Rí niʼnirámáʼ Lucas 14:1-35
-
Naguma thanáá xa̱bu̱ bi̱ gíʼdoo sua̱n mbiʼi sábado (1-6)
-
Ganindxa̱a̱ʼ xa̱bu̱ guabaaʼ índo̱ gáguma̱án invitar (7-11)
-
Guʼthúún maguwáʼ bi̱ raguáʼdáá rí muni̱ numa̱a̱ʼ (12-14)
-
Xkri̱da ndrígu̱ún bi̱ ndiyáʼ rí muthi mu xágún (15-24)
-
Rí matani̱ mu ma̱nindxa̱a̱ʼ xa̱bi̱i̱ Jesús (25-33)
-
Idú rí nánguá miríná (34, 35)
14 Imbo̱o̱ mi̱ʼtsu̱, ikháá má mbiʼi sábado,* ikhaa ni̱jkha̱ gákuiʼtsu náa goʼwóo xa̱bu̱ bi̱ naxná ikhúún fariseos. Bi̱ kúwá ikhí, tséniña̱a̱ʼ ruyejxi̱i̱.
2 Ga̱jma̱a̱ ikhí ma̱ngaa xtáa mbáa xa̱bu̱ bi̱ gíʼdoo sua̱n.
3 Ikhú Jesús nirajxu̱u̱n bi̱ najmañún Xtángoo gajmiún fariseos: “Lá ma̱ndoo maguma thanáá mbáa xa̱bu̱ rí mbiʼi sábado o na̱nguá dxe̱ʼ.”
4 Mú ikhiin nda̱a̱ rí nithi. Ikhú Jesús nixkrámaaʼ xa̱bu̱, niʼni thanuu ga̱jma̱a̱ niʼthúu̱n maʼga̱a̱.
5 Ikhú Jesús niʼthún: “Tsáá dí ikháanʼla á mu a̱ʼdióo o xediu̱u̱ naxpátuáʼáan náa iñáʼ mbiʼi sábado, lá xáríya̱a̱ʼ mbá nacha̱ xáʼ.”
6 Mú ikhiin nda̱a̱ rí nithi.
7 Índo̱ ndiʼyoo rí xa̱bu̱ bi̱ kúwá raguánú nduyáʼ mutrigi̱i̱n náa rí itháan gíʼdoo numuu, ikhú niʼthún xkri̱da rígi̱:
8 “Índo̱ gúthaanʼ mi̱dxu̱ʼ náa ndxa̱a̱ gatsigúnʼ, xáraʼwún náa rí itháan gíʼdoo numuu. Raʼkháa gáʼni rí nijuiʼtháán má maʼga i̱mba̱a̱ bi̱ itháan gíʼdoo numuu ki xóo ikháán.
9 Ikhú ma̱ʼkha̱ bi̱ niʼtála muʼgua ga̱jma̱a̱ maʼtháanʼ: ‹Atatsíñáʼ xíliaʼ mu magi̱ʼi̱ xa̱bu̱ bugi̱›. Ga̱jma̱a̱ ikhú mati̱ya̱a̱ʼ wéñuuʼ ga̱jma̱a̱ mi̱dxu̱ʼ gáraʼwún asndu kidííʼ.
10 Ikha jngóo, índo̱ gúthaanʼ mi̱dxu̱ʼ, araʼwún asndu kidííʼ, mu índo̱ gáʼkha̱ bi̱ niʼtháanʼ mi̱dxu̱ʼ, maʼtháanʼ: ‹Amigo, ayi̱ gáraʼwún gi̱i̱›. Ikhú maguma mba̱a̱n náa inún xúgíinʼ bi̱ nijuiʼthúún magún.
11 Numuu rí asndu tsáá bi̱ naʼnimbamínáʼ magajnúu gamajkuu, mú bi̱ naʼni guabaminaʼ maguma mba̱a̱”.
12 Nda̱wa̱á niʼthúu̱n xa̱bu̱ bi̱ goʼwóo: “Índo̱ gátani̱ májáánʼ ganitsu, xátandxaʼwu̱u̱n bi̱ nambájxa̱a̱ʼ gajmiáanʼ, ni má a̱ngia̱a̱nʼ ni má bi̱ xtañún ni má bi̱ guáʼdáá bi̱ kúwá náa mijngii xtaa. Á mu xúʼko̱ tani̱, ikhiin mangiin muta̱nʼ mi̱dxu̱ʼ náa guʼwún ga̱jma̱a̱ xúʼko̱ gátada̱a̱ʼ.
13 Índo̱ gátani̱ mbá ndxa̱a̱, arathún maguwáʼ bi̱ gúʼxíinʼ, bi̱ tsíkruigu̱u̱n,
14 ikhú maraxtaa gagi, numuu rí ikhiin nda̱a̱ rí muni̱ numa̱a̱ʼ ga̱jma̱a̱, ma̱ngaa mbi̱ya̱a̱ numaaʼ índo̱ gágabi̱ín* xa̱bu̱ míjíinʼ”.
15 Índo̱ mbáa bi̱ xtáa ikhí niʼdxuun rígi̱ niʼthí: “Gagi xtáa xa̱bu̱ bi̱ gákuiʼtsu* náa Xa̱bu̱ Ñajunʼ ndrígóo Dios”.*
16 Jesús niʼthúu̱n: “Mbáa xa̱bu̱, niʼthún mbaʼin xa̱bu̱ magún gúphiʼtsu wañún* náa goʼwóo.
17 Índo̱ ni̱jkha̱nú hora, nikungua̱a̱nʼ ñumbáá ndrígóo mu maʼthúún: ‹Aguwaʼ rá, rígá xawii má xúgíʼ›.
