Rí niʼnirámáʼ Marcos 10:1-52
-
Rí nudamijná ga̱jma̱a̱ rí nuniñamijnáá (1-12)
-
Jesús niʼni tsajkurámiinʼ e̱ji̱n (13-16)
-
Rí niraxi̱ mbáa xa̱bu̱ bi̱ gíʼdoo wéñuuʼ (17-25)
-
Guniʼñáánʼ xúgíʼ mu muʼgua kidxuuʼ Jesús (26-31)
-
Jesús naʼthí mbu̱júu̱ rí makhañúu (32-34)
-
Rí ninda̱ʼa̱ Santiago ga̱jma̱a̱ Juan (35-45)
-
Jesús niʼnikáwíin mbaʼin xa̱bu̱ (45)
-
-
Jesús naʼni thanuu Bartimeo bi̱ tsíkruigo̱o̱ (46-52)
10 Índo̱ nigájnáa ikhí, ni̱jkha̱ náa naguámbári̱go̱o̱ mbayuuʼ Judea, náa i̱mba̱ ridoo mañu Jordán. Niwi̱i̱n mbu̱júu̱ʼ mbaʼin xa̱bu̱ mbájndi náa ikhaa. Nigíʼdu̱u̱ niʼsngúún xó má eguʼwuun eʼni.
2 Ikhú tikhuun fariseos nigún gúyáá mu mbuyáá xú káʼnii gáʼthí ga̱jma̱a̱ nirajxi̱i̱ á mu ma̱ndoo maniña̱a̱ʼ* a̱ʼgiu̱u̱ mbáa xa̱bu̱.
3 Ikhaa niriʼñúún: “Ndiéjunʼ rí niʼtáñájuanla mu̱ni̱ Moisés rá.”
4 Ikhiin nithi: “Moisés niniñuuʼ rí xa̱biya̱ maxnúu i̱yi̱i̱ʼ a̱ʼgiu̱u̱ náa naʼthí rí naniña̱a̱nʼ ga̱jma̱a̱ maʼthúu̱n maʼga̱a̱”.
5 Ikhú Jesús niʼthún: “Moisés niʼnirámáʼ kiʼtáñajunʼ rígi̱ numuu rí migújkhúʼ a̱jkia̱la.
6 Mú nákha nigíʼdu̱u̱ nirígá xúgíʼ, Dios ‹niʼnii xa̱biya̱ ga̱jma̱a̱ a̱ʼgu̱›.
7 ‹Ikha jngóo xa̱biya̱ maniñuuʼ anu̱u̱ ga̱jma̱a̱ ru̱dúu̱,
8 ga̱jma̱a̱ nájmi̱i̱n mani̱ndxu̱ún mbóó xuwiʼ›, ikha jngóo nánguá ni̱ndxu̱ún a̱jmi̱i̱n, naʼni̱i̱ imbawíí xa̱bu̱.
9 Rí niruwaa Dios, xárkuájiiʼ nimbáa xa̱bu̱”.
10 Índo̱ nitangi̱i̱n guʼwáá, xa̱bi̱i̱ nigíʼdi̱i̱ nirajxi̱i̱ ga̱jma̱a̱ numuu rígi̱.
11 Ikhaa niʼthún: “Asndu tsáa bi̱ naniña̱a̱nʼ a̱ʼgiu̱u̱ ga̱jma̱a̱ ndayáa i̱mba̱a̱, nakiéʼkúun náa bi̱ ndiyáa ginii ga̱jma̱a̱ naʼni rí makudaminaʼ aʼkhá.
12 Xúʼko̱ má, á mu a̱ʼgu̱ naniña̱a̱nʼ ajmbio̱o̱* ga̱jma̱a̱ ndayáa i̱mba̱a̱, ma̱ngaa nakudaminaʼ aʼkhá”.
13 Ikhú xa̱bu̱ niguwáʼ kudiin e̱ji̱n mu Jesús maʼni tsajkurámiinʼ, mú xa̱bi̱i̱ nixpri̱gúún.
14 Índo̱ Jesús ndiʼyoo rígi̱, nikiʼnáa ga̱jma̱a̱ niʼthún: “Guniʼñúnʼ e̱ji̱n maguwáʼ náa ikhúúnʼ, xúrikhúnla. Numuu rí bi̱ ni̱ndxu̱ún xóo ikhiin kaʼñún náa Xa̱bu̱ Ñajunʼ ndrígóo Dios.*
