Rí na̱jkha̱ inún Romanos 3:1-31
3 Dí gíʼdoo numuu rí ñajuanʼ judío rá. Ndiéjunʼ eyambáá rí muthu xtóo xuyuuʼ tsáʼkháanʼ rá.
2 Nayambáá wéñuuʼ náa xúgíʼ. Timbá, numuu rí bi̱ judíos nijuixnún ajngóo Dios.
3 Ndiéjunʼ gárígá á mu mbáa na̱nguá gíʼdoo fe rá. Lá ga̱jma̱a̱ numuu rí na̱nguá gíʼdoo fe maʼni rí Dios ní xánindxu̱u̱ jmbii ráʼ.
4 ¡Na̱nguá! Dios gajkuwiin nindxu̱u̱, maski má xúgíinʼ xa̱bu̱ munindu̱wa̱ʼ, xó má kiʼnirámáʼ: “Dí gárata masngájma rí nindxa̱a̱ʼ xa̱bu̱ jmbii ga̱jma̱a̱ índo̱ gárígá mbá rí guxrui̱ga̱a̱n matasngajmún rí ikhiin tséyáá rí ethi”.
5 Mú á mu ga̱jma̱a̱ numuu dí ra̱májánʼ dí nu̱ʼni̱ nasngájma rí Dios nindxu̱u̱ májáanʼ, ndiéjunʼ gúʼthá rá. Lá nasngájma rí Dios nindxu̱u̱ ra̱májáanʼ índo̱ nakiʼnáa ráʼ. (Xtáá ra̱ta̱ rígi̱ xóo mbáa xa̱bu̱ numbaaʼ).
6 ¡Gajkhun dí na̱nguá! Á mu Dios nindxu̱u̱ ra̱májáanʼ, xú káʼnii gándi̱ʼi̱i̱n cuenta xa̱bu̱ numbaaʼ rá.
7 Á mu ga̱jma̱a̱ nduwaʼ rí na̱ni̱, naʼni makujmaa rí Dios nindxu̱u̱ gajkuwiin ga̱jma̱a̱ naʼni rí maʼga gamajkhu náa ikhaa, náá numuu rí ikhaa naʼthí rí nindxu̱ʼ xa̱bu̱ aʼkhá xá.
8 Náá numuu rí tséʼtálú “gu̱ʼni̱ dí ra̱májánʼ mu ma̱ʼkha̱ dí májánʼ”, xó má tikhuun nuni̱ tsudulú rá. Rí mumíniiʼ xa̱bu̱ buʼko̱ nindxu̱u̱ májánʼ.
9 Mú, lá ikháanʼ kuaʼdáá itháán numulú ráʼ. ¡Na̱nguá! Xó má ni̱tha̱, xúgiáanʼlú kuwáanʼ náa majñu̱u̱ʼ aʼkhá xó má judíos ga̱jma̱a̱ griegos.
10 Xó má naʼthí náa kiʼnirámáʼ: “Nda̱wa̱a̱ nimbáa xa̱bu̱ jmbii, nda̱wa̱a̱ nimbáa;
11 nda̱wa̱a̱ nimbáa bi̱ nakro̱ʼo̱o̱ wéñuuʼ, nda̱wa̱a̱ nimbáa bi̱ mbayáaʼ Dios.
12 Xúgíinʼ nijngaríʼiin, xúgíinʼ tséjmiin, nimbáa tsésngájma rí májánʼ a̱jkiu̱u̱n, nda̱wa̱a̱ nimbáa”.
13 “Iñúʼ aphúún nindxu̱u̱ xóo iñá wajinʼ rí kambaʼta; najmún raju̱ún mu munindu̱wa̱ʼ”. “Dí nagájnuu náa rawúúnʼ nindxu̱u̱ xóo iya ndawuuʼ a̱bu̱nʼ rí mbiiʼ”.*
14 “Náa rawúúnʼ gajtíí rí mitsaga ga̱jma̱a̱ rí miʼkhu̱u̱n”.
15 “Ikhiin asndu nagún ragáñúún rí muradíin eʼwíinʼ”.
16 “Asndu náá má egún nuni̱ gámbáa ga̱jma̱a̱ narígá rí tsíginá,
17 tsíñún gákuwá tsímáá gajmiún eʼwíinʼ”.
18 “Ikhiin tsémíñún kuyáá Dios”.
19 Nduʼyáá rí xúgíʼ rí naʼthí náa Xtángoo na̱jkha̱ inún bi̱ kúwá náa majñu̱u̱ʼ Xtángoo, mu xúgíinʼ maguanún wíí ga̱jma̱a̱ rí xúgíinʼ xa̱bu̱ numbaaʼ mbuyáá rí guáʼdáá aʼkhúún náa Dios ga̱jma̱a̱ rí ikhaa maʼni mumíniiʼ.
