Rí niʼnirámáʼ Lucas 15:1-32
15 Ikhú mbá xúgíinʼ bi̱ nuruma mbújkho̱o̱ guʼwá ñajunʼ ga̱jma̱a̱ xa̱bu̱ aʼkhá nigimbíin náa mbájndi gíʼ ikhaa mu mudxawíín rí naʼsngáa.
2 Xó má fariseos ga̱jma̱a̱ bi̱ nusngáa xtángoo nutanumáá: “Xa̱bu̱ bugi̱ nagruiguíin májánʼ bi̱ nuni̱ aʼkhá asndu nakuiʼtsu gajmíi̱n”.
3 Ikhú ikhaa nigíʼ xkri̱da rígi̱:
4 “Tsáá mbáa rí ikháanʼla, á mu gíʼdiin mbá 100 mugu̱ ga̱jma̱a̱ nandáti̱ga̱a̱ mbáwíí, lá raʼkháa maniñúúnʼ xanáá bi̱ mbá 99 mu maʼga gáyáaʼ bi̱ nindáti̱ga̱a̱ asndu náa maxkama̱a̱ xáʼ.
5 Índo̱ naxkama̱a̱, ra̱ʼkhá tháán edxuu rí asndu natámaaʼ náa xpajpoo.
6 Ga̱jma̱a̱ índo̱ na̱ʼkha̱núu goʼwóo, nandxaʼwún bi̱ nambájxu̱u̱ gajmíi̱n, ma̱ngaa bi̱ xtáa mijngii gajmíi̱n naʼthúún: ‹¡Gakuwáanʼ gagi ga̱jma̱á ni̱ndxu̱ʼ, numuu rí niʼngo̱ʼ nixkama̱a̱ mugiu̱ʼ bi̱ nindáti̱ga̱a̱!›.
7 Na̱tala gajkhun dí narígá itháan gagi mekhuíí índo̱ mbáa xa̱bu̱ aʼkhá natanga̱a̱ a̱jkiu̱u̱n, ki xóo bi̱ mbá 99 xa̱bu̱ míjíinʼ bi̱ tséyóoʼ má mata̱nga̱a̱ a̱jkiu̱ún.
8 O tsáá lá a̱ʼguíi bi̱ gíʼdoo gu̱wa̱ʼ mbújkha̱a̱ dracma* ga̱jma̱a̱ naʼnimbáti̱ga̱ mbóoʼ, lá xáskamuu aguʼ, magíjxi̱i̱ goʼwóo ga̱jma̱a̱ tsumáá gáyáaʼ asndu maxkama̱a̱ xáʼ.
9 Ga̱jma̱a̱ índo̱ naxkama̱a̱, nandxaʼwún bi̱ nambájxu̱u̱ gajmíi̱n ga̱jma̱a̱ bi̱ xtáa mijngii gajmíi̱n, naʼthúún: ‹¡Gakuwáanʼ gagi ga̱jma̱á ni̱ndxu̱ʼ, numuu rí niʼngo̱ʼ nixkama̱a̱ mbújkhoʼ rí nindáti̱ga̱!›.
10 Na̱tala gajkhun rí xúʼko̱ má ángeles ndrígóo Dios nakúwá gagi índo̱ mbáa xa̱bu̱ aʼkhá natanga̱a̱ a̱jkiu̱u̱n”.
11 Ikhú niʼthí: “Mbáa xa̱bu̱ gíʼdiin a̱jmi̱i̱n jiámá.
12 Ga̱jma̱a̱ bi̱ itháan chíʼgíiʼ niʼthúu̱n anu̱u̱: ‹Papáa, araxnáaʼ rí kaʼyoʼ mba̱ya̱a̱›. Ikhú xa̱bu̱ nikhi̱i̱ niruiʼta̱a̱ rí kaʼñún muda̱a̱ mbá nájmi̱i̱n.
13 Nguáthá mbiʼi nda̱wa̱á, dxámá bi̱ gi̱ʼtha̱á nigujxi̱i̱ xúgíʼ rí nikhánáá ga̱jma̱a̱ ni̱jkha̱ náa mbá xuajen rí itháan mitsínguánʼ, ga̱jma̱a̱ ikhí nitsíjmuuʼ* xúgíʼ rí nigu̱u̱ ga̱jma̱a̱ niʼni asndu ndí má eyoo.
14 Índo̱ ikhaa niguámbóo nitsíjmuuʼ xúgíʼ rí nigu̱u̱, ikhú nirígá mbá ewiʼ náa xuajen rúʼko̱ ga̱jma̱a̱ ikhaa nándáa rí nigiʼdoo.
15 Asndu nixtáa rambáyúu mbáa xa̱bu̱ bi̱ xtáa náa xuajen rúʼko̱, ga̱jma̱a̱ ikhaa nikuʼmaa maʼga gáñewu̱u̱n a̱ga náa mbayuuʼ.
16 Numuu dí ra̱ʼkhá tháán nixkidxu̱u̱, ikha jngóo nindoo mi̱khu̱ rí naʼphu̱ a̱ga, mú nimbáa nda̱wa̱a̱ tsáa nixnúu rí mi̱khu̱.
