Rut 1:1-22
1 Nákha nikúwá xa̱bu̱ bi̱ nunimbaníí xkujndu, mbiʼi rúʼko̱ nirígá ewiʼ náa xuajin. Mbáa xa̱bu̱ bi̱ na̱ʼkha̱ náa Judá dí kaʼyoo Belén ni̱jkha̱ ga̱jma̱a̱ a̱ʼgiu̱u̱ gajmíi̱n a̱jmi̱i̱n e̱ji̱i̱n náa mbaaʼ Moab mu makuwíin xóo xa̱bu̱ bi̱ naguwaáʼ.
2 Xa̱biya̱ bigi̱ nigumbiʼyuu Elimélec* ga̱jma̱a̱ a̱ʼgiu̱u̱ nigumbiʼyuu Noemí,* mbáa aʼdiún mbiʼyuu Mahlón,* imba̱a̱ mbiʼyuu Kilión.* Ninindxu̱ún náa xuajin Efrata xóo muʼthá Belén dí kaʼyoo Judá, niguáʼnú náa mbaaʼ Moab ga̱jma̱a̱ ikhí má niguanún.
3 Táʼni má mba̱yu̱u̱ʼ Elimélec nikháñúu, ikha jngóo Noemí niguanúu mbáwíí gajmíi̱n a̱jmi̱i̱n e̱ji̱i̱n.
4 Nda̱wa̱á e̱ji̱i̱n nidiin gu̱ʼu̱ bi̱ kúwá náa Moab, mbáa mbiʼyuu Orpá imba̱a̱ mbiʼyuu Rut. Nikúwíin ikhí mbá gu̱wa̱ʼ tsiguʼ.
5 Nda̱wa̱á Noemí niguanáti̱go̱o̱ mbáwíí numuu dí nikháñúu Mahlón ga̱jma̱a̱ Kilión.
6 Índo̱ ikhaa xtáa náa mbaaʼ Moab niʼdxawuun dí Jeobá nirmáʼáan a̱jkiu̱u̱n kaʼyoo xuajñuu ga̱jma̱a̱ niʼni marigá ganitsu,* ikha jngóo nitanga̱a̱ gajmíi̱n gu̱jkui̱i̱nʼ* náa xuajñuu.
7 Noemí gajmíi̱n a̱jmi̱i̱n gu̱jkui̱i̱nʼ nigájni̱ín náa xuajin dí kúwíin. Índo̱ kúwíin ragúun náa kamba̱a̱ dí na̱jkha̱ náa Judá.
8 Ikhú Noemí niʼthún gu̱jkui̱i̱nʼ: “Májánʼ gáʼni dí matangáan náa guʼwála mu makuwáanʼ gajmiála ru̱dála.* Ga̱jma̱a̱ Jeobá gágawíinʼ a̱jkiu̱u̱n* kaʼyála, xó má ni̱ni̱ ga̱jma̱á nindxu̱ʼ xúʼko̱ má náa e̱ji̱nʼ* ma̱ngaa.
9 Jeobá má gáxniála a̱jmbia̱la ga̱jma̱a̱ nandoʼ dí makuwáanʼla májánʼ”.* Ikhú nixnúún beso ga̱jma̱a̱ ikhiin nimbi̱ya̱ʼ ngínún.
10 Ikhiin nitháán: “Xúʼgua̱a̱xu̱, muʼguáxu̱ ga̱jma̱á nindxa̱a̱ʼ, makuwáanʼxu̱ náa xuajñaanʼ”.
11 Mú Noemí niʼthún: “Gutangáanʼla wa̱ʼxi̱nʼ. Ndíjkha dí muʼgua ga̱jma̱á nindxu̱ʼ rá. Lá xóó ma̱ndoo magúʼdiin e̱ji̱nʼ mu mudiinla ráʼ.
