Rí niʼnirámáʼ Lucas 24:1-53
24 Timbá mbiʼi rí ndayáa xmáná, gu̱ʼu̱ nigún miʼcha̱ wéñuuʼ náa iñá wajinʼ. Nigún kuñu̱u̱ iná rí ndataun rí ninda̱wa̱a̱ʼ ga̱jma̱a̱ aceite.
2 Mú ndiyáá rí nirmbijxi̱ itsí dí kúgoo ga̱jma̱a̱ iñá wajinʼ,
3 ga̱jma̱a̱ índo̱ nitu̱ʼu̱u̱n ndiyáá rí nándáa xuyuuʼ Jesús.
4 Índo̱ gu̱ʼu̱ ndiyáá rígi̱ niʼniún tsiánguá ga̱jma̱a̱ nánguá ndiyáá rí muni̱, nda̱a̱ tsu̱ma̱ nikujmiin a̱jmi̱i̱n xa̱bu̱ kugíʼ xtíin rí naxpíbiʼ náa níjniún.
5 Ikhiin nimíñúún ga̱jma̱a̱ niyejxi̱rigú mbayííʼ. Ikhú xa̱bu̱ nithi: “Náá numuu rí nduʼyáaʼ náa majñúnʼ bi̱ nikháñuu mbáa bi̱ ndaʼya rá.
6 Nda̱wa̱a̱ gi̱i̱, nigabi̱i̱* má. Garmáʼáan a̱jkia̱la rí niʼtála nákha kuwáanʼ gajmiála náa Galilea.
7 Niʼtála rí A̱ʼdióo xa̱biya̱ ndiyóoʼ rí mixnájxi̱i̱ náa ñawúúnʼ xa̱bu̱ aʼkhá ga̱jma̱a̱ rí miʼdujmaa náa ixi̱, mú índo̱ gáʼni ajtsú mbiʼi, magabi̱i̱”.*
8 Ikhú nirmáʼáan a̱jkiu̱ún rí niʼthí Jesús.
9 Nda̱wa̱á nigájnaán náa iñá wajinʼ ga̱jma̱a̱ nitangi̱ín gúthún xúgíʼ rígi̱ bi̱ mbá Gu̱wi̱i̱nʼ i̱mbi̱i̱n ga̱jma̱a̱ eʼwíinʼ.
10 Gu̱ʼu̱ bugi̱ ninindxu̱u̱ María Magdalena, Juana ga̱jma̱a̱ María ru̱dúu̱ Santiago. Ma̱ngaa eʼwíinʼ gu̱ʼu̱ bi̱ nikúwá gajmiún nithúún rígi̱ apóstoles.
11 Mú ikhiin nikumu̱ún rí mbaʼ ethíí gu̱ʼu̱, ikha jngóo túnimbu̱ún kuñún.
12 Mú Pedro nitu̱jxu̱u̱ ga̱jma̱a̱ ni̱jkha̱ ragáyúu náa iñá wajinʼ, índo̱ niyejxi̱ra̱ʼa̱, i̱ndó xtíin lino tra̱ʼa̱ ndiʼyoo. Ikha jngóo nitanga̱a̱ ga̱jma̱a̱ nirajximínáʼ ndiéjunʼ nirígá.
13 Ga̱jma̱a̱ ikhú má mbiʼi rúʼko̱, a̱jmi̱i̱n xa̱bi̱i̱ kúwá ragún náa xuajen Emaús, rí gíʼ mbá 11 kilómetro* náa Jerusalén.
14 Ga̱jma̱a̱ nagún rutamíjná ga̱jma̱a̱ numuu xúgíʼ dí nirígá.
15 Índo̱ ikhiin kúwá ragún ga̱jma̱a̱ kúwá rutamíjná rígi̱, ikhú Jesús nikuʼmaminaʼ ga̱jma̱a̱ ni̱jkha̱ gajmíi̱n,
16 ikhiin ndiyáá, mú túninuwiinʼ.
17 Ikhaa nirajxu̱u̱n: “Ndiéjunʼ e̱jkua̱ rutamíjnála rá.” Ikhiin gíná inún niguájun.
18 Ikhú bi̱ mbiʼyuu Cleopas niriʼñuu: “Lá xa̱bu̱ na̱ʼkha̱á nindxa̱a̱ʼ bi̱ xtáa mbáwíí náa Jerusalén ráʼ. Lá tsératamíjná ga̱jma̱a̱ʼ nimbáa rí táta̱ya̱a̱ dí nirígá náa mbiʼi rí nijngoo ráʼ.”