15 Na̱tala gajkhun rí bi̱ xágruiguíi Xa̱bu̱ Ñajunʼ ndrígóo Dios* xóo mbáa ada̱, nditháan xáta̱ʼa̱a̱ ikhí”.
16 Ga̱jma̱a̱ ikhú niguriʼin ga̱jma̱a̱ nigíʼdu̱u̱ niʼni tsajkurámiinʼ índo̱ nixkrámiinʼ.
17 Índo̱ xtáa ra̱jkha̱ kamba̱a̱, mbáa xa̱biya̱ ni̱ʼkha̱ ragáyúu ga̱jma̱a̱ nismbáti̱go̱o̱ inuu, ikhú nirajxu̱u̱: “Maestro májáanʼ, ndiéjunʼ eyóoʼ ma̱ni̱ mu maxtáá kámuu mbiʼi rá.”
18 Jesús niʼthúu̱n: “Náá numuu dí narathúnʼ rí ni̱ndxu̱ʼ mújúúnʼ rá. Nda̱wa̱a̱ i̱mba̱a̱ bi̱ májáanʼ, i̱ndó Dios.
19 Ikháán má natatsinuuʼ xtángoo: Xátaxíyáa xa̱bu̱, xátani̱ aʼkhá ga̱jma̱a̱ʼ i̱mba̱a̱, xátani̱ kuʼwáʼ, xátanigáma, xátani̱ nduwaʼ, atayamajkuíí ana̱a̱ʼ ga̱jma̱a̱ ru̱dáaʼ”.
20 Ikhú xa̱bu̱ niʼthí: “Maestro, nanimbánuu má xúgíʼ rígi̱ asndu nákha chíʼgiúnʼ”.
21 Jesús niyejxu̱u̱ ga̱jma̱a̱ nigáwiinʼ a̱jkiu̱u̱n kaʼyoo, ikhú niʼthúu̱n: “Imbóó rí ndayóoʼ matani̱. Ayu̱u̱ʼ gátagujua̱a̱ rí xtaʼdáá ga̱jma̱a̱ araxnúún mbújkha̱a̱ xa̱bu̱ gíníin. Xúʼko̱ maraʼdáá mbá rí gíʼdoo numuu náa mekhuíí, ga̱jma̱a̱ ayi̱ mu mani̱ndxa̱a̱ʼ xa̱bi̱ʼ”.
22 Mú índo̱ niʼdxuun rígi̱ xa̱bu̱, nijmáa a̱jkiu̱u̱n ga̱jma̱a̱ ni̱jkha̱a̱ gíná numuu dí ra̱ʼkhá tháán gíʼdoo.
23 Nda̱wa̱á rí Jesús niyejxi̱ mbájndi, niʼthún xa̱bi̱i̱: “¡Mingíjyúuʼ gáʼni rí mbáa bi̱ gíʼdoo mbújkha̱a̱ mato̱ʼo̱o̱ náa naʼtáñajunʼ Xa̱bu̱ Ñajunʼ ndrígóo Dios!”.*
24 Mú xa̱bi̱i̱ niʼniún tsiánguá ga̱jma̱a̱ rí niʼthí. Ikhú Jesús niʼthún: “E̱ji̱nʼ, ¡mingíjyúuʼ wéñuuʼ rí mbáa mato̱ʼo̱o̱ náa Xa̱bu̱ Ñajunʼ ndrígóo Dios!*
25 Itháan ragákhi̱i̱ rí mbáa camello mato̱ʼo̱o̱ náa iñúuʼ itsu̱ gúxá ki xóo mbáa xa̱bu̱ bi̱ gíʼdoo wéñuuʼ manújngoo náa naʼtáñajunʼ Xa̱bu̱ Ñajunʼ ndrígóo Dios”.*
26 Rúʼko̱ niʼniún itháan tsiánguá, ikha jngóo nitháán:* “Á mu xúʼko̱, tsáá gáʼngo̱o̱ gákríya̱a̱ʼ rá.”
27 Ikhú Jesús niyejxu̱u̱n ga̱jma̱a̱ niʼthún: “Xúgíʼ má rakáʼnii marigá eyáá xa̱bu̱ numbaaʼ, mú Dios na̱nguá eʼyoo xúʼko̱, numuu rí Dios xúgíʼ maʼngo̱o̱ maʼni”.
