I̱yi̱i̱ʼ rí niʼnirámáʼ Santiago 3:1-18
3 A̱ngui̱nʼ nindxa̱la, xáʼyóoʼ má rí xúgiáanʼ mani̱ndxa̱la bi̱ nusngáa, numuu rí itháán gakhi̱i̱ gáʼni índo̱ mixtanda̱ʼa̱a̱ cuenta.
2 Xúgiáánʼ nakiéʼkulu mbaʼa nuthu. Bi̱ tsikiéʼkúun ga̱jma̱a̱ rí naʼthí, ikhaa buʼko̱ nindxu̱u̱ xa̱bu̱ bi̱ ragíʼdoo aʼkhá ga̱jma̱a̱ naʼngo̱o̱ narikhoo xúgíʼ xuyuuʼ.
3 Índo̱ nugida̱ʼ freno náa rawúúnʼ wáyú, nu̱ʼni̱ mu munimbu̱ún kuyulú, ma̱ngaa najkua kuʼdiin asndu náa má eyulú.
4 Ma̱ngaa gu̱ya̱a̱la barco: Maski má nindxu̱u̱ mba̱ʼu̱ wéñuuʼ mú giñánʼ nindxu̱u̱ rí nakudingua̱ʼ, mú káaʼ mbá chíʼgíiʼ timón rí naxnúu ikha ga̱jma̱a̱ barco na̱jkha̱ asndu náa má eyoo maʼga bi̱ kuajtuun timón.
5 Xúʼko̱ má kayuuʼ ga̱jma̱a̱ ra̱junlú: Maski ajndu nindxu̱u̱ mbá chíʼgíiʼ xuwiʼ mú nuʼnimbaʼwumíjnalúʼ ga̱jma̱a̱. ¡Gu̱ya̱a̱ rí mbá chíʼgíiʼ aguʼ natsiká mba̱a̱ wéñuuʼ kúbá!
6 Ra̱junlú ma̱ngaa nindxu̱u̱ xóo mbá aguʼ. Nindxu̱u̱ dí rígá náa xuyulúʼ rí naʼni dí raʼkhí ga̱jma̱a̱ naʼni gachúu xúgíʼ xuyulúʼ, ma̱ndoo maʼni gachúu xóo xtáa mbáa xa̱bu̱, ma̱ngaa nindxu̱u̱ xóo Gehena* numuu rí naʼni gámbáa.
7 Numuu rí xúgíinʼ enii xujkhú xáná, ñu̱ʼu̱, bi̱ nuxmajtamijná, bi̱ kúwá náa awúu̱n iyaʼ, nandoo naguma mántsíin ga̱jma̱a̱ xa̱bu̱ niʼngu̱u̱n niguánu nini̱ rí mani̱ndxu̱ún xujkhú kraʼdiin.
8 Mú nimbáa xa̱bu̱ tséʼngo̱o̱ gárikoo raju̱u̱n. Tséʼngo̱o̱ gáñewu̱u̱n ga̱jma̱a̱ naʼnigawúúnʼ eʼwíinʼ ga̱jma̱a̱ ikhí rígá thana mbi̱i̱ʼ rí maxíña̱a̱n.
9 Ikhaa najmulú mu mu̱ʼni̱ mba̱a̱ Jeobá* bi̱ nindxu̱u̱ Anu̱lú, ikháá má najmulú mu muʼthá tsríguíin xa̱bu̱ bi̱ nigumiin “ikhaa kayuuʼ xóo Dios”.
10 Náa rawunlú nagájnuu rí mu̱ʼni̱ tsajkurámaaʼ mbáa ga̱jma̱a̱ rí muʼtátsríguíi.
A̱ngui̱nʼ nindxa̱la, raʼkhí kayuuʼ dí marigá rígi̱.
11 Xúʼko̱ má náa mbóó iduu iyaʼ, xándoo magajnúu iyaʼtsuii ga̱jma̱a̱ iya miʼkhu̱u̱n, lá ragájkhun ráʼ.
12 A̱ngui̱nʼ nindxa̱la, ixi̱ higo xándoo maxná aceitunas ni má ixi̱ uva xándoo maxná higos, lá ragájkhun ráʼ. Xúʼko̱ má iyaʼ dí miríná xándoo magajnúu iyaʼtsuii.
13 Tsáa dí ikháanʼla najmañuu ga̱jma̱a̱ nakro̱ʼo̱o̱ rá. Á mu xúʼko̱, gíʼmaa masngájma ga̱jma̱a̱ rí xóo májánʼ xtáa, ma̱ngaa índo̱ gáʼni rígi̱ ragíʼmaa makiʼnáa numuu dí rígi̱ na̱ʼkha̱ náa ku̱ma̱.
14 Mú, á mu náa a̱jkia̱la rígá tsixígú ga̱jma̱a̱ rí magiʼdala gajmiáánʼla eʼwíinʼ, xájngruigala ru̱ni̱ mbaʼumíjna̱ ni má xútanúmáá rí gajkhun.
15 Ku̱ma̱ rígi̱ na̱nguá e̱ʼkha̱ rijma̱a̱, nindxu̱u̱ dí rígá náa numbaaʼ, náa xujkhúʼ, náa xa̱bu̱ wéñiiʼ.
16 Numuu dí náa narígá tsixígú ga̱jma̱a̱ náa nanigu̱u̱nʼ magi̱ʼdu̱u̱n, xárígá májánʼ awan ga̱jma̱a̱ marigá xúgíʼ enii dí ra̱májánʼ.
17 Ku̱ma̱ dí na̱ʼkha̱ rijma̱a̱, ginii kayuuʼ naʼni rí xa̱bu̱ mani̱ndxu̱u̱ kaʼwii, nda̱wa̱á tséyáʼ xkujndu, gua̱ba̱ʼ a̱jkiu̱u̱n, xtáa xawii mu maʼnimbo̱o̱, nagáwíinʼ a̱jkiu̱u̱n, na̱jma̱a̱ dí májánʼ náa ikhaa, tséraʼwíin xa̱bu̱ ga̱jma̱a̱ tséʼni a̱jma̱ inuu.
18 Bi̱ nuni̱ marigá rí tsímáá nudu tsigaʼ índo̱ narígá rí tsímáá ga̱jma̱a̱ naguánú nurajxi̱i̱ rí nindxu̱u̱ jmbu.
