I̱yi̱i̱ʼ rí niʼnirámáʼ Santiago 5:1-20
5 Dí xúgi̱ rá, gudxawíín ikháanʼla bi̱ kuaʼdáá; gumbi̱ya̱ʼ ga̱jma̱a̱ gagáwíinʼ a̱jkia̱la ga̱jma̱a̱ numuu gamiéjunʼ dí wíji̱ muraʼnííla.
2 Rí kuaʼdáála niʼga̱a̱ ga̱jma̱a̱ xtíñala ni̱ʼphu̱ ruxi.*
3 Oro ga̱jma̱a̱ plata ndrígála ni̱ʼkha̱a̱ iyooʼ ga̱jma̱a̱ dí ni̱ʼkha̱a̱ iyooʼ rúʼko̱ masngájma tsáá phú nindxa̱la ga̱jma̱a̱ mi̱khu̱ xuyala. Rí nigímbola mani̱ndxu̱u̱ xóo mbá aguʼ náa iwáá mbiʼi.
4 Gu̱ya̱a̱, mbújkha̱a̱ rí túninumií ga̱jma̱a̱ bi̱ niñejunʼ bi̱ niraxi̱i̱ dí nidula náa mbayala xtáa randxa̱ʼwá, ga̱jma̱a̱ rí nundxa̱ʼwa̱ rí mixtambáñún bi̱ niraxi̱i̱ dí nidula, ni̱jkha̱nú niʼdxuun Jeobá* bi̱ naʼtáñajúnʼ ángeles náa mekhuíí.
5 Náa tsu̱du̱u̱ ku̱ba̱ʼ niguaʼdáá xúgíʼ dí nindala ga̱jma̱a̱ nixnaxímíjná rí mu̱ni̱ gagimijnáala. Nindxa̱la xóo xujkhúʼ bi̱ ningiin* mu maʼga̱nú mbiʼi rí makhañála.
6 Ikháanʼ ni̱ni̱ rí mamínuuʼ ga̱jma̱a̱ nixíyala xa̱bu̱ jmbii. Lá xáwijitala ikhaa xáʼ.
7 A̱ngui̱nʼ, gáʼngo̱o̱ a̱jkia̱la muguaʼti̱i̱n asndu índo̱ gátanga̱a̱* Tátá. Gu̱ya̱a̱ xóo eʼni bi̱ naʼdu naʼngo̱o̱ a̱jkiu̱u̱n na̱gi̱ʼtu̱u̱n ruʼwa dí naxnáa wapháá ga̱jma̱a̱ ruʼwa dí na̱ʼkha̱a̱ nda̱wa̱á mu ma̱jma̱a̱ dí naʼdu.
8 Xúʼko̱ má mangáanʼ gaʼngo̱o̱ a̱jkia̱la; gu̱ni̱ mbóó a̱jkia̱la numuu rí mbiʼi dí mata̱nga̱a̱ Tátá nijngiyuu má.
9 A̱ngui̱nʼ, xúxiéʼkála ga̱jma̱a̱ numún eʼwíinʼ mu xúʼko̱ xájuiʼtá dí magíʼnala. Numuu rí bi̱ naʼnimbánuu xkujndu wíji̱ má náa xkrugua.
10 A̱ngui̱nʼ, gu̱ya̱a̱ rí xóo nini̱ profetas* bi̱ nithi mbiʼyuu Jeobá* guyaridáá xkridún índo̱ ikháanʼ numíniiʼ ga̱jma̱a̱ gaʼngo̱o̱ a̱jkia̱la.
11 Gu̱ya̱a̱, kúwá gagi bi̱ naʼngu̱u̱n numíniiʼ. Nidxawíínla rí xóo kaʼnii niʼngo̱o̱ Job ga̱jma̱a̱ ndi̱ya̱a̱la xú káʼnii Jeobá* niʼni ga̱jma̱a̱ ikhaa, dí xúgi̱ ndu̱ya̱a̱ rí Jeobá* májánʼ wéñuuʼ a̱jkiu̱u̱n ga̱jma̱a̱ nagáwíinʼ a̱jkiu̱u̱n.
