Rí niʼnirámáʼ Lucas 23:1-56
23 Ikhú xúgíinʼ xa̱bu̱ niguájxu̱ ga̱jma̱a̱ nigún kuya̱a̱ Jesús náa inuu Pilato.
2 Ikhú nigíʼdi̱i̱ nini̱ tsu̱di̱i̱. Nithi: “Nixkamaaxu xa̱bu̱ bugi̱ naʼnijngi̱i̱n xa̱bu̱ xuajñuxu, ma̱ngaa naʼthí dí ragíʼmaa miʼni numáá mbújkha̱a̱ náa César ga̱jma̱a̱ naʼthí rí ikhaa mina̱a̱ʼ nindxu̱u̱ Cristo, mbáa rey”.
3 Ikhú Pilato nirajxu̱u̱: “Lá ikháán nindxa̱a̱ʼ rey ndrígu̱ún judíos ráʼ.” Ikhú ikhaa niriʼña̱a̱: “Xúʼko̱, ikháán má rathá”.
4 Ikhú Pilato niʼthún ndxajkun bi̱ kuya̱ edxu̱u̱ ga̱jma̱a̱ xa̱bu̱ bi̱ mbaʼin: “Ikhúúnʼ tséxkamaa nimbá aʼkhúun xa̱bu̱ bugi̱”.
5 Mú ikhiin nithi má xúʼko̱: “Naʼnijngi̱i̱n xa̱bu̱ xuajen ga̱jma̱a̱ rí naʼsngáa náa xúgíʼ mbayuuʼ Judea, nigíʼdu̱u̱ náa Galilea ga̱jma̱a̱ ni̱ʼkha̱nú asndu gi̱i̱”.
6 Índo̱ Pilato niʼdxuun rígi̱, nirajxi̱ á mu xa̱bu̱ bugi̱ na̱ʼkha̱ náa Galilea.
7 Índo̱ ndiʼyoo rí Herodes xtáa raʼtáñajunʼ náa mbaaʼ rúʼko̱, ikhú nikungua̱a̱nʼ náa Herodes bi̱ ma̱ngaa xtáa náa xuajen Jerusalén mbiʼi rúʼko̱.
8 Índo̱ Herodes ndiʼyoo Jesús, nidxuu wéñuuʼ. Numuu rí niʼnííʼ má eyoo mbaʼyoo, numuu dí mbaʼa dí niʼdxuun ga̱jma̱a̱ numuu ikhaa, ga̱jma̱a̱ gíʼthu̱u̱n rí maʼni mbá milagro.
9 Ikhú ikhaa nigíʼdu̱u̱ niʼniuu mbaʼa graxe̱, mú Jesús nditháan táriʼña.
10 Mú ndxajkun bi̱ kuya̱ edxu̱u̱ gajmiún bi̱ nusngáa xtángoo tséniña̱a̱ʼ runi̱ tsu̱di̱i̱.
11 Ikhú Herodes gajmíi̱n soldados ndrígio̱o̱ nditháan táʼndúún gúyáá ga̱jma̱a̱ nitsijmaa ma̱ngaa nixnáá magíʼ mbá xtíin dí mitsaanʼ. Ikhú nikuʼma̱a̱ nákhi náa Pilato.
12 Mbiʼi má rúʼko̱ Herodes ga̱jma̱a̱ Pilato nimbájxi̱ín, numuu dí nákha ginii guáʼdámíjná sia̱nʼ.
13 Ikhú Pilato nigímbíin ndxajkun bi̱ kuya̱ edxu̱u̱, xa̱bu̱ ñajunʼ ga̱jma̱a̱ xa̱bu̱ xuajen,
14 ga̱jma̱a̱ niʼthún: “Ikháanʼ niguwaʼ kuya̱a̱ xa̱bu̱ bugi̱, nu̱ta̱ dí ikhaa naʼni dí xúnimbu̱ún xa̱bu̱ xuajen náa inún xa̱bu̱ ñajunʼ. Mú náa inala má nirajxu̱u̱ ga̱jma̱a̱ táxkamaa nimbá aʼkhúun xóo dí ikháanʼ etha̱la.
