I̱yi̱i̱ʼ rí niʼnirámáʼ Santiago 2:1-26
2 A̱ngui̱nʼ nindxa̱la, náá numuu rí ikháanʼla dí kuaʼdáá má fe náa Tátá ndrígúlú Jesucristo bi̱ nindxu̱u̱ mba̱a̱, mú ikhú má nuraʼwíin xa̱bu̱ bi̱ muniu̱u̱ rí májánʼ rá.
2 Á mu mbáa xa̱bu̱ bi̱ tra̱ʼa̱ anillo dí oro ñawúunʼ ga̱jma̱a̱ kagíʼ xtíin mitsaanʼ na̱jkha̱ náa ikháanʼ nagimbáanʼla, ikhú má na̱jkha̱ mbáa xa̱bu̱ gínáa bi̱ kagíʼ xtíin mitsaga,
3 ikháanʼ nuríguíi májánʼ bi̱ kagíʼ xtíin mitsaanʼ ga̱jma̱a̱ nu̱tha̱a̱n, “araʼwún gi̱i̱ náa rí itháan májánʼ”, mú bi̱ gínáa nu̱tha̱a̱n, “ikháán ariejún má” o “araʼwún ñuʼún náa mijngii gíʼ rí masngutámáʼ rajkúʼ”.
4 Á mu xúʼko̱ eni̱la, lá raʼkháa kuwáanʼ ru̱ni̱ rí tikhun maguaʼdáá itháan numún ki xóo eʼwíinʼ ga̱jma̱a̱ nanindxa̱la bi̱ nunimbaníí xkujndu bi̱ tséraʼwi̱i̱ májánʼ rí muni̱ ráʼ.
5 Gudxawíínla a̱ngui̱nʼ bi̱ nandoʼ ka̱ya̱la, lá raʼkháa Dios niraʼwíin xa̱bu̱ bi̱ numbaaʼ ndaʼyoo rí migínii mu maguaʼdáá wéñuuʼ fe ga̱jma̱a̱ ikhiin mata̱ʼa̱án náa naʼtáñajunʼ Xa̱bu̱ Ñajunʼ ndrígóo Dios* rí ikhaa nikudaminaʼ maxnún bi̱ nandún kuyáá ráʼ.
6 Mú ikháanʼla tsíyala gúñúun xa̱bu̱ gíníi. Lá raʼkháa xa̱bu̱ bi̱ guáʼdáá nunigínáaʼla ga̱jma̱a̱ nuxmajtáanʼ mu magún kudáanʼla náa inún xa̱bu̱ ñajunʼ ráʼ.
7 Lá raʼkháa ikhiin nuta wéñííʼ mbiʼyala rí mitsaanʼ dí nikhánála xáʼ.
8 Á mu ikháanʼla nunimbaníí xtángoo ndrígóo rey, xó má naʼthí náa Kiʼniraʼmáʼ “gaʼndaaʼ xtayáá xa̱bu̱ numba ga̱jma̱a̱ʼ xó má eyaaʼ xtayaminaʼ ikháán”, ra̱ʼkhá tháán májánʼ á mu xúʼko̱ eni̱la.
9 Á mu nuraʼwíin má xúʼko̱ xa̱bu̱ bi̱ muniu̱u̱la rí májánʼ, kuwáanʼla ruxuʼdámijná aʼkhá ga̱jma̱a̱ xtángoo naʼthí rí nindxa̱la bi̱ nanújngurámúúnʼ náa ikhaa.
10 Á mu mbáa naʼnimbánuu Xtángoo mú rígá mbá rí naʼnitígo̱o̱ nagiʼdoo aʼkhúun rí nanújngurámuuʼ náa xúgíʼ Xtángoo.
11 Bi̱ niʼthí “xátani̱ aʼkhá ga̱jma̱a̱ʼ i̱mba̱a̱”, ma̱ngaa niʼthí “xátaxíyáa xa̱bu̱”. Á mu tsétaxudaminaʼ aʼkhá ga̱jma̱a̱ʼ i̱mba̱a̱ mú nataxíyáa xa̱bu̱, naraʼdáá aʼkháanʼ rí nanújngurámaanʼ náa xtángoo.
12 Gu̱tha̱ má xúʼko̱ ga̱jma̱a̱ gu̱ni̱ xóo nuni̱ bi̱ muxnaxi̱i̱ cuenta náa inuu xtángoo rí naʼni káwíin xa̱bu̱.
13 Numuu rí bi̱ tségáwíinʼ a̱jkiu̱u̱n, xúʼko̱ má xágáwíinʼ a̱jkiu̱ún kuyáá índo̱ gáxtanda̱ʼa̱a̱ cuenta, numuu rí magáwíinʼ a̱jkia̱a̱nʼ nindxu̱u̱ itháan májánʼ ki xóo rí matanda̱ʼa̱a̱ cuenta.