12 A̱ngui̱nʼ nindxa̱la, rígi̱ dí gíʼdoo itháan numuu, xútha dí ndaʼyoo mekhu índo̱ gúxna ajngála ni má rí ndaʼyoo ku̱ba̱ʼ, ma̱ngaa náa i̱ʼwáʼ xúxna ajngála. Índo̱ gútha̱ “xúʼko̱”, gaʼni xúʼko̱, á mu “na̱nguá”, na̱nguá, mu xúʼko̱ Dios xánda̱ʼa̱a̱la cuenta.
13 Lá xtáa mbáa náa ikháanʼla bi̱ namínúuʼ ráʼ. Gáʼtájkáan* má xúʼko̱. Lá xtáa mbáa bi̱ nadxuu ráʼ. Gaʼni ajmúú salmos.
14 Lá xtáa mbáa náa ikháanʼ bi̱ naʼniuu nandii ráʼ. Gandxa̱ʼwún bi̱ kuya̱ edxu̱u̱ náa nagimbáanʼ* ga̱jma̱a̱ ikhiin mutajkáan ga̱jma̱a̱ numuu, ma̱ngaa muxtajmaa aceite ga̱jma̱a̱ mbiʼyuu Jeobá.*
15 Dí mutajkáan ga̱jma̱a̱ fe maʼni rí bi̱ naʼniuu nandii* maʼni̱i̱ a̱jkiu̱u̱n ga̱jma̱a̱ Jeobá* maʼni rí mbayáa tsiakii. Ma̱ngaa á mu ikhaa nikudaminaʼ mbá aʼkhá, Dios maʼni mba̱a̱ a̱jkiu̱u̱n kaʼyoo.
16 Ikha jngóo, gu̱tha̱ pa̱jnu aʼkhá ndrígála kaníkháanʼ ma̱ngaa gutajkáan ga̱jma̱a̱ numún eʼwíinʼ, mu xúʼko̱ maguma thanún. Índo̱ xa̱bu̱ jmbii naʼtájkáan gíʼdoo wéñuuʼ tsiakii.*
17 Elías ninindxu̱u̱ mbáa xa̱bu̱ bi̱ nikumu̱u̱ xó má ikháánʼlú, mú índo̱ niʼtájkáan ga̱jma̱a̱ xúgíʼ a̱jkiu̱u̱n* rí xáxnúu ruʼwa, táxnúu ruʼwa mbá ajtsú tsiguʼ tikhu.
18 Índo̱ niʼtájkáan mbu̱júu̱ʼ, ikhú nixnáa ruʼwa ga̱jma̱a̱ mbaʼa rí ni̱jma̱a̱ náa tsu̱du̱u̱ ku̱ba̱ʼ.
19 A̱ngui̱nʼ nindxa̱la, á mu mbáa rí ikháanʼ nagájnuriyo̱o̱ʼ náa rí gajkhun mú mbáa naʼni rí mata̱nga̱a̱,
20 gu̱ya̱a̱la rí asndu tsáa bi̱ gáʼni rí mata̱nga̱a̱ mbáa xa̱bu̱ aʼkhá náa raʼkhí dí naʼni, maʼnikríyáaʼ náa rí makhañúu ga̱jma̱a̱ nambáyúu mu Dios maʼni mba̱a̱ a̱jkiu̱u̱n kaʼyoo aʼkhúun.
Mbaʼa nota
^ Ajngáa rígi̱ náa griego naʼthí rí nindxu̱u̱ mbáa xujkhúʼ bi̱ xóo bijphí kaʼnii bi̱ naʼni gámbáa xtíin.
^ Náa ajngáa griego naʼthí, “nini̱ rí maʼngaa a̱jkia̱la”.
^ O “gaʼyee”, “bi̱ nuthi dí marigá”.
^ O “gaʼni tsajkuun”.
^ O mbáa “neʼngo̱o̱”.
^ Náa ajngáa griego naʼthí, “gíʼdoo wéñuuʼ tsiakii índo̱ xtáa raʼni”.
^ O “ámiu̱u̱n”.
