Rut 2:1-23
2 Nixtáa mbáa xa̱bu̱ bi̱ kaʼyoo Elimélec, bi̱ ninindxu̱u̱ ajmbio̱o̱* Noemí, ikhaa nigumbiʼyuu Boaz, xa̱bu̱ bigi̱ ra̱ʼkhá tháán nigiʼdoo.
2 Rut bi̱ nindxu̱u̱ a̱ʼgú moabita niʼthúu̱n Noemí: “Lá ma̱ndoo maʼgá náa kiʼdu ráʼ. Maʼníí á mu dí maxkamaa mbáa bi̱ maniñuʼ mbaʼyáaʼ cebada dí niguanáa náa mbayuuʼ”. Ikhú Noemí niʼthúu̱n: “Ayuʼ wáxióʼ”.*
3 Ikhú nigájnuu, ga̱jma̱a̱ ni̱jkha̱ rayáaʼ dí niguanáa eni̱ bi̱ nuñajunʼ. Táʼyoo á mu dí náa mbayuuʼ Boaz bi̱ kaʼyoo Elimélec niñajunʼ.
4 Ikhaa má mbiʼi rúʼko̱ etanga̱a̱ Boaz náa Belén. Niʼthún xa̱bu̱ bi̱ nuñajunʼ: “Jeobá gáxtáa ga̱jma̱a̱ nindxa̱la”. Ikhiin nitháán: “Jeobá gáʼni tsajkurámáánʼ”.
5 Ikhú Boaz nirajxu̱u̱ bi̱ naʼtáñajúúnʼ xa̱bu̱ bi̱ nuñajunʼ: “Náá lá e̱ʼkha̱ dxáʼgú buʼko̱ rá.”
6 Ikhaa niriʼñuu: “Dxáʼgú buʼko̱ na̱ʼkha̱ náa mbaaʼ Moab, ni̱ʼkha̱ ga̱jma̱a̱ Noemí.
7 Ikhaa niʼthúnʼ: ‹Mbá péñu, lá ma̱ndoo maʼgá raʼyáaʼ cebada dí niguanáa eni̱ bi̱ nuñajunʼ ráʼ.› Asndu nákha ni̱ʼkha̱nú miʼcha̱ xóó tséyáa jxu̱u̱ʼ. Ndiʼkhún nángíi ni̱jkha̱ gági̱ʼi̱ náa guʼwá xtúgua mu mbayáa jxu̱u̱ʼ mbá xngaa”.
8 Nda̱wa̱á Boaz niʼthúu̱n Rut: “Atadxawíín wáxióʼ. Xídxúʼ gátaʼyáaʼ cebada náa i̱mba̱ mbaaʼ, aguanáaʼ atiejunʼ má gi̱i̱. Ayuʼ ratrajxi̱i̱ náa nagún ruñajunʼ wa̱ʼxa̱ʼ.*
9 Á mu nagún gúñajunʼ náa i̱mba̱ mbaaʼ, ayuʼ gajmiáanʼ. Ni̱thu̱u̱n má jiámá rí xúni̱ xkájkia̱a̱nʼ.* Índo̱ gákándawaaʼ ayuʼ náa guájun rayaʼ ga̱jma̱a̱ a̱gi̱i̱n iyaʼ dí gúri̱ya̱ʼ jiámá”.
10 Índo̱ ndiʼyoo rí xúʼko̱ eʼthí, ikhaa nigiʼnduti̱ga̱ ga̱jma̱a̱ nismbáti̱go̱o̱, ikhú niʼthúu̱n: “Ndíjkha rí májánʼ a̱jkia̱a̱nʼ ga̱jma̱á nindxu̱ʼ rá. Ndíjkha rí naxmiéjuaanʼ xtayoʼ rí nindxu̱ʼ mbáa a̱ʼgu̱ bi̱ na̱ʼkha̱á rá.”
11 Boaz niʼthúu̱n: “Numuu rí nithu̱nʼ xúgíʼ rí ikháán nitani̱ ga̱jma̱a̱ numuu dxa̱gia̱a̱ʼ asndu nákha nikháñuu ajmbia̱a̱ʼ, rí nitatsiñáá ana̱a̱ʼ, rudáa̱ʼ* ga̱jma̱a̱ xuajñaanʼ mu mi̱dxa̱ʼ gáraxtaa náa mbá xuajin rí tsitaya̱.
