Rí niʼnirámáʼ Lucas 16:1-31
16 Nda̱wa̱á niʼthún rígi̱ xa̱bi̱i̱: “Nixtáa mbáa xa̱bu̱ bi̱ gíʼdoo wéñuuʼ, nigiʼdaa mbáa bi̱ nañewu̱u̱n goʼwóo. Ga̱jma̱a̱ bugi̱ nini̱ tsu̱di̱i̱ rí nikiéʼkúun rí gíʼdoo patriúun.
2 Ikha jngóo patriúun nindxa̱ʼóo ga̱jma̱a̱ niʼthúu̱n: ‹Nadxawun dí raʼkhí ga̱jma̱a̱ numaaʼ. Ataxnájxi̱i̱ xúgíʼ cuenta dí kajti ñawáanʼ, numuu rí matatsiʼñááʼ ñajunʼ rí xtaa ratani̱›.
3 Ikhú xa̱bu̱ bi̱ nañewu̱u̱n guʼwá niʼtáminaʼ: Ndiéjunʼ gáni̱ xúgi̱ rá. Rí patriúnʼ marígú káyúʼ ñajunʼ rí gúʼdoo. Nánguá gúʼdoo tsiakii mañajunʼ ga̱jma̱a̱ nati̱yu̱ʼ gájngrui̱go̱ʼ randa̱ʼa̱mínúʼ* dí miʼkhu.
4 Nda̱yo̱o̱ rí ma̱ni̱ rá, mu xa̱bu̱ mundrigún náa guʼwún índo̱ patriúnʼ gárígú káyúʼ ñajunʼ rí gúʼdoo.
5 Ikhú nindxa̱ʼóo mámbáa bi̱ gíʼmaa náa patriúun. Nirajxu̱u̱ bi̱ timbáa: ‹Nguáthála gíʼmáán náa inuu patriúnʼ rá.›
6 Ikhú niʼthúu̱n: ‹Gíʼmúún mbá 2,200 litro* aceite dí oliva inuu›, ikhú bi̱ nañewu̱u̱n guʼwá niriʼñuu: ‹Ayá i̱yi̱i̱ʼ, ga̱ʼcha̱a̱ʼ, atagrígu̱u̱ mbá 1,100 litros›.
7 Nda̱wa̱á nirajxu̱u̱ i̱mba̱a̱ bi̱ gíʼmaa: ‹Ikháán rá. Nguáthá gíʼmáán›. Ikhú ikhaa niʼthí: ‹Gíʼmúún mbá 100 gúxta̱a̱* trigo›. Ikhú bi̱ nañewu̱u̱n guʼwá niʼthúu̱n: ‹Ayá i̱yi̱i̱ʼ ga̱jma̱a̱ atagrígu̱u̱ 80 gúxta̱a̱›.
8 Ga̱jma̱a̱ patrón niʼni mba̱a̱ bi̱ nañewu̱u̱n goʼwóo numuu rí maski ajndu nindxu̱u̱ xa̱bu̱ ra̱májáanʼ, nijmañuu mbaʼyoo xóo maʼni. Numuu rí xa̱bu̱ bi̱ kúwá rí mbiʼi xúgi̱* itháan má najmañún xóo munimíjna̱, ki xóo xa̱bu̱ bi̱ kúwá náa nambiʼi aguʼ.
9 Ma̱ngaa na̱tala: Gajmala rí gíʼdoo numuu dí rígá náa numbaaʼ aʼkhá rígi̱, mu mu̱ni̱ amigo, mu índo̱ rígi̱ nixájmaa, ikháanʼla maxtriguáanʼ náa makuwáanʼ kámuu.
10 Xa̱bu̱ bi̱ nindxu̱u̱ jmbii náa rí chíʼgíiʼ, xúʼko̱ má gánindxu̱u̱ jmbii náa rí itháan mba̱a̱, xa̱bu̱ bi̱ naʼni dí ra̱májánʼ náa rí itháan chíʼgíiʼ, xúʼko̱ má gáʼni dí ra̱májánʼ náa itháan mba̱a̱.
11 Á mu rí tséjmáanʼ gájmala dí gíʼdoo numuu dí rígá náa numbaaʼ aʼkhá rígi̱, tsáá lá gáxnájxala rí phú gajkhun gíʼdoo numuu rá.
12 Á mu tséjmáanʼla gúñewa̱a̱n ndrígóo i̱mba̱a̱, tsáá lá gáxnála mbá rí maʼni ndrígála ikháanʼ rá.
13 Nimbáa xándoo mani̱ndxu̱u̱ ñumbáá náa inún a̱jmi̱i̱n xa̱bu̱, numuu rí mbáa maʼndoo kaʼyoo mú xándoo kaʼyoo i̱mba̱a̱ o mambajxúu ga̱jma̱a̱ mbáa mú xámbájxúu ga̱jma̱a̱ i̱mba̱a̱. Xándoo mu̱ni̱ ñajuunʼ Dios ga̱jma̱a̱ ikhú má mbuʼyáʼ muguaʼdáá wéñuuʼ”.
14 Ikhú fariseos bi̱ kúwá rudxawíín xúgíʼ rígi̱, tánigu̱u̱nʼ kayuuʼ numuu rí ikhiin nanigu̱u̱nʼ wéñuuʼ mbújkha̱a̱.
15 Ga̱jma̱a̱ ikhaa niʼthún: “Ikháanʼla nu̱tala rí nindxa̱la májáanʼ xa̱bu̱ náa inún eʼwíinʼ, mú Dios naninuuʼ a̱jkia̱la.* Rí gíʼdoo numuu eʼyoo xa̱bu̱, xkawi̱ʼ eʼyoo Dios.
