Rí niʼnirámáʼ Lucas 18:1-43
-
Xkri̱doo a̱ʼgú xuáʼa̱ bi̱ naʼni gajmá nángi eʼni (1-8)
-
Fariseo ga̱jma̱a̱ bi̱ naruma mbújkho̱o̱ guʼwá ñajunʼ (9-14)
-
Jesús gajmíi̱n e̱ji̱n (15-17)
-
Graxe̱ dí niʼni xa̱bu̱ ñajunʼ bi̱ nigiʼdoo wéñuuʼ (18-30)
-
Jesús natanga̱a̱ naʼthí rí makhañúu (31-34)
-
Nambaʼta̱a̱ iduu mbáa xa̱bu̱ bi̱ na̱nda̱ʼa̱mínúuʼ (35-43)
18 Ikhú nigíʼ mbá xkri̱da ga̱jma̱a̱ numuu dí ndayóoʼ mutajkáan* má xúʼko̱ ga̱jma̱a̱ rí xákawabiinʼ.
2 Niʼthún: “Náa mbá xuajen xtáa mbáa xa̱bu̱ bi̱ naʼnimbánuu xkujndu, tsémiñuu kaʼyoo Dios ni tséʼyamajkhún xa̱bu̱.
3 Ga̱jma̱a̱ ikhí má náa xuajen rúʼko̱ ma̱ngaa xtáa mbáa a̱ʼgú xuáʼa̱ bi̱ na̱jkha̱ gáʼyoo nángi eʼni ga̱jma̱a̱ naʼthúu̱n: ‹Atanimbaníí xkujndu ndrígóʼ ga̱jmu̱ʼ xa̱bu̱ bi̱ gíʼdúún sia̱nʼ›.
4 Nákha ginii ikhaa tándoo gámbáyúu, mú nda̱wa̱á niʼtáminaʼ: ‹Maski ajndu tsémiñuʼ ka̱yo̱o̱ Dios ni má tséyamajkún xa̱bu̱,
5 numuu rí a̱ʼgú xuáʼa̱ bugi̱ tséniñuuʼ raʼni gajmúʼ, ikha jngóo manimbánuu numuu mu xáʼkha̱ gáʼni gajmúʼ nángi eʼni›”.
6 Ga̱jma̱a̱ ikhú Jesús* niʼthí: “Lá ndi̱ya̱a̱ rí niʼthí xa̱bu̱ bi̱ naʼnimbánuu xkujndu, maski ajndu na̱nguá nindxu̱u̱ mbáa xa̱bu̱ májáanʼ ráʼ.
7 Iwáála Dios bi̱ naʼngo̱o̱ a̱jkiu̱u̱n rá. Lá xáʼnimbánuu numún bi̱ ikhaa niraʼwíin, bi̱ nutakáñii mbiʼí mbruʼun mu ikhaa mambáñún xáʼ.
8 Na̱tala dí ikhaa maʼnimbánuu xkujndu ndrígu̱ún mbá nacha̱. Mú, índo̱ gáʼkha̱a̱ A̱ʼdióo xa̱biya̱, lá maxkamaa mbá fe xóo rígi̱ náa tsu̱du̱u̱ ku̱ba̱ʼ xáʼ.”
9 Ma̱ngaa nigíʼ i̱mba̱ xkri̱da rígi̱ náa xa̱bu̱ bi̱ nakumu̱ún dí ikhiin ni̱ndxu̱ún míjíinʼ, ga̱jma̱a̱ dí eʼwíinʼ nda̱a̱ numún.
10 “A̱jmi̱i̱n xa̱bu̱ nitsimún gútajkáan náa guʼwá rí nduyamajkuíí Dios: Mbáa ni̱ndxu̱u̱ fariseo ga̱jma̱a̱ i̱mba̱a̱ bi̱ naruma mbújkho̱o̱ guʼwá ñajunʼ.
11 Ikhú fariseo nitu̱jxu̱u̱ ga̱jma̱a̱ nigíʼdu̱u̱ niʼthí náa a̱jkiu̱u̱n: ‹Oh, Dios, naxna̱a̱ʼla núma̱aʼ numuu rí na̱nguá ni̱ndxu̱ʼ xóo eʼwíinʼ: Xóo bi̱ nuni̱ kuʼwáʼ, bi̱ nuni̱ dí ra̱májánʼ, bi̱ nuni̱ aʼkhá gajmiún eʼwíinʼ..., ni má na̱nguá ni̱ndxu̱ʼ xóo xa̱bu̱ bugi̱ bi̱ naruma mbújkho̱o̱ guʼwá ñajunʼ.