15 Ma̱ngaa asndu Herodes táxkamaa nimbá, numuu dí nirtanga̱a̱ nákhi náa ikháanʼxu. Gu̱ya̱a̱ xa̱bu̱ bugi̱ táʼni nimbá mu makhañúu.
16 Mú maxpajtíi ga̱jma̱a̱ nda̱wa̱á maniʼñúuʼ maʼga̱a̱”.
17 *
18 Ikhú xa̱bu̱ nindxa̱ʼwa̱ gakhi̱i̱: “¡Ataxíyáa xa̱bu̱ bugi̱, ga̱jma̱a̱ atani̱ dí magajnáa Barrabás!”.
19 (Xa̱bu̱ bugi̱ nixuda̱a̱ʼ náa guʼwá e̱jua̱nʼ numuu rí nikujximínáʼ náa inún xa̱bu̱ ñajunʼ náa xuajen má rúʼko̱ ma̱ngaa numuu rí nigudíin xa̱bu̱).
20 Pilato niʼthún mbu̱júu̱ʼ numuu rí nindoo maʼnikríyaaʼ Jesús.
21 Ikhú ikhiin nigíʼdi̱i̱ nindxa̱ʼwa̱: “¡Giʼdujmaa náa ixi̱! ¡Giʼdujmaa náa ixi̱!”.
22 Rí maʼni ragajtsú nuthu ikhaa niʼthí: “Mú, náá numuu rá. Ndiéjunʼ dí raʼkhí niʼni xa̱bu̱ bugi̱ rá. Ikhúúnʼ táxkamaa nditháan aʼkhúun mu makhañúu. Ikha jngóo, maxpajtíi ga̱jma̱a̱ nda̱wa̱á maniʼñúuʼ maʼga̱a̱”.
23 Ikhiin túniña̱a̱nʼ rundxa̱ʼwa̱ dí miʼdujmaa náa ixi̱, ga̱jma̱a̱ nimbánuu má dí nithi ikhiin.
24 Ikhú Pilato niʼtáñajunʼ dí maguma xóo nandún ikhiin.
25 Niríya̱a̱ʼ xa̱bu̱ bi̱ ikhiin nindúún magajnáa, bi̱ nixuda̱a̱ʼ numuu dí ikhaa nikujximínáʼ náa inún xa̱bu̱ ñajunʼ ma̱ngaa ga̱jma̱a̱ numuu dí nigudíin xa̱bu̱. Mú nixnájxi̱i̱ Jesús mu muni̱i̱ xó ma eñún ikhiin.
26 Índo̱ egún kuya̱a̱ Jesús, nirajtuwiin mbáa xa̱bu̱ bi̱ na̱ʼkha̱a̱ xanáá, ikhaa mbiʼyuu Simón bi̱ na̱ʼkha̱ náa Cirene. Ga̱jma̱a̱ nixnáá magu̱ ixi̱* náa rí makhañúu Jesús, ma̱ngaa dí maʼga rawi̱ji̱ kidxuuʼ.
27 Mbaʼin xa̱bu̱ egún kidxuuʼ, mangiin gu̱ʼu̱ bi̱ nagún rumbi̱ya̱ʼ* ga̱jma̱a̱ nagáwiinʼ a̱jkiu̱ún kuyáá.
28 Jesús nitangayii náa gu̱ʼu̱ ga̱jma̱a̱ niʼthún: “Waʼxiinʼ Jerusalén, guniʼñáánʼ rumbi̱ya̱ʼ ga̱jma̱á numuʼ. Gumbi̱ya̱ʼ ga̱jma̱á numala ma̱ngaa ga̱jma̱a̱ numún e̱jña̱la,
29 numuu rí na̱jkha̱nú mbiʼi rí majuiʼthá: ‹¡Tsímáá kúwá gu̱ʼu̱ bi̱ túguaʼdiin e̱ji̱n, ga̱jma̱a̱ bi̱ túxníxúún’ e̱jñún!›.