14 A̱ngui̱nʼ nindxa̱la, ndiéjunʼ lá eyambáá á mu mbáa naʼthíí rí gíʼdoo fe mú rí naʼni tsésngájma rá. Lá ragájkhun rí fe rúʼko̱ xándoo gáʼni kríya̱a̱ʼ xáʼ.
15 Á mu mbáa ndxájulú ndayóoʼ xtíñuu* ga̱jma̱a̱ xáʼngo̱o̱ ganitsu mi̱khu̱ mbiʼi rúʼko̱,
16 mú mbáa rí ikháanʼ naʼthúu̱n, atagíiʼ xtíñáanʼ ga̱jma̱a̱ atatsiʼtsu, mú tséxnúu rí ndayóoʼ mu maxtáa ga̱jma̱a̱,* dí lá gáyambáá rúʼko̱ rá.
17 Xúʼko̱ má kayuuʼ, á mu nuʼtáá rí kuaʼdáá fe mú nda̱a̱ rí e̱ʼni̱, fe rúʼko̱ ragíʼdoo numuu.*
18 Mbáa ma̱ndoo maʼthí: “Ikháán xtaʼdáá fe mú ikhúún rígá rí na̱ni̱, xú káʼnii gándoo gátasngajmá fe á mu nda̱a̱ rí tani̱ rá. Ikhúúnʼ masngajmáaʼ fe ndrígóʼ ga̱jma̱a̱ rí na̱ni̱”.
19 Ikháán natayáá rí xtáa mbáwíí Dios án. Májánʼ má tani̱. Mú asndu xa̱bu̱ wéñiiʼ nduyáá rígi̱ ga̱jma̱a̱ namíñún rí asndu naguíʼiin.
20 Xánindxa̱a̱ʼ mbáa xa̱bu̱ bi̱ tsékro̱ʼo̱o̱. Lá tsétayáá dí fe rí nda̱a̱ dí eʼni ragíʼdoo numuu mbá kayuuʼ ráʼ.
21 Lá na̱nguá nijuiʼthá rí nindxu̱u̱ jmbii anu̱lú Abrahán ga̱jma̱a̱ rí niʼni índo̱ nixnáxi̱i̱ Isaac náa nakarámáʼ tsigijñaʼ ráʼ.
22 Xó má nitayáá, fe ndrígóo nikujmaa ga̱jma̱a̱ rí niʼni, ikhú fe ndrígóo niʼni kájxi̱ ga̱jma̱a̱ rí niʼni.
23 Xúʼko̱ nimbánuu rí Kiʼniraʼmáʼ náa naʼthí: “Abrahán nigiʼdoo fe náa Jeobá,* ikhaa ndiʼyoo rí nindxu̱u̱ mbáa xa̱bu̱ jmbii”. Ga̱jma̱a̱ nigumbiʼyuu bi̱ nambáxu̱u̱ ga̱jma̱a̱ Jeobá.*
24 Xó má eya̱a̱la rí xa̱bu̱ na̱jkha̱nú nanindxu̱u̱ jmbii ga̱jma̱a̱ rí naʼni raʼkháa i̱ndó ga̱jma̱a̱ fe rí gíʼdoo.
25 Xúʼko̱ má kayuuʼ, lá tajuiʼthá rí nindxu̱u̱ jmbii ga̱jma̱a̱ rí niʼni Rahab bi̱ nigujuamínaʼ índo̱ nigruiguíin májánʼ bi̱ nigún kuñu̱u̱n ajngáa ga̱jma̱a̱ nikuʼmiin magúun i̱mba̱ kamba̱a̱ xáʼ.
26 Xó mbá xuwiʼ rí nánguá eyá xu̱u̱ʼ nakháñuu, xúʼko̱ má mbá fe rí nda̱a̱ dí eʼni nindxu̱u̱ asndu xóo rí nikháñuu má.
Mbaʼa nota
^ O “Reino ndrígóo Dios”.
^ Náa ajngáa griego naʼthí, “tsaʼtsaaʼ”.
^ Náa ajngáa griego naʼthí, “rí ndayóoʼ xuyuuʼ”.
^ Náa ajngáa griego naʼthí, “nikháñuu”.
