Rí niʼnirámáʼ Marcos 14:1-72
-
Ndxajkun niri̱ya̱ʼ awan muxiyáa Jesús (1, 2)
-
Mbáa a̱ʼgu̱ naxtrámuuʼ aceite rí ndataun náa edxu̱u̱ (3-9)
-
Judas nixnájxi̱i̱ (10, 11)
-
Iwáá Pascua (12-21)
-
Nagi̱ʼdu̱u̱ ganitsu wañuu Tátá (22-26)
-
Jesús niʼthí rí Pedro maʼni gaʼduunʼ rí naʼninuwiinʼ (27-31)
-
Naʼtájkháan náa Getsemaní (32-42)
-
Nirtuwiin (43-52)
-
Najuiʼthá rí magíʼnuu náa inún xa̱bu̱ ede̱ (53-65)
-
Pedro naʼni gaʼduunʼ rí naʼninuwiinʼ (66-72)
14 Imbá gi̱jma̱ mbiʼi tígo̱o̱ mu maʼni Pascua ga̱jma̱a̱ Ndxo̱o̱ Pan dí ragíʼdoo Levadura.* Ndxajkun bi̱ kuya̱ edxu̱u̱ gajmiún bi̱ nusngáa xtángoo ni̱ri̱ya̱ʼ awan xóo muninduwaʼ mu murtuwiin Jesús ga̱jma̱a̱ muxiyáa.
2 Numuu rí nithi: “Xúʼni̱ índo̱ gárígá ndxa̱a̱, mu xa̱bu̱ xátujxu̱u̱n makiʼníin”.
3 Índo̱ ikhaa xtáa náa Betania rakuiʼtsu náa goʼwóo Simón bi̱ nigiʼdoo nandii lepra,* ikhú nikuʼmaminaʼ mbáa a̱ʼgu̱ bi̱ kayá mbá ru̱jtu̱ itsí alabastro náa ka̱jnu̱ʼ mbawíí aceite nardo* rí ndataun, rí minumuu wéñuuʼ. Índo̱ niguámbóo nikuíʼtá ru̱jtu̱u̱, ikhú nixídirámuuʼ aceite náa edxu̱u̱ Jesús.
4 Índo̱ tikhuun bi̱ ndiyáá rígi̱, tánigu̱u̱nʼ mbá kayuuʼ, ikhú nitamijná: “Náá numuu rí nagadíí xúʼkhiín aceite rí ndataun rígi̱ rá.
5 Aceite rí ndataun rígi̱ ma̱ndoo mixtangujua̱ ga̱jma̱a̱ itháan rí 300 denarios...* ¡ga̱jma̱a̱ mbújkha̱a̱ rígi̱ ma̱ndoo mixnún xa̱bu̱ gíníi!”. Ikhiin nikiʼníin wéñuuʼ kuyáá.
6 Mú Jesús niʼthún: “Guniʼñáʼla. Ndíjkha rí xúʼko̱ etha̱a̱nla a̱ʼgu̱. Ikhaa niʼni mbá rí májánʼ ga̱jma̱a̱ numuʼ.
7 Numuu rí xa̱bu̱ gíníi makuwá má xúʼko̱ ga̱jma̱á nindxa̱la, ma̱ndoo mumbáñúún asndu náá má mbi̱ʼi̱i̱ gáʼndala, mú ikhúúnʼ xáxtáá má xúʼko̱ ga̱jma̱á nindxa̱la.
8 Ikhaa niʼni xó má eʼngo̱o̱, wapháá nixtrámuuʼ aceite náa xuyuʼ mu majuiʼdiu̱ún.
9 Na̱tala gajkhun rí náa xúgíʼ numbaaʼ, asndu náa gájuiʼtáraʼa ajngáa rí májánʼ ma̱ngaa majuiʼthá rí niʼni a̱ʼgu̱ bugi̱. Mu xúʼko̱ marmáʼáan a̱jkiu̱ún kuyáá”.
10 Ikhú Judas Iscariote, mbáa bi̱ mbá Gu̱wi̱i̱nʼ ejmi̱i̱n ni̱jkha̱ gáʼñún ndxajkun bi̱ kuya̱ edxu̱u̱ mu maxnájxi̱i̱ Jesús.
