I̱yi̱i̱ʼ rí na̱jkha̱ inuu Tito 3:1-15
3 Atani̱ marmáʼáan a̱jkiu̱ún rí gíʼmaa munimbu̱u̱n kuñún xa̱bu̱ ñajunʼ ga̱jma̱a̱ bi̱ guáʼdáá mbá ñajunʼ, dí gakuwíin xawii mu muni̱ xúgíʼ enii ñajunʼ rí májánʼ,
2 xúthi dí raʼkhí ga̱jma̱a̱ numuu nimbáa, xúyáʼ muguáʼdáá xkujndu, ganindxu̱ún xa̱bu̱ bi̱ nakru̱ʼu̱u̱n dí marathu̱u̱n ga̱jma̱a̱ xákiʼníin kuñún xa̱bu̱.
3 Numuu rí mangáanʼ nákha ginii nini̱ndxu̱lú skágunʼ, tséʼnimbulú, niguma nduwáanʼlú, nini̱ndxu̱lú ñumbáá náa mixtiʼkhu rí nigua̱ʼa̱ ni̱ʼni̱ ga̱jma̱a̱ dí ninigulúʼ, niʼni̱lú mbaʼa dí raʼkhí, nixígulú, tsagáanʼlú ga̱jma̱a̱ niwiyulúʼ kuʼyamíjna̱.
4 Mú índo̱ nikujmaa rí májánʼ wéñuuʼ a̱jkiu̱u̱n Dios bi̱ naʼni káwáanʼlu ga̱jma̱a̱ ngajua ndrígóo náa xa̱bu̱ numbaaʼ,
5 ikhaa niʼni káwáanʼlú (raʼkháa ga̱jma̱a̱ numuu rí ni̱ʼni̱ ñajunʼ rí májánʼ, nindxu̱u̱ rí nagáwíin a̱jkiu̱u̱n kaʼyulú) ikhaa niʼni káwáanʼ índo̱ nitsuwáanʼlú mu ma̱ndoo makuwáanʼ ga̱jma̱a̱ índo̱ nijmuu espíritu santo* ndrígóo mu maʼni̱i̱ nuxiáanʼlu.
6 Ikhaa nixídirámuuʼ mbaji̱nʼ espíritu* rígi̱ náa ikháanʼlu ga̱jma̱a̱ numuu Jesucristo bi̱ naʼni káwáanʼlu,
7 mu nda̱wa̱á rí gájuiʼthá rí ni̱ndxu̱lú jmbiáanʼ ga̱jma̱a̱ numuu rí májánʼ wéñuuʼ a̱jkiu̱u̱n Dios, mu xúʼko̱ ma̱ndoo mundrígú rí kua̱ʼthi̱i̱n makuwáanʼlu kámuu.
8 Rí na̱tha̱ rígi̱ nindxu̱u̱ gajkhun, ga̱jma̱a̱ nandoʼ rí marathu̱u̱n má xúʼko̱ rígi̱ bi̱ ninimbu̱ún kuyáá Dios, rí muni̱ má xúʼko̱ ñajunʼ rí májánʼ. Rígi̱ nindxu̱u̱ májánʼ wéñuuʼ ga̱jma̱a̱ nambáñún xa̱bu̱.
9 Xátaxuʼdáminaʼ náa mbaʼ nuthíí, ni má náa rí xóo kaʼnii niguwáʼ rakúwá xa̱bu̱,* náa rí nuni̱ xkujndu ni má náa nagiʼdu̱u̱n ga̱jma̱a̱ numuu Xtángoo, numuu rí nda̱a̱ rí ejmaa ga̱jma̱a̱ xámbáyáaʼ nditháan.
10 Mú xa̱bu̱ bi̱ naʼni marigá kiʼsngáa rí nduwaʼ, xátandriguíi á mu tséʼdxawun consejo dí niraxnáá timbá aʼphu̱ ga̱jma̱a̱ dí maʼni a̱jma̱ aʼphu̱,
11 numuu rí natayáá rí xa̱bu̱ buʼko̱ nigájnuriyo̱o̱ʼ náa kamba̱a̱ rí gajkhun ga̱jma̱a̱ xtáa raʼni aʼkhá, ikhaa má eyáʼ rí mamínuuʼ.
12 Índo̱ gákuʼngua̱a̱nʼ Ártemas o Tíquico, atani̱ mbá tsiakii mu mi̱dxa̱ʼ gátayoʼ náa Nicópolis, numuu dí niraʼwi̱i̱ maguanúʼ ikhí índo̱ gáʼni migúwán.
13 Araxnáá Zenas, mbáa bi̱ nakro̱ʼo̱o̱ májánʼ Xtángoo ga̱jma̱a̱ Apolos xúgíʼ rí gáʼñúnʼ mu xúʼko̱ nda̱a̱ rí gáʼñúnʼ náa rí gágún.
14 Mú a̱ngiu̱lú mangiin gajmañún muni̱ má xúʼko̱ ñajunʼ rí májánʼ, mu xúʼko̱ ma̱ndoo muñambáá índo̱ gáʼyóoʼ mbá nacha̱, mu xánindxu̱ún xa̱bu̱ bi̱ nda̱a̱ rí eni̱.*
15 Xúgíinʼ bi̱ xtáá gajmíʼ nurajxi̱ínʼla. Arathún dí narajxi̱ín xúgíinʼ bi̱ nandún kuyulú bi̱ mbóó fe kuaʼdáá gajmiúlú.
Rí májánʼ wéñuuʼ a̱jkiu̱u̱n Dios garigá náa xúgiáanʼ ikháanʼla.
Mbaʼa nota
^ O “xi̱ʼ”.
^ O “lista náa na̱ʼkha̱ mbiʼñún bi̱ niguwáʼ rakúwá”.
^ Náa ajngáa griego naʼthí, “bi̱ tséni rí majma̱a̱ nimbá”.