28 Ikhú Pedro niʼthúu̱n: “Natayáá májánʼ má rí ikháanʼ niniʼñánʼxu xúgíʼ mu magúwáʼxu kidxaaʼ”.
29 Jesús niʼthún: “Na̱tala gajkhun rí asndu tsáa bi̱ niniñuuʼ goʼwóo, a̱ngui̱i̱n, anu̱u̱, ru̱dúu̱, e̱ji̱i̱n o mbayuuʼ ga̱jma̱a̱ numuʼ ma̱ngaa ga̱jma̱a̱ numuu ajngáa rí májánʼ,
30 rí mbiʼi xúgi̱ magruigúu mbá 100 nuthu itháan, goʼwóo, a̱ngui̱i̱n, anu̱u̱, ru̱dúu̱, e̱ji̱i̱n o mbayuuʼ, maski ajndu maguma gínáa, ga̱jma̱a̱ nda̱wa̱á,* maxtáa kámuu mbiʼi.
31 Mú mbaʼin bi̱ guájun ginuu maguanún asndu kidííʼ,* ga̱jma̱a̱ mbaʼin bi̱ guájun kidííʼ maguajún ginuu”.
32 Índo̱ kúwá ragún náa kamba̱a̱ rí natsimuu Jerusalén. Jesús na̱jkha̱ ginii mú xa̱bi̱i̱ nagún kidxuuʼ ga̱jma̱a̱ asndu naʼniún tsiánguá, mú mangiin bi̱ naguwáʼ kidíiʼ nimíñúún. Mbu̱júu̱ʼ niguwíin kaníí bi̱ mbá Gu̱wi̱i̱nʼ ejmi̱i̱n ga̱jma̱a̱ niʼni marmáʼáan a̱jkiu̱ún ndiéjunʼ rí inu magíʼnuu.
33 Niʼthún: “Xó má e̱ya̱a̱, kuwáanʼ ratsimulú náa Jerusalén, ikhí A̱ʼdióo xa̱biya̱ mixnájxi̱i̱ náa ndxajkun bi̱ kuya̱ edxu̱u̱ ga̱jma̱a̱ bi̱ nusngáa xtángoo. Muthi rí makhañúu ga̱jma̱a̱ mixnájxi̱i̱ náa ñawúúnʼ xa̱bu̱ bi̱ rañájúúnʼ judíos.
34 Ikhiin mutsijmaa, mundujtáaʼ, muxpajtii ga̱jma̱a̱ muxiyáa, mú índo̱ gáʼni ajtsú mbiʼi matujxi̱i̱”.*
35 Santiago ga̱jma̱a̱ Juan, bi̱ a̱jmi̱i̱n e̱ji̱i̱n Zebedeo niguwáʼ kanuu ga̱jma̱a̱ nitháán: “Maestro, nanduxu rí matani̱ ga̱jma̱á numuxu rí gúnda̱ʼa̱ʼ”.
36 Ikhú nirajxu̱u̱n: “Ndiéjunʼ rí eyala ma̱ni̱ ga̱jma̱a̱ numala rá.”
37 Ikhiin nitháán: “Atatsíñuxu rí mutrigáanʼ ga̱jma̱á nindxa̱a̱ʼ náa gáratañájunʼ, mbáa gági̱ʼi̱ náa níjñu májáanʼ ga̱jma̱a̱ i̱mba̱a̱ gági̱ʼi̱ náa níjñu xti̱ya̱a̱ʼ”.
38 Mú Jesús niʼthún: “Tséya̱a̱ rí kuwáanʼ runda̱ʼa̱la. Lá maʼngala muwa̱a̱n rí ga̱jnu̱ʼ náa copa rí xtáá raga̱nʼ. Lá maʼngala muraʼníí rí xtáá ragíʼnuʼ ráʼ.”*
39 Ikhiin niriʼña: “Majmáanʼxu”. Ikhú Jesús niʼthún: “Ikháanʼ ma̱ndoo muwa̱a̱nla rí ka̱jnu̱ʼ náa copa rí xtáá raga̱nʼ ga̱jma̱a̱ muraʼníí rí xtáá ragíʼnuʼ.
40 Mú ikhúúnʼ rakáʼyoʼ ma̱ta̱ tsíin gátrigi̱i̱n náa níjniú mújúnʼ ga̱jma̱a̱ náa níjniú xti̱yu̱ʼ. Dios gáraʼwíin bi̱ matri̱gi̱i̱n ikhí”.