11 Índo̱ ikhiin nidxawíín, ra̱ʼkhá tháán nidxún, ikha jngóo nithi rí muxnáá mbújkha̱a̱.* Ikhú nigíʼdu̱u̱ ndiyáʼ xóo maxnájxi̱i̱.*
12 Timbá mbiʼi rí nagi̱ʼdu̱u̱ Ndxo̱o̱ Pan dí ragíʼdoo Levadura, índo̱ naguʼwún nuxnajxi̱ tsigijñaʼ ndrígóo Pascua, xa̱bi̱i̱ nirajxi̱i̱: “Náá eyaaʼ mu̱ni̱ májáánxu mu matsiʼtsu índo̱ gáʼni Pascua rá.”
13 Ikhú nikuʼmiin a̱jmi̱i̱n xa̱bi̱i̱ ga̱jma̱a̱ niʼthún rígi̱: “Aʼguala náa xuajen. Ikhí muxkamaa mbáa xa̱bu̱ bi̱ na̱jkha̱ kagu̱u̱ iyaʼ ga̱jma̱a̱ rayaʼ. Aʼguala kidxuuʼ
14 asndu náa má gáto̱ʼo̱o̱, ga̱jma̱a̱ gutha̱a̱n bi̱ goʼwóo: ‹Maestro naʼthí: “Náá rígá guʼwá mu miʼkhu Pascua gajmíʼ xa̱bi̱ʼ rá.”›
15 Ikhaa masngájmala guʼwá dí grígu rijma̱a̱, náa rígá xawii má xúgíʼ. Ikhí gúniratáá mu mu̱ʼni̱ Pascua”.
16 Ikhú xa̱bi̱i̱ nigún, nitu̱ʼu̱u̱n náa xuajen ga̱jma̱a̱ ndiyáá xó má ikhaa niʼthún. Ikhú niniratáá mu muni̱ Pascua.
17 Índo̱ niʼni wakíʼ, ni̱jkha̱nú gajmíi̱n bi̱ mbá Gu̱wi̱i̱nʼ ejmi̱i̱n.
18 Índo̱ tri̱gi̱i̱n ruphiʼtsu náa mesa, Jesús niʼthún: “Na̱tala gajkhun rí mbáa rí ikháanʼ maxnájxu̱u̱n, mbáa bi̱ xtáa rakuiʼtsu gi̱i̱ ga̱jma̱á ni̱ndxu̱ʼ”.
19 Rígi̱ niʼni makuwá gíná, ikha jngóo mámbáa dí ikhiin nirajxi̱i̱ Jesús: “Raʼkháa ikhúúnʼ áán”.
20 Ikhaa niʼthún: “Mbáa rí ikháanʼ, bi̱ xtáa rarmajan púun náa xúbá ga̱jma̱á ni̱ndxu̱ʼ.
21 A̱ʼdióo xa̱biya̱ najkha̱a̱, xó má kiʼniraʼmáʼ ga̱jma̱a̱ numuu. ¡Mú gínáalá xa̱bu̱ bi̱ gáxnájxi̱i̱! Itháan májánʼ gáʼni á mu tágumaa”.
22 Índo̱ kaʼníí kúwá ruphiʼtsu ikhaa niguajtuun mbá pan, ikhú niʼtájkáan. Nikuíʼtá ga̱jma̱a̱ nixnúún xa̱bi̱i̱, ikhú niʼthún: “Guphula. Rígi̱ nandoo gáʼthúu̱n xuyuʼ”.
23 Ga̱jma̱a̱ niguajtuun mbá copa, nixnáa núma̱aʼ Dios, ikhú nixnúún muwa̱a̱n xúgíinʼ.
24 Ga̱jma̱a̱ niʼthún: “Rígi̱ nandoo gáʼthúu̱n eʼdiuʼ, ‹eʼdi rí nambánuu›, rí magadíí mu mambáñúún mbaʼin xa̱bu̱.
25 Na̱tala rí ni xátangu̱ún maga̱nʼ vino asndu índo̱ gágánʼ vino nuxi̱ʼ náa xtáa Xa̱bu̱ Ñajunʼ ndrígóo Dios”.*
26 Índo̱ niguámbu̱u̱n nini̱ ajmúú* nigún náa kúbá rí mbiʼyuu Olivos.
27 Ikhú Jesús niʼthún: “Mbruʼun rígi̱, xúgiáanʼ ikháanʼ muniʼñúʼla,* numuu rí kiʼniraʼmáʼ: ‹Ma̱ni̱ gawúunʼ báxtúu ga̱jma̱a̱ mugiu̱u̱ magadríʼiin›.