18 Mú xúgíinʼ ndiyáʼ dí muthi mu xágún. Timbáa niʼthí: ‹Atani̱ mba̱a̱ a̱jkia̱a̱nʼ xta̱yo̱ʼ xáʼngo̱o̱ gáʼgá, nitsi mbá mbaaʼ ga̱jma̱a̱ ndayóoʼ maʼgá gáyejxi›.
19 I̱mba̱a̱ niʼthí: ‹Nitsi̱i̱n mbá witsu yunta xede̱ ga̱jma̱a̱ maʼgá gáyóo xú káʼnii eñajunʼ, atani̱ mba̱a̱ a̱jkia̱a̱nʼ xta̱yo̱ʼ xáʼngo̱o̱ gáʼgá›.
20 I̱mba̱a̱ niʼthí: ‹Ndiʼkhún niniʼgúnʼ, ikha jngóo xáʼngo̱o̱ gáʼgá›.
21 Ikhú ñumbáá ni̱jkha̱a̱ gáʼthúu̱n xa̱bu̱ bi̱ goʼwóo. Ikhú xa̱bu̱ buʼko̱ nikiʼnáa ga̱jma̱a̱ niʼthúu̱n ñumbáá: ‹Nacha̱, agajnáaʼ ayuʼ náa kamba̱a̱ a̱pha̱,* náa kamba̱a̱ majkhaʼ ga̱jma̱a̱ ayi̱ xtiin xa̱bu̱ gíníi, xa̱bu̱ gúʼxíinʼ ga̱jma̱a̱ bi̱ tsíkruigu̱u̱n›.
22 Nda̱wa̱á ñumbáá niʼthúu̱n: ‹Tátá, niguma xóo niratáñajunʼ, mú kaʼnííʼ gáʼchú›.
23 Ga̱jma̱a̱ bi̱ goʼwóo niʼtáñajuunʼ ñumbáá: ‹Ayuʼ náa kamba̱a̱ ga̱jma̱a̱ atani̱ kañún xa̱bu̱ maguwáʼ mu majtíin náa goʼwóʼ.
24 Na̱tala gajkhun dí nimbáa bi̱ nijuiʼtháán ma̱ʼkha̱, xáʼyoo xóo miʼtsí dí ninimújúunʼ›”.
25 Mbaʼin xa̱bu̱ egún kidxuuʼ Jesús, ikhaa nitangayii náa ikhiin ga̱jma̱a̱ niʼthún:
26 “Á mu mbáa na̱ʼkha̱ kidxuʼ, mú á mu itháan eyoo kaʼyoo anu̱u̱, ru̱dúu̱, a̱ʼgiu̱u̱, e̱ji̱i̱n, a̱ngui̱i̱n, ga̱jma̱a̱ nandoo kaʼyaminaʼ itháan ikhaa, xándoo mani̱ndxu̱u̱ xa̱bi̱ʼ.
27 Á mu mbáa tséniñaminaʼ maguma gínáa,* ga̱jma̱a̱ na̱ʼkha̱ kidxuʼ, xándoo mani̱ndxu̱u̱ xa̱bi̱ʼ.
28 Mbá xkri̱da, tsáá mbáa dí ikháanʼla á mu dí nandoo maʼni mbá guʼwá, tsígi̱ʼi̱ ginii mu mbaʼyoo nguáthá mba̱a̱ mbújkha̱a̱ gáraʼaa ga̱jma̱a̱ á mu kaʼnii maʼngo̱o̱ maʼnigájxu̱u̱.
29 Raʼkháa gáʼni rí káaʼ rajkhúu gátsiji ga̱jma̱a̱ xáʼngo̱o̱ gáʼni gájxu̱u̱, ga̱jma̱a̱ xúgíinʼ bi̱ gúyáá mugi̱ʼdi̱i̱ mutsijmaa,
30 muthi: ‹Xa̱bu̱ bugi̱ nigíʼdu̱u̱ niʼni guʼwá mú tájmaa gáʼni gájxu̱u̱›.
31 O tsáá mbáa rey rí índo̱ nacho̱o̱ magajnúu maʼga gáxmínaʼ ga̱jma̱a̱ i̱mba̱a̱, tsígi̱ʼi̱ ginii mu mbaʼyoo á mu maʼngo̱o̱ rí 10,000 soldados maʼni gajmíi̱n bi̱ mbá 20,000 soldados rá.
32 Á mu ndaʼyoo dí rakáʼnii maʼngo̱o̱, ikhú nakuʼmiin mbá nguéjmi̱i̱n xa̱bu̱ mu muthán i̱mba̱a̱ rey nákha xóó xtáa ra̱ʼkha̱ mitsínguánʼ rí tsíyoo xkujndu.
33 Xúʼko̱ má kayuuʼ, á mu mbáa rí ikháanʼ tséniñuuʼ xúgíʼ rí gíʼdoo, xándoo mani̱ndxu̱u̱ xa̱bi̱ʼ.
34 Májánʼ wéñuuʼ nindxu̱u̱ idú. Mú, á mu idú nánguá miríná, ní xándoo mata̱nga̱a̱ maʼni̱i̱ miríná.
35 Nánguá ejmaa ni magi̱ʼi̱ náa ku̱ba̱ʼ, ni maʼni yuska, ikha jngóo xa̱bu̱ nuxidíí. Bi̱ gíʼdoo cháʼwuun, gagíʼ edxu̱u̱ maʼdxuun”.
Mbaʼa nota
^ O “gátujxi̱ín”, “gúya̱a̱”.
^ Náa ajngáa griego naʼthí, “gíkhu̱ pan”.
^ O “wakíʼ”.
^ O “mba̱a̱”, “paska”.
