Rí niʼnirámáʼ Lucas 13:1-35
-
Rí mata̱nga̱a̱ a̱jkia̱a̱nʼ o makhañáaʼ (1-5)
-
Xkri̱doo ixi̱ higo rí tséjma̱a̱ xndúu (6-9)
-
A̱ʼgu̱ bi̱ na̱ʼkha̱ ndi̱jtsu̱u̱, naguma thanáá mbiʼi sábado (10-17)
-
Xkri̱doo tsígooʼ mostaza ga̱jma̱a̱ levadura (18-21)
-
Gu̱ni̱ tsiakimíjna̱la mu mata̱ʼa̱la náa xkrugua rí chíma̱ja̱nʼ (22-30)
-
Herodes, “igi̱ buʼko̱” (31-33)
-
Jesús nagáwíinʼ a̱jkiu̱u̱n kaʼyoo Jerusalén (34, 35)
13 Mbiʼi rúʼko̱, tikhuun bi̱ kúwá ikhí nitháán Jesús xú káʼnii Pilato nikuʼma rí makhañún tikhuun galileos náa mijngii guʼwá rí nduyamajkuíí Dios.
2 Índo̱ ikhaa niʼdxuun rígi̱, niʼthí: “Lá nakumala rí galileos bugi̱ nimíniiʼ rígi̱, numuu rí ikhiin ni̱ndxu̱ún itháan xa̱bu̱ aʼkhá ki xóo eʼwíinʼ galileos ráʼ.
3 Ikhúún’ na̱tala rí na̱nguá. Á mu rí tsétanga̱a̱ a̱jkia̱la, xúgiáanʼ mangáanʼ makhañála.
4 O bi̱ mbá 18 bi̱ nikháñun índo̱ ningajxi̱i̱ guʼwá mitsídánʼ* dí rígá náa Siloam, lá nakumala rí ikhiin ni̱ndxu̱ún itháan xa̱bu̱ aʼkhá ki xóo eʼwíinʼ xa̱bu̱ bi̱ kúwá náa Jerusalén ráʼ.
5 Ikhúún’ na̱tala rí na̱nguá. Á mu tsétanga̱a̱ a̱jkia̱la, xúgiáanʼ mangáanʼ mámbáanʼla xó má niguámbíin ikhiin”.
6 Ikhú niʼthún xkri̱da rígi̱: “Mbáa xa̱bu̱ bi̱ gíʼdoo mbá ixi̱ higo náa mbayuuʼ dí kiʼdu uva, ni̱jkha̱ gáʼyoo magruigú xndúu, mú nimbá táxkamaa.
7 Ikhú niʼthúu̱n xa̱bu̱ bi̱ nañewu̱u̱n mbayuuʼ: ‹Naʼni má ajtsú tsiguʼ rí na̱ʼkhá raʼyáʼ xndúu higo rígi̱, mú na̱nguá exkamaa nimbá. ¡Natayáá ráʼ! Atrujtu, nda̱a̱ má numuu wíji̱ á mu i̱ndó ku̱ba̱ʼ rugoo›.
8 Ikhú ikhaa niriʼñuu: ‹Tátá atatsíñaaʼ imbá tsiguʼ, mandii ga̱jma̱a̱ magíʼma̱a̱ yuskha íxtuun.
9 Á mu najma̱a̱ xndúu, májánʼ má. Mú á mu na̱nguá, ikhú gáta̱di̱i̱›”.
10 Mbá sábado,* ikhaa xtáa raʼsngáa náa guʼwá rí bi̱ judíos nuxnáá gamajkhu Dios.
11 Ga̱jma̱a̱ ikhí xtáa mbáa a̱ʼgu̱ bi̱ niʼni má mbá 18 tsiguʼ rí gíʼdaa giñán xkawi̱i̱ʼ* bi̱ naʼni rí maʼniuu nandii. Ikhaa na̱nguá eyoo gáwi̱ji̱ jmbu numuu rí ni̱ʼkha̱ ndi̱jtsu̱u̱.
12 Índo̱ ndiʼyoo, ikhú Jesús nikuʼmaminaʼ náa ikhaa ga̱jma̱a̱ niʼthúu̱n: “Náná, gaʼni̱i̱ a̱jkia̱a̱nʼ ga̱jma̱a̱ nandii rí xtaʼdáá”.
