Rí na̱jkha̱ inún Romanos 1:1-32
1 I̱yi̱i̱ʼ rígi̱ niʼnirámáʼ Pablo, ñumbáá ndrígóo Cristo Jesús bi̱ nijuaxtíya̱a̱ʼ mu mani̱ndxu̱u̱ apóstol, bi̱ Dios ndiyáaʼ mu maʼtáraʼa ajngáa rí májánʼ,
2 dí ikhaa má niʼtáriyaʼ náa profetas* dí na̱ʼkha̱ raʼthí náa Kiʼniraʼmáʼ
3 ma̱ngaa nithi ga̱jma̱a̱ numuu A̱ʼdióo. Ikhaa ni̱ʼkha̱ náa e̱ji̱i̱n David xóo mbáa xa̱bu̱ numbaaʼ,
4 nikujmaa kaʼwu rí ikhaa nindxu̱u̱ A̱ʼdióo Dios, numuu rí Dios nijmuu tsiakii ndrígóo espíritu santo* mu maʼnigabi̱i̱* náa majñúnʼ wajinʼ (xúʼko̱, Cristo Jesús bi̱ nindxu̱u̱ Tátá ndrígúlú,
5 ga̱jma̱a̱ numuu ikhaa, Dios nisngájmulú rí májánʼ wéñuuʼ a̱jkiu̱u̱n,* Jesús niraʼwún ikhúúnʼ mu mani̱ndxu̱ʼ Apóstol mu mambáñún xúgíinʼ xa̱bu̱ bi̱ kúwá náa xúgíʼ xuajen mu musngajma fe ga̱jma̱a̱ munimbu̱u̱n, ma̱ngaa rí mbuyamajkuíí mbiʼyuu,
6 ma̱ngaa náa xuajen rúʼko̱ niwatsaʼwála mu ma̱ʼgua̱la kidxuuʼ Jesucristo).
7 I̱yi̱i̱ʼ rígi̱ na̱jkha̱ náa inún xúgíinʼ bi̱ kúwá náa Roma bi̱ Dios nandoo kaʼñún, bi̱ ikhaa nindxaʼwún mu mani̱ndxu̱ún mikaʼwiin:
Garigá rí májánʼ wéñuuʼ a̱jkiu̱u̱n Dios náa ikháanʼ ga̱jma̱a̱ tsímáá ndrígóo Anu̱lú Dios ma̱ngaa ndrígóo Tátá Jesucristo.
8 Ginii kayuuʼ, najmuʼ mbiʼyuu Jesucristo mu maxna̱a̱ núma̱aʼ Dios ndrígóʼ ga̱jma̱a̱ numala xúgiáanʼ ikháanʼ, numuu rí náa xúgíʼ numbaaʼ najuiʼthá numuu fe ndrígála.
9 Dios bi̱ ikhúúnʼ na̱ni̱ ñajuunʼ ga̱jma̱a̱ xúgíʼ a̱jkiu̱nʼ índo̱ na̱tha̱ ajngáa rí májánʼ numuu A̱ʼdióo, ndaʼyoo májánʼ rí ikhúúnʼ tséniʼñúuʼ ratajkáan* má xúʼko̱ ga̱jma̱a̱ numala,
10 natakáñuu Dios, á mu ikhaa nandoo, mbáa maʼgá gáyala.
11 Nandoʼ mbayala mu maxna̱la tsiakii rí na̱ʼkha̱ náa Dios* mu fe ndrígála maʼni gújkhúʼ,
12 mu xúʼko̱ muxnamíjnálu tsiakii ga̱jma̱a̱ numuu fe ndrígóo mámbáa, xó má dí kuaʼdáála ikháanʼ ma̱ngaa dí gúʼdoo ikhúúnʼ.
13 Nandoʼ rí mbu̱ya̱a̱la a̱ngui̱nʼ, rí mbaʼa nuthu nindoʼ maʼgá gáyala, mú asndu xúgi̱ na̱nguá niʼngo̱o̱, nandoʼ mba̱yo̱o̱ májánʼ dí nirígá ikhí ga̱jma̱a̱ numuu rí nutaráʼala xó má rígá náa i̱ʼwáʼ xuajen.
14 Ikhúúnʼ kajkuáa ñawúnʼ rí mathu̱u̱n xúgíinʼ xa̱bu̱, xó má griegos ma̱ngaa bi̱ naguwaáʼ* bi̱ najmañún ga̱jma̱a̱ bi̱ tsíjmañún.
15 Ikháanʼla bi̱ kuwáanʼ náa Roma, ra̱ʼkhá tháán nandoʼ rí mata̱la ajngáa rí májánʼ.
16 Tsétiyuʼ ma̱ta̱ ajngáa rí májánʼ. Numuu rí nindxu̱u̱ mbá rí xóo Dios ga̱jma̱a̱ tsiakii ndrígóo maʼnikáwíin xúgíinʼ bi̱ gúguaʼdáá fe náa ikhaa, ginuu judíos nda̱wa̱á griegos.
17 Bi̱ guáʼdáá fe náa Dios nduyáá rí Dios nindxu̱u̱ májáanʼ, rígi̱ naʼni rí fe ndrígu̱ún maʼni gújkhúʼ, xó má naʼthí náa kiʼnirámáʼ: “Xa̱bu̱ jmbii maxtáa ga̱jma̱a̱ numuu fe ndrígóo”.
18 Rí nakiʼnáa Dios nakujmaa asndu mekhuíí ga̱jma̱a̱ numuu xúgíʼ rí mitsaga ga̱jma̱a̱ dí ra̱májánʼ rí nuni̱ xa̱bu̱, ikhiin tséniña̱a̱ʼ majmaʼnuuʼ rí gajkhun,
19 rí ma̱ndoo majmaʼnuuʼ ga̱jma̱a̱ numuu Dios nduyáá má pa̱jnu, numuu rí Dios nisngájmúún má kaʼwu.
