Náa nigumaraʼmáʼ Escrituras Hebreas ga̱jma̱a̱ Arameas (ma̱ngaa nagumbiʼyuu Antiguo Testamento), inuu má maʼni 7,000 nuthu dí nakujmaa mbiʼyuu Dios ga̱jma̱a̱ tsinaʼ rígi̱ יהוה. Tsinaʼ rígi̱ nindxu̱u̱ a̱jkhu̱ xkriʼkhu o consonantes náa ajngáa hebreo, ga̱jma̱a̱ najmaʼnuʼ xóo Tetragrámaton. Náa Traducción del Nuevo Mundo, nájkhu̱ letra rígi̱ naʼtájuíi xóo “Jeobá”. Mbiʼyuu Dios nindxu̱u̱ dí itháan mbaʼa nutu na̱ʼkha̱ náa Biblia. Gajkhun má dí xa̱bu̱ bi̱ niniraʼmáʼ Biblia nijmún mbaʼa título ga̱jma̱a̱ xóo dí ikhaa nindxu̱u̱ mú muthán, xóo bi̱ Gíʼdoo xúgíʼ tsiakii, bi̱ Phú Mba̱a̱ ga̱jma̱a̱ Tátá. Mú, indió dí nijmún mú muni mbiʼyuu Dios nindxu̱u̱ Tetragrámaton.

Mínaʼ má Jeobá niʼni rí bi̱ niniraʼmáʼ Biblia majmúún mbiʼyuu ikhaa. Mbá xkri̱da, niʼni dí gaʼyee Joel maʼnirámáʼ: “Xúgínʼ bi̱ nugríga̱a̱ mbiʼyuu Jeobá makáwíin”, ma̱ngaa Dios niʼni rí mbáa maʼnirámáʼ salmo náa niʼthí: “Mu xa̱bu̱ mbuyáá rí ikháánʼ mbiʼyaʼ Jeobá, i̱ndó ikháánʼ ni̱ndxa̱ʼ bi̱ phú Mba̱a̱ náa xúgíʼ tsu̱du̱u̱ ku̱ba̱ʼ” (Joel 2:32; Salmo 83:18). Ma̱ngaa, dí mbiʼyuu ikhaa najkumaa mbáa 700 nuthu náa i̱yi̱i̱ʼ Salmo, mbóo i̱yi̱i̱ʼ náa kajti ajmúú ga̱jma̱a̱ ajngáa rí mitsaanʼ wéñuʼ dí xa̱bi̱i̱ nini xó má kama. Á mu xúʼko̱, náa numuu dí náa i̱ʼwáʼ Biblia na̱nguá e̱ʼkha̱ mbiʼyuu Dios rá. Ga̱jma̱a̱ náa numuu dí náa Traducción del Nuevo Mundo naʼthí Jehová rá. Ndiéjunʼ eyoo gáʼthúu̱n mbiʼyuu xá.

Náa numuu dí náa i̱’wáʼ Biblia na̱nguá e̱ʼkha̱ mbiʼyuu Dios rá. Rígá mbaʼa numuu. 1) Kúwi̱i̱n tikhun bi̱ nundxaʼwamíjna̱ rí bi̱ Gíʼdoo xúgíʼ tsiakii na̱nguá eyóoʼ mbóo mbiʼyuu kiejunʼ. 2) Tikhun nuniñami̱jna̱ muni xóo nakumu̱ún judío dí ragíʼmaa majmúún mbiʼyuu Dios, mbáa mu dí namiñun muta wéñiʼ. 3) Ma̱ngaa eʼwíínʼ nundxaʼwamíjna̱ numuu rí na̱nguá eʼyáá xú káʼnii phú nithi mbiʼyuu, ikha jngó itháan májánʼ majmúún i̱ndó título xóo Tátá o Dios. Mú nimbá dí rúʼko̱ na̱nguá gíʼdoo numuu. Guʼyáá ndíjkha jngó.

• Timbá, bi̱ nuthi rí Dios na̱nguá eyóoʼ mbóo mbiʼyuu kiejunʼ tsixmiéjúúnʼ rí nixkamaa náa niniraʼmáʼ wajyúúʼ —tikhuu dí nákhi xóo  tséʼkha̱ Cristo— náa na̱ʼkha̱ mbiʼyuu Dios. Xó má nitaxu ginii, mínaʼ má Dios niʼni dí magumaraʼmáʼ mbiʼyuu mbáa 7,000 nuthu náa Ajngá rawunʼ. Xúʼko̱ nisngájma kaʼwu dí ikhaa nandoo dí muniʼnuʼ mbiʼyuu ga̱jma̱a̱ majmuluʼ.

