Rí niʼnirámáʼ Lucas 19:1-48
19 Índo̱ Jesús xtáa ranújngoo náa xuajen Jericó.
2 Ikhí xtáa mbáa xa̱bu̱ bi̱ mbiʼyuu Zaqueo. Bi̱ kayá edxu̱u̱ náa xa̱bu̱ bi̱ nuruma mbújkha̱a̱. Ga̱jma̱a̱ gíʼdoo wéñuuʼ.
3 Xa̱bu̱ bugi̱ ndiyáʼ mbaʼyoo tsáá ñajuunʼ Jesús. Mú, numuu dí ra̱ʼkhá tháán mbaʼin xa̱bu̱ kúwá ga̱jma̱a̱ ikhaa chímbayi̱i̱ʼ na̱nguá eʼngo̱o̱ gáʼyoo.
4 Ikha jngóo wapháá niríyaminaʼ ni̱jkha̱ ga̱jma̱a̱ nitsimuu náa mbá ixi̱* mu mbaʼyoo Jesús, numuu rí inu manújngoo ikhí.
5 Índo̱ ninújngoo ikhí Jesús, niyejxi̱ra̱ʼa̱n náa ixi̱ ga̱jma̱a̱ niʼthúu̱n: “Zaqueo, arajta̱a̱ʼ nacha̱, numuu rí xúgi̱ maguanúʼ náa guʼwáaʼ”.
6 Ikhú nigajta̱a̱ mbá nacha̱, ga̱jma̱a̱ asndu nadxuu nigruiguíi Jesús náa goʼwóo.
7 Índo̱ xa̱bu̱ ndiyáá rígi̱, xúgíinʼ nitanguʼwamíjna̱: “Ni̱jkha̱ gáguanúu náa goʼwóo xa̱bu̱ aʼkhá”.
8 Ikhú Zaqueo nitu̱jxu̱u̱ ga̱jma̱a̱ niʼthúu̱n Jesús:* “Natayáá ráʼ Tátá, maxnu̱u̱n mbá taguapha rí gúʼdoʼ bi̱ gíníin, ga̱jma̱a̱ xúgíʼ rí ni̱ni̱ kuʼwúunʼ eʼwíinʼ ga̱jma̱a̱ nduwaʼ, martanga̱a̱ imbá a̱jkhu̱ xúʼko̱ muda̱a̱”.
9 Ikhú Jesús niʼthí: “Dí mbiʼi xúgi̱ Dios niʼnikríya̱a̱ʼ xa̱bu̱ bugi̱ gajmíi̱n bi̱ kúwá náa goʼwóo numuu rí ma̱ngaa nindxu̱u̱ a̱ʼdióo Abrahán.
10 Numuu rí A̱ʼdióo xa̱biya̱ ni̱ʼkha̱ gáyáaʼ ga̱jma̱a̱ ni̱ʼkha̱ gáʼni kríya̱a̱ʼ rí nindáti̱ga̱”.
11 Índo̱ kúwá rudxawíín rígi̱, ikhú niʼthún i̱mba̱ xkri̱da, numuu rí kúwá mijngii náa Jerusalén ga̱jma̱a̱ numuu rí nakumu̱ún dí Xa̱bu̱ Ñajunʼ ndrígóo Dios* nda̱a̱ tsu̱ma̱ gáʼkha̱.
12 Ikha jngóo niʼthí: “Mbáa xa̱bu̱ bi̱ nindxu̱u̱ a̱ʼdióo rey nigájnuu ni̱jkha̱ mitsínguánʼ mu mbayá ñajunʼ dí mani̱ndxu̱u̱ rey, ga̱jma̱a̱ nda̱wa̱á mata̱nga̱a̱.
13 Ikhú nindxaʼwún mbá gu̱wi̱i̱nʼ ñumbáá bi̱ gíʼdiin ga̱jma̱a̱ nixnúún gu̱wa̱ʼ mina* ma̱ngaa niʼthún: ‹Guñajunʼla ga̱jma̱a̱ asndu índo̱ gátanga̱án›.
14 Mú xa̱bu̱ xuajñuu tsíñún gúyáá, ikha jngóo nixuʼmiin mbá nguéjmi̱i̱n xa̱bu̱ mu muthi: ‹Tsíyuxu dí xa̱bu̱ bugi̱ mani̱ndxu̱u̱ rey náa ikháanʼxu›.
