Rí na̱jkha̱ inún Romanos 7:1-25
7 A̱ngui̱nʼ, lá tséya̱a̱la rí Xtángoo naʼtáñajuunʼ xa̱bu̱ nákha xóó xtáa ráʼ. (Numuu dí xtáá ra̱thu̱u̱n bi̱ nuniʼnuuʼ xtángoo).
2 Mbá xkri̱da, náa xtángoo naʼthí dí a̱ʼgu̱ bi̱ ninújúnʼ gíʼmaa maxtáa ga̱jma̱a̱ ajmbio̱o̱* índo̱ ikhaa xóó xtáa; á mu ajmbio̱o̱ nakháñuu, nándáa xtángoo ndrígóo ajmbio̱o̱ náa ikhaa.
3 Á mu dí mbáa a̱ʼgu̱ kaʼni̱í xtáa ndaʼya ajmbio̱o̱ nagiʼdaa i̱mba̱a̱ xa̱bu̱ kaníí magumbiʼyuu a̱ʼgú ya̱mba̱ʼ.* Mú, á mu ajmbio̱o̱ nakháñuu ikhaa nánguá kaʼyoo maʼnimbánuu xtángoo ndrígóo ajmbio̱o̱, ikha jngóo nánguá xóo magumbiʼyuu a̱ʼgú ya̱mba̱ʼ á mu ikhaa na̱jkha̱nú nanújúunʼ.
4 Xúʼko̱ má mangáanʼ a̱ngui̱nʼ, Cristo niʼni káwáanʼla* mu xákuwáanʼ náa majñu̱u̱ʼ Xtángoo, rígi̱ nirígá mu maʼga̱nú mani̱ndxa̱la náa i̱mba̱a̱, ikhaa bi̱ nitujxi̱i̱* náa majñúnʼ wajinʼ mu xúʼko̱ ma̱ndoo mu̱ʼni̱ rí nanigu̱u̱ʼ Dios.
5 Numuu rí índo̱ xóó kuwáánʼ nandulú mu̱ʼni̱ rí nandoo xuyulú, Xtángoo naxkajxáánʼ magua̱ʼa̱ mu̱ʼni̱ dí ra̱májánʼ ga̱jma̱a̱ rígi̱ maʼga kaguáanʼ makhañúlú.
6 Mú rí xúgi̱ niguma káwáanʼ náa Xtángoo, numuu rí nikháñulú náa naʼtáñajunlú Xtángoo, mu xúgi̱ manindxu̱lú ñumbáá náa muniʼñámíjná dí maxnúlú ikha espíritu santo,* xúniʼñámíjná dí maxnúlú ikha xtángoo rí wayuu.
7 Ikha jngóo ndiéjunʼ gúʼthá, lá Xtángoo nindxu̱u̱ aʼkhá ráʼ. ¡Na̱nguá! Ikhúúnʼ xáyóo ndiéjunʼ nindxu̱u̱ aʼkhá á mu nda̱a̱ Xtángoo. Mbá xkri̱da, xáyóo ndiéjunʼ nindxu̱u̱ dí maʼndaaʼ maraʼdáá dí gíʼdoo i̱mba̱a̱ á mu náa Xtángoo táʼthi “xánigua̱a̱ʼ maraʼdáá dí gíʼdoo i̱mba̱a̱”.
8 Mú aʼkhá niʼni rí kiʼtáñajunʼ dí na̱ʼkha̱ náa xtángoo maxkajxu̱u̱n dí manigu̱ʼ magúʼdoo dí gíʼdoo i̱mba̱a̱, numuu dí nákha nda̱a̱ xtángoo, aʼkhá ragíʼdoo tsiakii.
9 Nákha ginii ikhúúnʼ na̱nguá eniʼnúuʼ xtángoo, mú índo̱ ni̱ʼkha̱nú kiʼtáñajunʼ ndrígóo xtángoo ikhú ndi̱yo̱o̱ dí gúʼdoo aʼkhá ga̱jma̱a̱ nikháñuʼ.
