Rut 4:1-22
4 Boaz ni̱jkha̱ gági̱ʼi̱ asndu náa riejuun xuajin, índo̱ ndiʼyoo ejkha̱ ranújngoo xa̱bu̱* bi̱ niʼthí ga̱jma̱a̱ numuu, niʼthúu̱n: “Ayi̱ tháan mbá xngaa mu mutriʼgáánʼlú”. Ikhú xa̱bu̱ nikuʼmaminaʼ ga̱jma̱a̱ nigi̱ʼi̱.
2 Nda̱wa̱á Boaz nidxaʼwúún mbá gu̱wi̱i̱nʼ xabuanii bi̱ kuya̱ edxu̱u̱ náa xuajin. Niʼthún: “Mbá péñu, gutrigáanʼla tháan gi̱i̱”. Ikhú nitri̱gi̱i̱n.
3 Boaz niʼthúu̱n xa̱bu̱: “Noemí bi̱ ni̱ʼkha̱a̱ náa Moab ndayóoʼ dí magujua̱a̱ mbayuuʼ bi̱ ninindxu̱u̱ ajmbio̱o̱,* bi̱ mbiʼyuu Elimélec, bi̱ kuʼyáálú.
4 Ndi̱yo̱o̱ rí ndayóoʼ mata̱a̱nʼ rígi̱: ‹Gaʼni ginún xa̱bu̱ ga̱jma̱a̱ xabuanii bi̱ kuya̱ edxu̱u̱ náa xuajñunʼ dí maratsi̱i̱ mbayuuʼ. Á mu nandaaʼ maratsi̱i̱, aratsi̱i̱ má, á mu xáratsi̱i̱, arathúnʼ mu ma̱ndoo gáyóo. Numuu dí ma̱ndoo má matsi̱i̱ ikhúún á mu dí xáratsi̱i̱›”. Ikhú xa̱bu̱ niʼthí: “Matsi̱i̱ má ikhúún”.
5 Ikhú Boaz niʼthúu̱n: “Agiwa̱a̱nʼ a̱jkia̱a̱nʼ dí raʼkháa mbáwíí Noemí mbayuuʼ rúʼko̱, ma̱ngaa mbayuuʼ a̱ʼgiu̱u̱ a̱ʼdióo bi̱ nikháñúu, Rut a̱ʼgú moabita. Ikha jngóo ndayóoʼ dí maratsi̱i̱ mbañúúnʼ nájmi̱i̱n mu xúʼko̱ xándáti̱ga̱a̱ mbiʼyuu bi̱ nikháñúu”.
6 Índo̱ xa̱bu̱ niʼdxuun rígi̱ niʼthí: “Xándoo matsiríya̱a̱ʼ numuu rí gamíi mandáti̱ga̱a̱ rí gúʼdoo ikhúún gáʼni. Iwáá aratsi̱i̱ má ikháán, ikhúún xándoo matsi̱i̱”.
7 Nákha ikhú xa̱bu̱ Israel naguʼwún dí á mu mbáa xa̱bu̱ naniñuuʼ dí i̱mba̱a̱ maʼtsi̱i̱ dí kaʼyoo maʼtsi̱i̱ ikhaa, naríyaʼ raxtóo* naxnúu bi̱ maʼtsi̱i̱. Xúʼko̱ embánúún xa̱bu̱ Israel.
8 Ikha jngóo xa̱bu̱ bi̱ maʼtsiríya̱a̱ʼ mbaaʼ niríyaʼ mbá raxtóo índo̱ niʼthúu̱n Boaz “Aratsi̱i̱ má ikháán”.
9 Ikhú Boaz niʼthúún xabuanii bi̱ kuya̱ edxu̱u̱ náa xuajin ga̱jma̱a̱ mbá xúgíinʼ bi̱ kúwá ikhí: “Ikháanʼ naʼni ginala gi̱i̱ xúgi̱, dí ikhúún natsi̱i̱ xúgíʼ dí nigiʼdoo Elimélec ajmbio̱o̱ Noemí, ma̱ngaa dí nigiʼdoo Kilión ga̱jma̱a̱ Mahlón.
