Rí na̱jkha̱ inún Romanos 14:1-23
14 Guríguíi májánʼ bi̱ na̱nguá gíʼdoo mbá fe gújkhúʼ, mú xútanuma á mú mixtiʼkhu xóo endxa̱ʼwa̱a̱ e̱dxa̱laʼ.
2 Mbáa xa̱bu̱ bi̱ gíʼdoo mbá fe gújkhúʼ ma̱ndoo mi̱khu̱ xúgíʼ, mú mbáa bi̱ na̱nguá, i̱ndó yaʼwu e̱ʼkhu̱.
3 Bi̱ na̱ʼkhu̱ xúgíʼ xákiʼnáa kaʼyoo bi̱ tséʼkhu̱ xúgíʼ, bi̱ tséʼkhu̱ xáʼtánumuu bi̱ na̱ʼkhu̱, numuu rí Dios nagruiguíin ga̱jma̱a̱ gagi xúgíinʼ.
4 Tsáá nindxa̱a̱ʼ ikháán mu maratanúmáá bi̱ nambáyúu i̱mba̱a̱ rá. I̱ndó bi̱ naʼtáñajuunʼ kaʼyoo mbaʼyoo á mu ikhaa mawiji̱ o maxpátri̱ga̱a̱. Mú ikhaa mawiji̱ numuu rí Jeobá* mambáyúu mawiji̱.
5 Mbáa xa̱bu̱ ndaʼyoo rí mbá mbiʼi gíʼdoo itháán numuu ki xóo i̱ʼwáʼ, mú i̱mba̱a̱ ndaʼyoo dí xúgíʼ mbiʼi mbríguu nindxu̱u̱. Mámbáa gáʼni xó má endxa̱ʼóo edxu̱u̱.
6 Bi̱ ndaʼyoo rí gíʼdoo numuu mbóo mbiʼi, naʼni ga̱jma̱a̱ numuu Jeobá.* Xúʼko̱ má bi̱ na̱ʼkhu̱, naʼni ga̱jma̱a̱ numuu Jeobá,* numuu rí naxnáa núma̱aʼ Dios, xúʼko̱ má bi̱ tséʼkhu̱ naʼni ga̱jma̱a̱ numuu Jeobá* ga̱jma̱a̱ naxnáa núma̱aʼ Dios.
7 Nimbáa dí ikháanʼlú na̱nguá xtáa ni má nimbáa dí ikháanʼ tsékháñuu i̱ndó ga̱jma̱a̱ numulúʼ má ikháanʼ.
8 Á mu kuwáánʼ, kuwáánʼ ga̱jma̱a̱ numuu Jeobá,* á mu nakháñulú, nakháñulú ga̱jma̱a̱ numuu Jeobá,* ikha jngóo á mu kuwáánʼ o nakháñulú kaʼyulú náa Jeobá.*
9 Numuu rí Cristo nikháñuu ma̱ngaa nigabi̱i̱ ga̱jma̱a̱ numuu rígi̱: Mu mani̱ndxu̱u̱ Tátá ndrígu̱ún bi̱ nduya ga̱jma̱a̱ bi̱ nikháñúún.
10 Náá numuu dí naratánúmáá ndxájuaaʼ rá. O náá numuu rí nawiya̱a̱ʼ xtayáá ndxájuaaʼ rá. Xúgiáanʼ makuwáánʼ náa manda̱ʼa̱a̱ cuenta Dios.
11 Numuu dí kiʼnirámáʼ: “Xó má gajkhun rí ikhúúnʼ xtáá, eʼthí Jeobá,* xúgíinʼ musmbati̱gu̱u̱n náa inuʼ ga̱jma̱a̱ xúgíinʼ muthi pa̱jnu rí ikhúúnʼ ni̱ndxu̱ʼ Dios”.
12 Numuu rí mámbáa dí ikháanʼla maxnájxi̱i̱ cuenta náa Dios.
13 Guniʼñáánʼ ruʼtanumamijná. Itháan májánʼ dí mu̱ʼni̱ mbá tsiakii dí xúʼgíʼ nimbá dí maʼni majngrádaaʼ mbáa ndxájulú.
14 Ikhúúnʼ dí ni̱ndxu̱ʼ xa̱bi̱i̱ Jesús nda̱yo̱o̱ májánʼ dí nda̱a̱ nimbá dí mitsaga. I̱ndó á mu mbáa xa̱bu̱ nandxa̱ʼwa̱mínáʼ dí mitsaga nindxu̱u̱, ikhú ndaʼyoo dí mitsaga.
15 Á mu natani gawíínʼ ndxájuaaʼ ga̱jma̱a̱ numuu mbá dí ikháán natsu nánguá xtaʼdáá ngajua. Xátani̱ gámbáa ga̱jma̱a̱ numuu dí natsu mbáa bi̱ Cristo nikháñuu ga̱jma̱a̱ numuu.
16 Ikha jngóo, xúniʼñáánʼ rí xa̱bu̱ muthi dí ra̱májánʼ ga̱jma̱a̱ numuu dí májánʼ kuwáanʼ ru̱nila.
17 Raʼkháa ga̱jma̱a̱ numuu dí mbáa xa̱bu̱ makuiʼtsu, maga̱a̱n, ma̱ndoo mata̱ʼa̱a̱ náa naʼtáñajunʼ Xa̱bu̱ Ñajunʼ ndrígóo Dios,* nindxu̱u̱ rí mawiji̱ jmbu, maxtáa tsímáá gajmíi̱n eʼwíinʼ ga̱jma̱a̱ magiʼdoo gagi rí na̱ʼkha̱ náa espíritu santo.*
18 Numuu rí asndu tsáa bi̱ xígi̱ kaʼnii naʼni ñajuunʼ Cristo, nanigu̱u̱ʼ Dios ga̱jma̱a̱ nanigu̱u̱nʼ xa̱bu̱.
19 Ikha jngóo guʼyáʼ má xúʼko̱ dí naʼni marigá rí tsímáá ga̱jma̱a̱ dí muxnamíjnálú tsiakii.
20 Xátani̱ gámbáa rí niʼni Dios i̱ndó ga̱jma̱a̱ numuu ganitsu. Gajkhun dí xúgíʼ nindxu̱u̱ kaʼwu, mú ra̱májánʼ nindxu̱u̱ índo̱ mbáa na̱ʼkhu̱ dí naʼni majngrádaaʼ i̱mba̱a̱.
21 Itháan májánʼ dí xátsu xuwiʼ, ni xángíin vino, ni xátani̱ nimbá dí maʼni majngrádaaʼ ndxájuaaʼ.
22 I̱ndó ikháán ga̱jma̱a̱ʼ Dios etayáá rí natatsimbaaʼ.* Gagi xtáa xa̱bu̱ bi̱ naraʼwíí rí maʼni ga̱jma̱a̱ tséʼni gawúunʼ rí naʼni.
23 Ikha jngóo, á mu mbáa naʼni a̱jma̱ a̱jkiu̱u̱n ga̱jma̱a̱ mbá rí na̱ʼkhu̱, ra̱májánʼ dí xtáa raʼni, numuu dí tséʼni ga̱jma̱a̱ xúgíʼ a̱jkiu̱u̱n.* Numuu rí á mu mbáa tséʼni ga̱jma̱a̱ xúgíʼ a̱jkiu̱u̱n mbá rí naʼni, nindxu̱u̱ aʼkhá.