12 Gutangáanʼla janʼ wa̱ʼxi̱nʼ, aʼgua̱a̱ʼla, numuu dí nikiu̱u̱n má ikhúúnʼ mu manujúunʼ. Á mu xóó ma̱ndoo manujúunʼ wakíʼ má rígi̱ ga̱jma̱a̱ magúʼdiin e̱ji̱nʼ,
13 lá muguaʼthi̱i̱n asndu índo̱ ikhiin gáʼnii mu mudiinla xáʼ. Maʼnga̱la maguanálá ndajkuáanʼ asndu índo̱ gáʼga̱nú mbiʼi rúʼko̱ ráʼ. Xúnila xúʼko̱ wa̱ʼxi̱nʼ. Jeobá niʼni dí mamínuuʼ, índo̱ nda̱yo̱o̱ xúgíʼ rígi̱ dí ikháanʼ naʼni mumíniiʼ naʼni dí maxtáá ngíná”.
14 Ikhú nitangiín nimbi̱ya̱ʼ ngínún. Nda̱wa̱á Orpá nixnúu beso dxa̱giu̱u̱, ikhú ni̱jkha̱a̱, mú Rut tándoo gániñuuʼ dxa̱giu̱u̱.
15 Ikha jngóo Noemí niʼthúu̱n: “Guʼgún ga̱jma̱a̱ʼ, najkha̱a̱ náa xuajñuu ma̱ngaa najkha̱a̱ gáʼñúún dioses ndrígóo, ayu̱u̱ʼ ga̱jma̱a̱ʼ”.
16 Mú Rut niʼthúu̱n: “Xátani̱ kañúʼ rí maʼgáaʼ ni má rí maniʼñááʼ; náa má gídxúʼ ikhí má gáʼgá mangúún, náa maguanáaʼ minuʼ ikhí má gígú mangúún. Xuajñaanʼ mani̱ndxu̱u̱ xuajñunʼ, Dios ndrígáaʼ maʼni Dios ndrígóʼ.
17 Náa gákháñáaʼ, ikhí má gákháñuʼ ga̱jma̱a̱ ikhí má gájuiʼdiu̱ún. Jeobá má gáʼni mamínuuʼ á mu naniʼñáá wapháá nákha xóó tsekháñuʼ”.
18 Índo̱ Noemí ndiʼyoo dí Rut gajkhun nindoo maʼga̱ ga̱jma̱a̱, ikha jngóo niniñuuʼ raʼtákáñuu.
19 Ikhú nájmi̱i̱n nigúun Belén. Índo̱ niguaʼnún, ikhú xa̱bu̱ xuajin nigi̱ʼdi̱i̱ nitamijná ga̱jma̱a̱ gu̱ʼu̱ nithi̱: “Lá Noemí buʼko̱ ráʼ.”
20 Ikhaa niʼthúún: “Xúthu̱nʼla Noemí. Guthu̱nʼla Mara* numuu rí Dios* niʼni rí mamínuuʼ.
21 Nákha ni̱jkhá gúʼdoo xúgíʼ, mú xúgi̱ Jeobá niʼni rí maʼkháaʼ i̱ndó ikhúún. Ndíjkha rí nuthu̱nʼla Noemí rá. Jeobá niʼni rí mamínuuʼ. Dios niʼni rí maxtáá ngíná wéñuuʼ”.
22 Xúʼko̱ niʼni rí Noemí nigájna̱a̱ náa Moab ga̱jma̱a̱ guʼgiúunʼ Rut bi̱ nindxu̱u̱ moabita. Índo̱ niguáʼnún náa Belén nindxu̱u̱ mbiʼi dí nurajxi̱i̱ cebada.
Mbaʼa nota
^ Rí nandoo gáʼthúu̱n ‹Dios ndrígóʼ nindxu̱u̱ rey›.
^ Rí nandoo gáʼthúu̱n ‹nanigu̱ʼ› o ‹naʼni maʼdxu̱ʼ›.
^ Mbáa náa ajngáa hebreo nandoo gáʼthúu̱n ‹nakáguabaaʼ› o ‹nandoo káñuu›.
^ Rí nandoo gáʼthúu̱n ‹bi̱ na̱jkha̱ rakáñúu›.
^ Náa ajngáa hebreo naʼthí, “pan”.
^ O “gu̱ʼgui̱i̱nʼ”.
^ O “nániála”.
^ O “bi̱ nikháñún”.
^ Náa ajngáa hebreo naʼthí, “náa mbuya̱a̱ jxa̱la”.
^ Rí nandoo gáʼthúu̱n ‹miʼkhu̱u̱n›.
^ Náa ajngáa hebreo naʼthí, “bi̱ gíʼdoo xúgíʼ tsiaki̱i̱”.