28 Mú índo̱ gágabi̱i̱ʼ,* ginún gáʼgá náa Galilea ki xóo ikháanʼla”.
29 Pedro niʼthúu̱n: “Maski ajndu eʼwíinʼ muniña̱a̱nʼ,* mú ikhúúnʼ nditháan xániʼñááʼ”.
30 Ikhú Jesús niʼthúu̱n: “Natha̱nʼ gajkhun rí mbruʼun rígi̱, rí asndu xóó tséndxaʼwá a̱jma̱ nuthu mbaxtá, ikháán niguámbáʼ má nirathá ajtsú nuthu rí tsétatsiniúnʼ”.
31 Mú ikhaa niʼthí má xúʼko̱: “Maski ajndu makhañúʼ ga̱jma̱á nindxa̱a̱ʼ, ikhúúnʼ nditháan xáta rí tséniʼníínʼ”. Xúʼko̱ má nithi eʼwíinʼ ma̱ngaa.
32 Ikhú niguánú náa ixi̱ ri̱ʼi̱ rí mbiʼyuu Getsemaní ga̱jma̱a̱ niʼthún xa̱bi̱i̱: “Aguanála gi̱i̱ mu ikhúúnʼ matajkáan”.*
33 Ikhú ni̱jkha̱ ga̱jma̱a̱ Pedro, Santiago ma̱ngaa Juan ga̱jma̱a̱ nigíʼdu̱u̱ nixtáa gíná ma̱ngaa nixmiéjuunʼ wéñuuʼ.
34 Niʼthún: “Ra̱ʼkhá tháán ejmúʼ rí asndu naku̱mu̱ʼ rí makhañúʼ. Aguanála gi̱i̱ ga̱jma̱a̱ xúnuʼla”.
35 Ikhú nitsíngúunʼ* mbá chíʼgíiʼ náa ikhiin ga̱jma̱a̱ nismbáti̱go̱o̱. Nigíʼdu̱u̱ niʼtájkáan, niʼthí rí á mu nandoo, xáʼga̱nú hora mingíjyúuʼ rúʼko̱.
36 Niʼthí: “Abba,* Anu̱ʼ, á mu nandoo atiéxingaa copa rígi̱. Mú xáguma rí nandoʼ ikhúúnʼ, gaguma xó má eyaaʼ ikháán”.
37 Nda̱wa̱á nitanga̱a̱ náa kúwá ga̱jma̱a̱ ndiʼñún dí kúwá runuʼ. Ikhú niʼthúu̱n Pedro: “Simón, ninuʼ ráʼ. Lá táʼnga̱a̱ʼ gáraʼthi̱i̱n mbá hora wáa ráʼ.
38 Maxúnuʼla ga̱jma̱a̱ gutajkáan má xúʼko̱ mu xájngutíguáanʼla náa tsáʼkhá. Gajkhun má rí xa̱bu̱ nandoo maʼni rí májánʼ, mú xuyuuʼ tséʼngo̱o̱”.*
39 Ikhú ni̱jkha̱a̱ gáʼtájkáan mbu̱júu̱ʼ ga̱jma̱a̱ ikháá má rí ninda̱ʼa̱.
40 Índo̱ nitanga̱a̱ mbu̱júu̱ʼ ndiʼyoo dí kúwá runuʼ, numuu dí ra̱ʼkhá tháán eñún gúnuʼ. Ga̱jma̱a̱ ikhiin nánguá ndiyáá rí muthán.
41 Ni̱ʼkha̱a̱ mbu̱júu̱ʼ rí maʼni ajtsú nuthu ga̱jma̱a̱ niʼthún: “Náá numuu rí nu̱nu̱ʼ ga̱jma̱a̱ ndu̱ya̱a̱xala náa mbiʼi rí gíʼdoo wéñuuʼ numuu xóo rígi̱ rá. ¡Ikhí xúʼko̱ rá! ¡Gu̱ya̱a̱! Ni̱ʼkha̱nú má hora rí mixnájxi̱i̱ A̱ʼdióo xa̱biya̱ náa ñawúúnʼ xa̱bu̱ aʼkhá.
42 Aguaxu̱nʼ, guʼgua̱ rá. Gu̱ya̱a̱, xtáa ra̱ʼkha̱nú má bi̱ maxnájxu̱u̱n”.
43 Índo̱ kaʼníí xtáa raʼthí rígi̱, ni̱ʼkha̱nú Judas, mbáa bi̱ mbá Gu̱wi̱i̱nʼ ejmi̱i̱n, ni̱ʼkha̱ gajmíi̱n mbaʼin xa̱bu̱ bi̱ kuda espada ga̱jma̱a̱ ixi̱, bi̱ nixuʼmiin maguwáʼ ndxajkun bi̱ kuya̱ edxu̱u̱, bi̱ nusngáa xtángoo gajmiún xabuanii.
