Rí niʼnirámáʼ Lucas 8:1-56
-
Gu̱ʼu̱ bi̱ nagún gajmiún Jesús (1-3)
-
Xkri̱da ndrígóo bi̱ naʼdu (4-8)
-
Jesús naʼsngáa ga̱jma̱a̱ xkri̱da (9, 10)
-
Rí nandoo gáʼthúu̱n xkri̱da ndrígóo bi̱ naʼdu (11-15)
-
Nimbáa tsérugoo aguʼ (16-18)
-
Ru̱dúu̱ Jesús gajmíi̱n a̱ngui̱i̱n (19-21)
-
Jesús naxprígúu mbá giñán mbiʼ (22-25)
-
Nakuʼmiin giñán xkawi̱i̱nʼ matu̱ʼu̱u̱n náa a̱ga (26-39)
-
Wáxioo Jairo; mbáa a̱ʼgu̱ nixkajma xtíñuu Jesús (40-56)
8 Nguáthá mbiʼi nda̱wa̱á, ikhaa ni̱jkha̱ náa mámbá xuajen mba̱ʼu̱ ga̱jma̱a̱ náa xuajen majkhaʼ. Ni̱jkha̱ raʼtáraʼa ajngáa rí májánʼ ga̱jma̱a̱ numuu Xa̱bu̱ Ñajunʼ ndrígóo Dios.* Ni̱jkha̱ gajmíi̱n bi̱ mbá Gu̱wi̱i̱nʼ ejmi̱i̱n,
2 ma̱ngaa nigún tikhuun gu̱ʼu̱ bi̱ niguma thanún ga̱jma̱a̱ nandii rí guáʼdáá mangiin bi̱ niguáʼdiin giñán xkawi̱i̱nʼ:* María, bi̱ nutháán Magdalena, bi̱ nigiʼdiin mbá juwiin giñán xkawi̱i̱nʼ,*
3 Juana a̱ʼgiu̱u̱ Cuza, bi̱ nañewu̱u̱n goʼwóo Herodes, Susana ga̱jma̱a̱ eʼwíinʼ gu̱ʼu̱, bi̱ najmún rí guáʼdáá mu mumbañún.
4 Índo̱ nigimbíin mbaʼin xa̱bu̱ gajmiún bi̱ nagún má xúʼko̱ kidxuuʼ índo̱ na̱jkha̱ náa mámbá xuajen, ikhú nijmuu xkri̱da rígi̱ mu maʼsngúún:
5 “Mbáa xa̱bu̱ ni̱jkha̱ gáʼdu tsígáʼ, índo̱ ikhaa ni̱jkha̱ raʼdu, tikhuu tsígáʼ nijngutígú náa rawuunʼ kamba̱a̱ ga̱jma̱a̱ nijnguprigu̱u̱n, ikhú ñu̱ʼu̱ bi̱ jngruigu̱u̱n rijma̱a̱ ni̱ʼphu̱.
6 Tikhuu nijngutígú náa rígá itsí, numuu rí na̱nguá jmañu̱u̱ʼ, ikha jngóo tájyúuʼ nijndooʼ índo̱ nikráʼáan.
7 I̱ʼwáʼ nijngutígú náa majñu̱u̱ʼ tsuwanʼ, índo̱ tsuwanʼ ndiʼya, ikhú tsígáʼ nikájxu̱u̱ʼ.*
8 Mú i̱ʼwáʼ nijngutígú náa ku̱ba̱ʼ májánʼ, nda̱wa̱á rí nikráʼáan, rúʼko̱ rí nigu̱ májánʼ tsígooʼ. Nigu̱ itháan rí mbá 100 ki xóo rí nijuiʼdu”. Índo̱ guámbóo niʼthí rígi̱, niʼthún: “¡Bi̱ gíʼdoo cháʼwuun, gagíʼ edxu̱u̱ maʼdxuun!”.
