Rí niʼnirámáʼ Lucas 2:1-52
-
Nagumaa Jesús (1-7)
-
Nakujmiin tikhuun ángeles náa báxtúu (8-20)
-
Nuthu xtóo xuyuuʼ tsáʼkhúun ada̱, naguma ka̱ʼwi̱ín (21-24)
-
Simeón ndaʼyoo Cristo (25-35)
-
Ana naʼthí ga̱jma̱a̱ numuu ada̱ (36-38)
-
José ga̱jma̱a̱ María natangi̱i̱n náa Nazaret (39, 40)
-
Jesús xtáa náa guʼwá rí nduyamajkuíí Dios índo̱ gíʼdoo 12 tsiguuʼ (41-52)
2 Mbiʼi rúʼko̱, César Augusto niʼtáñajunʼ rí mbá xúgíinʼ xa̱bu̱ muxuda̱a̱ʼ mbiʼñún náa inuu i̱yi̱i̱ʼ.
2 (Rígi̱ niguma índo̱ Quirinio xtáa raʼtáñajunʼ náa Siria).
3 Ga̱jma̱a̱ xúgíinʼ nigún gúxuda̱a̱ʼ mbiʼñún, mámbáa ni̱jkha̱a̱ náa xuajñuu.
4 Xúʼko̱ má niʼni José ma̱ngaa. Numuu rí ikhaa na̱ʼkha̱ náa e̱ji̱i̱n David. Nigájnuu náa xuajen Nazaret rí naʼtáñajuunʼ Galilea mu maʼga náa Belén xuajñuu David, rí naʼtáñajuunʼ Judea.
5 Ni̱jkha̱ gákuda̱a̱ʼ mbiʼyuu ga̱jma̱a̱ María,* mú ikhaa inu magiʼdaa ada̱.
6 Índo̱ kúwá ikhí, ni̱jkha̱nú mbiʼi rí magumaa ada̱.
7 Ga̱jma̱a̱ nigiʼdaa timbáa a̱ʼdióo. Nimbráʼaa xtíin ga̱jma̱a̱ nituáʼáan náa napiʼtsumúʼún xujkhúʼ, numuu rí nánguá gáʼchú náa maguanún.
8 Ikhí má náa mbaaʼ rúʼko̱, kúwá báxtúu náa xanáá ga̱jma̱a̱ nuñewu̱u̱n mugiu̱ún rí mbruʼun.
9 Nda̱a̱ tsu̱ma̱ nikujmaa ángel ndrígio̱o̱ Jeobá,* ga̱jma̱a̱ Jeobá* niʼni rí maxpíbiríga̱ náa mbájndi kúwá ikhiin, ikhú nimíñúún wéñuuʼ.
10 Mú ángel niʼthún: “Xámiñala, numuu rí na̱ʼkhá ka̱yo̱ʼ mbá ajngáa rí májánʼ rí maʼni makuwá gagi xúgíinʼ xa̱bu̱ xuajen.
11 Numuu rí xúgi̱ nigumaa mbáa bi̱ maʼni káwáanʼ náa xuajñuu David, bi̱ nindxu̱u̱ Tátá, Cristo.
12 Rígi̱ gánindxu̱u̱ rí ma̱ndoo mbu̱ya̱a̱la. Muxkamaa ada̱ buʼko̱ kambráʼaa xtíin ga̱jma̱a̱ kua̱ʼa̱a̱n náa napiʼtsumúʼún xujkhúʼ”.
13 Nda̱a̱ tsu̱ma̱ nikujmaa ikháá má ángel gajmíi̱n mbaʼin ángeles mekhuíí bi̱ nuni̱ mba̱a̱ Dios ga̱jma̱a̱ nuthi:
14 “Gaguma mba̱a̱ Dios bi̱ xtáa mekhuíí, ga̱jma̱a̱ gakuwá tsímáá xa̱bu̱ bi̱ nuni̱ rí nandoo ikhaa”.
