Rí na̱jkha̱ inún Romanos 16:1-27
16 Bugi̱ nindxu̱u̱ ndxájulú Febe, mbáa bi̱ nayambáá náa guʼwá nagimbáanʼ dí rígá náa Cencreas,
2 gundríguíila májánʼ ga̱jma̱a̱ numuu mbiʼyuu Tátá Jesús xó má gíʼmaa mundríguíi mbáa xa̱bi̱i̱ ikhaa* ga̱jma̱a̱ gumbáyííla náa gáʼyóoʼ, numuu rí ma̱ngaa niñewu̱u̱n mbaʼin ga̱jma̱a̱ niñewu̱nʼ mangúún.
3 Gutha̱a̱n dí narajxi̱i̱ Prisca ga̱jma̱a̱ Áquila, bi̱ ni̱ni̱ mbóó gajmíʼ ñajuunʼ Cristo Jesús,
4 bi̱ nigíʼ makhañún* ga̱jma̱a̱ numuʼ ga̱jma̱a̱ bi̱ naxni̱i̱n núma̱aʼ ikhúúnʼ ma̱ngaa a̱ngiu̱lú bi̱ nagimbíi̱n bi̱ kúwá náa i̱ʼwáʼ xuajen.
5 Ma̱ngaa guthu̱u̱n dí narajxiín bi̱ nagimbíi̱n náa guʼwún. Gutha̱a̱nla Epéneto bi̱ nandoʼ ka̱yo̱o̱ dí narajxi̱i̱, bi̱ ninindxu̱u̱ ginii kayuuʼ xa̱bi̱i̱ Cristo náa Asia.
6 Gutha̱a̱nla María dí narajxi̱i̱, bi̱ niñajunʼ gakhi̱i̱ wéñuuʼ ga̱jma̱á numala.
7 Ma̱ngaa gutha̱a̱n dí narajxi̱i̱ Andrónico ga̱jma̱a̱ Junias, bi̱ ka̱ñu̱u̱n bi̱ ni̱jkhá mbóó gajmíʼ náa guʼwá e̱jua̱nʼ, ma̱ngaa bi̱ apóstoles nuniʼniúnʼ májánʼ ga̱jma̱a̱ ikhiin itháán mba̱yu̱u̱ʼ má kúwá runi̱ ñajuunʼ Cristo ki xóo ikhúúnʼ.
8 Gutha̱a̱nla Ampliato dí narajxi̱i̱, bi̱ nandoʼ ka̱yo̱o̱ numuu rí nindxu̱u̱ xa̱bi̱i̱ Jesús.
9 Gutha̱a̱nla Urbano dí narajxi̱i̱, bi̱ nuʼnilú gajmiúlú ñajuunʼ Cristo ga̱jma̱a̱ Estaquis bi̱ nandoʼ ka̱yo̱o̱.
10 Ma̱ngaa gutha̱a̱nla Apeles dí narajxi̱i̱, bi̱ nawi̱ji̱ jmbu náa Cristo. Ma̱ngaa guthu̱u̱n dí narajxi̱ín bi̱ kúwá náa goʼwóo Aristóbulo.
11 Gutha̱a̱nla dí narajxi̱i̱ Herodión bi̱ ka̱yo̱o̱. Ma̱ngaa guthu̱u̱n dí narajxiín bi̱ kúwá náa goʼwóo Narciso bi̱ ni̱ndxu̱ún xa̱bi̱i̱ Jesús.
12 Narajxi̱i̱ Trifena ga̱jma̱a̱ Trifosa, gu̱ʼu̱ bi̱ ra̱ʼkhá tháán eñajunʼ ga̱jma̱a̱ numuu Tátá. Ma̱ngaa gutha̱a̱nla dí narajxi̱i̱ Pérsida bi̱ nandulú kuʼyáá, numuu rí ma̱ngaa niñejunʼ wéñuuʼ ga̱jma̱a̱ numuu Tátá.
13 Narajxi̱i̱ Rufo, bi̱ Tátá niraʼwíi ga̱jma̱a̱ ru̱dúu̱ bi̱ nindxu̱u̱ xóo ru̱dúʼ mangúún.
14 Gutha̱a̱nla dí narajxi̱i̱ Asíncrito, Flegonte, Hermes, Patrobas, Hermas ga̱jma̱a̱ a̱ngiu̱lú bi̱ kúwá gajmiún.
15 Narajxi̱i̱ Filólogo, Julia, Nereo ga̱jma̱a̱ ndxájuu, Olimpas ga̱jma̱a̱ xúgíinʼ a̱ngiu̱lú* bi̱ kúwá gajmiún ikhiin.
16 Gurajximíjnáaʼla ga̱jma̱a̱ beso.* Xúgíinʼ xa̱bi̱i̱ Cristo bi̱ nagimbíi̱n nurajxáanʼla.
17 A̱ngui̱nʼ, dí xúgi̱ natakháñala ga̱jma̱a̱ xúgíʼ a̱jkiu̱nʼ rí guñewumíjna̱la náa bi̱ nuni̱ dí murkuajimíjnála ga̱jma̱a̱ bi̱ nuni̱ dí majngrádáanʼla, bi̱ tsésngáa kiʼsngáa rí nijmañala, nditháan xámbájxala gajmiála.