15 Nda̱wa̱á rí nigruigú ñajunʼ dí mani̱ndxu̱u̱ rey nitanga̱a̱, ikhú nigímbíin ñumbáá bi̱ nixnájxu̱u̱n mbújkha̱a̱* mu mbaʼyoo nguáthá niʼngu̱u̱n nida̱a̱ʼ inuu.
16 Ikhú nikuʼmaminaʼ bi̱ timbáa ga̱jma̱a̱ niʼthúu̱n: ‹Tátá ni̱ʼkha̱a̱ imbá gu̱wa̱ʼ inuu mina ndrígáaʼ›.
17 Ikhú rey niʼthúu̱n: ‹¡Májánʼ nitani̱ ñumbáá májáanʼ! Numuu rí nijmañaaʼ nitiejunʼ ga̱jma̱a̱ guáthaá rígi̱, ikha jngóo maratañájuíínʼ mbá gu̱wa̱ʼ xuajen›.
18 Ikhú ni̱ʼkha̱ bi̱ maʼni ragajmi̱i̱n ga̱jma̱a̱ niʼthúu̱n: ‹Tátá, mina ndrígáaʼ ni̱ʼkha̱a̱ imbá witsu inuu›.
19 Ga̱jma̱a̱ xúʼko̱ má niʼthúu̱n bugi̱ ma̱ngaa: ‹Maratañájuiinʼ mbá witsu xuajen›.
20 Mú ni̱ʼkha̱ i̱mba̱a̱ ga̱jma̱a̱ niʼthúu̱n: ‹Tátá, gi̱jyooʼ rígá mina ndrígáaʼ, nimbróʼoo xtíin ga̱jma̱a̱ niyejxíi.
21 Numuu rí nimíñunʼ tani̱, nindxa̱a̱ʼ mbáa xa̱bu̱ bi̱ gakhi̱i̱ a̱jkiu̱u̱n, nada̱a̱ náa tátadríyáʼ ga̱jma̱a̱ narajxi̱i̱ náa tátadu›.
22 Ikhú rey niʼthúu̱n: ‹Ajngáaʼ má eʼthí xú kaʼníín, ñumbáá ra̱májáanʼ nindxa̱a̱ʼ. Á mu natayáá má rí ni̱ndxu̱ʼ mbáa xa̱bu̱ gakhi̱i̱ a̱jkiu̱u̱n, rí na̱gu̱u̱ náa tágruíyáʼ ga̱jma̱a̱ rí nagújxi̱i̱ náa rí tádu.
23 Náá numuu dí tátaxuʼdáaʼ mbújkhoʼ náa banco, mu xúʼko̱ índo̱ gáʼkháaʼ ma̱gu̱u̱ inuu rá.›
24 Ga̱jma̱a̱ ikhú niʼthún bi̱ kúwá ikhí: ‹Gurígú kaʼyííʼla mina ga̱jma̱a̱ guxna̱a̱la bi̱ gíʼdoo gu̱wa̱ʼ mina›.
25 Mú ikhiin nitháán: ‹¡Tátá, ikhaa gíʼdoo má gu̱wa̱ʼ mina!›.
26 Ikhú ikhaa niʼthún: ‹Na̱tala rí asndu tsáa bi̱ gíʼdoo makánáán itháan, mú bi̱ ragíʼdoo, asndu dí gíʼdoo magajta káyííʼ.
27 Ma̱ngaa aguwaʼla kudiin gi̱jyooʼ bi̱ guáʼdúún sia̱nʼ, bi̱ tsíñún rí ikhúúnʼ mani̱ndxu̱ʼ rey náa ikhiin, ga̱jma̱a̱ guradíin náa inuʼ›”.
28 Índo̱ guámbóo niʼthí rígi̱, ikhú ni̱jkha̱ ratsimuu náa Jerusalén.
29 Ga̱jma̱a̱ ni̱jkha̱nú náa kúbá rí mbiʼyuu Olivos náa mijngii Betfagué ga̱jma̱a̱ Betania, ikhú nikuʼmiin a̱jmi̱i̱n xa̱bi̱i̱
30 ga̱jma̱a̱ niʼthún rígi̱: “Aʼguala náa xuajen rí nakujmaa ñuʼún. Índo̱ gáta̱ʼa̱la ikhí, muxkamaa mbáa a̱ʼdá burru bi̱ xóó táriguii nimbáa xa̱bu̱. Gurajkuíiʼla ga̱jma̱a̱ gaguwaʼ kuya̱a̱.
31 Á mu mbáa narajxala, ‹náá numuu dí nurajkuííʼ a̱ʼdá burru rá.› Guta̱a̱nla, ‹majmiuu Tátá›”.
