I̱yi̱i̱ʼ rí na̱jkha̱ inuu Tito 1:1-16
1 I̱yi̱i̱ʼ rígi̱ niʼnirámáʼ Pablo, ñumbáá ndrígóo Dios ga̱jma̱a̱ apóstol ndrígóo Jesucristo, xó má fe rí guáʼdáá bi̱ niraʼwíin Dios ga̱jma̱a̱ ku̱ma̱ kájxi̱ rí gajkhun, rí kajua̱a̱ ga̱jma̱a̱ rí xóo mbiʼyamajkuíí Dios,
2 dí na̱ʼkha̱ náa rí kua̱ʼthi̱i̱n makuwáánʼ kámuu mbiʼi, dí Dios bi̱ tséʼni nduwaʼ nikudaminaʼ asndu nákha wájyúuʼ
3 (xó má ni̱jkha̱ ranújngoo mbiʼi, ikhaa niʼni rí majmaʼnuuʼ ajngóo náa najuiʼtáraʼa, náa ñajunʼ rí nixnúʼ ma̱ni̱ Dios bi̱ naʼni káwáanʼlu).
4 Mu maʼga náa inuu Tito, bi̱ gajkhun nindxu̱u̱ a̱ʼdióʼ náa fe rí kuaʼdáálú:
Garigá náa ikháán rí májánʼ wéñuuʼ a̱jkiu̱u̱n ga̱jma̱a̱ dí tsímáá ndrígóo Anu̱lú Dios, ma̱ngaa ndrígóo Cristo Jesús bi̱ naʼni káwáanʼlu.
5 Niniʼñáánʼ náa Creta, mu matani̱ májáanʼ dí nánguá ejmaa ga̱jma̱a̱ mu matadri̱gi̱i̱n bi̱ mbuya̱ edxu̱u̱ náa mámbá xuajen, xó má ikha dí ikhúúnʼ nixna̱a̱ʼ:
6 Xa̱biya̱* bi̱ mbayá edxu̱u̱ ragíʼmaa magiʼdoo aʼkhúun mu xútanumáá, xa̱biya̱ bi̱ gíʼdaa mbáwíí a̱ʼgiu̱u̱, ga̱jma̱a̱ bi̱ gíʼdiin e̱ji̱i̱n bi̱ guáʼdáá fe, bi̱ tséwán rigo̱o̱ numún rí nuni̱ dí raʼkhí,* ni má bi̱ tsénimbu̱ún.
7 Numuu rí xóo bi̱ kajkuáa ñawúunʼ dí gíʼdoo Dios, bi̱ kayá edxu̱u̱ ragíʼmaa magiʼdoo aʼkhúun mu mutanumáá, ragíʼmaa mani̱ndxu̱u̱ mbáa xa̱bu̱ bi̱ tségíʼ edxu̱u̱ maratha̱a̱n, ragíʼmaa makiʼnáa nacha̱, xáʼyóoʼ mani̱ndxu̱u̱ mbáa xa̱bu̱ najnga̱a̱, ni má mbáa xa̱bu̱ najmangu̱u̱ʼ,* ni má xágua̱ʼa̱ magiʼdoo wéñuuʼ.
8 Gíʼmaa mani̱ndxu̱u̱ mbáa bi̱ nagruiguíin májánʼ eʼwíinʼ, bi̱ nandoo kaʼyoo rí májánʼ, bi̱ nandxa̱ʼwáminaʼ májánʼ, bi̱ naʼni rí májánʼ ga̱jma̱a̱ bi̱ nawi̱ji̱ jmbu, ma̱ngaa bi̱ nañewu̱u̱n rí naʼni.
9 Gíʼmaa maguajtuminaʼ náa ajngáa rí gajkhun,* rí kajua̱a̱ ga̱jma̱a̱ rí xóo najmañuu naʼsngáa, mu xúʼko̱ ma̱ndoo maxnún tsiakii eʼwíinʼ ga̱jma̱a̱ kiʼsngáa rí májánʼ* ma̱ngaa rí maxprígún bi̱ nusngáa i̱mba̱ nuthu.
10 Numuu rí kúwá mbaʼin xa̱bekha, mú itháán bi̱ nuthi rí muthu xtóo xuyuuʼ tsáʼkhún, bi̱ tsénimbu̱ún, bi̱ mbaʼ nuthíí, ga̱jma̱a̱ bi̱ nuninduwiinʼ eʼwíinʼ.
11 Xa̱bu̱ bugi̱ ndayóoʼ muruguáá rawúúnʼ, numuu rí ikhiin má ni̱ndxu̱ún bi̱ nuni̱ nduwiinʼ bi̱ kúwá náa mbá guʼwíin índo̱ nusngúún dí ragíʼmaa mu xúʼko̱ maguaʼdáá dí rakáʼñún.
12 Rí asndu mbáa dí ikhiin, bi̱ nindxu̱u̱ profeta ndrígu̱ún, niʼthí: “Bi̱ cretenses nuni̱ nduwaʼ má xúʼko̱, ni̱ndxu̱ún xóo xujkhú xáná bi̱ mbi̱i̱nʼ, nuphiʼtsu egún ga̱jma̱a̱ naskún”.
13 Rí na̱tha̱ nindxu̱u̱ gajkhun. Ikha jngóo ataxprígún má xúʼko̱, mu xúʼko̱ makuwá májánʼ náa fe,
14 xúʼgíʼ e̱dxa̱la mudxa̱wíín cuento minduwaʼ rí nuthi judíos ga̱jma̱a̱ kiʼtáñajunʼ ndrígu̱ún xa̱bu̱ bi̱ nitsíngumijna̱ náa rí gajkhun.
15 Xúgíʼ nindxu̱u̱ kaʼwu náa bi̱ kaʼwiin. Mú bi̱ tsagiin bi̱ na̱nguá guaʼdáá fe nda̱a̱ rí kaʼwu eyáá ikhiin, numuu dí niguma tsagáá dí xóo nundxa̱ʼwa̱míjna̱ ga̱jma̱a̱ ku̱ma̱ ndrígu̱ún.
16 Nuthi pa̱jnu rí nuniʼniiʼ Dios, mú ga̱jma̱a̱ rí xóo nuni̱ nusngajma rí tsíñún gúyáá, numuu dí ikhiin tsagiin ga̱jma̱a̱ tsénimbu̱ún ma̱ngaa nimbá ñajunʼ rí májánʼ tséxtriguíin muni̱.
Mbaʼa nota
^ Náa ajngáa griego naʼthí, “á mu xtáa mbáa”.
^ O “bi̱ tséñawa̱a̱n rí nuni̱”.
^ O “bi̱ naxnún a̱ngui̱i̱n”.
^ O “ajngáa rí nuʼnimbulú kuʼyáá”.
^ O “rí nañambáá”.