16 Rí naʼthí náa Xtángoo ga̱jma̱a̱ rí nithi profetas* nirígá asndu índo̱ Juan nigíʼdu̱u̱ niʼtáráʼa. Asndu nákha ikhú nigi̱ʼdu̱u̱ nijuiʼtáraʼa ga̱jma̱a̱ numuu Xa̱bu̱ Ñajunʼ ndrígóo Dios* xóo ajngáa rí májánʼ. Ga̱jma̱a̱ xúgíinʼ xa̱bu̱ nunimíjna̱ magún ikhí.
17 Na̱tala gajkhun rí tséʼñuu á mu ku̱ba̱ʼ ga̱jma̱a̱ mekhu nandáti̱ga̱a̱ mú rí naʼthí náa Xtángoo mambanúu tsiakii.
18 Asndu tsáa bi̱ naniña̱a̱nʼ* a̱ʼgiu̱u̱ ga̱jma̱a̱ ndayáa i̱mba̱a̱ nakudaminaʼ aʼkhá ga̱jma̱a̱ asndu tsáa bi̱ gáyáa a̱ʼgu̱ bi̱ niguanáa, nakudaminaʼ aʼkhá ma̱ngaa.
19 Nixtáa mbáa xa̱bu̱ bi̱ nigiʼdoo wéñuuʼ bi̱ nagíʼ xtíin miʼñuu rí minumuu, ga̱jma̱a̱ nigiʼdoo xúgíʼ rí nindoo.
20 Mú náa mijngii xkrugoo naguwáʼ runiña̱a̱nʼ mbáa xa̱bu̱ gínáa bi̱ mbiʼyuu Lázaro, bi̱ kagu̱ ska.
21 Nandoo mi̱khu̱ rí najngutígú náa mésóo xa̱bu̱ bi̱ gíʼdoo. Asndu naguwáʼ xu̱wánʼ ga̱jma̱a̱ nuxtííʼ ska rí kagu̱.
22 Índo̱ ninújngoo mbiʼi, xa̱bu̱ gínáa nikháñuu ga̱jma̱a̱ ángeles nigúu̱n kuya̱a̱ náa níjniúu Abrahán.
Ma̱ngaa xa̱bu̱ bi̱ gíʼdoo nikháñuu ga̱jma̱a̱ nijui̱ʼdi̱i̱.
23 Ga̱jma̱a̱ índo̱ ikhaa kua̱ʼa̱a̱n náa Iñá wajinʼ,* índo̱ xtáa ramínuuʼ, ikhú nigrui̱ga̱a̱ iduu ga̱jma̱a̱ asndu tsínguánʼ ndiʼyoo Abrahán ga̱jma̱a̱ Lázaro náa níjniúu.
24 Ikhú niʼthúu̱n: ‹Anu̱ʼ Abrahán, agáwíinʼ a̱jkia̱a̱nʼ xtayoʼ ga̱jma̱a̱ aratháán Lázaro marmajan a̱ʼdióo ñawúunʼ mu ma̱ʼkha̱ gáʼni ma̱jxa̱a̱ ra̱ju̱nʼ, numuu rí xtáá ramínuuʼ náa aguʼ rígi̱›.
25 Mú Abrahán niriʼñuu: ‹A̱ʼdióʼ, garmáʼáan a̱jkia̱a̱nʼ rí índo̱ niraxtaa niraʼdáá xúgíʼ rí májánʼ, mú Lázaro na̱nguá, i̱ndó nimínuuʼ. Dí xúgi̱ ikhaa xtáa raʼni̱i̱ a̱jkiu̱u̱n, mú ikháán xtaa ratamíniiʼ.
26 Ga̱jma̱a̱ raʼkháa i̱ndó rígi̱, ma̱ngaa rígá mbá iñá mbiʼ náa ikháanʼlu, ikha jngóo bi̱ kúwá gi̱i̱ xándoo gánújngún ñuʼún ni má bi̱ kúwá ñuʼún xándoo gáguwáʼ gi̱i̱›.
27 Ikhú xa̱bu̱ bi̱ gíʼdoo niʼthúu̱n: ‹Anu̱ʼ, á mu xúʼko̱, na̱nda̱ʼa̱a̱ʼ rí mataxuʼmáa Lázaro maʼga náa goʼwóo anu̱ʼ,
28 numuu rí gúʼdiin witsiin a̱ngui̱nʼ. Ga̱jma̱a̱ gaʼthún mbá xúgíʼ dí nirígá mu xúʼko̱ mangiin xáguwáʼ mumíniiʼ gi̱jyooʼ›.
29 Ikhú Abrahán niʼthí: ‹Xtáa má Moisés ga̱jma̱a̱ kúwá má Profetas; gudxawíín dí nuthi ikhiin›.
30 Ikhú ikhaa niʼthí: ‹¡Na̱nguá, na̱nguá anu̱ʼ Abrahán! Á mu mbáa bi̱ xtáa náa majñúnʼ wajinʼ gáʼga gáʼñúún, xúʼko̱ rí mata̱nga̱a̱ a̱jkiu̱ún›.
31 Mú Abrahán niriʼñuu: ‹Á mu tsédxawíín rí naʼthí Moisés ga̱jma̱a̱ rí nuthi Profetas, xúnimbu̱ún má kuyáá bi̱ gátujxi̱i̱ náa majñúnʼ wajinʼ ma̱ngaa›”.
Mbaʼa nota
^ O “randaʼaá”.
^ Náa ajngáa griego naʼthí, “100 coro”. Mbá coro trigo nindxu̱u̱ mbá 220 litro. Atayáá glosario, coro.
^ O “ámiala”.
^ O “gaʼyee”, “bi̱ nuthi dí marigá”.
^ O “naxnúu divorcio”.