15 Índo̱ ángeles nigúun mekhuíí, báxtúu nitamijná: “Asndu xú káʼnii má. Mbaʼyóoʼ mu̱ʼgua̱ Belén mu mbuʼyáá ndiéjunʼ nirígá, rí Jeobá* niʼni mbuʼyáálu”.
16 Ikhú mbá nacha̱ nigún ga̱jma̱a̱ nixkamaa María ga̱jma̱a̱ José ma̱ngaa ada̱ kua̱ʼa̱a̱n náa nupiʼtsumúʼún xujkhúʼ.
17 Índo̱ ndiyáá rígi̱, ikhú nigíʼdi̱i̱ nithi rí nijuiʼthúún ga̱jma̱a̱ numuu ada̱.
18 Ga̱jma̱a̱ xúgíinʼ bi̱ nidxawíín rí nithi báxtúu ni̱jkha̱ a̱jkiu̱ún ga̱jma̱a̱ rí nithi.
19 Mú María nigíʼdu̱u̱ nigujxi̱i̱ náa a̱jkiu̱u̱n xúgíʼ ajngáa rígi̱ ga̱jma̱a̱ nindxa̱ʼwáminaʼ ndiéjunʼ eyoo gáʼthúu̱n.
20 Ikhú nitangi̱i̱n báxtúu. Numuu rí ndiyáá xó má nijuiʼthún, nigúun runi mba̱a̱ Dios ga̱jma̱a̱ ni̱xna̱a̱ núma̱aʼ numuu xúgíʼ rí ndiyáá ga̱jma̱a̱ rí nidxawíín.
21 Migiñuʼ mbiʼi nda̱wa̱á, índo̱ ni̱jkha̱nú mbiʼi rí mu̱thu̱ xtóo xuyuuʼ tsáʼkhúun ada̱, nixna mbiʼíí Jesús, xó má niʼthí ángel rí magumbiʼyuu nákha xóó tségiwa̱nʼ náa awúu̱n ru̱dúu̱.
22 Índo̱ ni̱jkha̱nú mbiʼi rí munikaʼumijnáa, xó má naʼthí náa Xtángoo rí niʼnirámáʼ Moisés, nitsimún náa xuajen Jerusalén mu muxnajxi̱i̱ ada̱ náa Jeobá.*
23 Xó má kiʼnirámáʼ náa Xtángoo ndrígóo Jeobá:* “Xúgíinʼ jiámá bi̱ e̱jín giʼnuu, manindxu̱ún ndrígio̱o̱ Jeobá”.*
24 Ga̱jma̱a̱ nixnajxi̱ mbá tsigijñaʼ, xó má naʼthí náa Xtángoo ndrígóo Jeobá:* “Ajmi̱i̱n gúgu̱ o a̱jmi̱i̱n ejín paloma”.
25 Mbiʼi rúʼko̱, náa xuajen Jerusalén nixtáa mbáa xa̱bu̱ bi̱ mbiʼyuu Simeón, nindxu̱u̱ mbáa xa̱bu̱ májáanʼ, bi̱ kájxi̱ a̱jkiu̱u̱n maʼni ñajunʼ, ikhaa nigi̱ʼthu̱u̱n rí mixtambáyii Israel, ga̱jma̱a̱ nirígá espíritu santo* náa ikhaa.
