Rí niʼnirámáʼ Marcos 11:1-33
11 Índo̱ niguánú náa kúbá rí mbiʼyuu Olivos, mijngii Jerusalén, náa tri̱ga̱ xuajen Betfagué ga̱jma̱a̱ Betania, ikhí Jesús nikuʼmiin a̱jmi̱i̱n xa̱bi̱i̱
2 ga̱jma̱a̱ niʼthún rígi̱: “Aʼguala náa xuajen rí nakujmaa ñuʼún. Índo̱ gáta̱ʼa̱la ikhí, muxkamaa mbáa a̱ʼdá burru bi̱ xóó táriguii nimbáa xa̱bu̱. Gurajkuíiʼla ga̱jma̱a̱ gaguwaʼ kuya̱a̱.
3 Á mu mbáa narajxala, ‹náá numuu rí nurajkuíiʼla a̱ʼdá burru rá.› Guta̱a̱nla, ‹majmiuu Tátá ga̱jma̱a̱ xájyúuʼ má makuʼma̱a̱ ma̱ʼkha̱a̱›”.
4 Ikha jngóo nigún ga̱jma̱a̱ nixkamaa mbáa a̱ʼdá burru kaxtoʼóo náa rexo̱o̱ mbá guʼwá, náa rawuunʼ kamba̱a̱, ikhú nirajkuííʼ.
5 Mú tikhuun bi̱ kúwá ikhí nirajxu̱u̱n: “Náá numuu dí nurajkuííʼ a̱ʼdá burru rá.”
6 Ikhú xa̱bi̱i̱ Jesús niriʼña̱a̱ rí ikhaa má niʼthún muthi, ga̱jma̱a̱ xa̱bu̱ niniñu̱u̱nʼ magúun.
7 Niguwáʼ kuya̱a̱ a̱ʼdá burru náa Jesús ga̱jma̱a̱ nixtra̱ma̱ʼ xtíñún náa tsu̱du̱u̱ ga̱jma̱a̱ ikhú Jesús nigriguii.
8 Mbaʼin nixtri̱ga̱ xtíñún náa kamba̱a̱ ga̱jma̱a̱ eʼwíinʼ nisti̱ga̱ iná.
9 Ikhú xa̱bu̱ bi̱ nagún ginuu ga̱jma̱a̱ bi̱ naguwáʼ tsu̱díí nithi gakhi̱i̱: “¡Gaguma kríya̱a̱ʼ! ¡Gaguma tsajkurámaaʼ bi̱ na̱ʼkha̱ ga̱jma̱a̱ mbiʼyuu Jeobá!*
10 ¡Gaguma tsajkurámaaʼ Xa̱bu̱ Ñajunʼ* bi̱ na̱ʼkha̱, Xa̱bu̱ Ñajunʼ ndrígóo anu̱lú David! ¡Gaʼnikríya̱a̱ʼ bi̱ xtáa mekhuíí!”.
11 Nda̱wa̱á rí nito̱ʼo̱o̱ náa Jerusalén, Jesús ni̱jkha̱ náa guʼwá rí nduyamajkuíí Dios ga̱jma̱a̱ niyexi mbájndi. Numuu rí wakíʼ má, ikha jngóo ni̱jkha̱ náa Betania gajmíi̱n bi̱ mbá Gu̱wi̱i̱nʼ ejmi̱i̱n.
12 I̱mba̱ néjtsuu, índo̱ kúwá ragájna̱án náa Betania ikhaa nixkidxu̱u̱.
13 Asndu mitsínguánʼ ndiʼyoo mbá ixi̱ higo rí gíʼdoo inúu ga̱jma̱a̱ ni̱jkha̱ gáʼyoo á mu tima xndúu. Mú índo̱ ni̱jkha̱nú ikhí nimbá higo táxkamaa, i̱ndó inúu kagu̱, numuu dí xóó raʼkháa gu̱nʼ rí maxná higo.
14 Ikha jngóo niʼthúu̱n: “Nimbáa xíkhu rí najma̱a̱ náa ikháán”. Ga̱jma̱a̱ xa̱bi̱i̱ nidxawíín rígi̱.
15 Índo̱ ni̱jkha̱nú náa Jerusalén, ikhú Jesús nito̱ʼo̱o̱ náa guʼwá rí nduyamajkuíí Dios ga̱jma̱a̱ nixkawíin bi̱ nugujua̱ ga̱jma̱a̱ bi̱ nutsi ikhí. Nirngájxi̱i̱ mésu̱ún bi̱ nuriʼkuíí mbújkha̱a̱ ga̱jma̱a̱ xíliu̱ún bi̱ nugujui̱i̱n paloma.
