Santa Biblia nindxu̱u̱ ajngóo Dios dí nigumaraʼmáʼ mu mambáyulú xúgiáánʼ. Ndayóoʼ rí muʼni gájmaa mu muniʼniiʼ bi̱ niʼthí xóo magumaraʼmáʼ (Juan 17:3; 2 Timoteo 3:16). Ikhí naʼthí rí Jeobá Dios nasngájma ndiéjunʼ eyoo maʼni ga̱jma̱a̱ numún xa̱bu̱ numbaaʼ ma̱ngaa náa ku̱ba̱ʼ rí kúwíin (Génesis 3:15; Apocalipsis 21:3, 4).

Nda̱a̱ i̱mba̱ libro rí nambáñúún wéñuuʼ xa̱bu̱ xóo Biblia. I̱ndó Biblia nindxu̱u̱ dí naxkajxa̱ánʼ musngajmá xóo nindxu̱u̱ Jeobá, rí maʼndulú kuʼyamijná, rí magáwíinʼ a̱jkiu̱lú ga̱jma̱a̱ rí maʼngo̱o̱ a̱jkiu̱lú.Ma̱ngaa naʼthí dí rígá mbá rí kuáʼti̱i̱n nda̱wa̱á rí nambáyulú maʼngulú muraʼníí tsingíná. Ma̱ngaa naʼthí xú kaʼnii nindxu̱u̱ numbaaʼ rígi̱, dí tsérígá xóo eyoo Dios maguma (Salmo 119:105; Hebreos 4:12; 1 Juan 2:15-17).

Náa ajngáa rí phú nigumaraʼmáʼ Biblia nindxu̱u̱ náa ajngáa hebreo, arameo ga̱jma̱a̱ griego, nijuiʼtájuíi kañiiʼ o ta̱pha̱ itháan rí 3,000 ajngáa. Asndu mbiʼi xúgi̱ nindxu̱u̱ mbá libro rí itháan najuiʼtájuíi ga̱jma̱a̱ najuixnáráʼaa. Ragíʼmaa maʼniulú tsiánguá rígi̱, numuu rí náa Biblia naʼthí mbá kiʼtáriyaʼ dí mambanúu, naʼthí: “Majuiʼtáraʼa ajngáa rí májánʼ ga̱jma̱a̱ numuu Xa̱bu̱ Ñajunʼ ndrígóo Dios náa xúgíʼ tsu̱du̱u̱ ku̱ba̱ʼ mu mudxawíín xúgíinʼ xa̱bu̱, ga̱jma̱a̱ ikhú martumuu mbiʼi” (Mateo 24:14). (Ajngáa rígi̱ rí itháan nagájnuriyo̱o̱ʼ náa Biblia.)

Nijkuánúxu̱ ndi̱ya̱a̱ dí gíʼdoo wéñuuʼ numuu ajngáa dí na̱ʼkha̱ náa Biblia, ikhaa rúʼko̱ numuu dí nigíʼdi̱i̱ ni̱ni̱ májáanʼxu̱ texto dí na̱ʼkha̱ ikhí numuu rí ni̱jkuánú ndi̱ya̱a̱xu̱ dí nindxu̱u̱ mitsúʼkháan rí naʼthí ikhí. Ndi̱ya̱a̱xu̱ rí kajkuáa ñawúnxu mbá ñajunʼ dí gíʼdoo wéñuuʼ numuu rí mu̱nixu̱ manújngáa xóo phú gíʼmaa ajngáa dí naʼthí náa Biblia. Náa nijuiʼtáriya̱a̱ʼ rígi̱ ninindxu̱u̱ náa Traducción del Nuevo Mundo, dí niguma nákhá ginii, naʼni má itháan rí 60 tsiguʼ rí nigájnuu náa timbá aʼphu̱ náa ajngáa inglés. Náa tsiguʼ rí ni̱ʼkha̱ ranújngoo ajngáa ma̱ngaa ni̱ʼkha̱ raxtiʼkhuu. Ikha jngóo ikháanʼ bi̱ nindxu̱xu̱ Comité ndrígóo Biblia Traducción del Nuevo Mundo niraʼwi̱i̱xu̱ dí mu̱ni̱ májáanʼxu̱ rí naʼthí náa Biblia. Rí ninduxu̱, nindxu̱u̱ dí marigá mbá Biblia rí naʼthí mbájmbu xó má naʼthí náa dí phú nigumaraʼmáʼ nákhá ginii, maʼthí kaʼwu ga̱jma̱a̱ rí xáʼni mingíjyúuʼ matraxnuu. Mbaʼa artículo ndrígóo apéndice rí mbiʼyuu (“Criterios para la traducción de la Biblia”, “Características de esta revisión” ga̱jma̱a̱ “Cómo llegó la Biblia hasta nuestros días”) náa naʼthí xú kaʼnii niguma májáanʼ tikhu ajngáa náa Biblia rígi̱.

Bi̱ nandún kuyáá Jeobá Dios ga̱jma̱a̱ bi̱ nduyamajkuíí nandún maguaʼdáá mbá Biblia rí nijuiʼtájuíi mbájmbu ga̱jma̱a̱ dí ra̱mingíjyúuʼ makrua̱ʼa̱a̱ʼ (1 Timoteo 2:4). Ikha jngóo nigájnuu Biblia rígi̱ dí niguma májáanʼ náa ajngáa inglés, numuu rí nanduxuʼ rí majuiʼtájuíi náa mbaʼa enii ajngáa dí rígá. Ikháán bi̱ natayáaʼ Dios, nutájkáanxu rí Biblia rígi̱ mambáyáaʼ matsiʼníiʼ Dios (Hechos 17:27).