Rí niʼnirámáʼ Lucas 17:1-37
17 Ikhú niʼthún xa̱bi̱i̱: “Jkhu marigá má rí maʼni majngrádiinʼ xa̱bu̱. ¡Mú gínáa xa̱bu̱ bi̱ gáʼni majngrádiinʼ eʼwíinʼ!
2 Itháan májánʼ gáʼni rí maxtoʼóo mbá itsí mba̱a̱ náa aphuu ga̱jma̱a̱ midama̱ʼa̱a̱n náa lamáa, ki xóo rí maʼni majngrádaaʼ mbáa bi̱ chíʼgíiʼ bugi̱.
3 Ikha jngóo guñewa̱a̱n rí nu̱nila. Á mu ndxájuaaʼ nakiéʼkúun inaaʼ, ataxpríguíí. Ga̱jma̱a̱ á mu natanga̱a̱ a̱jkiu̱u̱n, atani̱ mba̱a̱ a̱jkia̱a̱nʼ xtayáá.
4 Á mu juwan nuthu gákiéʼkúun náa inaaʼ dí mbá mbiʼi ga̱jma̱a̱ juwan nuthu na̱ʼkha̱ gáʼyaaʼ mu maʼtháanʼ ‹nagáwiinʼ a̱jkiu̱nʼ dí niniaanʼ›, gíʼmaa dí matani̱ mba̱a̱ a̱jkia̱nʼ xtayáá”.
5 Ikhú apóstoles nitháán Jesús:* “Araxnúxu xóó itháan fe”.
6 Ikhú Jesús niʼthún: “Á mu fe ndrígála mba̱a̱ xóo mbá tsígooʼ mostaza, mutha̱a̱nla ixi̱ mora* rígi̱ ‹¡Atruburiyami̱na̱ʼ ga̱jma̱a̱ ataduminaʼ náa lamáa!›, ga̱jma̱a̱ ikhaa maʼnimbo̱o̱ kaʼyala.
7 Tsáá mbáa rí ikháanʼla maʼthúu̱n ñumbióo bi̱ ni̱ʼkha̱a̱ ni̱jkha̱ gáxkubi o ni̱jkha̱ gáʼñún mugu̱, nacha̱ aya̱ gáraʼwún náa mesa matatsiʼtsu.
8 Lá raʼkháa maʼthúu̱n ‹atriʼkumina̱a̱ʼ ga̱jma̱a̱ atani̱ májáánʼ rí miʼkhu wañuʼ, atrajkuáa rí miʼkhu asndu índo̱ gámboʼ rakuíʼtsu ikhú ma̱ndoo matatsiʼtsu ga̱jma̱a̱ migi̱i̱n ikháán›.
9 Ñumbáá niʼnimbánuu má ñajunʼ ndrígóo, ikha jngóo patriúun xáxnáa má núma̱aʼ, lá ragájkhun ráʼ.
10 Xúʼko̱ má mangáanʼ, índo̱ gúnimbáníí xúgíʼ rí nijuiʼtá ñajuanla, gu̱tha̱: ‹Ni̱ndxu̱xu̱ʼ ñumbáá bi̱ nda̱a̱ rí ejmaa. I̱ndó ni̱nixu̱ rí kaʼyuxu má mu̱ni̱›”.
11 Índo̱ xtáa ra̱jkha̱ Jerusalén, ninújngoo náa ndawaa ndrígóo Samaria ga̱jma̱a̱ Galilea.
12 Índo̱ xtáa ra̱jkha̱nú náa mbá xuajen, ikhú mbá gu̱wi̱i̱nʼ xa̱bu̱ bi̱ guáʼdáá nandii lepra ndiyáá Jesús, mú mitsínguánʼ niguanún.
13 Ikhú gakhi̱i̱ nitháán: “¡Jesús, Maestro, agáwíinʼ a̱jkia̱a̱nʼ xtayuxu!”.
14 Índo̱ ikhaa ndiʼñún xa̱bu̱, ikhú niʼthún: “Gaʼguala guxnaximíjná náa ndxajkun”. Ga̱jma̱a̱ índo̱ kúwá ragúun, niguma thanún.
15 Índo̱ mbáa rí ikhiin ndiʼyoo rí niguma thanáá, ikhú nitanga̱a̱ raxnáa núma̱aʼ Dios ga̱jma̱a̱ aʼwá gakhi̱i̱.
16 Nismbáti̱go̱o̱ náa inuu Jesús ga̱jma̱a̱ nixnáa núma̱aʼ. Xa̱bu̱ bugi̱ nindxu̱u̱ xa̱bu̱ Samaria.
17 Índo̱ Jesús ndiʼyoo rígi̱, ikhú niʼthí: “Lá raʼkháa mbá gu̱wi̱i̱nʼ niguma thanún ráʼ. Náá nigún bi̱ i̱mbá 9 rá.