• Raga̱jma̱, bi̱ nitajuíi Biblia bi̱ niningudi̱i̱ mbiʼyuu Dios ga̱jma̱a̱ numuu dí xóo kumún judío na̱nguá eyáá mbóo dí gíʼdoo wéñuʼ numuu. Maski ajndu tikhun judío bi̱ niniriyaʼ Biblia na̱nguá eñún gúthi mbiʼyuu, mú niniraʼmáʼ índo̱ niniriyaʼ náa Biblia. Mijngii náa mar Muerto, náa Qumrán, nikujma̱a̱ i̱yi̱i̱ʼ kambúxi̱ dí rígá wajyúúʼ náa kiʼniraʼmáʼ mbaʼa nuthu mbiʼyuu Dios. Tikhun bi̱ nitajuíi Biblia niningudi̱i̱ mbiʼyuu Dios niniraʼmáʼ imbo̱ʼ título xóo TÁTÁ ga̱jma̱a̱ tsinaʼ mba̱ʼu̱ o mayúscula mú musngajma náa e̱ʼkha̱ mbiʼyuu Dios náa phú kiʼniraʼmáʼ. Mú ikhiin nduyáá rí mbiʼyuu Dios na̱ʼkha̱ mbaʼa wéñuʼ nuthu náa Biblia, náa numuu dí niriʼkuíí o niningudi̱i̱ xá. Tsáa lá niʼtañajúnʼ dí xúʼko̱ gúni xá. I̱ndó ikhiin gándoo muthi.

• Ragajtsú numuu, bi̱ nuthi dí ragíʼmaa majmuluʼ mbiʼyuu Dios numuu rí na̱nguá eʼyáá xóo phú gíʼmaa miʼtá najmún mbiʼyuu Jesús. Mú dí phú gajkhun, mbiʼi xúgi̱ nimbáa tseʼyoo xóo phú nithi mbiʼyuu Jesús nákha timbá siglo. Cristianos bi̱ nithi ajngáa hebreo mbáa ikhiin nitháán xóo “Yeshúa”. Ga̱jma̱a̱ título Cristo (o Mesías) nindxu̱u̱ “Maschíaj”. Cristiano bi̱ nuthi ajngáa griego nixna mbiʼí “Iēsóus Kjristós”, mangiin bi̱ nuthi latín, “Iesus Christus”. Ga̱jma̱a̱ xi̱ʼ kaʼwu ndrígóo Dios, bi̱ niniraʼmáʼ Biblia nijmún mbiʼyuu Dios xóo nitajuíi náa ajngáa griego. Na̱nguá má nini dí mawán kayúʼ xóo ajngáa hebreo, ikhiin nijmún xó má nuthi xa̱bu̱ náa ajngún.Xúʼko̱ kayuʼ erígá ga̱jma̱a̱ mbiʼyuu Dios: Mbá Nguáthi̱i̱n bi̱ nuyambáá xóo Miʼtájuíi Biblia del Nuevo Mundo ndiyáá rí májánʼ má majmúún Jeobá maski ajndu má raʼkháa xúʼko̱ phú ethi dí ajngá hebreo nákha wajyúúʼ.

Náa numuu dí náa Traducción del Nuevo Mundo najmuu xóo Jehová rá. Náa xtílo̱o̱, nájkhu̱ tsinaʼ ndrígóo Tetragrámaton (יהוה) nandoo gáʼthi xkriʼkhu YHWH (ma̱ngaa ma̱ndoo maʼni YHVH o JHVH). Náa numuu nda̱a̱ tsíxkriʼkhu o vocales rá. Numuu rí náa ajngáa hebreo dí nirígá wajyúúʼ i̱ndó nagumaraʼmáʼ ga̱jma̱a̱ xkriʼkhu. Á mu xúʼko̱, xóo eyáá xa̱bu̱ xú káʼnii tsíxkriʼkhu gájmun índo̱ guraxnuu ajngáa rá. Nduyáá xóo guraxnuu numuu dí najmún xúgíʼ mbiʼi.

