Rí niʼnirámáʼ Marcos 3:1-35
3 Mbu̱júu̱ʼ nito̱ʼo̱o̱ náa guʼwá rí bi̱ judíos nuxnáá gamajkhu Dios, ga̱jma̱a̱ ikhí gídáʼ mbáa xa̱bu̱ bi̱ niʼni xa̱ʼ ñawúunʼ.*
2 Ikhú fariseos niñamaa Jesús mu mbuyáá á mu naʼni thanuu xa̱bu̱ rí mbiʼi sábado,* mu xúʼko̱ ma̱ndoo muxruiga̱a̱.
3 Ikhú Jesús nindo̱ʼo̱o̱ xa̱bu̱ bi̱ niʼni xa̱ʼ ñawúunʼ ga̱jma̱a̱ niʼthúu̱n: “Atujxa̱a̱ʼ ga̱jma̱a̱ ayi̱ gáñajún ta̱pha̱* gi̱jyooʼ”.
4 Ikhú niʼthún: “Ndiéjunʼ rí ma̱ndoo maguma mbiʼi sábado. Matani̱ rí májánʼ o matani̱ dí raʼkhí dxe̱ʼ. Matani̱ kríyaaʼ mbáa xa̱bu̱ o mataxíyáa dxe̱ʼ”. Mú ikhiin wíí niguanún.
5 Índo̱ Jesús guámbóo ndiʼñún ga̱jma̱a̱ sia̱nʼ bi̱ wájun mbájndi, nigawúunʼ índo̱ ndiʼyoo rí gújkhúʼ a̱jkiu̱ún, ikhú niʼthúu̱n xa̱bu̱: “Ataxruíyaʼ ñawáanʼ”. Índo̱ xa̱bu̱ nikrui̱ya̱ʼ ñawúunʼ, núkhu niʼni̱i̱.
6 Ikhú fariseos nigájnaán ikhí, mbá nacha̱ nigimbúmíjná gajmiún xa̱bi̱i̱ Herodes mu muri̱ya̱ʼ awan xóo muxiyáa Jesús.
7 Mú Jesús ni̱jkha̱ náa lamáa gajmíi̱n xa̱bi̱i̱, ga̱jma̱a̱ mbaʼin xa̱bu̱ bi̱ kúwá náa Galilea ga̱jma̱a̱ Judea nigún kidxuuʼ.
8 Asndu niguwáʼ mbaʼin bi̱ kúwá náa Jerusalén ga̱jma̱a̱ náa Idumea, náa i̱mba̱ ridoo mañu Jordán ga̱jma̱a̱ náa xuajen dí rígá mbájndi Tiro ga̱jma̱a̱ Sidón, numuu rí nidxawíín xúgíʼ rí ikhaa naʼni.
9 Ikha jngóo, ikhaa nindu̱ʼu̱u̱n xa̱bi̱i̱ rí maguaʼdáá xawii mbá barco mu xuxujmbi̱i̱ xa̱bu̱.
10 Numuu rí mbaʼin xa̱bu̱ niʼni thanún, xúgíinʼ bi̱ naʼniún nandii mbiiʼ nirmajngumi̱jna̱ mu muxkajmaa.
11 Asndu giñán xkawi̱i̱nʼ* nusmbati̱gu̱u̱n náa inuu índo̱ nduyáá, ga̱jma̱a̱ nindxa̱ʼwa̱: “¡Ikháán ñajuaanʼ A̱ʼdióo Dios!”.
12 Mú nángi eʼni Jesús niʼthún rí xútháán nimbáa tsáa nindxu̱u̱ ikhaa.
13 Nda̱wa̱á nitsimuu náa kúbá ga̱jma̱a̱ nindxaʼwún bi̱ ikhaa nindoo, ga̱jma̱a̱ ikhiin niwi̱i̱n gajmiún.
14 Ikhú niraʼwíin mbá 12, bi̱ nixná mbiʼñún apóstoles. Ikhiin magún gajmiún ga̱jma̱a̱ makuʼmiin magún gútaraʼa.
15 Ga̱jma̱a̱ nixnúún ñajunʼ rí muxkawíin xa̱bu̱ wéñiiʼ.
16 Náa bi̱ mbá 12 bugi̱, ikhí ma̱ngaa nixtáa Simón (bi̱ ma̱ngaa nixná mbiʼyuu Pedro),
17 Santiago ga̱jma̱a̱ Juan e̱ji̱i̱n Zebedeo (bi̱ ma̱ngaa nixná mbiʼñún Boanerges, rí nandoo gáʼthúu̱n “e̱ji̱i̱n a̱jkhu̱u̱n”),*
18 Andrés, Felipe, Bartolomé, Mateo, Tomás, Santiago a̱ʼdióo Alfeo, Tadeo, Simón bi̱ xtiékoo
19 ga̱jma̱a̱ Judas Iscariote (bi̱ nda̱wa̱á nixnájxi̱i̱).
