Rí na̱jkha̱ inún Romanos 13:1-14
13 Xúgiáanʼ gíʼmaa munimbáníí dí nuthi xa̱bu̱ ñajunʼ, numuu rí ikhiin kúwá ga̱jma̱a̱ numuu Dios; xa̱bu̱ ñajunʼ bi̱ kúwá, Dios nigruigi̱i̱n náa kaʼñún.
2 Ikha jngóo bi̱ tsénimbu̱ún kuñún xa̱bu̱ ñajunʼ, tsénimbáníí awan rí nigíʼ Dios ga̱jma̱a̱ ikhiin mumíniiʼ.
3 Bi̱ nuni̱ rí májánʼ tsémíñún kuñún xa̱bu̱ ñajunʼ, mú bi̱ nuni̱ dí ra̱májánʼ namíñúún. Lá nandala rí xámiñala kuñu̱u̱n xa̱bu̱ ñajunʼ ráʼ. Gu̱ni̱ má xúʼko̱ rí májánʼ mu ikhiin mbuyamajkuala,
4 numuu rí ikhiin kúwá mu muni̱ ñajuunʼ Dios mu mambáyaaʼ má ikháán. Mú á mu xtaa ratani̱ dí raʼkhí, gamiñáaʼ, numuu dí raʼkháa ndíí kuya̱ espada. Numuu rí ikhiin kúwá runi̱ ñajuunʼ Dios, mú ma̱ngaa muni̱ mumíniiʼ bi̱ nuni̱ dí raʼkhí.
5 Ikháanʼ ndayóoʼ rí munimbala, mú raʼkháa numuu rí ikhiin muni̱ rí mumíni̱i̱ʼla, numuu rí ku̱ma̱ ndrígála naʼni dí mbu̱ya̱a̱ dí májánʼ má nindxu̱u̱.
6 Ikha jngóo mangáanʼla nuninuma náa inún xa̱bu̱ ñajunʼ, numuu rí ikhiin kúwá runi̱ ñajuunʼ Dios ga̱jma̱a̱ nuni̱ ñajunʼ rígi̱ tsejtsíí mbiʼi.
7 Xúgíinʼ guxnu̱u̱n rí kaʼñún: Bi̱ na̱nda̱ʼa̱ miʼni numáá xúgíʼ rí kaʼyoo, guninumala; bi̱ na̱nda̱ʼa̱ rí mbiʼyamajkuíí, guyamajkuíí; bi̱ na̱nda̱ʼa̱ rí miʼni mba̱a̱, gu̱ni̱ mba̱a̱.
8 Nimbá xágiʼmáanʼla náa inuu nimbáa, i̱ndó gaʼndala kuyamíjna̱ kaníkáanʼ; numuu rí bi̱ nandoo kaʼyoo ndxájuu naʼnimbánuu xtángoo.
9 Numuu rí kiʼtáñajunʼ dí naʼthí náa xtángoo, “xátani̱ aʼkhá ga̱jma̱a̱ʼ i̱mba̱a̱, xátaxíyáa xa̱bu̱, xátani̱ kuʼwáʼ, xánigua̱a̱ʼ maraʼdáá rí gíʼdoo i̱mba̱a̱” ga̱jma̱a̱ asndu xú káʼnii má i̱mba̱ kiʼtáñajunʼ dí rígá, naʼni̱i̱ imbóó rígi̱: “Gaʼndaaʼ xtayáá xa̱bu̱ numba ga̱jma̱a̱ʼ xó má eyaaʼ xtayaminaʼ ikháán”.
10 Bi̱ nandoo kaʼyoo xa̱bu̱ numba ga̱jma̱a̱ tséʼniuu nimbá dí ra̱májánʼ. Numuu rí ngajua naʼnimbánuu xtángoo.
11 Gu̱ni̱ rígi̱, numuu rí ikháanʼ má ndu̱ya̱a̱ mbiʼi rí kuwáanʼlu. Ndu̱ya̱a̱ rí ni̱jkha̱nú má hora rí mba̱jua̱a̱nʼlú, numuu rí makáwáanʼlú gíʼ itháán mijngii ki xóo nákha nini̱ndxu̱lú xa̱bi̱i̱ Jesús.
12 Mbruʼun na̱jkha̱ ranújngoo; najngiyuu má rí mambiʼi. Ikha jngóo guniʼñáánʼ ru̱ʼni̱ dí narígá náa mikrína ga̱jma̱a̱ guʼgíʼ ajua̱nʼ dí rígá náa nambiʼi.
13 Gajngruigulú xó má najngruigulú rí mbiʼi; xúʼgua náa ndxa̱a̱ náa rí tsíñewa̱a̱n dí eni̱, xájngáanʼla, xúbala xkawiʼ kayuuʼ gajmiála eʼwíinʼ,* xúni̱ xúgíʼ enii dí xkawiʼ,* xagiʼdala ni xáxíguála.
14 Rí gíʼmaa mu̱ni̱la, guyaridáá xkri̱da ndrígóo Tátá Jesucristo ga̱jma̱a̱ xúriyaʼ wapháá awan mu mu̱ni̱la rí nagua̱ʼa̱ xuyala.
