Rí na̱jkha̱ inún Romanos 4:1-25
4 Ikha jngóo, ndiéjunʼ gúʼthá rí niʼngo̱o̱ nikhánúu Abrahán, bi̱ nindxu̱u̱ wajin xiʼñúlú rá.
2 Mbá xkri̱da, á mu Abrahán nijuiʼthá rí ninindxu̱u̱ xa̱bu̱ jmbii ga̱jma̱a̱ numuu rí niʼni, magiʼdoo numuu dí maʼnimbamínáʼ, mú raʼkháa náa inuu Dios.
3 Ndiéjunʼ rí naʼthí náa Kiʼniraʼmáʼ rá. Ikhí naʼthí “Abrahán nigiʼdoo fe náa Jeobá,* ikhaa ndiʼyoo dí nindxu̱u̱ mbáa xa̱bu̱ jmbii”.
4 Ikha jngóo bi̱ nañejunʼ, rí na̱da̱ʼ* na̱nguá nindxu̱u̱ mbá rí nakhánáá xúʼkhi̱ín, nindxu̱u̱ rí kaʼyoo magruigú.
5 Xa̱bu̱ bi̱ tséñajunʼ, mú nasngájma dí gíʼdoo fe náa Dios, bi̱ naʼthí rí nindxu̱u̱ jmbii mbáa xa̱bu̱ aʼkhá ga̱jma̱a̱ numuu fe rí gíʼdoo majuiʼtháán rí nindxu̱u̱ jmbii.
6 Ma̱ngaa David naʼthí dí naxtáa gagi xa̱bu̱ bi̱ Dios ndaʼyoo dí nindxu̱u̱ jmbii, raʼkháa ga̱jma̱a̱ numuu dí naʼni:
7 “Gagi kúwá xa̱bu̱ bi̱ Dios niʼni mba̱a̱ a̱jkiu̱u̱n kaʼñún náa raʼkhí rí nini̱* ga̱jma̱a̱ niʼni jngudi̱i̱ aʼkhúún;
8 gagi xtáa xa̱bu̱ bi̱ Jeobá* ni xármáʼáan a̱jkiu̱u̱n kaʼyoo aʼkhá ndrígóo”.
9 Lá gagi rígi̱ guáʼdáá i̱ndó bi̱ nithu xtóo xuyuuʼ tsáʼkhún o ma̱ngaa bi̱ túthu ráʼ. Numuu rí nuʼthá: “Abrahán ninindxu̱u̱ jmbii ga̱jma̱a̱ numuu fe rí nigiʼdoo”.
10 Nguáná nijuiʼtháán dí nindxu̱u̱ jmbii xá. Lá índo̱ nithu xtóo xuyuuʼ tsáʼkhúun o índo̱ xóó tsétu dxe̱ʼ. Ninindxu̱u̱ nákha xóó tsétu xtóo xuyuuʼ tsáʼkhúun.
11 Dios nixnúu mbá tsinaʼ, niʼthúu̱n dí marujtu xtóo xuyuuʼ tsáʼkhúun mu makujmaa* rí gíʼdoo fe. Rígi̱ nirígá mu mani̱ndxu̱u̱ anu̱ún xúgíinʼ bi̱ guáʼdáá fe nákha xóó tsétu xtóo xuyuuʼ tsáʼkhún, mu makujmaa rí ni̱ndxu̱ún jmbiin,
12 mu mani̱ndxu̱u̱ anu̱ún xúgíinʼ bi̱ nithu xtóo xuyuuʼ tsáʼkhún, raʼkháa i̱ndó bi̱ nandún muthu xtóo xuyuuʼ tsáʼkhún, mangiin bi̱ guáʼdáá fe xó má rí nigiʼdoo anu̱lú Abrahán índo̱ ikhaa xóó tsétu xtóo xuyuuʼ tsáʼkhúun.
13 Numuu rí Abrahán o e̱ji̱i̱n túndrigú rí nikudaminaʼ maʼni Dios dí ikhaa magruigú mbá numbaaʼ á mu naʼnimbo̱o̱ xtángoo, ninindxu̱u̱ numuu dí Abrahán nigiʼdoo fe náa Dios ga̱jma̱a̱ Dios ndiʼyoo dí nindxu̱u̱ mbáa xa̱bu̱ jmbii.