44 Bi̱ maxnájxi̱i̱ niʼthún maʼni rígi̱: “Bi̱ gáxnu̱u̱ beso, ikhaa buʼko̱, gúrtuwinla ga̱jma̱a̱ xúni̱ kríya̱a̱ʼ”.
45 Ni̱jkha̱ mbájmbu náa ikhaa ga̱jma̱a̱ niʼthúu̱n: “¡Maestro!”,* ga̱jma̱a̱ nixnúu beso.
46 Ikhú nirtuwiin ga̱jma̱a̱ nigún kuya̱a̱.
47 Mú mbáa bi̱ xtáa ikhí niríyaʼ espada ga̱jma̱a̱ nirujturígú cháʼwuun ñumbáá ndrígóo ndxajkun bi̱ phú kayá edxu̱u̱.
48 Ikhú Jesús niʼthún: “Náá numuu rí ku̱dala espada ga̱jma̱a̱ ixi̱ niguwa̱ʼ mu murtuwún xóo ertuwiin mbáa kuʼwáʼ rá.
49 Tsejtsí mbiʼi nixtáá ga̱jma̱á nindxa̱la rasngáa náa guʼwá rí nduyamajkuíí Dios mú ikháanʼ túrugu̱u̱nla. Mú nirígá rígi̱ mu mambanúu rí Kiʼniraʼmáʼ”.
50 Ikhú xúgíinʼ niniña̱a̱nʼ ga̱jma̱a̱ nigáñun.
51 Mú mbáa dxámá bi̱ kagíʼ mbá xtíin lino rí májánʼ, mijngíí ni̱jkha̱ kidxuuʼ. Ikhú nigíʼ murugua̱a̱.
52 Mú ikhaa niniñati̱ya̱ʼ xtíñuu ga̱jma̱a̱ nikhatíya̱a̱ʼ ragáyúu tsaʼtsaaʼ.*
53 Ikhú nigún kuya̱a̱ Jesús náa ndxajkun bi̱ phú kayá edxu̱u̱, ga̱jma̱a̱ ndxajkun bi̱ kuya̱ edxu̱u̱, xabuanii ga̱jma̱a̱ bi̱ nusngáa xtángoo nigimbíin.
54 Pedro mitsínguánʼ ejkha̱ ragiʼi kidxúúnʼ asndu ni̱jkha̱nú náa rexo̱o̱ goʼwóo ndxajkun bi̱ phú kayá edxu̱u̱, ikhú nigi̱ʼi̱ gajmíi̱n bi̱ nuñajunʼ ikhí mu mataguuʼ.
55 Ndxajkun bi̱ kuya̱ edxu̱u̱ ga̱jma̱a̱ xa̱bu̱ ede̱* ndiyáʼ xóo muni̱ tsu̱di̱i̱ Jesús mu muxiyáa, mú túxkamaa nimbá numuu.
56 Mbaʼin nithi rí minduwaʼ ga̱jma̱a̱ numuu, mú rí nithi tsémbánii.
57 Ikhú tikhuun niguájun ga̱jma̱a̱ nithi nduwaʼ rígi̱ ga̱jma̱a̱ numuu:
58 “Ikháanʼ nidxawíínxu̱ rí niʼthí: ‹Maʼngo̱ʼ ma̱ni̱ gámbáa guʼwá náa nduyamajkuíí Dios rí nini̱ xa̱bu̱ ga̱jma̱a̱ káaʼ ajtsú e̱jkha̱ʼ gátanguún mani̱i̱ imbo̱ʼ dí raʼkháa xa̱bu̱ gúni›”.
59 Mú asndu rígi̱ támbánii rí nithi.
60 Ikhú ndxajkun bi̱ phú kayá edxu̱u̱ niwi̱ji̱ tapu̱ún ga̱jma̱a̱ nirajxu̱u̱ Jesús: “Lá xátaʼgooʼ kayuuʼ ráʼ. Ndiéjunʼ ethi xa̱bu̱ bugi̱ ga̱jma̱a̱ numaaʼ tayáá rá.”
61 Mú ikhaa nda̱a̱ rí niʼthí. Ikha jngóo ndxajkun bi̱ phú kayá edxu̱u̱ niʼthúu̱n: “Lá ikháán nindxa̱a̱ʼ Cristo, A̱ʼdióo Dios bi̱ kaʼwii ráʼ.”