10 Ma̱ngaa mba̱ya̱a̱ Rut a̱ʼgú moabita bi̱ ninindxu̱u̱ a̱ʼgiu̱u̱ Mahlón, mu xándáti̱ga̱a̱ mbiʼyuu bi̱ nikháñúu náa dí nigiʼdoo mu bi̱ kaʼñúún ga̱jma̱a̱ xa̱bu̱ xuajin xámbumún kuyáá. Ikháanʼla gi̱i̱ xúgi̱ naʼni ginala”.
11 Xúgíinʼ xa̱bu̱ bi̱ nigimbíin náa riejuun xuajin ga̱jma̱a̱ xabuanii bi̱ kuya̱ edxu̱u̱ nithi: “¡Naʼni ginuxu̱! Jeobá gáʼni tsajkurámaaʼ a̱ʼgu̱ bi̱ ndayáa dí mani̱ndxu̱u̱ xóo Raquel ga̱jma̱a̱ Lea, náa ni̱ʼkha̱ xuajin Israel. Gaguma tsajkurámáánʼ náa Efrata ga̱jma̱a̱ gajmaʼnííʼ dí nindxa̱a̱ʼ májáanʼ xa̱bu̱ náa Belén.
12 Ga̱jma̱a̱ dí e̱ji̱n bi̱ Jeobá gáxniáaʼ náa dxáʼgú bigi̱, maʼga̱nú maʼni mbaʼin xóo e̱ji̱i̱n Pérez, a̱ʼdióo Tamar ga̱jma̱a̱ Judá”.
13 Boaz ndiyáa Rut. Nibóoʼ ga̱jma̱a̱, ikhú Jeobá niʼni dí magiʼdaa mbáa ada̱.
14 Gu̱ʼu̱ nitháán Noemí: “Gaguma mba̱a̱ Jeobá, numuu dí nixniáaʼ mbáa bi̱ ma̱ndoo maʼtsiríña̱a̱ʼ. ¡Gawánrígo̱o̱ mbiʼyuu ada̱ náa xúgíʼ Israel!
15 Ada̱ bigi̱ niʼni dí maʼni̱i̱ a̱jkia̱a̱nʼ ga̱jma̱a̱ ikhaa gáñewa̱a̱nʼ índo̱ gíkhi̱i̱n, numuu dí nindxu̱u̱ a̱ʼdióo guʼgiáanʼ bi̱ ra̱ʼkhá tháán eyoo kaʼyaaʼ, ikhaa itháan májáanʼ ki xóo maraʼdiin juwiin ejña̱a̱nʼ”.
16 Ikhú Noemí ndiyáraʼaa ada̱, ga̱jma̱a̱ ikhaa má niʼni mbaja̱a̱.
17 Gu̱ʼu̱ bi̱ kúwá mijngii nixna mbiʼíí Obed ada̱ buʼko̱ ga̱jma̱a̱ nithi: “Nigiʼdaa mbáa ada̱ Noemí”. Ada̱ bigi̱ ni̱jkha̱nú ninindxu̱u̱ anu̱u̱ Jesé, bi̱ ninindxu̱u̱ anu̱u̱ David.
18 Bigi̱ ninindxu̱ún e̱ji̱i̱n Pérez, Pérez ninindxu̱u̱ anu̱u̱ Hezrón,
19 Hezrón ninindxu̱u̱ anu̱u̱ Ram, Ram ninindxu̱u̱ anu̱u̱ Aminadab,
20 Aminadab ninindxu̱u̱ anu̱u̱ Nahsón, Nahsón ninindxu̱u̱ anu̱u̱ Salmón,
21 Salmón ninindxu̱u̱ anu̱u̱ Boaz, Boaz ninindxu̱u̱ anu̱u̱ Obed,
22 Obed ninindxu̱u̱ anu̱u̱ Jesé ga̱jma̱a̱ Jesé ninindxu̱u̱ anu̱u̱ David.