9 Mú xa̱bi̱i̱ nirajxi̱i̱ ndiéjunʼ eyoo gáʼthúu̱n xkri̱da rígi̱.
10 Ikhaa niʼthún: “Ikháanʼ nikánála makrua̱ʼa̱la̱ ngu̱ʼwa̱ rí mitsúʼkháan dí rígá náa Xa̱bu̱ Ñajunʼ ndrígóo Dios.* Mú eʼwíinʼ mbawíí má xkri̱da ejuiʼsngúún ga̱jma̱a̱, numuu rí maski má ajndu nuyejxi̱, xúyáá, maski má nudxawíín, xákru̱ʼu̱u̱n.
11 Rígi̱ eyoo gáʼthúu̱n xkri̱da. Tsígáʼ nandoo gáʼthúu̱n ajngá rawuunʼ Dios.
12 Rí nijngutígú náa rawuunʼ kamba̱a̱, ni̱ndxu̱ún bi̱ nudxawíín ajngá rawuunʼ Dios, mú mbá nacha̱ na̱ʼkha̱ Gixa̱a̱ ga̱jma̱a̱ naguwíi ajngáa rí nijuiʼdu náa a̱jkiu̱ún* mu xúnimbu̱u̱n ga̱jma̱a̱ xákáwíin.
13 Rí nijngutígú náa rígá itsí, bugi̱ ni̱ndxu̱ún bi̱ nudxawíín ajngáa ma̱ngaa nundrigú ga̱jma̱a̱ gagi. Numuu rí tséjkha̱ mi̱jnu̱ʼ ajmu̱u̱. Mbá xngaa enimbu̱ún, mú índo̱ na̱ʼkha̱nú gamiéjunʼ, nuniña̱a̱ʼ.
14 Tsígáʼ rí nijngutígú náa majñu̱u̱ʼ tsuwanʼ ni̱ndxu̱ún bi̱ nudxawíín ajngóo Dios, mú numuu rí nuniñami̱jna̱ maxmiéjúúnʼ wéñuuʼ, manigu̱u̱nʼ maguaʼdáá itháan, muni̱ gagimijná ga̱jma̱a̱ dí rígá, rúʼko̱ naʼni rí ajngáa makájxu̱u̱ʼ, ga̱jma̱a̱ nánguá ejma̱a̱ rí májánʼ náa ikhiin.
15 Rí nijngutígú náa ku̱ba̱ʼ májánʼ, ni̱ndxu̱ún bi̱ nudxawíín ajngóo Dios ga̱jma̱a̱ mbá a̱jkiu̱ún kájxi̱, nugida̱ʼ náa edxu̱ún ma̱ngaa najma̱a̱ rí májánʼ náa ikhiin ga̱jma̱a̱ naʼngu̱u̱n maski má narígá xkujndu.
16 Nimbáa tséskámuu aguʼ mu magídáʼ náa agoo rayaʼ o magídáʼ náa agoo xiawoo. Natsrigu náa mitsídánʼ mu xúgíinʼ bi̱ gátu̱ʼu̱u̱n mambiʼñún.
17 Numuu rí nda̱a̱ nimbá dí rígá ngo̱ʼo̱o̱ dí xáʼga̱nú makujmaa ni má dí gíwánʼ ngu̱ʼwa̱ rí xáʼga̱nú maʼni pa̱jnu mbóo mbiʼi.
18 Ikha jngóo, gudxawíín májánʼ rí na̱tala, numuu rí bi̱ gíʼdoo makánáán itháan. Mú bi̱ ragíʼdoo magajta káyííʼ asndu dí naku̱mu̱u̱ rí gíʼdoo”.