19 Ikhú niʼthún: “Dí nirígá rá.” Ikhú ikhiin niriʼña̱a̱: “Dí nigíʼnuu Jesús bi̱ na̱ʼkha̱ náa Nazaret, bi̱ nisngájma kaʼwu náa inuu Dios ga̱jma̱a̱ náa inún xa̱bu̱ rí ninindxu̱u̱ mbáa profeta* bi̱ gíʼdoo tsiakii ga̱jma̱a̱ rí naʼni ma̱ngaa rí naʼthí.
20 Ndxajkun bi̱ kuya̱ edxu̱u̱ ga̱jma̱a̱ xa̱bu̱ bi̱ nutañajunʼ náa xuajñuxu nixnajxi̱i̱ mu muxiyáa ga̱jma̱a̱ rí miʼdujmaa náa ixi̱.
21 Mú ikháanʼ niguaʼti̱i̱nxu rí ikhaa gánindxu̱u̱ bi̱ maʼnikríyaaʼ Israel. Naʼni má ajtsú mbiʼi dí nirígá xúgíʼ rígi̱.
22 Ma̱ngaa tikhuun gu̱ʼu̱ bi̱ kúwá náa ikháanʼxu ninimiñúxu, numuu rí miʼcha̱ nigún náa iñá wajinʼ.
23 Mú túxkamaa xuyuuʼ Jesús, ikhú niguwáa̱nʼ gúthi rí ndiñún tikhuun ángeles bi̱ nithúún rí ikhaa ndaʼya.
24 Ikhú nigún tikhuun bi̱ kúwi̱i̱n ga̱jma̱á ni̱ndxu̱xu̱ʼ náa iñá wajinʼ ga̱jma̱a̱ ndiyáá xó má nithi gu̱ʼu̱. Mú túyáá Jesús”.
25 Ga̱jma̱a̱ ikhaa niʼthún: “Náá numuu rí gújkhúʼ wéñuuʼ a̱jkia̱la* ga̱jma̱a̱ tsíyoo gíkruaʼala mbá nacha̱ xúgíʼ rí nithi profetas rá.
26 Lá táʼyóoʼ rí Cristo mamínuuʼ mu maguma mba̱a̱ ráʼ.”
27 Ga̱jma̱a̱ ikhaa nigíʼdu̱u̱ niʼsngúún xúgíʼ rí naʼthí náa Kiʼniraʼmáʼ ga̱jma̱a̱ numuu ikhaa, nigíʼdu̱u̱ ga̱jma̱a̱ rí niʼnirámáʼ Moisés ga̱jma̱a̱ dí niniraʼmáʼ xúgíinʼ profetas.
28 Índo̱ niguánú náa xuajen rí egún, ikhú ikhaa niʼni rí xóo tsínguánʼ ejkha̱.
29 Mú ikhiin nitsudaa rí maguanúu. Nitháán: “Aguanáaʼ ga̱jma̱á ni̱ndxu̱xu̱ʼ, numuu rí wakíʼ má, ga̱jma̱a̱ itháán maʼni kríná”. Ikha jngóo, ikhaa niguanúu gajmíi̱n.
30 Índo̱ xtáa rakuiʼtsu gajmíi̱n, niguajthun mbá pan, niʼtájkáan ga̱jma̱a̱ nikuíʼtá, ikhú nixnúún mu̱phu̱.
31 Ikhú nininuwiin’, mú mbá nacha̱ túyáá náa ni̱jkha̱.
32 Ga̱jma̱a̱ ikhú nigi̱ʼdi̱i̱ nitamíjná: “Lá raʼkháa asndu xóo aguʼ nirmáʼan náa a̱jkiu̱lú índo̱ ni̱ʼkha̱ raʼtúlú kamba̱a̱, ga̱jma̱a̱ índo̱ ni̱ʼkha̱ raʼtúlú kaʼwu rí na̱ʼkha̱ raʼthí náa Kiʼniraʼmáʼ xáʼ.”
33 Núkhu má nitujxu̱u̱n ga̱jma̱a̱ nitangi̱ín náa xuajen Jerusalén, náa ndiñún bi̱ mbá Gu̱wi̱i̱nʼ i̱mbi̱i̱n ga̱jma̱a̱ bi̱ kúwá gajmiún,
34 bi̱ nithi: “¡Gajkhun rí Jesús* nigabi̱i̱,* numuu rí nisngájmaminaʼ náa Simón!”.
35 Ikhú ikhiin nithi rí ndiyáá náa kamba̱a̱, ga̱jma̱a̱ xú káʼnii nininuwiinʼ índo̱ nikuíʼtá pan.
36 Índo̱ ikhiin kúwá ruthi rígi̱, ikhú Jesús niwi̱ji̱ náa taphu̱ún ikhiin ga̱jma̱a̱ niʼthún: “Tsímáá gákuwáanʼla”.