18 Numuu rí xa̱bu̱ bugi̱ na̱nguá ni̱ndxu̱ún ñumbáá ndrígóo Cristo bi̱ nindxu̱u̱ Tátá ndrígúlú, i̱ndó nuni̱ rí nandún ikhiin najmún ajngáa wabaʼ ga̱jma̱a̱ ajngáa nagui̱i̱ mu muninduwiinʼ bi̱ wabaʼ a̱jkiu̱ún.*
19 Xúgíinʼ nidxawíín rí ikháanʼ nunimbala ga̱jma̱a̱ rúʼko̱ rí naʼni maʼdxuʼ wéñuuʼ ga̱jma̱a̱ numala. Nandoʼ rí majmañala muni̱ rí májánʼ, mú xájmañala dí ra̱májánʼ.
20 Dios bi̱ naxná rí tsímáá inu má makujmbiriga̱a̱ Gixa̱a̱* náa agoo rajkuála. Rí májánʼ wéñuuʼ a̱jkiu̱u̱n* Tátá Jesús garigá náa ikháanʼla.
21 Timoteo bi̱ nambáyuʼ, narajxáanʼla. Ma̱ngaa narajxáanʼla Lucio, Jasón, Sosípatro bi̱ kañu̱u̱n.
22 Ikhúúnʼ Tercio, bi̱ niʼnirámáʼ i̱yi̱i̱ʼ rígi̱, narajxáanʼla ga̱jma̱a̱ numuu Tátá.
23 Narajxáanʼla Gayo, bi̱ naxnátíʼñuʼ goʼwóo ga̱jma̱a̱ naxnátíʼñún bi̱ nagimbíi̱n. Ma̱ngaa narajxáanʼla Erasto bi̱ nindxu̱u̱ tesorero* náa xuajen ga̱jma̱a̱ ndxájuu bi̱ mbiʼyuu Cuarto narajxáanʼla.
24 *
25 Ajngáa májánʼ rí ikhúúnʼ nataráʼa ma̱ngaa rí na̱tha̱ ga̱jma̱a̱ numuu Jesucristo, nasngájma rí Dios ma̱ndoo maxnúlú tsiakii mu muguajún gújkhúʼ, dí nirígá ngu̱ʼwa̱ Dios nijmuu ajngáa rí májánʼ mu maʼni rí makujmaa pa̱jnu ga̱jma̱a̱ rígi̱ nirígá ngu̱ʼwa̱ mba̱yu̱u̱ʼ tsiguʼ,
26 mú rí xúgi̱ ni̱jkha̱nú nikujmaa índo̱ nijuixnún rí muniʼnuuʼ xúgíinʼ xa̱bu̱ xuajen dí kiʼtáriyaʼ náa Kiʼniraʼmáʼ xó má niʼtáñajunʼ Dios bi̱ xtáa kámuu mbiʼi, mu xúʼko̱ maguánú munimbu̱u̱n ga̱jma̱a̱ fe rí guáʼdáá,
27 gaʼga gamajkhu náa mbáwíí Dios bi̱ najmañuu wéñuuʼ ga̱jma̱a̱ numuu Jesucristo asndu kámuu mbiʼi. Xúʼko̱ gáʼni.*
Mbaʼa nota
^ Náa ajngáa griego naʼthí, “bi̱ kaʼwiin”.
^ Náa ajngáa griego naʼthí, “muturígú aphúún”.
^ Náa ajngáa griego naʼthí, “bi̱ kaʼwiin”.
^ Náa ajngáa griego naʼthí, “beso rí kaʼwu”. Beso rígi̱ nuxnamijná a̱ngiu̱lú bi̱ ndiʼkhún eniʼnumijná.
^ O “bi̱ raguáʼdáá aʼkhúún”, “bi̱ tsékru̱ʼu̱u̱n”, “bi̱ tséni dí ra̱májánʼ”.
^ O “rí májánʼ wéñuuʼ a̱jkiu̱u̱n Tátá Jesús maski asndu rakáʼyulú”.
^ O “bi̱ naguduun mbújkha̱a̱”.
^ Versículo rígi̱ rígá náa tikhuu Biblia, mú nda̱a̱ náa mbaʼa rí nigumaraʼmáʼ náa ajngáa griego.
^ O “Amén”.