13 Ikhú nixkrámáaʼ ga̱jma̱a̱ núkhu niwi̱ji̱i̱ jmbu a̱ʼgu̱, ikhú nigíʼdu̱u̱ nixnáa núma̱aʼ Dios.
14 Índo̱ ndiʼyoo rígi̱ bi̱ kayá edxu̱u̱ náa guʼwá rí bi̱ judíos nuxnáá gamajkhu Dios, tánigu̱u̱ʼ kayuuʼ rí Jesús naʼni thana rí mbiʼi sábado, ikhú niʼthún xa̱bu̱: “Majun mbiʼi gíʼmaa muñajunʼ; ikha jngóo gaguwaʼla maguma tanala mbiʼi rúʼko̱, raʼkháa sábado”.
15 Ikhú Jesús* niʼthúu̱n: “A̱jma̱ inala jáanla, lá nimbáa rí ikháanʼ tsérajkúuʼ xediu̱u̱ o búrriu̱u̱ mu maʼga̱ ka̱ya̱a̱ maga̱a̱n iyaʼ rí mbiʼi sábado ráʼ.
16 Xó má a̱ʼgu̱ bugi̱, bi̱ nindxu̱u̱ wáxioo Abrahán bi̱ niʼni gínáa Gixa̱a̱* mbá 18 tsiguʼ, lá ragíʼmaa rí maguma thanáá maski ajndu mbiʼi sábado xáʼ.”
17 Índo̱ ikhaa niʼthí rígi̱, xúgíinʼ bi̱ guáʼdaa sia̱nʼ nitiñu̱u̱ʼ, mú xa̱bu̱ bi̱ mbaʼin ra̱ʼkhá tháán nidxún índo̱ ndiyáá dí ra̱ʼkhá tháán mitsaanʼ rí eʼni.
18 Ga̱jma̱a̱ niʼthún xóó: “Xú káʼnii nindxu̱u̱ Xa̱bu̱ Ñajunʼ ndrígóo Dios,* ndiéjunʼ gándoo gáni mbríguii ga̱jma̱a̱ rá.
19 Nindxu̱u̱ xóo tsígooʼ mostaza rí mbáa xa̱bu̱ niʼdu náa mbayuuʼ. Tsígáʼ rígi̱ nikráʼáan ga̱jma̱a̱ niʼni mbá ixi̱ mba̱a̱, ga̱jma̱a̱ ñu̱ʼu̱ bi̱ jngruigu̱u̱n rijma̱a̱ niguwáʼ gúni̱ xújúnʼ náa ñawúunʼ”.
20 Ikhú niʼthún mbu̱júu̱ʼ: “Ndiéjunʼ gándoo gáni mbríguii ga̱jma̱a̱ Xa̱bu̱ Ñajunʼ ndrígóo Dios* rá.
21 Nindxu̱u̱ xóo levadura rí mbáa a̱ʼgu̱ nindáwo̱o̱ʼ náa mbá gu̱wa̱ʼ kilo harina, ikhú xúgíʼ xúwáʼ nikájxi̱i̱”.
22 Índo̱ xtáa ra̱jkha̱ Jerusalén, nanújngoo raʼsngúún xa̱bu̱ náa tri̱ga̱ xuajen mba̱ʼo̱ ga̱jma̱a̱ náa xuajen majkhaʼ.
23 Ikhú mbáa xa̱bu̱ nirajxu̱u̱: “Tátá, lá gajkhun rí káaʼ nguéjmi̱i̱n bi̱ makáwíin ráʼ.” Ikhú ikhaa niʼthún:
24 “Gu̱ni̱ tsiakimíjna̱la mu mata̱ʼa̱la náa xkrugua rí chíma̱ja̱nʼ, numuu rí na̱tala rí mbaʼin mugími̱jna̱ matu̱ʼu̱u̱n mú xájmiin.
