I̱yi̱i̱ʼ rí niʼnirámáʼ Santiago 1:1-27
1 I̱yi̱i̱ʼ rígi̱ niʼnirámáʼ Santiago ñumbáá ndrígóo Dios ga̱jma̱a̱ Tátá Jesucristo, narajxi̱ín bi̱ mbá 12 xuajen majkhaʼ bi̱ kúwá asndu náá.
2 A̱ngui̱nʼ nindxa̱la, gaʼdxala índo̱ nuraʼníí mixtiʼkhu xkujndu,
3 xó má eya̱a̱la, índo̱ fe ndrígála naraʼnuu mbaʼa enii xkujndu ikhú najmañala rí maʼngala.
4 Á mu naʼngala má xúʼko̱ maguma ratháanʼ itháan májánʼ, mu xúʼko̱ mani̱ndxa̱la kájxáanʼ ga̱jma̱a̱ náa xúgíʼ rí gúni̱ mani̱ndxu̱u̱ májánʼ ma̱ngaa nimbá nda̱a̱ dí gáʼyála.
5 Ikha jngóo, á mu mbáa dí ikháanʼla ndayóoʼ magiʼdoo xóó ku̱ma̱ gando̱ʼo̱o̱ má xúʼko̱ Dios ga̱jma̱a̱ ikhaa maxnúu, numuu rí ikhaa naxnún xúgíinʼ ga̱jma̱a̱ xúgíʼ a̱jkiu̱u̱n ma̱ngaa tsétanga̱a̱ maʼthí kikáá ga̱jma̱a̱ numuu rí naxná.
6 Mú gíʼmaa manda̱ʼa̱ ga̱jma̱a̱ fe, xáʼni a̱jma̱ a̱jkiu̱u̱n, numuu rí bi̱ naʼni a̱jma̱ a̱jkiu̱u̱n nindxu̱u̱ xóo iyaʼ rí nambujxu̱u̱ náa lamáa dí giñánʼ na̱jkha̱ kayóo gi̱i̱ ñuʼún.
7 Xa̱bu̱ bi̱ naʼni a̱jma̱ a̱jkiu̱u̱n ragíʼmaa mandxaʼwáminaʼ dí rígá mbá dí magruigúu náa Jeobá.*
8 Nindxu̱u̱ mbáa bi̱ tséjmaa gáraʼwíí dí maʼni, nariʼkhuu má xúʼko̱ dí naʼni.
9 Mú ndxájulú bi̱ gínáa* gaʼdxuu* numuu rí niguma mba̱a̱,
10 xó má bi̱ gíʼdoo gaʼdxuu ga̱jma̱a̱ numuu rí nuxruiguíi, numuu rí bi̱ gíʼdoo mandáti̱ga̱a̱ xóo mbá ri̱ʼi̱ dí rígá náa xánáá.
11 Índo̱ nagájnuu a̱jkha̱ʼ naʼni mijkha wéñuuʼ ga̱jma̱a̱ iná nujndooʼ; ikhú ri̱ʼyu̱u̱ nagajtaa ga̱jma̱a̱ nánguá mitsaanʼ. Xúʼko̱ má kayuuʼ gándati̱ga̱a̱ xa̱bu̱ bi̱ gíʼdoo, bi̱ ndayáʼ má xúʼko̱ rí magiʼdoo.
12 Gagi xtáa xa̱bu̱ bi̱ naʼngo̱o̱ má xúʼko̱ índo̱ xtáa raraʼnuu xkujndu, numuu rí índo̱ gáxtriguíi, magruigú rí maxtáa, dí Jeobá* nikudaminaʼ maxnún bi̱ nandún kuyáá má xúʼko̱.
13 Nimbáa xáʼthi rígi̱ índo̱ xtáa raraʼnuu xkujndu: “Dios nagruiga̱ dí ra̱májánʼ náa inuʼ”. Numuu rí nimbáa xándoo magruiga̱ dí ra̱májánʼ náa inuu Dios ni má Dios xándoo magruiga̱ dí ra̱májánʼ náa inuu nimbáa.
