa̱bu̱ Madián, majmiuʼ káaʼ 300 xa̱bekha bi̱ niʼwa̱a̱n iyaʼ ga̱jma̱a̱ ñawúúnʼ. Mú eʼwíinʼ xa̱bekha gatangi̱ín náa guʼwún”.
8 Ikha jngóo índo̱ israelitas nixnúún dí muda gágún ga̱jma̱a̱ chi̱ji̱ʼ bi̱ mbá 300 xa̱bekha, ikhú Gedeón nikuʼmiin magúun náa guʼwún bi̱ eʼwíinʼ. Káaʼ 300 niguanúu gajmíi̱n. Xa̱bu̱ Madián gíwi̱i̱nʼ náa xkua̱.
9 Mbruʼun rúʼko̱ Jeobá niʼthúu̱n Gedeón: “Ayuʼ gátaxmíjná gajmiáanʼ xa̱bu̱ Madián náa gíi̱nʼ, numuu dí ikhúún maxnajxíin náa ñawáanʼ.
10 Mú, á mu namíñáaʼ gátaxmíjná gajmiáanʼ, arajtaa ga̱jma̱a̱ʼ Purá bi̱ nambáyaaʼ.
11 Índo̱ gátadxawíín dí kúwá ruthi, mbi̱ya̱a̱ tsiaki̱i̱* mu mi̱dxu̱ʼ gátaxmíjná gajmiáanʼ náa gíwi̱i̱nʼ”. Ikhú ikhaa ga̱jma̱a̱ Purá bi̱ nambáyúu, nigún kanuu asndu náa rawuunʼ dí gíi̱nʼ.
12 Xa̱bu̱ madianitas, amalequitas ga̱jma̱a̱ bi̱ naguwáʼ xígií náa nagájnuu a̱jkha̱ʼ* nigi̱wi̱i̱n náa mbájndi xkua̱ xóo tsíʼbu.* Ga̱jma̱a̱ camellos ndrígu̱ún ra̱ʼkhá tháán mbaʼin dí asndu tséʼngo̱o̱ matraxnii, dí asndu nindxu̱ún xóo jui̱ʼi̱ dí rígá náa rawuunʼ lamáa.*
13 Índo̱ Gedeón ni̱jkha̱nú, niʼdxawuun dí mbáa xa̱bu̱ xtáa raʼthúu̱n i̱mba̱a̱ dí nigundaa. Naʼthúu̱n: “Natayáá dí nigúndaa ráʼ. Mbá pan cebada dijndi ni̱ʼkha̱ rámbíjxi̱ náa giáa̱nʼlú ga̱jma̱a̱ nixnúu náa mbá guʼwá xtíin. Ra̱ʼkhá tháán gakhi̱i̱ nixnúu dí asndu ningajxi̱i̱. Nimbíjxi̱ ga̱jma̱a̱ nijngudiriga̱a̱ guʼwá”.
14 Ga̱jma̱a̱ bi̱ naʼdxawuun niʼthúu̱n: “Nindxu̱u̱ espada ndrígóo Gedeón rúʼko̱, a̱ʼdióo Joás mbáa israelita. Dios maxnájxi̱ Madián ga̱jma̱a̱ mbá xúgíinʼ soldado ndrígóo bi̱ gíi̱nʼ gi̱i̱ náa ñawúunʼ”.
15 Índo̱ Gedeón niʼdxawuun xnuʼndaa rígi̱ ga̱jma̱a̱ dí nandoo gáʼthúu̱n, ikhú nismbáti̱go̱o̱ mu mbaʼyamajkuu Dios. Nda̱wa̱á ni̱jkha̱a̱ náa gíi̱nʼ israelitas ga̱jma̱a̱ niʼthún: “¡Guʼgua! Jeobá nixnájxi̱i̱n xa̱bu̱ Madián ga̱jma̱a̱ soldado ndrígio̱o̱ náa ñawúnlú”.
16 Ikhú nirui̱ʼti̱i̱n bi̱ mbá 300 xa̱bekha náa mbá ajtsú grupo, mbá xúgíinʼ nixnúún chi̱ji̱ʼ ga̱jma̱a̱ rayaʼ náa nixuda̱ʼ ixi̱ dí grígu aguʼ.
17 Nda̱wa̱á niʼthún: “Gu̱yo̱ʼ, ga̱jma̱a̱ gu̱ni̱ ikháá kayuuʼ xó má eni̱ ikhúún. Índo̱ gáʼgánú náa rawuunʼ dí gíi̱nʼ, gu̱ni̱la̱ xó má ikhúún gáni̱.