41 Índo̱ bi̱ mbá gu̱wi̱i̱nʼ nidxawíín rígi̱, nikíʼníin kuyáá Santiago ga̱jma̱a̱ Juan.
42 Mú Jesús nigímbíin mbá xúgíinʼ ga̱jma̱a̱ niʼthún: “Ikháanʼ má ndu̱ya̱a̱la rí xa̱bu̱ ñajunʼ nuni̱i̱ xuajen asndu xó má eñún ga̱jma̱a̱ xa̱bu̱ bi̱ guáʼdáá numún najmún tsiakii ndrígu̱ún mu muthún xa̱bu̱ ndiéjunʼ gíʼmaa muni̱.
43 Mú ragíʼmaa ma’ni xúʼko̱ náa ikháanʼla. Bi̱ nandoo magiʼdoo numuu náa ikháanʼla gíʼmaa rí mambáñun eʼwíinʼ.
44 Bi̱ nandoo mani̱ndxu̱u̱ giʼnii náa ikháanʼla gíʼmaa mani̱ndxu̱u̱ ñumbáá náa eʼwíinʼ.
45 Numuu rí asndu A̱ʼdióo xa̱biya̱ táʼkha̱ mu muni̱ mbáʼwi̱i̱, ni̱ʼkha̱ mu maʼni mbáʼwi̱i̱n eʼwíinʼ ga̱jma̱a̱ maxnájximinaʼ mu maʼnikáwíin mbaʼin xa̱bu̱”.
46 Ikhú nitu̱ʼu̱u̱n náa xuajen Jericó. Índo̱ Jesús gajmíi̱n xa̱bi̱i̱ nigájnaán náa xuajen rúʼko̱ gajmíi̱n mbaʼin xa̱bu̱, Bartimeo bi̱ tsíkruigo̱o̱, a̱ʼdióo Timeo, gíʼ ra̱nda̱ʼa̱ mbújkha̱a̱ náa rawuunʼ kamba̱a̱
47 Índo̱ niʼdxawun rí Jesús bi̱ na̱ʼkha̱ náa Nazaret xtáa ranújngoo, nigíʼdu̱u̱ nindxa̱ʼwá: “¡Jesús, A̱ʼdióo David, agáwíinʼ a̱jkia̱a̱nʼ xta̱yo̱ʼ!”.
48 Ikhú mbaʼin nitháán rí ni xándxaʼwá mú ikhaa itháan gakhi̱i̱ nindxa̱ʼwá: “¡A̱ʼdióo David, agáwíinʼ a̱jkia̱a̱nʼ xta̱yo̱ʼ!”.
49 Ikhú Jesús niwi̱ji̱ ga̱jma̱a̱ niʼthún: “Gutha̱a̱n rí ma̱ʼkha̱ gi̱i̱”. Ikhú ikhiin nitháán bi̱ tsíkruigo̱o̱: “¡Xámiñaʼ! Atujxa̱a̱ʼ, nandxa̱ʼwáaʼ”.
50 Ikhí niniñátígú xtíin rí kambráʼaa, ikhú ikhaa mbá nacha̱ nitu̱jxu̱u̱ mu maʼga náa wíji̱ Jesús.
51 Ikhú Jesús nirajxu̱u̱: “Ndiéjunʼ eyaaʼ ma̱ni̱ ga̱jma̱á numaaʼ rá.” Bi̱ tsíkruigo̱o̱ niʼthí: “Rabbóni,* nandoʼ rí matambáʼta̱a̱ iduʼ”.
52 Jesús niʼthúu̱n: “Ayu̱u̱ʼ, fe ndrígáaʼ niʼni thanaaʼ”. Núkhu má nimbaʼta̱a̱ iduu xa̱bu̱ ga̱jma̱a̱ nigíʼdu̱u̱ ni̱jkha̱ kidxuuʼ.
Mbaʼa nota
^ O “maxnúu divorcio”.
^ O “jmba̱yi̱i̱”.
^ O mbáa “nitamijná kaníkhiin”.
^ O “tsudíí”.
^ O “magabi̱i̱”, “mbaʼya̱a̱”.
^ Náa ajngáa griego naʼthí, “ma̱ndoo majnguála iyááʼ xóo rí ikhúúnʼ xtáá rajngúnʼ iyááʼ”.
^ Rí nandoo gáʼthúu̱n, “maestro”.