16 Ma̱ngaa taniñuuʼ rí manújngún kudúún rí najmún náa rexo̱o̱ guʼwá rí nduyamajkuíí Dios.
17 Ikhú niʼsngúún xa̱bu̱ ga̱jma̱a̱ niʼthún: “Lá raʼkháa kiʼnirámáʼ, ‹goʼwóʼ magumbiʼyuu guʼwá náa nutajkáan* xa̱bu̱ bi̱ kúwá náa xúgíʼ xuajen ráʼ.› Mú ikháanʼla ninila tsíñún kuʼwáʼ”.
18 Ndxajkun bi̱ kuya̱ edxu̱u̱ ga̱jma̱a̱ bi̱ nusngáa xtángoo nidxawíín rígi̱, ikhú ikhiin ndiya̱ʼ xóo muni̱ mu muxiyáa. Mú nimíñúún kuyáá, numuu rí xa̱bu̱ nanigu̱u̱nʼ ga̱jma̱a̱ naʼniún tsiánguá rí xóo naʼsngáa.
19 Índo̱ niʼni wakíʼ, Jesús gajmíi̱n xa̱bi̱i̱ nigájnaán náa xuajen.
20 Miʼcha̱ rí imbo̱o̱ mbiʼi, índo̱ ninújngún náa wíji̱ ixi̱ higo ndiyáá rí asndu ajmu̱u̱ ixi̱ nijndooʼ.
21 Ikhú Pedro nirmáʼáan a̱jkiu̱u̱n dí nirígá, ikha jngóo niʼthúu̱n: “¡Maestro,* atayáá! Nijndooʼ ixi̱ higo rí niratátsríguíí”.*
22 Índo̱ Jesús niʼdxuun rígi̱, niʼthí: “Aguaʼdáála fe náa Dios.
23 Na̱tala gajkhun rí á mu mbáa tséʼni a̱jma̱ a̱jkiu̱u̱n, naʼthúu̱n kúbá rígi̱ ‹arajxu ga̱jma̱a̱ atadaminaʼ náa lamáa›. Á mu gíʼdoo fe dí xúʼko̱ gárígá, maʼga̱nú marigá.
24 Ikha jngóo na̱tala: Xúgíʼ rí gúnda̱ʼa̱ índo̱ gútájkáan, á mu kuaʼdáála fe rí mundrígú, makhánala.
25 Índo̱ ndrigáanʼ rutajkáan, gu̱ni̱ mba̱a̱ a̱jkia̱la kuñu̱u̱n bi̱ nunia̱la dí ra̱májánʼ, mu xúʼko̱ Ana̱la bi̱ xtáa mekhuíí maʼni mba̱a̱ a̱jkiu̱u̱n náa rí nakiéʼkala”.
26 *
27 Índo̱ niguánú mbu̱júu̱ʼ náa Jerusalén, ikhaa xtáa ra̱jkha̱ náa guʼwá rí nduyamajkuíí Dios, ikhú niguwáʼ ndxajkun bi̱ kuya̱ edxu̱u̱, ga̱jma̱a̱ bi̱ nusngáa xtángoo mangiin xabuanii.
28 Ikhú nirajxi̱i̱: “Náá numuu etani̱ rígi̱ rá. Tsáá niʼtháanʼ matani̱ rá.”
29 Jesús niriʼñún: “Rígá mbá rí marajxala mangúún. Á mu rí najmáanʼla nuriʼña̱a̱, ma̱tala tsáa eʼthúnʼ ma̱ni̱ rígi̱.
30 Náá e̱ʼkha̱ rí Juan nakumíinʼ iyááʼ xa̱bu̱, mekhuíí o náa xa̱bu̱ dxe̱ʼ. Gutu̱nʼla”.
31 Ikhú nitamijná: “Á mu nuʼtháán rí mekhuíí, ikhaa maʼtúlú: ‹Náá numuu rí túnimbala ku̱ya̱a̱ xá.›
32 Mú, tsáá gáʼngo̱o̱ a̱jkiu̱u̱n gáʼthí rí na̱ʼkha̱ náa xa̱bu̱ rá.” Nimíñúún kuñún xa̱bu̱. Numuu rí xúgíinʼ nduyáá Juan xóo mbáa profeta.*
33 Ikha jngóo niriʼña: “Tséya̱a̱xu”. Ikhú Jesús niʼthún: “Xátala má mangúún tsáa eʼthúnʼ ma̱ni̱ rígi̱”.
Mbaʼa nota
^ O “muni̱ tsajkuun”.
^ O “niraxnáma’an”.
^ Versículo rígi̱ rígá náa tikhuu Biblia, mú nda̱a̱ náa mbaʼa rí nigumaraʼmáʼ náa ajngáa griego.
^ O “gaʼyee”, “bi̱ naʼthí dí marigá”.