19 Ikhú ru̱dúu̱ ga̱jma̱a̱ gua̱ʼti̱i̱n niguwáʼ gúyáá mú tándoo gáguánú náa ikhaa numuu rí kúwá mbaʼin wéñuuʼ xa̱bu̱.
20 Ikha jngóo nitháán: “Ru̱dáa̱ʼ ga̱jma̱a̱ guaʼtia̱a̱nʼ guájun rexa̱a̱, nandún mbuyaaʼ”.
21 Ikhaa niriʼñúún: “Ru̱dúʼ ga̱jma̱a̱ a̱ngui̱nʼ ni̱ndxu̱ún bugi̱ bi̱ nudxawíín ajngóo Dios ga̱jma̱a̱ nugíʼ nunimbáníí”.
22 Mbóo mbiʼi, ikhaa nitsimuu gajmíi̱n xa̱bi̱i̱ náa barco ga̱jma̱a̱ niʼthún: “Gakidáanʼlú náa i̱mba̱ ridoo iyaʼ”. Ikhú nikidiin.
23 Índo̱ kúwá rakidiin, Jesús niʼgu. Ikhú nixnúu mbá giñán mbiʼ ga̱jma̱a̱ nigíʼdu̱u̱ nijnííʼ iyaʼ náa barco rí asndu nigíʼ marmáʼán.
24 Ikha jngóo nigún gúxkajui̱i̱ ga̱jma̱a̱ nitháán: “¡Maestro! ¡Maestro! ¡Makhañúlú rá!”. Ikhú nitujxu̱u̱ ga̱jma̱a̱ nixprígúu giñánʼ ma̱ngaa lamáa. Ikhú niwi̱ji̱i̱ raxnúu giñánʼ ga̱jma̱a̱ lamáa niwi̱ji̱i̱ rajmangu̱u̱ʼ.
25 Ikhú nirajxu̱u̱n: “Náá ni̱jkha̱ fe ndrígála rá.” Mú ikhiin nimíñúún wéñuuʼ ga̱jma̱a̱ niʼniún tsiánguá, ikha jngóo nitamijná: “Tsáá phú nindxu̱u̱ xa̱bu̱ bugi̱. Asndu giñánʼ ga̱jma̱a̱ lamáa nunimbu̱ún kuyáá”.
26 Ikhú niguánú náa mbaaʼ rí kaʼyoo Gerasa náa ridoo Galilea.
27 Índo̱ Jesús nigajta̱a̱ náa barco, náa xuajen rúʼko̱ ni̱ʼkha̱ gáraʼnuu mbáa xa̱bu̱ bi̱ gíʼdaa giñán xkawi̱i̱ʼ.* Niʼni má rí nánguá egíʼ xtíñuu ga̱jma̱a̱ nánguá xtáa náa mbá guʼwá, xtáa náa najuaʼdíín wajinʼ.
28 Índo̱ ndiʼyoo Jesús, nindxa̱ʼwá gakhi̱i̱ ga̱jma̱a̱ nismbáti̱go̱o̱ inuu, ikhú niʼthí xígú: “A̱ʼdióo Dios bi̱ phú mba̱a̱, náá numuu rí na̱dxa̱ʼ náa ikhúúnʼ rá. Natakáñaaʼ rí xátani̱ gínún”.
29 Numuu rí Jesús nixtáa raʼthúu̱n giñán xkawi̱i̱ʼ* rí magajnáa náa xa̱bu̱. Mbaʼa nuthu giñán xkawi̱i̱ʼ* naʼniuu xa̱bu̱ maʼni xó má eyoo, mbaʼa nuthu má niruʼwa̱a̱ ga̱jma̱a̱ cadena ma̱ngaa ajua̱nʼ náa ñawúunʼ ga̱jma̱a̱ rajkhúu ma̱ngaa nijngawii má xúʼko̱, mú ikhaa naxkuʼtujngaa xúgíʼ, ga̱jma̱a̱ xa̱bu̱ wéñiiʼ naʼniuu maʼga tsínguánʼ.
30 Jesús nirajxu̱u̱: “Xú káʼnii mbiʼyaaʼ”. Ikhaa niʼthí: “Legión”. Numuu rí mbaʼin xa̱bu̱ wéñiiʼ nitu̱ʼu̱u̱n náa ikhaa.
31 Ga̱jma̱a̱ nitakáñii rí xákuʼmiin magún náa iñá mbiʼ.
32 Ga̱jma̱a̱ ikhí má náa kúbá gríguiin ruphiʼtsu mbaʼin a̱ga, ikha jngóo nitakáñíí rí maniñúúnʼ matu̱ʼu̱u̱n náa a̱ga. Ga̱jma̱a̱ ikhaa niniñúúnʼ matu̱ʼu̱u̱n.
