Rí na̱jkha̱ inún Romanos 12:1-21
12 Ikha jngóo a̱ngui̱nʼ, numuu rí Dios niʼni mba̱a̱ a̱jkiu̱u̱n kaʼyala, ikha jngóo natakháñala rí muxnajxí xuyala xóo mbá tsigijñaʼ rí kaʼwu, mbá rí ndaʼya rí manigu̱u̱ʼ Dios; mu xúʼko̱ mundxa̱ʼwa̱a̱ májánʼ e̱dxa̱la índo̱ gúni ñajuunʼ Dios.
2 Xúniʼñámíjná rí numbaaʼ rígi̱* maʼniala xó má eyoo; rí itháán gíʼdoo numuu mu̱ni̱ guriʼkumijnáala mu muriʼkui̱i̱ ku̱ma̱ ndrígála, mu ikháanʼ mínanʼ mbu̱ya̱a̱la xú káʼnii dí májánʼ nanigu̱u̱ʼ ga̱jma̱a̱ xúgíʼ dí Dios nandoo maguma.
3 Xó má rí Dios nigáwíinʼ a̱jkiu̱u̱n kaʼyoʼ ikhúúnʼ,* na̱tala mámbáa rí ikháanʼ rí xúndxa̱ʼwa̱míjna̱la rí ikháanʼ kuaʼdáá itháan numala, gusngajmá rí awáán endxaʼwamíjna̱la ga̱jma̱a̱ numala, xó má fe rí Dios nixnúu mámbáa rí ikháanʼ.
4 Numuu rí xóo mbáa xa̱bu̱ mbaʼa rí kaguminaʼ náa xuyuuʼ, mú raʼkháa xúgíʼ naʼni ikháá ñajunʼ,
5 xúʼko̱ má mangáanʼlu, maski ajndu mbaʼánʼ mú kuwáánʼ náa mbóó xuwiʼ gajmiúlú Cristo, maski má mbaʼa rí kaguminaʼ náa mbá xuwiʼ mú xúgíʼ kuajtuminaʼ.
6 Numuu rí májánʼ wéñuuʼ a̱jkiu̱u̱n Dios mixtiʼkhu rí nixnúlú rí najmáánʼ nuʼni maski asndu rakáʼyulú. Á mu ikhaa nindxu̱u̱ rí muʼtáriyaʼ, guʼtáriyaʼ xó má mba̱a̱ fe rí kuaʼdáá;
7 á mu nindxu̱u̱ rí mumbáñuun eʼwíinʼ, gu̱ʼni̱ tsiakimijna̱ rí muʼnimbáníí ñajunʼ rígi̱; á mu mbáa najmañuu naʼsngáa, gáʼsngáa;
8 bi̱ naxná tsiakii, gaxná tsiakii; bi̱ naxná, gaxná ga̱jma̱a̱ xúgíʼ a̱jkiu̱u̱n; bi̱ naxná ikha, gaʼni nacha̱ ga̱jma̱a̱ tsumáá; bi̱ nagáwíinʼ a̱jkiu̱u̱n kaʼñún eʼwíinʼ, gaʼni ga̱jma̱a̱ gagi.
9 Ngajua ndrígála xáʼni a̱jma̱ inuu. Gawiyala kuya̱a̱ dí ra̱májánʼ; gu̱ni̱ tsiakimíjna̱la* mu̱ni̱ rí májánʼ.
10 Gusngajmá rí nandala kuyamíjna̱ xóo bi̱ kaníkáanʼla. Gináanʼ ikháanʼ gúyamajkúnla eʼwíinʼ.
11 Guñajunʼla, xáʼskala. Gaguaʼdáá gagi rí na̱ʼkha̱ náa espíritu santo.* Ganindxa̱la ñumbáá ndrígóo Jeobá.*
12 Gaʼdxala ga̱jma̱a̱ numuu rí kuaʼti̱i̱n. Gaʼngala índo̱ nuraʼníí xkujndu. Xuniʼñáánʼ rutajkáanʼla.*
13 Guxnu̱u̱n má xúʼko̱ rí kuaʼdáá a̱ngiu̱lú* xó má rí ikhiin nda̱ñúnʼ. Gudrígúun májánʼ má xúʼko̱ eʼwíinʼ.
14 Gutajkáan ga̱jma̱a̱ numún bi̱ nuni gínáanʼla; xútha tsríguíinla.
15 Gaʼdxala gajmiála bi̱ nadxún; gumbi̱ya̱ʼ gajmiála bi̱ numbi̱ya̱ʼ.
16 Guñu̱u̱nla eʼwíinʼ xó má eyamíjna̱la ikháanʼ; xúndxa̱ʼwa̱míjna̱ náa maʼni rí mu̱ni̱ mbaʼwumíjna̱la, gu̱ni̱ rí nakujmaa dí ragíʼdoo numuu. Xúndxa̱ʼwa̱míjna̱ rí ikháanʼ najmañala wéñuuʼ.
17 Xútangáanʼ muniu̱u̱nla dí ra̱májánʼ bi̱ niniala dí ra̱májánʼ. Gu̱ni̱ tsiakimíjna̱la mu̱ni̱ rí xa̱bu̱ nundxa̱ʼwa̱míjna̱ dí nindxu̱u̱ májánʼ.
18 Á mu nandoo, gunimíjna̱la asndu xó má eʼnga̱la makuwáanʼ tsímáá gajmiála xúgíinʼ.
19 A̱ngui̱nʼ, á mu mbáa naʼniala dí ra̱májánʼ xútangáanʼ muni̱i̱ xó má niʼniala, guniʼñááʼla rí Dios masngájma sia̱nʼ ndrígóo náa raʼkhí dí niʼni. Numuu rí kiʼnirámáʼ: “‹Ikhúúnʼ kaʼyoʼ rí ma̱ni̱ gíníin; ga̱jma̱a̱ ma̱ni̱ numi̱ín náa rí nini̱›, eʼthí Jeobá”.*
20 Á mu “xa̱bu̱ bi̱ gíʼdáán sia̱nʼ naxkidxu̱u̱, araxnáá dí mi̱khu̱; á mu nakándawuuʼ, araxnáá rí maga̱a̱n; numuu rí á mu xúgi̱ kaʼnii tani̱ matadrámáʼ xámbúʼ mijkha náa edxu̱u̱”.*
21 Atani̱ má xúʼko̱ rí májánʼ maski má xa̱bu̱ nunianʼ dí ra̱májánʼ, mu xúʼko̱ maʼnga̱a̱ʼ matani̱ ga̱jma̱a̱ʼ dí ra̱májánʼ.
Mbaʼa nota
^ O “xó má rí Dios nisngájma rí májánʼ wéñuuʼ a̱jkiu̱u̱n kaʼyoʼ maski asndu rakáʼyoʼ”.
^ Náa angáa griego naʼthí, “araʼma”.
^ O “runi̱ tsajkuun”.
^ Náa ajngáa griego naʼthí, “bi̱ kaʼwiin”.
^ Xóo muʼthá, matani̱ rí maguabaaʼ a̱jkiu̱u̱n xa̱bu̱.