12 Narkuéyiminaʼ* a̱jma̱ nuthu dí mbá xmáná, ma̱ngaa na̱xna̱* dí kaʼyoʼ náa xúgíʼ rí nakhánuʼ›.
13 Mú, bi̱ naruma mbújkho̱o̱ guʼwá ñajunʼ wíji̱ mitsínguánʼ asndu tsíyoo gáyejxiraʼan mekhuíí, ikhaa asndu naxnúu tsoxto̱o̱ naʼthí: ‹Oh, Dios, agáwíinʼ a̱jkia̱a̱nʼ xtayoʼ, numuu rí xa̱bu̱ aʼkhá ni̱ndxu̱ʼ›.
14 Na̱tala dí índo̱ xa̱bu̱ bugi̱ nitanga̱a̱ náa goʼwóo ninindxu̱u̱ itháan jmbii ki xóo bi̱ fariseo. Numuu rí asndu tsáa bi̱ naʼnimbamínáʼ magajnúu gamajkuu, mú bi̱ naʼni wabaminaʼ maguma mba̱a̱”.
15 Mangiin xa̱bu̱ naguwáʼ kudiin e̱jñún mu maʼni tsajkurámiinʼ. Mú, índo̱ xa̱bi̱i̱ ndiyáá rígi̱ nigíʼdi̱i̱ nixpri̱gúún.
16 Mú Jesús ninda̱ʼa̱ dí maguwáʼ kudiin e̱ji̱n náa ikhaa, ga̱jma̱a̱ niʼthí: “Guniʼñúnʼ e̱ji̱n maguwáʼ náa ikhúúnʼ, xúrikúnla. Numuu rí bi̱ ni̱ndxu̱ún xóo ikhiin kaʼñún náa Xa̱bu̱ Ñajunʼ ndrígóo Dios.*
17 Na̱tala gajkhun rí bi̱ xágruiguíi Xa̱bu̱ Ñajunʼ ndrígóo Dios* xóo mbáa ada̱, nditháan xáta̱ʼa̱a̱ ikhí”.
18 Mbáa xa̱bu̱ ñajunʼ judío nirajxu̱u̱: “Maestro májáanʼ, ndiéjunʼ eyóoʼ ma̱ni̱ mu maxtáá kámuu mbiʼi rá.”
19 Jesús niʼthúu̱n: “Náá numuu dí narathúnʼ rí ni̱ndxu̱ʼ mújúúnʼ rá. Nda̱wa̱a̱ i̱mba̱a̱ bi̱ májáanʼ, i̱ndó Dios.
20 Ikháán má natatsinuuʼ xtángoo: Xátani̱ aʼkhá ga̱jma̱a̱ʼ i̱mba̱a̱, xátaxíyáa xa̱bu̱, xátani̱ kuʼwáʼ, xátanigáma, atayamajkuíí ana̱a̱ʼ ga̱jma̱a̱ ru̱dáaʼ”.
21 Ikhú ikhaa niʼthí: “Nanimbánuu má xúgíʼ rígi̱ asndu nákha chíʼgiúnʼ”.
22 Nda̱wa̱á dí Jesús niʼdxuun dí niʼthí, niʼthúu̱n: “Imbóó rí ndayóoʼ matani̱. Ayu̱u̱ʼ gátagujua̱a̱ rí xtaʼdáá ga̱jma̱a̱ araxnúún mbújkha̱a̱ xa̱bu̱ gíníin. Xúʼko̱ maraʼdáá mbá rí gíʼdoo numuu náa mekhuíí, ga̱jma̱a̱ ayi̱ mu mani̱ndxa̱a̱ʼ xa̱bi̱ʼ”.
23 Índo̱ xa̱bu̱ bugi̱ niʼdxuun rígi̱, nixtáa gíná wéñuuʼ numuu dí ra̱ʼkhá tháán gíʼdoo.
24 Jesús niyejxu̱u̱ ga̱jma̱a̱ niʼthí: “¡Mingíjyúuʼ dí xa̱bu̱ bi̱ guáʼdáá wéñuuʼ mbújkha̱a̱ manújngún náa naʼtáñajunʼ Xa̱bu̱ Ñajunʼ ndrígóo Dios!*
25 Itháan ragákhíi rí mbáa camello mato̱ʼo̱o̱ náa iñúuʼ itsu̱ gúxá ki xóo mbáa xa̱bu̱ bi̱ gíʼdoo wéñuuʼ manújngoo náa naʼtáñajunʼ Xa̱bu̱ Ñajunʼ ndrígóo Dios”.*
