Náa Biblia naʼthí ajngóo Dios mu mbuyáá xa̱bu̱ numbaaʼ. Ikha jngó najuiʼthá dí nindxu̱u̱ Ajngá rawunʼ Dios. Naʼsngúlúʼ ndiéjunʼ gúʼni mu makuwáanʼ gagi ga̱jma̱a̱ ndiéjunʼ gúʼni mu manigu̱ʼ bi̱ Niʼniáanʼ, ga̱jma̱a̱ nariʼña̱a̱ graxe̱ rí gíʼdoo wéñuʼ numuu xóo rí tima gi̱jyooʼ:

Náa Biblia na̱ʼkha̱ mbá 66 libros. Gíʼdoo a̱jma̱ níʼkhóo: Escrituras Hebreas ga̱jma̱a̱ Arameas ma̱ngaa Escrituras Griegas Cristianas. Tikhun xa̱bu̱ nuxnambiʼí Antiguo Testamento ga̱jma̱a̱ Nuevo Testamento. Náa Biblia, mámbá libro nawiʼtáa ga̱jma̱a̱ tsinaʼ mba̱ʼu̱, ga̱jma̱a̱ mámbá tsinaʼ mba̱ʼu̱ nawiʼtáa ga̱jma̱a̱ tsinaʼ ma̱jkha̱ʼ. Índo̱ nutha̱nʼ mataʼyáaʼ mbóo texto, ginii na̱ʼkha̱ mbiʼyuu libro, nda̱wa̱á mbóo número rí nindxu̱u̱ tsinaʼ mba̱a̱, ga̱jma̱a̱ nda̱wa̱á kayuʼ na̱ʼkha̱ mbóó o mbaʼa número rí nindxu̱u̱ tsinaʼ ma̱jkha̱ʼ. Mbá xkri̱da, Génesis 1:1 nandoo gáʼthi Génesis tsinaʼ mba̱a̱ 1, tsinaʼ chíʼgíʼ 1.