12 Jeobá gáʼni tsajkurámáánʼ ga̱jma̱a̱ xúgíʼ rí nitani̱. Jeobá Dios ndrígóo Israel gáʼni numa̱a̱ʼ kájxi̱ numuu rí nitayáʼ matambáyuminaʼ náa ikhaa”.*
13 Ikhú ikhaa niʼthúu̱n: “Núma̱aʼ tátá rí natambáyuʼ numuu rí nitani̱ maʼni̱i̱ a̱jkiu̱nʼ ga̱jma̱a̱ ajngáa dí nirathúnʼ niʼni rí xáxmiéjunʼ, maski ajndu na̱nguá nindxu̱ʼ mbáa bi̱ nambáyaaʼ”.
14 Índo̱ ni̱jkha̱nú hora dí muphiʼtsu, Boaz niʼthúu̱n: “Ayi̱, atriyaʼ pan ga̱jma̱a̱ ataxumááʼ náa vino migaʼ”.* Ikhú ikhaa ni̱jkha̱ gági̱ʼi̱ náa tri̱gi̱i̱n bi̱ nuñajunʼ. Ikhaa nixnúu cebada rí nigu̱ʼ, ni̱ʼkhu̱ asndu nigiʼmuu ga̱jma̱a̱ asndu nipíduunʼ.
15 Índo̱ nitu̱jxu̱u̱ mu mañajunʼ mbu̱júu̱, Boaz niʼthúún xa̱bu̱ bi̱ nuñajunʼ: “Guniʼñáála rí ma̱ngaa mbayáaʼ náa xtáxu̱u̱ dí nirujtula, xúni̱ gajmáá.
16 Ma̱ngaa guniʼñááʼ dí majngutígú, mu xúʼko̱ ikhaa maʼga ragujxi̱i̱. Xútanla nimbá”.
17 Ikhaa niñejunʼ má xúʼko̱ asndu wakhííʼ. Índo̱ nirujtsi xúgíʼ dí ikhaa nigujxi̱i̱, niʼni xóo mbá 22 litro* cebada.
18 Ikhú niguéjkha̱a̱ʼ náa xuajin ga̱jma̱a̱ nisngájmuu dxa̱giu̱u̱ dí ikhaa niʼngo̱o̱ ndiyáaʼ. Ma̱ngaa nixnúu ganitsu dí ikhaa nipíduunʼ niʼkhu̱.
19 Dxa̱giu̱u̱ nirajxu̱u̱: “Náá mina̱a̱ʼ nitiejunʼ xúgi̱ rá. Dios gáʼni tsajkurámaaʼ bi̱ nixmiéjuunʼ kaʼyaaʼ”. Ikhú Rut niʼthúu̱n náá mina̱a̱ʼ nixtáa rañejunʼ. Niʼthí: “Niñejunʼ náa mbayuuʼ xa̱bu̱ bi̱ mbiʼyuu Boaz”.
20 Índo̱ Noemí niʼdxuun rígi̱, niʼthí: “Jeobá bi̱ nagáwíinʼ a̱jkiu̱u̱n kaʼñún* bi̱ nduya ga̱jma̱a̱ bi̱ nikháñún gáʼni tsajkurámaaʼ”. Niʼthúu̱n xóó: “Kuʼyáálú xa̱bu̱ buʼko̱. Nindxu̱u̱ mbáa bi̱ ma̱ndoo maʼtsiwáánʼlú”.*
21 Ikhú Rut niʼthúu̱n xóó: “Ma̱ngaa niʼthúnʼ: ‹Aguanáaʼ má matiejunʼ mijngii gi̱i̱ náa xa̱bi̱ʼ asndu índo̱ gámbu̱u̱n›”.
22 Noemí niʼthúu̱n guʼgiúunʼ: “Májánʼ má gáʼni wáxióʼ dí matiejunʼ gajmiáanʼ ikhiin, xúʼko̱ xúni̱ xkájkia̱a̱nʼ eʼwíinʼ xa̱bu̱ náa i̱mba̱ mbaaʼ”.
23 Ikhaa niñejunʼ má xúʼko̱ náa mijngii gu̱ʼu̱ bi̱ nuñejunʼ náa Boaz asndu índo̱ niguámbu̱u̱n nirajxi̱i̱ cebada ga̱jma̱a̱ trigo. Ikhaa nixtáa má xúʼko̱ ga̱jma̱a̱ dxa̱giu̱u̱.
Mbaʼa nota
^ O “jmba̱yi̱i̱”.
^ O “na̱á”.
^ O “i̱jín go̱ʼo̱”.
^ O “gajmáaʼ”.
^ O “tátiáaʼ, nániaaʼ”.
^ Náa ajngáa hebreo naʼthí, “agoo xpíjpiúu”.