10 Ni̱jkhánú ndi̱yo̱o̱ dí kiʼtáñajunʼ ndrígóo xtángoo dí gíʼmaa maʼga kañún maxtáá, na̱jkha̱ kañún makhañúʼ.
11 Numuu dí aʼkhá nijmuu kiʼtáñajunʼ ndrígóo xtángoo mu mbayáʼ xóo maʼninduwúúnʼ ga̱jma̱a̱ nixíñu̱u̱n.
12 Ikha jngóo Xtángoo nindxu̱u̱ kaʼwu, ga̱jma̱a̱ kiʼtáñajunʼ nindxu̱u̱ kaʼwu, jmbu ga̱jma̱a̱ májánʼ.
13 Lá mbá dí májánʼ maʼni dí makhañúʼ ráʼ. ¡Na̱nguá! Ninindxu̱u̱ aʼkhá dí niʼni makhañúʼ náa majñu̱u̱ʼ dí májánʼ. Mu xúʼko̱ makujmaa dí nindxu̱u̱ aʼkhá, xúʼko̱ aʼkhá ni̱jkha̱nú ninindxu̱u̱ itháan ra̱májánʼ náa majñu̱u̱ʼ kiʼtáñajunʼ.
14 Numuu rí nduʼyáá dí Xtángoo na̱ʼkha̱ náa Dios, mú ikhúúnʼ ni̱ndxu̱ʼ xuwiʼ, ninindxu̱ʼ ñumbáá* náa aʼkhá.
15 Numuu dí tsikro̱ʼo̱ʼ dí xtáá ra̱ni̱: Tséni dí nandoʼ, na̱ni̱ dí nawi̱yu̱ʼ ka̱yo̱o̱.
16 Á mu na̱ni̱ rí tsíyóʼ gáni, nda̱yo̱o̱ rí Xtángoo nindxu̱u̱ májánʼ.
17 Mú raʼkháa ikhúúnʼ e̱ni̱ rúʼko̱, nindxu̱u̱ aʼkhá dí rígá náa ikhúúnʼ.
18 Numuu rí nda̱yo̱o̱ dí náa ikhúúnʼ, xóo muʼthá náa xuyuʼ na̱nguá rígá dí májánʼ, maski ajndu ikhúúnʼ nandoʼ ma̱ni̱ rí májánʼ, mú tséʼngo̱ʼ gáni.
19 Numuu rí tséni rí májánʼ rí nandoʼ ma̱ni̱, mú dí ra̱májánʼ rí tsíyóʼ ma̱ni̱ ikhaa eni̱.
20 Ikha jngóo á mu na̱ni̱ rí tsíyóʼ gáni, na̱nguá ni̱ndxu̱ʼ ikhúúnʼ bi̱ naʼni, nindxu̱u̱ aʼkhá dí rígá náa ikhúúnʼ.
21 Mú na̱jkhánú nda̱yo̱o̱ dí rígá xtángoo rígi̱ náa ikhúúnʼ: Índo̱ nandoʼ ma̱ni̱ dí májánʼ, dí ra̱májánʼ wíji̱ ginii.
22 A̱jkiu̱nʼ ra̱ʼkhá tháán enigu̱u̱ʼ xtángoo ndrígóo Dios,
23 mú náa xuyuʼ nda̱yo̱o̱ imbo̱o̱ xtángoo rí naʼniminaʼ ga̱jma̱a̱ xtángoo dí rígá náa edxu̱ʼ, ma̱ngaa na̱jkha̱ kañún náa xtángoo ndrígóo aʼkhá dí rígá náa xuyuʼ.
24 ¡Ra̱ʼkhá tháán migínún xa̱bu̱ ni̱ndxu̱ʼ! Tsáá gáʼni kríñuunʼ náa xuwiʼ rígi̱ rí na̱jkha̱ kañún makhañúʼ rá.
25 ¡Naxna̱a̱ núma̱a̱ Dios ga̱jma̱a̱ numuu Jesucristo Tátá ndrígúlú! Ikha jngóo, ga̱jma̱a̱ ku̱ma̱ ndrígóʼ ni̱ndxu̱ʼ ñumbáá náa xtángoo ndrígóo Dios, mú xuyuʼ ni̱ndxu̱ʼ ñumbáá náa xtángoo ndrígóo aʼkhá.
Mbaʼa nota
^ O “jmba̱yi̱i̱”.
^ O “a̱ʼgu̱ bi̱ mambaʼkhu̱u̱n gajmii eʼwíin xabe̱kha̱”.
^ Náa ajngáa griego naʼthí, “niʼni rí makhañála ga̱jma̱a̱ numuu Xtángoo”.
^ O “nigabi̱i̱”, “ndiʼya̱a̱”.
^ Náa ajngáa griego naʼthí, “índo̱ mbáa naxtangu̱jua̱a̱ náa aʼkhá”.