18 Nda̱wa̱a̱ i̱mba̱a̱ bi̱ nitanga̱a̱ gáʼni mba̱a̱ Dios, i̱ndó xa̱bu̱ bugi̱ bi̱ na̱ʼkha̱ i̱mba̱ xuajen”.
19 Ikhú niʼthúu̱n: “Atujxa̱a̱ʼ ga̱jma̱a̱ ayu̱u̱ʼ, fe ndrígáaʼ niʼni thanaaʼ”.
20 Fariseos nirajxi̱i̱ nguáná gáʼkha̱ Xa̱bu̱ Ñajunʼ ndrígóo Dios,* ikhú ikhaa niʼthún: “Xa̱bu̱ Ñajunʼ ndrígóo Dios* ma̱ʼkha̱, mú xákujmaa.
21 Ni má xa̱bu̱ xúthi ‹¡Gu̱ya̱a̱la xtáa gi̱i̱!› o ‹¡Xtáa ñuʼún!›. Numuu rí Xa̱bu̱ Ñajunʼ ndrígóo Dios* xtáa má náa majñala ikháanʼ”.
22 Ikhú ikhaa niʼthún xa̱bi̱i̱: “Ma̱ʼkha̱ mbiʼi rí ikháanʼ maʼndala mbu̱ya̱a̱ A̱ʼdióo xa̱biya̱, mú ní xúya̱a̱la.
23 Xa̱bu̱ mutala ‹¡Gu̱ya̱a̱la xtáa ñuʼún!› o ‹¡Xtáa gi̱i̱!›. Mú xáʼguala kidxu̱únʼ.
24 Numuu rí xóo naxpíbínʼ náa xúgíʼ mekhu, xúʼko̱ gánindxu̱u̱ mbiʼi ndrígóo A̱ʼdióo xa̱biya̱.
25 Mú ginii mbaʼyóoʼ mamínuuʼ wéñuuʼ ga̱jma̱a̱ xáʼndúún gúyáá xa̱bu̱ bi̱ kúwá mbiʼi xúgi̱.
26 Ma̱ngaa xó má nirígá mbiʼi rí nixtáa Noé, xúʼko̱ má gárígá mbiʼi ndrígóo A̱ʼdióo xa̱biya̱ ma̱ngaa:
27 Xa̱bu̱ nuphiʼtsu, naʼwa̱a̱n, xa̱bekha nunigu̱nʼ ga̱jma̱a̱ gu̱ʼu̱ nunuju̱nʼ... asndu mbiʼi rí Noé nito̱ʼo̱o̱ náa arca, ga̱jma̱a̱ ikhú nixnúu ruʼwambiʼ dí niʼni gámbíin xúgíinʼ.
28 Ma̱ngaa maʼni mbiʼi rí xóo nixtáa Lot. Xa̱bu̱ nuphiʼtsu, naʼwa̱a̱n, nutsi̱, nugujua̱, nudu ga̱jma̱a̱ nuni̱ guʼwá...
29 Mú mbiʼi rí Lot nigájnuu náa Sodoma nijngutígú aguʼ ga̱jma̱a̱ azufre* mekhuíí rí niʼni gámbíin xúgíinʼ.
30 Xúʼko̱ má gánindxu̱u̱ mbiʼi rí A̱ʼdióo xa̱biya̱ makujmaa.
31 Mbiʼi rúʼko̱, bi̱ jngruámuuʼ náa tsu̱du̱u̱ goʼwóo xáta̱ʼa̱a̱ náa goʼwóo maguwíi rí gíʼdoo, xúʼko̱ má bi̱ ni̱jkha̱ xanáá, xátanga̱a̱ kidííʼ mu magu̱u̱ rí niniñuuʼ.
32 Garmáʼáan a̱jkia̱la ku̱ya̱a̱ a̱ʼgiu̱u̱ Lot.
33 Numuu rí asndu tsáá bi̱ gándoo maʼni kríyaminaʼ makhañúu, mú bi̱ gákháñuu makríya̱a̱ʼ.
34 Na̱tala rí mbruʼun rúʼko̱ a̱jmi̱i̱n xa̱bu̱ kubúnʼ náa mbóó xiawoo, mbáa maʼga kiʼyáa, i̱mba̱a̱ maguanáti̱go̱o̱.
35 Makuwíin a̱jmi̱i̱n gu̱ʼu̱ bi̱ jngújmii runu̱ náa mbóó tsi̱nu̱, mbáa maʼga kiʼyáa, i̱mba̱a̱ maguanáti̱go̱o̱”.
36 *
37 Índo̱ ikhiin nidxawíín rígi̱, ikhú nirajxi̱i̱: “Náá mina̱a̱ʼ rá Tátá”. Ikhaa niriʼñúún: “Náa kri̱ga̱a̱ bi̱ nikháñuu, ikhí gágimbíin bi̱yú”.
Mbaʼa nota
^ Náa ajngáa griego naʼthí, “Tátá”.
^ O “xndúrumáʼ”.
^ Gi̱i̱ ajngáa azufre nandoo gáʼthúu̱n xíʼtóo itsí rí gíʼdoo agiuuʼ.
^ Versículo rígi̱ rígá náa tikhuu Biblia, mú nda̱a̱ náa mbaʼa rí nigumaraʼmáʼ náa ajngáa griego.