30 Ikhú mutha̱a̱nla kúbá ‹¡Atarkaʼwáanʼxu!› ga̱jma̱a̱ bíjní ‹¡Atruguaruwáanʼxu!›.
31 Á mu nu̱ni̱ rígi̱ índo̱ xóó maxaʼ ixi̱, ndiéjunʼ lá gárígá índo̱ gújndooʼ rá.”
32 Ma̱ngaa nigún kudiin a̱jmi̱i̱n xa̱bu̱, bi̱ ra̱míjíinʼ mu miʼdujmii gajmíi̱n.
33 Índo̱ niguánú náa mbaaʼ rí mbiʼyuu itsu̱ edxu̱u̱ wajinʼ, nidujmaa gajmíi̱n xa̱bu̱ ra̱míjíinʼ: Mbáa náa níjniú mújúunʼ ga̱jma̱a̱ i̱mba̱a̱ náa níjniú xti̱yu̱u̱ʼ.
34 Mú Jesús niʼthí: “Anu̱ʼ atani̱ mba̱a̱ a̱jkia̱a̱nʼ xtañún numuu dí tséyáá dí eni̱”. Ma̱ngaa niri̱ya̱ʼ suerte* mu mbuyáá tsáa gáguanúu ga̱jma̱a̱ xtíñuu.
35 Ga̱jma̱a̱ xa̱bu̱ kúwá ruyáá. Mú xa̱bu̱ ñajunʼ asndu nubajngaa edxu̱ún ga̱jma̱a̱ nuthi: “Niʼni káwíin eʼwíinʼ, gaʼnikríyaminaʼ á mu ikhaa nindxu̱u̱ Cristo, bi̱ Dios ndiyáaʼ”.
36 Asndu soldados nanduʼwajmaa ma̱ngaa nuxuʼmamijná mijngii náa ikhaa mu muxnaraʼá vino miga̱ʼ
37 ga̱jma̱a̱ nitháán: “Á mu ikháán nindxa̱a̱ʼ rey ndrígu̱ún judíos, atanikríyaminaʼ”.
38 Ma̱ngaa náa edxu̱u̱ ixi̱ rí nidujmaa, nidujma náa naʼthí: “Bugi̱ nindxu̱u̱ rey ndrígu̱ún judíos”.
39 Ikhú mbáa bi̱ ra̱májáanʼ bi̱ kiʼdujmaa níjniúu nigíʼdu̱u̱ nitsíjmaa ga̱jma̱a̱ niʼthúu̱n: “Lá raʼkháa ikháán ñajuaanʼ Cristo ráʼ. ¡Atanikríyaminaʼ ikháán ga̱jma̱a̱ atani̱ káwáanʼxu mangáanʼ!”.
40 Índo̱ i̱mba̱a̱ bi̱ nijuaʼdujmaa niʼdxuun rígi̱, nixprígúu: “Lá tsémíñaaʼ xtayáá Dios xúgi̱ rí mangáán natamíniiʼ ráʼ.
41 Ikháanʼlú kuwáanʼ rumíniiʼ ga̱jma̱a̱ numuu rí ni̱ʼni̱ dí ra̱májánʼ, mú xa̱bu̱ bugi̱ táʼni nimbá dí ra̱májánʼ”.
42 Ikhú niʼthí: “Jesús, garmáʼáan a̱jkia̱a̱nʼ xtayoʼ índo̱ gáratañájunʼ”.
43 Ikhú ikhaa niriʼñuu: “Asndu xúgi̱ má e̱tha̱a̱nʼ: Maraxtaa ga̱jma̱á ni̱ndxu̱ʼ náa ku̱ba̱ʼ mitsaanʼ”.
44 Maski má itháan maʼni a las 12 dí wakhaʼ, asndu xóo itháan maʼni las 3 dí wakíʼ niʼni krína náa xúgíʼ ku̱ba̱ʼ rúʼko̱,
45 numuu rí nikháñuu a̱jkha̱ʼ. Ikhú cortina rí frájkha náa guʼwá rí nduyamajkuíí Dios nitungaa ta̱pha̱.