20 Ikha jngóo nimbáa xájuiʼthá rí nindxu̱u̱ xa̱bu̱ jmbii náa inuu ikhaa ga̱jma̱a̱ numuu rí naʼnimbánuu xtángoo ga̱jma̱a̱ numuu xtángoo nduʼyáá májánʼ ndiéjunʼ nindxu̱u̱ aʼkhá.
21 Á mu nuʼgíʼ kaníí xtángoo, Dios nisngájmulú rí ikhaa ndaʼyoo dí ikháanʼ ni̱ndxu̱lú májáanʼ, xó má naʼthí náa Xtángoo ndrígóo Moisés ga̱jma̱a̱ dí ninirámáʼ Profetas,*
22 xúʼko̱, numuu rí Dios ndaʼñún rí ni̱ndxu̱ún míjíinʼ xúgíinʼ bi̱ guáʼdáá fe náa Jesucristo. Numuu rí Dios tséraʼwíin xa̱bu̱.
23 Numuu rí xúgíinʼ nixudamíjna̱ aʼkhá, ikha jngóo tséʼngu̱u̱n gúsngajma rí xóo mba̱a̱ nindxu̱u̱ Dios,
24 Dios ndaʼñún rí ni̱ndxu̱ún jmbiin ga̱jma̱a̱ numuu rí Cristo niʼtsiwíin mu maʼnikáwíin, rígi̱ nindxu̱u̱ mbá rí nimínáanʼ Dios numuu rí májánʼ wéñuuʼ a̱jkiu̱u̱n* maski ajndu rakáʼyulú.
25 Dios nixnájxi̱i̱ ikhaa xóo mbá tsigijñaʼ mu ma̱ndoo mambaxíiʼ gajmiúlú ikhaa* ga̱jma̱a̱ numuu fe rí muguaʼdáá náa eʼdiuu. Niʼni rígi̱ mu ikhaa masngájma rí nindxu̱u̱ májáanʼ, numuu rí Dios naʼngo̱o̱ a̱jkiu̱u̱n, naʼni mba̱a̱ a̱jkiu̱u̱n kaʼyoo aʼkhá dí nirígá nákha ginii.
26 Niʼni mu masngájma rí nindxu̱u̱ jmbii náa mbiʼi rígi̱, ma̱ngaa rí mani̱ndxu̱u̱ jmbii índo̱ gáʼthí dí nindxu̱u̱ májáanʼ bi̱ gágiʼdoo fe náa Jesús.
27 Lá rígá mbá rí ma̱ndoo mu̱ʼni̱ mbaʼumíjna̱ ráʼ. Na̱nguá. Xú káʼnii xtángoo dí erikoo rá. Lá ga̱jma̱a̱ numuu rí nu̱ʼni̱ ráʼ. Na̱nguá, nindxu̱u̱ xtángoo ndrígóo fe.
28 Numuu rí ni̱jkua̱nú ndiʼyáá rí mbáa xa̱bu̱ nanindxu̱u̱ jmbii ga̱jma̱a̱ numuu fe, raʼkháa ga̱jma̱a̱ numuu rí naʼnimbánuu xtángoo.
29 Lá ikhaa i̱ndó nindxu̱u̱ Dios ndrígu̱ún bi̱ judíos xáʼ. Lá raʼkháa ma̱ngaa nindxu̱u̱ Dios ndrígu̱ún xa̱bu̱ numbaaʼ xáʼ. Xúʼko̱, ikhaa ma̱ngaa nindxu̱u̱ Dios ndrígu̱ún xa̱bu̱ numbaaʼ.
30 Xó má Dios nindxu̱u̱ mbáwíí, ikhaa maʼthí dí ni̱ndxu̱ún xa̱bu̱ jmbiin bi̱ nirujtu xtóo xuyuuʼ tsáʼkhún ga̱jma̱a̱ numuu fe rí guáʼdáá, xúʼko̱ má bi̱ túrujtu xtóo xuyuuʼ tsáʼkhún maʼthí rí ni̱ndxu̱ún xa̱bu̱ jmbiin ga̱jma̱a̱ numuu fe rí guáʼdáá.
31 Lá nuʼnijngudi̱i̱ xtángoo ga̱jma̱a̱ numuu fe rí guaʼdáá ráʼ. ¡Na̱nguá! Nu̱ʼni̱ rí xtángoo magiʼdoo itháán numuu.