62 Ikhú Jesús niʼthúu̱n: “Ikhúúnʼ ni̱ndxu̱ʼ. Ga̱jma̱a̱ ikháanʼ mbuya̱a̱ A̱ʼdióo xa̱biya̱ gíʼ náa níjniú mújúunʼ Dios bi̱ gíʼdoo tsiakii ga̱jma̱a̱ rí na̱ʼkha̱ náa du̱u̱n mekhuíí”.
63 Índo̱ ndxajkun bi̱ phú kayá edxu̱u̱ niʼdxawun rígi̱, nixkuʼtu xtíñuu ga̱jma̱a̱ niʼthí: “Nánguá má eyóoʼ bi̱ muthi rá.
64 Ikháanʼ má nidxawíín rí niʼthí wéñuuʼ Dios, ndiéjunʼ e̱tala ikháanʼ rá.” Xúgíinʼ nithi rí gíʼmaa makhañúu.
65 Tikhuun nigíʼdi̱i̱ nindujtáaʼ, niruguáá inuu ga̱jma̱a̱ nixnáá puñete. Ikhú nitháán: “¡Á mu gajkhun rí nindxa̱a̱ʼ profeta* aratúxu tsáa nixnáaʼ!”. Nda̱wa̱á rí nixuba̱a̱ inuu, ikhú bi̱ nuñewa̱a̱n guʼwá ñajunʼ nigún kuya̱a̱.
66 Índo̱ Pedro gíʼ rexa̱a̱, ni̱ʼkha̱nú mbáa a̱ʼgu̱ bi̱ nambáyúu ndxajkun bi̱ phú kayá edxu̱u̱.
67 Índo̱ ndiʼyoo rí Pedro xtáa rataguuʼ ikhú niʼthúu̱n: “Ikháán mangáán jngrui̱ga̱a̱ʼ ga̱jma̱a̱ʼ Jesús bi̱ na̱ʼkha̱ náa Nazaret”.
68 Mú ikhaa niʼninduwaʼ, niʼthúu̱n: “Tséninúwiinʼ ga̱jma̱a̱ tséyóo dí ratá jún”. Ikhú nigájna̱a̱ náa riejun.
69 Mú a̱ʼgu̱ bi̱ nañajunʼ ikhí ndiʼyoo mbu̱júu̱ʼ, ikhú niʼthún bi̱ kúwá ikhí: “Ikhaa ma̱ngaa nindxu̱u̱ mbáa dí ikhiin”.
70 Mú Pedro niʼninduwaʼ má xúʼko̱. Tájyúuʼ má mba̱yu̱u̱ʼ índo̱ nitháán mbu̱júu̱ʼ: “Nakujmaa kaʼwu rí mangáán nindxa̱a̱ʼ mbáa rí ikhiin, numuu rí nindxa̱a̱ʼ xa̱bu̱ Galilea”.
71 Ikhú ikhaa nigíʼdu̱u̱ niʼtátsrígú ga̱jma̱a̱ niʼthí: “¡Tséni núwíinʼ xa̱bu̱ buʼko̱ bi̱ nu̱tala ga̱jma̱a̱ numuu jún!”.
72 Núkhu nindxa̱ʼwá mbáa mbaxtá rí maʼni a̱jma̱ nuthu, ikhú nirmáʼáan a̱jkiu̱u̱n Pedro rí niʼthúu̱n Jesús: “Nákhá xóó tséndxaʼwá a̱jma̱ nuthu mbaxtá, ikháán niguámbáaʼ má nirathá ajtsú nuthu rí tsétatsiniúnʼ”. Nigáwiinʼ a̱jkiu̱u̱n ga̱jma̱a̱ nigíʼdu̱u̱ nimbi̱ya̱ʼ.
Mbaʼa nota
^ Náa ajngáa griego naʼthí, “plata”.
^ O “magujua̱a̱”.
^ O “salmos”.
^ Náa ajngáa griego naʼthí, “majngrádáanʼ ga̱jma̱a̱ numuʼ”.
^ O “gátuxi̱i̱ʼ”, “gáya̱a̱”.
^ Náa ajngáa griego naʼthí, “majngrádiinʼ ga̱jma̱a̱ numaaʼ”.
^ O “ma̱ni̱ tsajkuun”.
^ O “nirájñu̱u̱nʼ”.
^ Náa ajngáa hebreo o arameo nandoo gáʼthúu̱n ‹¡Anu̱ʼ!›.
^ Nandoo gáʼthúu̱n rí nindxu̱u̱ xa̱bu̱ aʼkhá.
^ O “i̱ndó xtíñuu rí awúún”.
^ O “gaʼyee”, “bi̱ naʼthí dí marigá”.