18 Índo̱ ikhúún ga̱jma̱a̱ xúgíinʼ bi̱ na̱jkhá gajmíʼ gúndiyííʼxu̱ chi̱ji̱ʼ, xúʼko̱ má gúndiyíí mangáanʼla chi̱ji̱ʼ náa mbájndi rawuunʼ dí gíi̱nʼ, ga̱jma̱a̱ gundxaʼwa̱: ‹¡Espadóo Jeobá ga̱jma̱a̱ Gedeón!›”.
19 Gedeón gajmíi̱n mbá 100 xa̱bekha bi̱ ni̱jkha̱ gajmíi̱n niguánú náa rawuunʼ dí gíi̱nʼ índo̱ inu maʼni tikhu nduʼun,* ikhú índo̱ niguámbá nixtiʼku̱ún bi̱ nuyejngoo. Nindiyííʼ chi̱ji̱ʼ ga̱jma̱a̱ nixui̱ʼta̱ rayaʼ dí kuda nigún.
20 Ikha jngóo, mbá najtsú grupo nindiyííʼ chi̱ji̱ʼ ga̱jma̱a̱ nixui̱ʼta̱ rayaʼ. Ñawún xtiñu̱ún ndiya̱ ga̱jma̱a̱ ixi̱ dí náa grígu aguʼ, ga̱jma̱a̱ ñawún mújúunʼ ndiya̱ chi̱ji̱ʼ dí nindiyííʼ, ikhú nindxa̱ʼwa̱: ¡Espadóo Jeobá ga̱jma̱a̱ Gedeón!”.
21 Xa̱bekha niguájun wíí náa má kaʼñún náa mbájndi dí gíi̱nʼ, ga̱jma̱a̱ soldado bi̱ sia̱nʼ nigájnún ragáñúún rundxa̱ʼwa̱.
22 Bi̱ mbá 300 xa̱bekha nindiyííʼ má xúʼko̱ chi̱ji̱ʼ, ga̱jma̱a̱ Jeobá niʼni dí mbá xúgíinʼ soldado bi̱ sia̱nʼ muxmijná kaníkiin ga̱jma̱a̱ espadu̱ún. Ga̱jma̱a̱ eʼwíinʼ soldado bi̱ sia̱nʼ nigáñún asndu náa Bet-Sitá, náa Zererá, asndu náa rawi̱i̱nʼ Abel-Meholá, náa mijngii Tabat.
23 Ikhú nigimbúmíjná israelitas: Bi̱ naguwáʼ náa Neftalí, náa Aser ga̱jma̱a̱ mbá xúgíinʼ bi̱ naguwáʼ náa Manasés. Ikhiin nigún ruxkúún xa̱bu̱ Madián.
24 Gedeón nikuʼmiin xa̱bu̱ magún kuñu̱u̱n ajngáa rígi̱ náa kúbá Efraín: “Guguajtala muxmijná gajmiánʼla xa̱bu̱ Madián, guruguáála náa dí nanújngúún ga̱jma̱a̱ náa mañu Jordán, ma̱ngaa náa mata dí rígá asndu náa Bet-Bará”. Ikha jngóo mbá xúgíinʼ xa̱bekha bi̱ naguwáʼ náa Efraín nigimbúmíjná, niruguáá náa dí nanújngúún ga̱jma̱a̱ mañu Jordán, ma̱ngaa náa mata dí rígá asndu náa Bet-Bará.
25 Nirugui̱i̱n a̱jmi̱i̱n príncipes bi̱ kúwá náa Madián: Oreb ga̱jma̱a̱ Zeeb. Nixiyáa Oreb náa mbá tsíñu dí nda̱wa̱á nixna mbiʼíí tsíñu Oreb, ga̱jma̱a̱ Zeeb nixiyáa náa nuxujmbi̱i̱ uva dí nda̱wa̱á nixna mbiʼíí Zeeb. Nigún ruxkúún má xúʼko̱ xa̱bu̱ Madián, ga̱jma̱a̱ nigúun kuñu̱u̱n edxu̱u̱ Oreb ga̱jma̱a̱ Zeeb náa Gedeón, náa ku̱ba̱ʼ Jordán.
Mbaʼa nota
^ O “ataniu̱ʼ mbá rí májánʼ”.
^ O “bi̱ naʼwa̱a̱n iyaʼ xóo eni̱ xuwánʼ”.
^ Náa ajngáa hebreo naʼthí, “ñawáanʼ maʼni gújkhúʼ”.
^ O “este”.
^ O “mar”.
^ Náa ajngáa hebreo naʼthí, “segunda vigilia”, rígi̱ naʼni xóo mbá las 10 dí mbruʼun asndu las 2 dí miʼcha̱.