20 Maski má ikháanʼlú nda̱a̱ xóo mbuʼyáá xóo nindxu̱u̱ Dios, mú asndu nákha niguma numbaaʼ nakujmaa kaʼwu xóo nindxu̱u̱ ikhaa, ma̱ndoo mbuʼyáá xóo nindxu̱u̱ ikhaa á mu nduʼyáá májánʼ xúgíʼ rí niʼni, xúgíʼ rígi̱ nasngájma rí ikhaa gíʼdoo tsiakii rí tsétumuu ga̱jma̱a̱ rí ikhaa nindxu̱u̱ Dios. Nimbáa xándoo maʼthí: Tséyóo.
21 Maski má nuniʼniiʼ Dios, mú na̱nguá nini mba̱a̱ xóo mbáa Dios asndu núma̱aʼ túxna̱a̱, ku̱ma̱ ndrígu̱ún ninindxu̱u̱ itháan ra̱májánʼ ga̱jma̱a̱ a̱jkiu̱ún ninindxu̱u̱ skágunʼ.*
22 Maski má nuthíí rí najmañún, mú niguajtiin skágunʼ
23 niriʼkui̱i̱ gamajkhu rí nuxnáá Dios bi̱ xtáa kámuu mbiʼi ga̱jma̱a̱ mbá xtiʼkhuu xa̱bu̱ bi̱ nakháñuu, xó má ñu̱ʼu̱, xujkhúʼ bi̱ a̱jkhu̱ rajkúún ga̱jma̱a̱ bi̱ nuxmajtamijná.
24 Ikha jngóo Dios niniñúúnʼ muni̱ rí nagua̱ʼa̱ a̱jkiu̱ún, nixnájxi̱i̱n náa rí mitsaga mu xúʼko̱ xúyamajkuíí xuñúnʼ.
25 Ikhiin niriʼkui̱i̱ rí gajkhun ndrígóo Dios ga̱jma̱a̱ rí mindu̱wa̱ʼ, ndiyamajkuíí ga̱jma̱a̱ nini̱ ñajuunʼ dí kiʼniwíi raʼkháa bi̱ niʼniwíi dí rígá,* bi̱ gíʼmaa mbiʼyamajkuíí asndu kámuu mbiʼi. Xúʼko̱ gáʼni.*
26 Ikha jngóo Dios niniñúúnʼ rí xáʼngu̱u̱n gúrikháá rí nagua̱ʼa̱ wéñuuʼ mubúúnʼ gajmiún mbáa rí nindxu̱u̱ majthi̱ʼ, numuu rí gu̱ʼu̱ nánguá eñún mubúúnʼ gajmiún xa̱bekha, i̱ndó nandún mubúúnʼ kaníkhiin gu̱ʼu̱.
27 Xúʼko̱ má xa̱bekha ma̱ngaa, niniña̱a̱ʼ rubúúnʼ gajmiún gu̱ʼu̱, nigua̱ʼa̱ itháán mubúúnʼ gajmiún xa̱bekha, nini̱ xúgíʼ rí mixkawiʼ, nindrigú má rí mumíniiʼ ga̱jma̱a̱ numuu aʼkhúún.
28 Numuu rí na̱nguá nindúún muninuwiinʼ Dios,* ikha jngóo Dios niniñúúnʼ má rí mundxa̱ʼwa̱míjna̱ xúgíʼ rí mitsaga ga̱jma̱a̱ rí muni̱ dí ragíʼmaa muni̱.
29 Nuni̱ xúgíʼ enii dí ra̱májánʼ, nanigu̱u̱nʼ maguáʼdáá wéñuuʼ, ni̱ndxu̱ún ra̱míjíinʼ, naxígu̱u̱n, nuradíin xa̱bu̱, nagiʼdu̱u̱n, nuni̱ nduwaʼ, nanigu̱u̱nʼ mbuyáá rí numíniiʼ eʼwíinʼ, mixtujtiin,
30 nuni̱ tsudúún eʼwíinʼ, tsíñún gúyáá Dios, nda̱a̱ gamajkhún, nuni̱ mbaʼumíjna̱, najñekhún,* nuri̱ya̱ʼ awan muni̱ dí ra̱májánʼ, tsénimbu̱u̱n kuñún anu̱ún,
31 tsékru̱ʼu̱u̱n, tsénimbáníí ajngún, na̱nguá guáʼdáá ngajua, tségáwi̱i̱nʼ a̱jkiu̱ún.
32 Maski ajndu ikhiin nduyáá májánʼ rí Dios naʼthí, rí xa̱bu̱ bi̱ nuni̱ rígi̱ kaʼñún makhañún, mú raʼkháa i̱ndó nuni̱ rígi̱, ma̱ngaa asndu nuxnáá ñawúúnʼ índo̱ nduyáá rí eʼwíinʼ nuni̱.
Mbaʼa nota
^ O “gaʼyee”, “bi̱ nuthi dí marigá”.
^ O “makujxi̱i̱”, “maʼni mbaʼya̱a̱”.
^ O “ra̱ni̱ tsajkuun”.
^ Náa ajngáa griego naʼthí, “regalo”.
^ O “bi̱ na̱nguá nindxu̱ún griegos”.
^ Náa ajngáa griego naʼthí, “niʼni mikrína”.
^ O “neʼne ku̱maa”.
^ O “Amén”.
^ O “na̱nguá ndiyáá rí gíʼdoo numuu muniʼniiʼ Dios xó má gíʼmaa”.
^ O “naganí a̱kuíi̱n”.