26 Ma̱ngaa espíritu santo ndrígóo Dios niʼni rí mbaʼyoo rí xákhañuu asndu índo̱ gáʼyoo bi̱ Jeobá* nikungua̱a̱nʼ.*
27 Ikhú espíritu* nixnúu ikha mu maʼga náa guʼwá rí nduyamajkuíí Dios. Índo̱ anu̱u̱ ga̱jma̱a̱ ru̱dúu̱ Jesús niguwáʼ kuya̱a̱ mu muni̱ ga̱jma̱a̱ numuu rí e̱nda̱ʼa̱ Xtángoo maguma,
28 ikhú Simeón ndiyáraʼaa ada̱ ga̱jma̱a̱ nixnáa núma̱aʼ Dios, ga̱jma̱a̱ niʼthí:
29 “Tátá, ikháán bi̱ nindxa̱a̱ʼ itháan mba̱a̱, rí xúgi̱ rá, natatsíñááʼ rí xa̱bia̱a̱ʼ makhañúu tsímáá, xó má niratá matani̱,
30 numuu rí ndi̱yo̱o̱ má ga̱jma̱a̱ iduʼ bi̱ majmiaaʼ mu matani̱ káwíin xa̱bu̱,
31 bi̱ nitaxúngua̱a̱nʼ mu mbuyáá xúgíinʼ xa̱bu̱ xuajen.
32 Nindxu̱u̱ xóo mbá aguʼ dí marígúu rí tseniñúnʼ mbuyáá xa̱bu̱ ga̱jma̱a̱ ikhaa mani̱ndxu̱u̱ mba̱a̱ náa xuajñaaʼ Israel”.
33 Anu̱u̱ ga̱jma̱a̱ ru̱dúu̱ ada̱ ra̱ʼkhá tháán niʼniún tsiánguá índo̱ nidxawíín rí nithi ga̱jma̱a̱ numuu aʼdiún.
34 Ma̱ngaa Simeón niʼni tsajkurámiinʼ, nda̱wa̱á niʼthúu̱n María ru̱dúu̱ ada̱: “Atadxawíín, ada̱ bugi̱ katsíñánʼ maʼni rí mbaʼin majnguti̱gi̱i̱n ga̱jma̱a̱ mbaʼin maguajxúúnʼ náa Israel, ga̱jma̱a̱ mbaʼin muthi dí raʼkhí ga̱jma̱a̱ numuu maski má Dios masngájma rí xtáa ga̱jma̱á nindxu̱u̱,
35 mu xúʼko̱ makujmaa dí rígá náa a̱jkiu̱ún xa̱bu̱, (ga̱jma̱a̱ ikháán mbá chídí rí mbaʼ mafraʼa ngaín)”.
36 Ma̱ngaa ikhí nixtáa mbáa a̱ʼgú nikhi̱i̱, bi̱ mbiʼyuu Ana, wáxioo Fanuel, bi̱ na̱ʼkha̱ náa e̱ji̱i̱n Aser, ikhaa ninindxu̱u̱ mbáa profetisa.* Índo̱ ninújunʼ káaʼ juwan tsiguʼ nixtáa ga̱jma̱a̱ ajmbio̱o̱,
37 ga̱jma̱a̱ ikhaa nindxu̱u̱ mbáa a̱ʼgú xuáʼa̱, bi̱ gíʼdoo 84 tsiguuʼ. Ikhaa xtáa má xúʼko̱ náa guʼwá rí nduyamajkuíí Dios, ikhaa naʼni ñajuunʼ Dios mbiʼíí mbruʼun, ma̱ngaa narkuéyimina’* ga̱jma̱a̱ naʼtájkáan.*
38 Ikhú má mbiʼi rúʼko̱ nikuʼmaminaʼ náa ikhiin ga̱jma̱a̱ nigíʼdu̱u̱ nixnáa núma̱aʼ Dios, ma̱ngaa nigíʼdu̱u̱ niʼthún xúgíinʼ bi̱ kúwá raguáʼthi̱i̱n rí Dios maʼnikríya̱a̱ʼ Jerusalén ga̱jma̱a̱ numuu ada̱.
39 Índo̱ niguámbu̱u̱n ninimbáníí xúgíʼ rí naʼthí náa Xtángoo ndrígóo Jeobá,* nitangiín náa xuajñún Nazaret rí naʼtáñajuunʼ Galilea.
40 Ada̱ ni̱jkha̱ ragaja̱a̱ ga̱jma̱a̱ nigiʼdoo itháan tsiakii, ni̱jkha̱ rajmañuu itháan ga̱jma̱a̱ Dios nimbáyúu má xúʼko̱.