26 Bi̱ nidxawíín rígi̱, nirajxi̱i̱: “Á mu xúʼko̱, tsáá gáʼngo̱o̱ gákríya̱a̱ʼ rá.”
27 Ikhaa niriʼña: “Mingíjyúuʼ maguma eyáá xa̱bu̱, mú Dios xúgíʼ maʼngo̱o̱ maʼni”.
28 Ikhú Pedro niriʼña: “Ikháanʼ niniʼñánʼxu xúgíʼ mu magúwáʼxu kidxaaʼ”.
29 Ikhaa niʼthún: “Na̱tala gajkhun dí asndu tsáá bi̱ niniñuuʼ goʼwóo, a̱ʼgiu̱u̱, a̱ngui̱i̱n, anu̱u̱, o e̱ji̱i̱n ga̱jma̱a̱ numuu Xa̱bu̱ Ñajunʼ ndrígóo Dios*
30 rí mbiʼi xúgi̱ magruigú itháan ga̱jma̱a̱ nda̱wa̱á* maxtáa kámuu mbiʼi”.
31 Ikhú niguwíin wájíʼ bi̱ mbá Gu̱wi̱i̱nʼ ejmi̱i̱n xa̱bi̱i̱ ga̱jma̱a̱ niʼthún: “Xó má e̱ya̱a̱, kuwáanʼ ratsimulú náa Jerusalén, ga̱jma̱a̱ xúgíʼ rí niniraʼmáʼ profetas* ga̱jma̱a̱ numuu A̱ʼdióo xa̱biya̱ mambanúu.
32 Mbá xkri̱da, muxnajxi̱i̱ náa xa̱bu̱ bi̱ rañájúúnʼ judíos, mutsijmaa, muni̱ gínáa ga̱jma̱a̱ mundujtáaʼ.
33 Nda̱wa̱á rí muxpajtii, muxiyáa, ga̱jma̱a̱ índo̱ gáʼni ajtsú mbiʼi matujxi̱i̱”.*
34 Mú ikhiin tákru̱ʼu̱u̱n ndiéjunʼ eyoo gáʼthúu̱n xúgíʼ rígi̱, numuu rí ikhiin tákánún makru̱ʼu̱u̱n ndiéjunʼ xtáa rajuiʼthá.
35 Índo̱ Jesús xtáa ra̱jkha̱nú Jericó, ikhí gíʼ náa rawuunʼ kamba̱a̱ mbáa xa̱bu̱ bi̱ tsíkruigo̱o̱, bi̱ xtáa randa̱ʼa̱mínúʼ.*
36 Numuu dí niʼdxuun rí mbaʼin xa̱bu̱ kúwá ranújngún, ikhú nirajxi̱ káʼnii xtáa rarígá.
37 Nitháán: “¡Xtáa ranújngoo Jesús bi̱ na̱ʼkha̱ náa Nazaret!”.
38 Índo̱ niʼdxuun, niʼthí gakhi̱i̱: “¡Jesús, A̱ʼdióo David, agáwíinʼ a̱jkia̱a̱nʼ xtayoʼ!”.
39 Mú bi̱ nagún ginuu nigi̱ʼdi̱i̱ nixpriguíí ga̱jma̱a̱ nitháán dí xándxaʼwá. Mú ikhaa itháan gakhi̱i̱ endxa̱ʼwá: “¡A̱ʼdióo David, agáwíinʼ a̱jkia̱a̱nʼ xta̱yo̱ʼ!”.
40 Ikhú Jesús niwi̱ji̱ ga̱jma̱a̱ nikuʼma dí maguwáʼ kuya̱a̱ xa̱bu̱. Índo̱ xa̱bu̱ ni̱ʼkha̱nú mijngii, ikhú Jesús nirajxu̱u̱:
41 “Ndiéjunʼ eyaaʼ ma̱ni̱ ga̱jma̱á numaaʼ rá.” Ikhaa niriʼña: “Tátá, nandoʼ rí matambáʼta̱a̱ iduʼ”.
42 Ikhú Jesús niʼthúu̱n: “Gamba̱ʼta̱a̱ idaaʼ, fe ndrígáaʼ niʼni thanaaʼ”.
43 Núkhu má nimbaʼta̱a̱ iduu ga̱jma̱a̱ ni̱jkha̱ kidxuuʼ Jesús raxnáa núma̱a̱ Dios. Índo̱ xa̱bu̱ ndiyáá rígi̱ mangiin nini̱ mba̱a̱ Dios.
Mbaʼa nota
^ O “muni̱ tsajkuun”.
^ Náa ajngáa griego naʼthí, “Tátá”.
^ O “ndayamiʼchúu”.
^ O “gaʼyee”, “bi̱ nuthi dí marigá”.
^ O “magabi̱i̱”, “mbaʼya̱a̱”.
^ O “randaʼaá dí mi̱khu̱”.