Nda̱wa̱á Jesús nito̱ʼo̱o̱ náa guʼwá,
20 mbu̱júu̱ nigimbíin mbaʼin wéñuuʼ xa̱bu̱, ikha jngóo asndu tándoo muphiʼtsu.
21 Índo̱ bi̱ kúwá náa goʼwóo ndiyáá dí nirígá, nigún gúyáaʼ mu magúun kuya̱a̱ numuu rí nithi: “Niguajta skáguiinʼ”.
22 Mú bi̱ nusngáa xtángoo bi̱ niguájtaan Jerusalén nithi: “Xa̱bu̱ bugi̱ gíʼdaa Gixa̱a̱.* Ga̱jma̱a̱ tsiakii ndrígóo bi̱ naʼtáñajúúnʼ xa̱bu̱ wéñiiʼ naxkawíin xa̱bu̱ wéñiiʼ”.
23 Mú ikhaa niʼthún rí maguwáʼ kanuu ga̱jma̱a̱ nijmuu xkri̱da mu maʼthúún: Niʼthí: “Xú káʼnii gáxkriyaaʼ Gixa̱a̱,* Gixa̱a̱ ga̱jma̱a̱ rá.
24 Á mu xa̱bu̱ ñajunʼ nagiʼdu̱u̱n, xákúwá májánʼ.
25 Á mu mbá guʼwíin xa̱bu̱ nagiʼdu̱u̱n, xákúwá májánʼ.
26 Xúʼko̱ má, á mu Gixa̱a̱* tsíyoo gáʼyaminaʼ. Xáʼngo̱o̱ maʼtáñajunʼ ga̱jma̱a̱ maʼga̱nú mambáa.
27 Xúʼko̱ má, á mu mbáa xa̱bu̱ nandoo mato̱ʼo̱o̱ náa goʼwóo xa̱bu̱ migújkuíiʼ mu maʼni kúwóoʼ, ginii ndayóoʼ maruʼwóo xa̱bu̱. I̱ndó xúʼko̱ rí ma̱ndoo maʼni kúwóoʼ.
28 Na̱tala gajkhun rí Dios maʼni mba̱a̱ a̱jkiu̱u̱n kaʼñún xa̱bu̱ bi̱ asndu xkáʼníí má aʼkhá rí nuni̱ ga̱jma̱a̱ á mu nuta wéñííʼ rí mitsúʼkháan.
29 Mú bi̱ gáʼtá wéñuuʼ espíritu santo,* Dios xáʼni mba̱a̱ a̱jkiu̱u̱n kaʼyoo. Magiʼdoo aʼkhúun asndu kámuu mbiʼi”.
30 Niʼthún rígi̱ numuu rí ikhiin nithi: “Xa̱bu̱ bugi̱ gíʼdaa giñán xkawi̱i̱ʼ”.*
31 Ikhú ni̱ʼkha̱nú ru̱dúu̱ gajmíi̱n gua̱ʼthi̱i̱n Jesús, mú niguanún rexa̱a̱ ga̱jma̱a̱ nixuʼmaa mbáa mandxaʼwáriya̱a̱ʼ.
32 Mbaʼin tri̱gi̱i̱n náa mbájndi gíʼ ikhaa. Ikhú xa̱bu̱ nitháán: “Atayáá, ru̱dáa̱ʼ ga̱jma̱a̱ guaʼtia̱a̱nʼ guájun rexa̱a̱, kúwá ruñáanʼ”.
33 Mú ikhaa niriʼñúún: “Tsíin ni̱ndxu̱ún ru̱dúʼ ga̱jma̱a̱ tsíin ni̱ndxu̱ún a̱ngui̱nʼ rá.”
34 Ikhú niyejxu̱u̱n bi̱ tri̱gi̱i̱n mbájndi ga̱jma̱a̱ niʼthí: “¡Bugi̱ ni̱ndxu̱ún ru̱dúʼ ga̱jma̱a̱ bugi̱ ni̱ndxu̱ún a̱ngui̱nʼ!
35 Xúgíinʼ bi̱ nuni̱ rí nandoo Dios buʼko̱ ni̱ndxu̱ún a̱ngui̱nʼ ga̱jma̱a̱ ru̱dúʼ”.
Mbaʼa nota
^ Náa ajngáa griego naʼthí, “nijndooʼ”.
^ O “tikhuíí”.
^ O “bi̱gu̱”.
^ Náa ajngáa griego naʼthí, “giñán tsagaa”.