41 Mámbá tsiguʼ anu̱u̱ ga̱jma̱a̱ ru̱dúu̱ naguʼwún nagún runiriya̱a̱ʼ ndxa̱a̱ Pascua náa xuajen Jerusalén.
42 Índo̱ Jesús nigiʼdoo 12 tsiguuʼ, nigún ndxa̱a̱ náa xuajen Jerusalén xó má eguʼwún nuni̱.
43 Índo̱ nijngoo ndxa̱a̱, ikhú nitangiín, mú Jesús* niguanúu Jerusalén, anu̱u̱ ga̱jma̱a̱ ru̱dúu̱ túyáá.
44 Numuu dí nikumu̱ún rí ada̱ na̱ʼkha̱a̱ náa majñúnʼ xa̱bu̱ bi̱ naguwáánʼ gajmiún, xúʼko̱ niguwáánʼ mbá mbiʼi kamba̱a̱. Ikhú nigíʼdi̱i̱ ndiyáaʼ ada̱ náa majñúnʼ bi̱ kuñún ga̱jma̱a̱ náa eʼwíinʼ xa̱bu̱.
45 Numuu rí túxkama̱a̱ ikha jngóo nitangiín náa xuajen Jerusalén ga̱jma̱a̱ bájndi ndiyáaʼ.
46 Nda̱wa̱á rí nijngoo ajtsú mbiʼi, nixka̱ma̱a̱ náa guʼwá rí nduyamajkuíí Dios, gíʼ náa majñúnʼ bi̱ nusngáa, xtáa raʼdxuun rí nuthi ga̱jma̱a̱ naʼniún graxe̱.
47 Ga̱jma̱a̱ xúgíinʼ bi̱ kúwá rudxawíín naguanún tsiánguá ga̱jma̱a̱ ku̱ma̱ rí gíʼdoo ga̱jma̱a̱ rí xóo nariʼña̱a̱ graxe̱.
48 Índo̱ anu̱u̱ ga̱jma̱a̱ ru̱dúu̱ ndiyáá rígi̱ niʼniún tsiánguá, ga̱jma̱a̱ ru̱dúu̱ niʼthúu̱n: “Náá numuu rí xígi̱ etaniuxu táa,* ra̱ʼkhá tháán nixmiéjunxu tani, asndu náá ndiʼñáanʼxu”.
49 Mú ikhaa niʼthún: “Náá numuu rí nduʼñúunʼla rá. Lá tséya̱a̱ rí ndayóo’ maxtáá náa goʼwóo Anu̱ʼ ráʼ.”
50 Mú ikhiin tákru̱ʼu̱u̱n rí niʼthún.
51 Ikhú nitanga̱a̱ gajmíi̱n náa Nazaret ga̱jma̱a̱ ikhaa niʼnimbo̱o̱ kaʼñún. Ga̱jma̱a̱ ru̱dúu̱ nigujxi̱i̱ náa a̱jkiu̱u̱n xúgíʼ ajngáa rígi̱.
52 Ga̱jma̱a̱ Jesús ni̱jkha̱ ragaja̱a̱, ni̱jkha̱ ragiʼdoo itháan ku̱ma̱ ga̱jma̱a̱ ni̱jkha̱ raʼni rí Dios maʼdxuu a̱jkiu̱u̱n kaʼyoo ga̱jma̱a̱ xúʼko̱ má xa̱bu̱ ma̱ngaa.
Mbaʼa nota
^ O “ndiyáa xó má nimbánuu ga̱jma̱a̱ José”.
^ Náa ajngáa griego naʼthí, “Cristo”.
^ O “xi̱ʼ”.
^ O “gaʼyee”, “bi̱ naʼthí dí marigá”.
^ O “ndaʼyamiʼchúu”.
^ O “naʼni tsajkuun”.
^ Náa ajngáa griego naʼthí, “ada̱ Jesús”.
^ O “a̱ʼdióʼ”.
