Rí niʼnirámáʼ Marcos 2:1-28
2 Mú nguáthá mbiʼi nda̱wa̱á Jesús nitanga̱a̱ mbu̱júu̱ʼ náa xuajen Capernaúm. Ga̱jma̱a̱ niwán ri̱go̱o̱ rí xtáa náa guʼwá rí na̱ʼkha̱nú.
2 Ikha jngóo mbaʼin wéñuuʼ xa̱bu̱ nigimbíin ikhí rí asndu na̱nguá kaʼnii matu̱ʼu̱u̱n náa xkrugua. Ga̱jma̱a̱ ikhú, nigíʼdu̱u̱ niʼsngúún ajngá rawuunʼ Dios.
3 Ikhú mbá a̱jkhui̱i̱n xa̱bu̱ niguwáʼ kuya̱a̱ mbáa xa̱bu̱ bi̱ nikháñuu xuyuuʼ.
4 Numuu rí kúwá mbaʼin wéñuuʼ xa̱bu̱, tándoo gátu̱ʼu̱u̱n kuya̱a̱ asndu náa xtáa Jesús. Ikhú nirkuna tsu̱du̱u̱ guʼwá náa jmbu xtáa ikhaa, ikhú nixruiguíi xa̱bu̱ buʼko̱ ga̱jma̱a̱ xiawoo.
5 Índo̱ Jesús ndiʼyoo fe rí guáʼdáá, ikhú niʼthúu̱n bi̱ nikháñuu xuyuuʼ: “A̱ʼdióʼ, nijngudi̱i̱ má aʼkháanʼ rá”.
6 Ikhí tri̱gi̱i̱n tikhuun bi̱ nusngáa xtángoo ga̱jma̱a̱ nindxa̱ʼwa̱míjna̱ rígi̱:
7 “Ndíjkha jngóo rí xa̱bu̱ bugi̱ naʼthá wéñuuʼ Dios rá. Lá raʼkháa i̱ndó Dios maʼngo̱o̱ maʼnijngudi̱i̱ aʼkhá ráʼ.”
8 Ikhú, mbá nacha̱ ndiʼyoo Jesús rí kúwá rundxa̱ʼwa̱míjna̱. Ikhú niʼthún: “Ndíjkha rí xúʼko̱ kaʼnii e̱ndxa̱ʼwa̱míjnala rá.
9 Ndiéjunʼ dí itháan ragákhíi mathu̱u̱n xa̱bu̱ bi̱ nikháñuu xuyuuʼ, ‹aʼkháanʼ nijmangudi̱i̱ má rá›, o mathu̱u̱n, ‹atujxa̱a̱ʼ, atiéjxi̱i̱ xiawaaʼ, ga̱jma̱a̱ ayu̱u̱ʼ dxe̱ʼ.›
10 Mu mbu̱ya̱a̱ rí A̱ʼdióo xa̱biya̱ maʼngo̱o̱ maʼnijngudi̱i̱ aʼkhúún xa̱bu̱ numbaaʼ...”. Ikhú niʼthúu̱n bi̱ nikháñuu xuyuuʼ:
11 “Ikhúúnʼ etha̱a̱n’: Atujxa̱a̱ʼ, atiéjxi̱i̱ xiewaaʼ ga̱jma̱a̱ ayu̱u̱ʼ guʼwáaʼ”.
12 Núkhu má nitujxi̱i̱, niyéjxi̱i̱ xiawuu ga̱jma̱a̱ nigájnáa náa inún xúgíinʼ. Xúgíinʼ niguanún tsiánguá ga̱jma̱a̱ nini̱ mba̱a̱ Dios, ikhú nithi: “Nimbá miʼtsú túʼyáá rígi̱”.
13 Jesús ni̱jkha̱ mbu̱júu̱ʼ náa rawuunʼ lamáa. Xúgíinʼ xa̱bu̱ nigún gúyáá ga̱jma̱a̱ ikhaa nigíʼdu̱u̱ niʼsngúún.
14 Índo̱ xtáa ra̱jkha̱ kamba̱a̱, ndiʼyoo Leví* a̱ʼdióo Alfeo bi̱ gíʼ náa guʼwá rí naxtuma mbújkho̱o̱ guʼwá ñajunʼ, ga̱jma̱a̱ niʼthúu̱n: “Ayi̱ mu̱ʼgua̱”. Mbá nacha̱ Leví nitu̱jxu̱u̱ ga̱jma̱a̱ ni̱jkha̱ ga̱jma̱a̱.
15 Nda̱wa̱á Jesús gajmíi̱n xa̱bi̱i̱ nigún gúphiʼtsu náa goʼwóo. Ma̱ngaa nikúwá ruphiʼtsu gajmiún bi̱ nuruma mbújkho̱o̱ guʼwá ñajunʼ mangiin xa̱bu̱ aʼkhá. Numuu rí xúgíinʼ ikhiin nigún kidxuuʼ.