14 Mámbáa natriga̱ dí ra̱májánʼ náa inuu ga̱jma̱a̱ naxkajxi̱minaʼ maʼni xó má rí nagua̱ʼa̱ maʼni.
15 Índo̱ nagua̱ʼa̱ wéñuuʼ maʼni, ikhú nakudaminaʼ aʼkhá ga̱jma̱a̱ nda̱wa̱á rí nakudaminaʼ aʼkhá, ikhú na̱ʼkha̱ rí makhañúu.
16 A̱ngui̱nʼ bi̱ nandoʼ ka̱ya̱la xúni̱ nduwamijnála.
17 Xúgíʼ dí nakánulú rí na̱ʼkha̱ rijma̱a̱ nindxu̱u̱ májánʼ ga̱jma̱a̱ nindxu̱u̱ kájxi̱, na̱ʼkha̱ náa bi̱ niniʼwíi aguʼ dí rígá mekhuíí. Ikhaa tsiriʼkuminaʼ xó má naxtiʼkhuu ndájkua̱.
18 Numuu rí xúʼko̱ nindoo ikhaa, dí magumáánʼ mbu̱júu̱ʼ náa majñu̱u̱ʼ ajngáa dí gajkhun, mu xúʼko̱ manindxu̱lú giniáanʼ náa xa̱bu̱ numbaaʼ.
19 A̱ngui̱nʼ bi̱ nandoʼ ka̱ya̱la, nandoʼ mbu̱ya̱a̱la rí xúgiáanʼ gíʼmaa makuwáanʼ xawii mudxawíín, mú xútala mbá nacha̱ ga̱jma̱a̱ xákiʼnáanʼla mbá nacha̱,
20 numuu rí xa̱bu̱ bi̱ nakásngañu̱u̱ʼ tséʼni marigá dí jmbu xóo rí nandoo Dios.
21 Ikha jngóo guniʼñááʼ xúgíʼ enii dí tsaga ga̱jma̱a̱ xúgíʼ enii dí ra̱májánʼ, xákiʼnáanʼla índo̱ gúndrígú ajngá rawuunʼ Dios guniʼñááʼ rí maxkuaʼán ajmu̱u̱ náa ikháanʼla mu xúʼko̱ makáwáanʼla.
22 Guʼgíʼ munimbáníí ajngá rawuunʼ Dios raʼkháa i̱ndó mudxawíín, xúni̱ nduwamíjná ga̱jma̱a̱ ku̱ma̱ nduwaʼ.
23 Á mu mbáa xa̱bu̱ naʼdxawuun ajngáa mú tségiminaʼ maʼnimbánuu, nindxu̱u̱ xóo mbáa xa̱bu̱ bi̱ ndaʼyoo inuu náa niwanʼ:
24 Ndaʼyamina̱ʼ mú índo̱ najkha̱a̱ mbá nacha̱ nambumuu xú káʼnii xa̱bu̱ nindxu̱u̱.
25 Á mu mbáa xa̱bu̱ ndaʼyoo tsumáá xtángoo rí nindxu̱u̱ kájxi̱ dí maʼni káwáánʼ, naʼni dí naʼthí ikhí raʼkháa i̱ndó naʼdxawuun ga̱jma̱a̱ nambumuu, ikhaa naʼni ñajuunʼ Dios, ga̱jma̱a̱ naxtáa gagi índo̱ naʼni.
26 Á mu mbáa nandxa̱ʼwáminaʼ rí ndaʼyamajkuu Dios mú tséʼngo̱o̱ gáñewu̱u̱n raju̱u̱n, ikhaa xtáa raʼni nduwaaʼ a̱jkiu̱u̱n, ma̱ngaa rí ndaʼyamajkuu Dios tséjmaa nditháan.
27 Gamajkhu dí mikaʼwu rí na̱nguá nindxu̱u̱ mitsaga náa iduu Anu̱lú Dios nindxu̱u̱ rígi̱: Dí muñewu̱u̱n ejínwáʼa ga̱jma̱a̱ gu̱ʼú xuáʼa̱ náa rí ikhiin numíniiʼ* ma̱ngaa dí xúʼni gachímíjná ga̱jma̱a̱ dí rígá náa numbaaʼ.
Mbaʼa nota
^ O “bi̱ nindxu̱u̱ xa̱bu̱ guabaaʼ”.
^ Náa ajngáa griego naʼthí, “gaʼnimbamínáʼ”.
^ Náa ajngáa griego naʼthí, “náa ga̱ʼkhu̱ ndrígu̱ún”.