46 Ga̱jma̱a̱ Jesús nindxa̱ʼwá gakhi̱i̱: “¡Anu̱ʼ náa ñawáanʼ eniʼñúnʼ espíritu* ndrígóʼ!”. Nda̱wa̱á rí niʼthí rígi̱, nikháñuu.
47 Índo̱ xa̱bu̱ bi̱ naʼtáñajúúnʼ soldados ndiʼyoo dí nirígá, nigíʼdu̱u̱ niʼni mba̱a̱ Dios ga̱jma̱a̱ ajngáa rígi̱: “Gajkhun rí xa̱bu̱ bugi̱ nda̱a̱ aʼkhúun”.
48 Ga̱jma̱a̱ índo̱ xúgíinʼ xa̱bu̱ bi̱ kúwá ikhí ndiyáá dí nirígá, asndu nuxnáá tsu̱xtu̱ún nitangi̱ín náa guʼwún.
49 Xúgíinʼ bi̱ nuniʼniiʼ Jesús guájun mitsínguánʼ. Ma̱ngaa ikhí guájun gu̱ʼu̱ bi̱ nigún kidxuuʼ Jesús asndu nákha nigájnuu náa Galilea.
50 Ga̱jma̱a̱ ikhí xtáa mbáa xa̱bu̱ bi̱ májáanʼ ga̱jma̱a̱ jmbii bi̱ mbiʼyuu José, ikhaa nindxu̱u̱ mbáa xa̱bu̱ ede̱.*
51 (Xa̱bu̱ bugi̱ táyambáá náa awan rí niri̱ya̱ʼ ni má táyambáá náa rí nini̱). Ikhaa na̱ʼkha̱ náa Arimatea, mbá xuajen dí rígá náa Judea, ma̱ngaa gíʼthu̱u̱n rí maʼtáñajunʼ Xa̱bu̱ Ñajunʼ ndrígóo Dios.*
52 Ikhaa ni̱jkha̱ náa Pilato mu manda̱ʼa̱a̱ xuyuuʼ Jesús.
53 Ga̱jma̱a̱ nirígúu xuyuuʼ Jesús, nimbráʼaa ga̱jma̱a̱ mbá xtíin rí májánʼ rí niguma ga̱jma̱a̱ lino. Nda̱wa̱á niʼdi̱i̱ náa iñúuʼ itsí rí ikhaa má niʼni, náa nimbáa xóó tájuiʼdi̱i̱.
54 Mbiʼi rúʼko̱ nagumaratáá, ga̱jma̱a̱ inu mbayáa sábado.*
55 Gu̱ʼu̱ bi̱ niguwáʼ gajmiún Jesús asndu nákhi náa Galilea mangiin nigún asndu ikhí. Ga̱jma̱a̱ ndiyáá xú káʼnii nixuda̱ʼ xuyuuʼ Jesús náa iñá wajinʼ.
56 Nda̱wa̱á nitangi̱ín mu muni̱ májáánʼ iná rí ndataun rí ninda̱wa̱a̱ʼ ga̱jma̱a̱ aceite. Mú ndiya̱a̱ xu̱únʼ mbiʼi sábado xó má naʼthí náa xtángoo.
Mbaʼa nota
^ Versículo rígi̱ rígá náa tikhuu Biblia, mú nda̱a̱ náa mbaʼa rí nigumaraʼmáʼ náa ajngáa griego.
^ Náa ajngáa griego naʼthí, “nuxnáá tsu̱xtu̱ún”.