33 Ikhú xa̱bu̱ wéñiiʼ nigájnaán náa xa̱bu̱ ga̱jma̱a̱ nita̱ʼa̱án náa a̱ga ikhú a̱ga nijngutíguíin náa mitsídánʼ, nijnguíʼíin náa lamáa ga̱jma̱a̱ nikháñúún.
34 Índo̱ xa̱bu̱ bi̱ nuñawu̱u̱n a̱ga ndiyáá dí nirígá, ikhú ningujuíin ragáñún. Nigún gúthún xa̱bu̱ bi̱ kúwá náa xuajen ga̱jma̱a̱ bi̱ kúwá náa rawuunʼ xuajen.
35 Ikhú xa̱bu̱ nigún gúyáá rí nirígá. Índo̱ niguánú náa xtáa Jesús, ndiyáá xa̱bu̱ bi̱ nigiʼdiin xa̱bu̱ wéñiiʼ, kagúwuunʼ xtíñuu, niʼni̱i̱ a̱jkiu̱u̱n ga̱jma̱a̱ gíʼ náa níjñúu rajkhúu Jesús. Ikhú xa̱bu̱ nimíñúún wéñuuʼ.
36 Bi̱ ndiyáá rí nirígá nithi xóo niʼni̱i̱ a̱jkiu̱u̱n bi̱ nigiʼdiin giñán xkawi̱i̱nʼ.*
37 Ga̱jma̱a̱ mbaʼin xa̱bu̱ bi̱ kúwá náa i̱ʼwáʼ xuajen náa mbaaʼ rí kaʼyoo Gerasa, nitháán Jesús rí maʼga̱a̱ numuu rí nimíñúún wéñuuʼ. Ikhú ikhaa nitsimuu náa barco mu maʼga̱a̱.
38 Bi̱ nigiʼdiin xa̱bu̱ wéñiiʼ niʼni káñuu Jesús rí maniñuuʼ maʼga ga̱jma̱a̱, mú Jesús niʼtángawuu ga̱jma̱a̱ niʼthúu̱n:
39 “Ayu̱u̱ʼ guʼwáaʼ ga̱jma̱a̱ arathún xúgíinʼ rí niʼni Dios ga̱jma̱a̱ numaaʼ”. Ikhú, ikhaa ni̱jkha̱a̱ raʼthí náa xúgíʼ xuajen rí Jesús niʼni ga̱jma̱a̱ numuu.
40 Índo̱ Jesús nitanga̱a̱, xa̱bu̱ nindriguíi májánʼ, numuu rí xúgíinʼ má kúwá raguáʼti̱i̱n ma̱ʼkha̱a̱.
41 Ikhú ni̱ʼkha̱ mbáa xa̱bu̱ bi̱ mbiʼyuu Jairo, bi̱ kayá edxu̱u̱ náa guʼwá rí bi̱ judíos nuxnáá gamajkhu Dios. Nismbáti̱go̱o̱ náa Jesús ga̱jma̱a̱ niʼtákáñuu rí maʼga náa goʼwóo,
42 numuu rí wáxioo* bi̱ gíʼdoo 12 tsiguuʼ, na̱jkha̱ rakháñuu.
Índo̱ Jesús xtáa ra̱jkha̱ kamba̱a̱ mbaʼin xa̱bu̱ nuxujmbi̱i̱.
43 Ikhí ejkha̱ mbáa a̱ʼgu̱ ma̱ngaa, bi̱ naʼni má mbá 12 tsiguʼ rí naʼniuu eʼdi mbiʼ. Ga̱jma̱a̱ nimbáa tséʼngo̱o̱ gáʼni thanuu.