37 Mú nixúwúnʼ ga̱jma̱a̱ nimíñúún wéñuuʼ, nikumu̱ún rí kúwá ruyáá mbáa ángel.*
38 Ikha jngóo niʼthún: “Náá numuu rí namíñálá rá. Náá numuu rí nuni̱ a̱jma̱ a̱jkia̱la.
39 Guxkajmúún, gu̱ya̱a̱ ñawúnʼ ga̱jma̱a̱ rajkúʼ mbu̱ya̱a̱. Ikhúúnʼ ñajunʼ. Numuu dí mbáa ángel ragíʼdoo xuyuuʼ ni má itsu̱u̱ xó má rí ndu̱ya̱a̱ gúʼdoo ikhúúnʼ”.
40 Índo̱ xtáa raʼthí rígi̱, ikhú nisngájmúún ñawúunʼ ga̱jma̱a̱ rajkúu.
41 Índo̱ ikhiin kaʼnííʼ xóó tsíyoo gúnimbu̱ún, numuu dí ra̱ʼkhá tháán edxún ga̱jma̱a̱ naʼniún tsiánguá, ikhú ikhaa nirajxu̱u̱n: “Lá kuaʼdáá tháan rí mu̱ʼphu ráʼ.”
42 Ikhú nixniáá mbáa e̱gi̱ʼ nigui̱i̱ʼ.
43 Ikhaa nigruiguíi ga̱jma̱a̱ niʼkhu̱u̱ náa inún ikhiin.
44 Ikhú niʼthún: “Rígi̱ rí ni̱tala nákha xóó xtáá ga̱jma̱á nindxa̱laʼ: Rí xúgíʼ rí kiʼniraʼmáʼ ga̱jma̱a̱ numuʼ ikhúúnʼ náa Xtángoo ndrígóo Moisés, rí nithi profetas ga̱jma̱a̱ rí kiʼniraʼmáʼ náa Salmos ndiyóoʼ rí mambanúu”.
45 Ikhú nimbáñún mu makru̱ʼu̱u̱n májánʼ rí na̱ʼkha̱ raʼthí náa Kiʼniraʼmáʼ
46 ga̱jma̱a̱ niʼthún: “Rígi̱ rí naʼthí náa kiʼniraʼmáʼ: Rí Cristo mamínuuʼ ga̱jma̱a̱ rí matujxi̱i̱ náa majñúnʼ wajinʼ índo̱ gáʼni ajtsú mbiʼi
47 ma̱ngaa rí ga̱jma̱a̱ numuu mbiʼyuu, majuiʼtáraʼa mu mata̱nga̱a̱ a̱jkiu̱ún xa̱bu̱ náa aʼkhúún náa xúgíʼ xuajen, mú magi̱ʼdu̱u̱ náa Jerusalén.
48 Ikháanʼ gíʼmaa mu̱tala rí ndiya̱a̱.
49 Ga̱jma̱a̱ gu̱ya̱a̱la rí ikhúúnʼ makuʼmá náa ikháanʼla rí Anu̱ʼ nikudaminaʼ maxnála. Mú gaguanála náa xuajen asndu índo̱ gúndrígú tsiakii rí na̱ʼkha̱ rijma̱a̱”.
50 Ikhú ni̱jkha̱ kagui̱i̱n asndu náa Betania, nikujxi̱ ñawúunʼ ga̱jma̱a̱ niʼni tsajkurámiinʼ.
51 Índo̱ ikhaa xtáa raʼni tsajkurámiinʼ, niʼni tsínguminaʼ náa ikhiin ga̱jma̱a̱ ni̱jkha̱a̱ kiʼyáa mekhuíí.
52 Ikhiin nismbati̱gu̱u̱n náa inuu, ga̱jma̱a̱ asndu nadxún nitangiín Jerusalén.
53 Ga̱jma̱a̱ nikúwá má xúʼko̱ runi̱ mba̱a̱ Dios náa goʼwóo.*
Mbaʼa nota
^ O “nitujxi̱i̱”, “ndiʼya̱a̱”.
^ O “matujxi̱i̱”, “mbaʼya̱a̱”.
^ O “gaʼyee”, “bi̱ naʼthí dí marigá”.
^ O “ámiala”.
^ Náa ajngáa griego naʼthí, “Tátá”.
^ O “nitujxi̱i̱”, “ndiʼya̱a̱”.
^ Náa ajngáa griego naʼthí, “espíritu”.
^ O “náa guʼwá rí nduyamajkuíí Dios”.