16 Mú bi̱ nusngáa xtángoo bi̱ ni̱ndxu̱ún fariseos,* índo̱ ndiyáá rí Jesús xtáa rakuiʼtsu gajmíi̱n bi̱ nuruma mbújkho̱o̱ guʼwá ñajunʼ ga̱jma̱a̱ xa̱bu̱ aʼkhá, nigíʼdi̱i̱ nithúún xa̱bi̱i̱ Jesús: “Ndíjkha rí ikhaa gíʼ rakuiʼtsu gajmíi̱n bi̱ nuruma mbújkho̱o̱ guʼwá ñajunʼ ga̱jma̱a̱ bi̱ nuni̱ aʼkhá xá.”
17 Índo̱ Jesús niʼdxawun dí kúwá ruthi, niʼthún: “Xa̱bu̱ bi̱ tséʼniún nandii tséñúúnʼ má xa̱bu̱ bi̱ nuni̱ thana, mú bi̱ naʼniún nandii, nda̱ñúúnʼ. Táʼkhá gáñiinʼ xa̱bu̱ jmbiin, ni̱ʼkhá gáñiinʼ xa̱bu̱ aʼkhá”.
18 Xó má xa̱bi̱i̱ Juan gajmiún fariseos naguʼwún murkueyimijná.* Ikhú niguwáʼ ga̱jma̱a̱ nirajxi̱i̱: “Ndíjkha rí xa̱bi̱i̱ Juan ga̱jma̱a̱ fariseos naguʼwún nurkueyimijná, mú xa̱bia̱a̱ʼ ikháán na̱nguá rá.”
19 Jesús niriʼñún: “Xándoo murkueyimijná mígiu̱u̱ bi̱ manigúnʼ índo̱ xtáa gajmíi̱n. Xákujmaa májánʼ á mu xúʼko̱ gúni índo̱ kúwá gajmiún bi̱ manigúnʼ. Lá raʼkháa xúʼko̱ ráʼ.
20 Mú maʼga̱nú mbiʼi rí magajta káñúnʼ bi̱ manigúnʼ, ikhú rí murkueyimijná.
21 Nimbáa nda̱wa̱a̱ tsáa eʼxmíjma̱a̱ xtíin nuxi̱ʼ náa mbá xtíin wayuu. Á mu mbáa gáʼni xúʼko̱, xtíin rí nuxi̱ʼ maxúmuu xtíin wayuu ga̱jma̱a̱ itháan mba̱a̱ gútu.
22 Xúʼko̱ má kayuuʼ, nimbáa tseguxiʼñáʼ vino nuxi̱ʼ náa kulámbra wayuu. Á mu mbáa gáʼni xúʼko̱, vino maxkuʼtu kulámbra rí wayuu ga̱jma̱a̱ magadíí. Ikhú kulámbra nixájmaa mbá kayuuʼ, ikha jngóo vino rí nuxi̱ʼ gíʼmaa ma̱jni̱ʼ náa kulámbra rí nuxi̱ʼ”.
23 Mbá mbiʼi sábado* índo̱ ikhaa xtáa ranújngoo náa mbaaʼ rí kiʼdu trigo, ikhú xa̱bi̱i̱ nigíʼdi̱i̱ nixmajuíi iña índo̱ kúwá ragún kamba̱a̱ numuu rí nixkidxu̱u̱n.
24 Índo̱ fariseos ndiyáá rígi̱, ikhú nitháán Jesús: “¡Atiexi̱ ma̱ta̱ya̱a̱! Ndíjkha rí kúwá runi̱ mbá dí ragíʼmaa maguma mbiʼi sábado xá.”
25 Mú ikhaa niʼthún: “Lá túraxnuu rí niʼni David índo̱ ikhaa gajmíi̱n xa̱bi̱i̱ nixkidxu̱u̱n ráʼ.
26 Lá túraxnuu náa naʼthí ga̱jma̱a̱ numuu Abiatar ndxajkun bi̱ kayá edxu̱u̱ ráʼ. Rí niʼni David índo̱ nito̱ʼo̱o̱ náa goʼwóo Dios. Ikhaa niʼkhu̱ pan rí nijuixnáxi̱ gajmíi̱n xa̱bi̱i̱. Nimbáa xándoo mi̱khu̱ pan rúʼko̱, i̱ndó ndxajkun kaʼñúún mu̱phu̱”.
27 Ikhú niʼthún: “Dios nigíʼ mbiʼi sábado mu mbuya̱a̱ xu̱únʼ xa̱bu̱, raʼkháa mu xa̱bu̱ mbuyamajkuíí mbiʼi sábado.
28 Ikha jngóo A̱ʼdióo xa̱biya̱ naʼtáñajunʼ asndu mbiʼi sábado”.
