Rut 3:1-18
3 Noemí niʼthúu̱n guʼgiúunʼ: “Wáxióʼ,* ndayóoʼ dí mbaʼyáaʼ mbáa xa̱bu̱ bi̱ mbi̱ya̱a̱* mu xúʼko̱ maraxtaa májánʼ.
2 Kuʼyáálú Boaz ga̱jma̱a̱ wa̱ʼxa̱ʼ* bi̱ nitiejunʼ gajmiáanʼ nindxu̱ún bi̱ nañejunʼ gajmíi̱n. Wakíʼ rígi̱ ikhaa maʼga gáʼndijtííʼ cebada náa nañajunʼ.
3 Ikha jngóo ana̱ ga̱jma̱a̱ ataxtájmamina̱a̱ʼ aceite rí ndataun, atagíʼ xtíñaaʼ dí itháán májánʼ ga̱jma̱a̱ ayuʼ náa nundijtíí cebada. Mú tsumáálá gátani̱, tiáá lá gáʼyaaʼ asndu índo̱ gámbóo rakuiʼtsu.
4 Atayáá náá gáʼga gábóoʼ migu, ikhú gídxúʼ, ataxújxi̱ dí kúgoo ga̱jma̱a̱ rajkhúu, atabáaʼ ikhí, ikhaa má gáʼtháanʼ ndiéjunʼ gíʼmaa matani̱”.
5 Rut niriʼñuu: “Ma̱ni̱ má xúgíʼ dí nirathúnʼ”.
6 Ikhú nigajtaa náa nundijtíí cebada ga̱jma̱a̱ niʼni xúgíʼ dí niʼthúu̱n dxa̱giu̱u̱.
7 Índo̱ Boaz niguámbóo nikuiʼtsu, tsímáá niʼni̱i̱ a̱jkiu̱u̱n. Ni̱jkha̱a̱ gábóoʼ náa gíʼ mbá ru̱tsu̱u̱ cebada. Tsumáá ni̱jkha̱ Rut, nikujxi̱ dí kúgoo ga̱jma̱a̱ rajkhúu, ikhú nibóoʼ ikhí.
8 Tikhu nduʼun índo̱ ndijyuu nigi̱ʼi̱, ndiʼyoo dí kri̱ga̱a̱ a̱ʼgu̱ kabóoʼ náa rajkhúu.
9 Ikhú nirajxu̱u̱: “Tsáá nindxa̱a̱ʼ ján.” Ikhaa niriʼñuu: “Nindxu̱ʼ Rut bi̱ nambáyaaʼ. Araxnúʼ maguʼwúnʼ mangúún dí xtagúwaanʼ, numuu dí ikháán nindxa̱a̱ʼ bi̱ maʼtsiríñu̱u̱ʼ”.
10 Ikhaa niʼthúu̱n: “Jeobá gáʼni tsajkurámáánʼ wáxióʼ. Numuu rí ngajua dí xtaa ratasngájma xúgi̱ nindxu̱u̱ itháan mba̱a̱ ki xóo dí nitasngájma nákha ginii, tátaʼyaaʼ mbáa bi̱ nindxu̱u̱ ndxáma̱á, tséʼniuu á mu gíʼdoo o gínáa.
11 Ikha jngóo xámíñáaʼ wáxióʼ. Ma̱ni̱ má xúgíʼ dí nirathúnʼ, numuu dí xúgíinʼ xa̱bu̱ nduyáá dí nindxa̱a̱ʼ mbáa a̱ʼgu̱ bi̱ ra̱ʼkhá tháán májáanʼ a̱jkiu̱u̱n.
12 Gajkhun má dí ikhúúnʼ ma̱ndoo matsiríña̱a̱ʼ, mú xtáa i̱mba̱a̱ bi̱ kuya̱a̱la itháan mijngii bi̱ ma̱ndoo maʼtsiríña̱a̱ʼ.
13 Aguanáaʼ má gi̱i̱ mbruʼun rígi̱. Á mu gájtsíí nandoo ikhaa maʼtsiríña̱a̱ʼ májánʼ má gáʼni á mu xúʼko̱. Natha̱a̱nʼ ga̱jma̱a̱ mbiʼyuu Jeobá, á mu ikhaa tsíyoo gáʼtsiríña̱a̱ʼ, matsiríña̱a̱ʼ má ikhúún. Atabáaʼ má minu̱ʼ asndu índo̱ gájtsi”.
14 Ikhí má kri̱ga̱a̱ niguanúu niʼgu náa rajkhúu Boaz asndu índo̱ inu majtsi, ikhú nitu̱jxu̱u̱ ni̱jkha̱a̱ mu xúʼko̱ xúyáá. Boaz niʼthí: “Gúʼthu̱u̱n dí nimbáa xáʼyoo dí ni̱ʼkha̱ a̱ʼgu̱ gi̱i̱”.
15 Ikhú niʼthúu̱n Rut: “Ayi̱ jcháa bañáaʼ ga̱jma̱a̱ ataxuájan”. Boaz nigruiʼyáʼ mbá majun canasta* cebada. Ikhú nikujxi̱ nixnúu mayeʼga̱a̱ náa xuajin.
16 Dxa̱giu̱u̱ nirajxu̱u̱ índo̱ ni̱jkha̱núu: “Xú káʼnii nidxu̱ʼ rá wáxióʼ.” Rut niʼthúu̱n xúgíʼ rí Boaz niʼni ga̱jma̱a̱ numuu,
17 niʼthúu̱n xóó: “Nixnúʼ mbá majun canasta cebada rígi̱ ga̱jma̱a̱ niʼthúnʼ: ‹Xádxu̱u̱ʼ i̱ndó ikháán náa goʼwóo dxa̱gia̱a̱ʼ›”.
18 Ikhú Noemí niʼthúu̱n: “Wáxióʼ araʼthi̱i̱n mu mbuʼyáá xú káʼnii gaʼnimbánuu rígi̱”.
Mbaʼa nota
^ O “na̱á”.
^ Náa ajngáa hebreo naʼthí, “náa mbi̱ya̱a̱ jxa̱a̱ʼ”.
^ O “i̱jín go̱ʼo̱”.
^ Mbáa naʼni xóo mbá 44 litro.