32 Ikhú xa̱bi̱i̱ nigún ga̱jma̱a̱ nixkamaa xó má ikhaa niʼthún.
33 Mú índo̱ kúwá rurajkuííʼ a̱ʼdá burru, ikhú bi̱ búrriu̱u̱ nirajxu̱u̱n: “Náá numuu rajkuííʼ a̱ʼdá búrriuʼ rá.”
34 Ikhú nitháán: “Majmiuu Tátá”.
35 Ikhú nigún kuya̱a̱ náa Jesús, nixtra̱ma̱ʼ xtíñún náa tsu̱du̱u̱ a̱ʼdá burru ga̱jma̱a̱ ikhú Jesús nigriguii.
36 Xóo ejkha̱ xúʼko̱ egún ruxtri̱ga̱ xtíñún náa kamba̱a̱.
37 Índo̱ inu maʼga̱nú náa kamba̱a̱ rí nagajtaa náa kúbá rí mbiʼyuu Olivos, mbá xúgíinʼ xa̱bi̱i̱ ra̱ʼkhá tháán nidxúún, ga̱jma̱a̱ nigíʼdi̱i̱ nini̱ mba̱a̱ Dios ga̱jma̱a̱ aʼwá gakhi̱i̱ ga̱jma̱a̱ numuu xúgíʼ milagro rí ndiyáá niʼni.
38 Nithi: “¡Gaguma tsajkurámaaʼ bi̱ na̱ʼkha̱ xóo Rey ga̱jma̱a̱ mbiʼyuu Jeobá!* ¡Garigá rí tsímáá mekhuíí ga̱jma̱a̱ gaguma mba̱a̱ Dios!”.
39 Mú tikhuun fariseos bi̱ kúwá náa majñúnʼ xa̱bu̱ nitháán: “Maestro, ataxprígún xa̱bia̱a̱ʼ”.
40 Ikhú ikhaa niriʼñúún: “Na̱tala rí á mu ikhiin naguanún wíí, ikhú itsí mundxa̱ʼwa̱”.
41 Índo̱ ni̱jkha̱nú náa mijngii xuajen, ikhú nimbi̱ya̱ʼ ga̱jma̱a̱ numuu,
42 niʼthúu̱n: “Á mú rí ikháán, xúgi̱ niʼnga̱a̱ʼ nidxu̱ʼnú nikrua̱ʼa̱a̱ʼ xú káʼnii nindxu̱u̱ rí maraxtaa tsímáá... Mú ní xándoo gákrua̱ʼa̱a̱ʼ numuu rí warkaʼu.
43 Numuu rí maʼga̱nú mbiʼi rí maguwáʼ bi̱ guáʼdáán sia̱nʼ muruguama̱ʼa̱a̱n ga̱jma̱a̱ ixi̱ kúdú, ga̱jma̱a̱ muni̱ matamíniiʼ.
44 Ikháán gajmiáanʼ xa̱bia̱a̱ʼ mambíin, ga̱jma̱a̱ xáguanúu nimbá itsí náa ikháán, numuu rí táta̱ya̱a̱ mbiʼi rí nijuiʼyáá rí natani̱”.
45 Ikhú nito̱ʼo̱o̱ náa guʼwá rí nduyamajkuíí Dios ga̱jma̱a̱ nixkawíin bi̱ kúwá rugujua̱ ikhí.
46 Niʼthún: “Náa kiʼnirámáʼ naʼthí ‹goʼwóʼ magumbiʼyuu guʼwá náa nutajkáan›,* mú ikháanʼla ninila tsíñún kuʼwáʼ”.
47 Ga̱jma̱a̱ tsejtsí nixtáa raʼsngáa náa guʼwá rí nduyamajkuíí Dios. Mú ndxajkun bi̱ kuya̱ edxu̱u̱ gajmiún bi̱ nusngáa xtángoo, mangiin xabuanii bi̱ guáʼdáá numún náa xuajen nugíʼ muxiyáa.
48 Túxkamaa xóo muxiyáa, numuu rí xúgíinʼ xa̱bu̱ xuajen kúwá xawii mu mudxawíín rí naʼsngáa.
Mbaʼa nota
^ Ixi̱ rígi̱ najmaʼnuuʼ xóo “sicómoro”.
^ Náa ajngáa griego naʼthí, “Tátá”.
^ Náa ajngáa griego naʼthí, “plata”.
^ O “nuni̱ tsajkuun”.