25 Índo̱ bi̱ goʼwóo gátujxu̱u̱ marugua̱a̱ xkrugoo ga̱jma̱a̱ ixi̱, ikháanʼ maguanála rexa̱a̱, mudi̱i̱ xkrugua ga̱jma̱a̱ mutha̱a̱n: ‹¡Tátá, atambáʼtáá matu̱ʼu̱xu!›. Mú ikhaa mariʼñala: ‹Tséyóo náa eguwaʼla jún›.
26 Ikhú mutha̱a̱nla: ‹Nipíʼtsuxu ga̱jma̱a̱ niwánxu ga̱jma̱á nindxa̱a̱ʼ, ma̱ngaa nirasngáa náa kambuxu›.
27 Mú ikhaa maʼthúún: ‹Tséyóo náa eguwáʼla jún. ¡Aʼguala kaníí mbá xúgiáanʼ bi̱ nu̱nila dí ra̱májánʼ!›.
28 Ikhí mumbiya̱ʼla ga̱jma̱a̱ muphu duun iñala, índo̱ gúya̱a̱ rí Abrahán, Isaac, Jacob gajmiún mbá xúgíinʼ profetas* kúwá náa naʼtáñajunʼ Xa̱bu̱ Ñajunʼ ndrígóo Dios* mú ikháanʼla niguanála rexa̱a̱.
29 Ma̱ngaa maguwáʼ xa̱bu̱ xígií náa nagájnuu a̱jkha̱ʼ ga̱jma̱a̱ náa narámaaʼ, naʼwáán* ga̱jma̱a̱ xígií kawáá.* Ga̱jma̱a̱ mutrigi̱i̱n náa mesa náa naʼtáñajunʼ Xa̱bu̱ Ñajunʼ ndrígóo Dios.*
30 Gudxawíínla rígi̱: Kúwá tikhuun bi̱ guájun kidiíʼ maguajún ginuu, ga̱jma̱a̱ eʼwíinʼ bi̱ guájun ginuu maguajún kidiíʼ”.
31 Ikhú má mbiʼi rúʼko̱, niguwáʼ tikhuun fariseos ga̱jma̱a̱ nitháán: “Atagájnaaʼ midxu̱u̱ʼ ni xáraxtaa gi̱i̱ numuu dí Herodes* nandoo gáxíña̱a̱n”.
32 Ikhú ikhaa niʼthún: “Aʼgua̱la gútha̱a̱n igi̱ buʼko̱: ‹Natayáá ráʼ, xúgi̱ ga̱jma̱a̱ gájtsíí maxkawíin xa̱bu̱ wéñiiʼ ga̱jma̱a̱ manitanún xa̱bu̱, ga̱jma̱a̱ mambóʼ índo̱ gáʼni ajtsú mbiʼi›.
33 Mú rí xúgi̱, gájtsíí ga̱jma̱a̱ i̱ʼwáʼ mbiʼi rí na̱ʼkha̱, maʼgá numuu rí xándoo rí mbáa profeta makhañúu náa imbo̱o̱ xuajen á mu raʼkháa náa Jerusalén.
34 Jerusalén, Jerusalén, bi̱ nagudíin profetas ma̱ngaa naxnún ga̱jma̱a̱ itsí bi̱ nagún ikhí..., ¡mbaʼa nuthu nindoʼ magímbíin ejña̱a̱nʼ xóo eʼni mbáxtiʼ* bi̱ naguriʼiin e̱ji̱i̱n náa agoo xpíjpiúu! Mú ikháanʼ táʼndala.
35 ¡Gu̱ya̱a̱! Goʼwóo naguanáa ga̱jma̱a̱ ikháanʼ naguanáti̱ga̱la. Na̱tala rí asndu xúgi̱ ní xúyoʼ asndu índo̱ gútha̱: ‹¡Gaguma tsajkurámaaʼ bi̱ na̱ʼkha̱ ga̱jma̱a̱ mbiʼyuu Jeobá!›”.*
Mbaʼa nota
^ O “torre”.
^ O “giñán guéenʼ”.
^ Náa ajngáa griego naʼthí, “Tátá”.
^ O “gaʼyee”, “bi̱ nuthi dí marigá”.
^ O “norte”.
^ O “sur”.
^ O “jlúmbáa”, “gu̱mba̱ gáxtiʼ”, “xtílá eʼgú”.