17 Índo̱ nigíiʼ a̱jkiu̱u̱n ikhú niʼthí: ‹¡Ñumbáá bi̱ gíʼdiin anu̱ʼ asndu napídu̱únʼ ganitsu eni̱, mú ikhúúnʼ gi̱i̱ na̱jkha̱ rakáñúnʼ xki̱dxu̱ʼ!
18 Matangaán náa goʼwóo anu̱ʼ ga̱jma̱a̱ mathu̱u̱n: “Papáa, nikiéʼkhunʼ náa inuu Dios ga̱jma̱a̱ náa ikháán.
19 Nánguá kaʼyoʼ mani̱ndxu̱ʼ a̱ʼdiáaʼ. Ikha jngóo, ataniuʼ xó má mbáa ñumbáá ndrígiáaʼ”›.
20 Ikhú niguajthun kamba̱a̱ ni̱jkha̱a̱ náa goʼwóo anu̱u̱. Índo̱ ka̱ʼníí e̱ʼkha̱a̱ mitsínguánʼ, anu̱u̱ ndiʼyoo, ikhú nigáwiinʼ a̱jkiu̱u̱n kaʼyoo. Ni̱jkha̱ ragáyúu gátsijnuu, ndiyáraʼaa ga̱jma̱a̱ nixnúu beso.
21 Ikhú dxámá niʼthúu̱n anu̱u̱: ‹Papáa, nikiéʼkhunʼ náa inuu Dios ga̱jma̱a̱ náa ikháán. Nánguá kaʼyoʼ mani̱ndxu̱ʼ a̱ʼdiáaʼ›.
22 Mú xa̱bu̱ nikhi̱i̱ nikuʼmiin ñumbáá ndrígióo: ‹¡Gaʼcha̱la! Guríyaaʼ xtíin rí itháan májánʼ guxna̱a̱ magúwúunʼ. Gugídáʼ mbá anillo náa ñawúunʼ ga̱jma̱a̱ guxna̱a̱ raxtá* majngróʼoo.
23 Ma̱ngaa gaguwaʼ kuya̱a̱ a̱ʼdá xédí bi̱ itháan rangíiʼ, guxíyáala mu mu̱ʼni̱ ndxa̱a̱ ga̱jma̱a̱ numuu rí nitanga̱a̱,
24 numuu rí a̱ʼdióʼ bugi̱ nikháñuu mú nitanga̱a̱ nixtáa, nindáti̱ga̱a̱ mú nikujma̱a̱›. Ikhú nigi̱ʼdi̱i̱ nini̱ gagimijná.
25 Dxámá bi̱ giʼnii ni̱jkha̱ gáñajunʼ xanáá, mú índo̱ na̱ʼkha̱a̱ mijngii náa goʼwóo, ikhú niʼdxuun rí nawáán ajmúú ga̱jma̱a̱ gisián.
26 Ikha jngóo nindxa̱ʼóo mbáa ñumbáá ga̱jma̱a̱ nirajxu̱u̱ ndiéjunʼ xtáa rarígá.
27 Ikhú ñumbáá niriʼñuu: ‹Gi̱ʼtia̱a̱ʼ nitanga̱a̱, ikha jngóo ana̱a̱ʼ nixíyáa a̱ʼdá xédí bi̱ itháan rangíiʼ numuu rí májánʼ nitanga̱a̱ a̱ʼdióo›.
28 Mú dxámá giʼnii tánigu̱u̱ʼ kayuuʼ ikha jngóo tándoo gáta̱ʼa̱a̱. Mú anu̱u̱ nigájnuu ga̱jma̱a̱ niʼtákáñuu rí mata̱ʼa̱a̱.
29 Mú ikhaa niriʼñuu anu̱u̱: ‹Xúgíʼ tsiguʼ rígi̱ ni̱ni̱ gínáminaʼ niñajunʼ xóo mbáa ñumbáá ga̱jma̱á nindxa̱a̱ʼ, ga̱jma̱a̱ xúgíʼ rí nirathúnʼ ninimbánuu, mú nimbá miʼtsú táraxniuʼ nimbáa a̱ʼdá tsújtuunʼ maxíyáa miʼkhuu gajmíʼ mígiuʼ.
30 Mú índo̱ ni̱ʼkha̱núu a̱ʼdiáaʼ bugi̱ bi̱ nitsíjmuuʼ* mbújkha̱a̱ gajmíi̱n gu̱ʼu̱, asndu nitaxíyáa mbá a̱ʼdá xédí rangíiʼ mikhu̱u̱›.
31 Ikhú xa̱bu̱ nikhi̱i̱ niʼthúu̱n a̱ʼdióo: ‹A̱ʼdióʼ, ikháán niraxtaa má xúʼko̱ ga̱jma̱á ni̱ndxu̱ʼ, xúgíʼ rí gúʼdoʼ ndrígáaʼ má ikháán nindxu̱u̱.
32 Mú ndayóoʼ rí mu̱ʼni̱ ndxa̱a̱ mu makuwáanʼ gagi numuu rí gi̱ʼtia̱a̱ʼ nikháñuu mú nitanga̱a̱ nixtáa. Nindáti̱ga̱a̱ mú nikujma̱a̱›”.