44 Ikhú ni̱ʼkha̱ kidxuuʼ Jesús ga̱jma̱a̱ nixkajma rawuunʼ xtíñuu, núkhu niwi̱ji̱i̱ raʼniuu eʼdi mbiʼ.
45 Mú Jesús nirajxi̱: “Tsáá nixkajma xtíñúʼ rá.” Mú xúgíinʼ xa̱bu̱ bi̱ nagún ikhí nithi rí na̱nguá, ikhú Pedro niʼthúu̱n: “Maestro, mbaʼin xa̱bu̱ egún kidxaaʼ, ikhiin nixujmbi̱i̱n”.
46 Mú Jesús niʼthí: “Xtáa mbáa bi̱ nixkajmúún, numuu rí niku̱mu̱ʼ dí nigájnuu tsiakii ndrígóʼ”.
47 Índo̱ a̱ʼgu̱ ni̱jkha̱nú ndiʼyoo rí nikujmaa rí niʼni, ikhú asndu niguáʼaan ni̱ʼkha̱ gásmbáti̱go̱o̱ inuu Jesús ga̱jma̱a̱ niʼthí náa inún xúgíinʼ xa̱bu̱ náá numuu rí nigujtuun xtíñuu, ga̱jma̱a̱ rí núkhu niguma tanáá.
48 Mú ikhaa niʼthúu̱n: “Wáxioʼ, fe ndrígáaʼ niʼni thanaaʼ, ayu̱u̱ʼ tsímáá rá”.
49 Índo̱ ikhaa xóó xtáa raʼthí, mbáa xa̱bu̱ bi̱ xtáa náa goʼwóo Jairo ni̱ʼkha̱ gáʼthúu̱n: “Nikháñuu má wáxiaaʼ. Ní xátani̱ gajmáá Maestro”.
50 Índo̱ Jesús niʼdxuun rígi̱, ikhú niʼthúu̱n Jairo: “Xámíñáaʼ, i̱ndó araʼdáá fe ga̱jma̱a̱ maʼni̱i̱ má a̱jkiu̱u̱n wáxiaaʼ”.
51 Índo̱ ni̱jkha̱nú náa goʼwóo, i̱ndó nito̱ʼo̱o̱ ga̱jma̱a̱ Pedro, Juan, Santiago, anu̱u̱ dxáʼgú ga̱jma̱a̱ ru̱dúu̱.
52 Xúgíinʼ xa̱bu̱ kúwá rumbi̱ya̱ʼ ga̱jma̱a̱ nuxnáá tsu̱xtu̱ún numuu rí nikháñuu wáxá. Ikhú ikhaa niʼthí: “Ní xúmbi̱ya̱ʼ numuu rí tákhañuu, i̱ndó xtáa raʼgu”.
53 Índo̱ nidxawíín rígi̱ ikhú nitsijmaa, numuu rí ndiyáá rí dxáʼgú nikháñuu.
54 Mú ikhaa nigujtuun ñawúunʼ dxáʼgú ga̱jma̱a̱ niʼthúu̱n: “Dxáʼgú, ¡arajxu̱u̱nʼ!”.
55 Ikhú dxáʼgú nirmáʼáan a̱jkiu̱u̱n* ga̱jma̱a̱ nitujxi̱i̱, ikhú Jesús niʼthún dí muxnáá rí mi̱khu̱.
56 Anu̱u̱ ga̱jma̱a̱ ru̱dúu̱ dxáʼgú ra̱ʼkhá tháán nidxúún, mú ikhaa niʼthún rí xútháán nimbáa dí nirígá.
Mbaʼa nota
^ O “giñán guéenʼ”.
^ O “giñán guéenʼ”.
^ O “nikáʼdu̱u̱”.
^ O “ámiuún”.
^ O “giñán guéenʼ”.
^ O “giñán guéenʼ”.
^ O “giñán guéenʼ”.
^ Náa ajngáa griego naʼthí, “a̱ʼdá mbáwíí”.