14 Á mu bi̱ mundrigúu rí kaʼñún ni̱ndxu̱ún bi̱ nunimbáníí xtángoo, fe ndrígu̱ún xágiʼdoo numuu ga̱jma̱a̱ nándáa rí gáguaʼthi̱i̱n.
15 Ikha jngóo, á mu mbáa gánújngurámuuʼ Xtángoo, Dios makiʼnáa kaʼyoo, á mu nda̱a̱ xtángoo nda̱a̱ má rí manújngurámulúʼ.
16 Ikha jngóo dí nikudaminaʼ maʼni Dios nagruigú mbáa ga̱jma̱a̱ numuu fe rí gíʼdoo, magruigú maski ajndu rakáʼyoo* mu xúʼko̱ mundrígúu xúgíinʼ bi̱ gáguwáʼ náa ikhaa, raʼkháa i̱ndó bi̱ nunimbáníí Xtángoo ma̱ngaa bi̱ guáʼdáá ikháá má fe xóo Abrahán bi̱ nindxu̱u̱ anu̱lú xúgiáanʼ.
17 (Xó má kiʼnirámáʼ: “Niʼgíinʼ mu mani̱ndxa̱a̱ʼ anu̱ún xa̱bu̱ bi̱ gákúwá náa mbaʼa xuajen mba̱ʼu̱”). Abrahán nigiʼdoo fe rígi̱ náa inuu Dios, náa inuu bi̱ naʼni rí matujxi̱ín* bi̱ nikháñún ga̱jma̱a̱ bi̱ naʼthí dí rígá má dí xóó nda̱a̱.
18 Ikhaa nigi̱ʼthu̱u̱n ga̱jma̱a̱ nigiʼdoo fe dí maʼga̱nú mani̱ndxu̱u̱ anu̱ún xa̱bu̱ bi̱ gákúwá náa mbaʼa xuajen mba̱ʼu̱, maski ajndu ndiʼyoo dí rakáʼnii marigá, mú ikhaa niʼnimbo̱o̱ rí nijuiʼtháán: “Xúʼko̱ mbaʼin gáʼni ejña̱a̱nʼ”.
19 Maski ajndu fe ndrígóo tákaguabaaʼ, mú ndiʼyoo rí xuyuuʼ asndu xóo nikháñuu má (numuu rí gíʼdoo má 100 tsiguuʼ) ga̱jma̱a̱ dí Sara na̱nguá xóo magiʼdiin e̱ji̱n.
20 Mú, ga̱jma̱a̱ numuu dí nikudaminaʼ maʼni Dios, ikhaa táʼni a̱jma̱ a̱jkiu̱u̱n nigiʼdoo má xúʼko̱ fe. Ikhaa nigiʼdoo tsiakii ga̱jma̱a̱ numuu fe ndrígóo ga̱jma̱a̱ xúʼko̱ niʼni mba̱a̱ Dios,
21 ikhaa ndiʼyoo gajkhun rí Dios maʼnimbánuu xúgíʼ rí nikudaminaʼ maʼni náa ikhaa.
22 Ikha jngóo, “Dios ndiʼyoo rí nindxu̱u̱ jmbii”.
23 Mú ajngáa “Dios ndiʼyoo rí nindxu̱u̱” tágumaraʼmáʼ i̱ndó ga̱jma̱a̱ numuu ikhaa,
24 ma̱ngaa nigumarámáʼ ga̱jma̱a̱ numulú, bi̱ Dios mbaʼyoo rí ni̱ndxu̱lú jmbiáánʼ, numuu rí nuʼnimbulú kuʼyáá bi̱ nitujxi̱i̱* náa majñúnʼ wajinʼ ikhaa nindxu̱u̱ Jesús Tátá ndrígúlú.
25 Ikhaa nijuixnájxi̱i̱ ga̱jma̱a̱ numuu aʼkhúlú, ma̱ngaa nigabi̱i̱* mu maʼthí rí ni̱ndxu̱lú xa̱bu̱ jmbii.
Mbaʼa nota
^ O “nagruigú numuu maski ajndu rakáʼyoo”.
^ Náa ajngáa griego naʼthí, “túnimbaníí xtángoo”.
^ O “nikudaminaʼ”.
^ O “magabi̱ínʼ”, “mbuya̱a̱”.
^ O “nigabi̱i̱”, “ndiʼya̱a̱”.
^ Náa ajngáa griego naʼthí, “nitujxi̱i̱”.