Mbá míí tsiguʼ nda̱wa̱á índo̱ niguámbá nigumaraʼmáʼ Escrituras náa ajngáa Hebreo ga̱jma̱a̱ Arameo, judíos bi̱ nijmañún wéñuʼ nini ratáá mbóʼ náa ma̱ndoo muñambáá magixnuu ajngáa hebreo. Dí nini ratáá rígi̱ naʼnirámáʼ punto, o signo, mú mbuyáá náa ejkha̱ tsíxkriʼkhu náa mámbá ajngáa. Mú, nákha ikhú mbaʼin judío niniñami̱jna̱ muni xóo eʼwíínʼ, dí ra̱májánʼ muthi mbiʼyuu Dios, ikha jngó nijmún i̱ʼwáʼ ajngáa. Índo̱ niniriyaʼ Tetragrámaton, nuniraʼmáʼ tsíxkriʼkhu dí ajngáa rúʼko̱ náa a̱jkhu̱ xkriʼkhu dí mbiʼyuu Dios. Ikha jngó i̱yi̱i̱ʼ náa  nigumaraʼmáʼ punto na̱nguá ejmaa mu mbuʼyáá xú káʼnii phú nijuiʼthá mbiʼyuu Dios náa ajngá hebreo. Kúwi̱i̱n tikhun bi̱ nundxaʼwamíjna̱ dí nijuiʼthá “Yahweh” (o “Yahvé”), mú iʼwíínʼ nuthi dí mixtiʼkhu nijuiʼthá. Mbóo I̱yi̱i̱ʼ dí Kambúxi̱ ndrígóo Levítico rí nikujma̱a̱ náa mar Muerto rí kiʼniraʼmáʼ náa ajngáa griego ikhí na̱ʼkha̱ xóo “Iao” mbiʼyuu Dios. Iʼwíínʼ bi̱ niniraʼmáʼ ajngá griego nákhi wajyúúʼ nuthi dí nijuiʼthá xóo “Iaé”, “Iabé” o “Iaoué”. Dí phú gajkhun, na̱nguá eʼyáá xú káʼnii phú nijuiʼthá nákhi wajyúúʼ mbiʼyuu Dios náa ajngáa hebreo, ikha jngó xándoo muʼthálú mbájmbu (Génesis 13:4; Éxodo 3:15). Mú i̱ndó dí nduʼyáálú rí Dios nijmuu mbaʼa nuthu mbiʼyuu índo̱ niʼthún xa̱bi̱i̱ ga̱jma̱a̱ dí ikhiin nijmún índo̱ nitakáñii ikhaa ma̱ngaa índo̱ nithúún iʼwíínʼ xa̱bu̱ (Éxodo 6:2; 1 Reyes 8:23; Salmo 99:9).

Mú, náa numuu dí náa Traducción del Nuevo Mundo najmuu xóo Jehová rá. Xó má mbuʼyáá gi̱i̱, numuu dí mba̱yu̱ʼ tsiguʼ ejmaa xúʼko̱ káʼnii náa xtílo̱o̱.

Timbá Biblia dí nitajuíi xtílo̱o̱ náa na̱ʼkha̱ mbiʼyuu Dios nindxu̱u̱ i̱yi̱i̱ʼ ndrígóo Salmos dí niʼnirámáʼ Juan de Valdés, nákha tsiguʼ 1537. Najmuu xóo Iehova. Xó má ni̱jkha̱ raxtiʼkhuu ajngáa, xúʼko̱ má ni̱jkha̱ raxtiʼkhuu ma̱ngaa xóo nigumaraʼmáʼ mbiʼyuu Dios. Mbá xkri̱da, i̱yi̱i̱ʼ ndrígóo Salmos dí niʼni Bernardino de Rebolledo, nákha tsiguʼ 1661, najmuu Jehova. Biblia dí Scío de San Miguel, tsiguʼ 1791, najmuu Iehováh náa mbaʼa nota. Imbo̱o̱ dí Torres Amat nákha tsiguʼ 1824 najmuu Jehovah, ga̱jma̱a̱ náa Reina-Valera dí tsiguʼ 1862, xóo Jehová. Náa i̱ʼwáʼ ajngáa ma̱ngaa nijmaa mba̱yu̱ʼ tsiguʼ xúʼko̱ kaʼnii mbiʼyuu Dios. Mbá xkri̱da, Pentateuco rí niʼtájuíi William Tyndale, nákha tsiguʼ 1530, najmuu Iehouah. Rígi̱ nindxu̱u̱ timbá Biblia dí niguma náa ajngáa inglés náa na̱ʼkha̱ xú nitajuíi mbiʼyuu Dios.

Dí niguma náa inglés Studies in the Psalms (Ninigajmaa numuu Salmos), nigájnuu nákha tsiguʼ 1911, bi̱ niʼnirámáʼ Biblia bi̱ ndiyamajkuíí  wéñuʼ Joseph Bryant Rotherham, nijmuu mbiʼyuu Dios xóo Jehovah náa ajngáa inglés raʼkháa xóo Yahweh numuu rí ndiʼyoo rí “najmaʼnuʼ itháan —ga̱jma̱a̱ rí májánʼ wéñuʼ eyáá— xúgínʼ bi̱ nuraxnuu Biblia”. Ma̱ngaa, nákha tsiguʼ 1930, Alexander Kirkpatrick bi̱ najmañuu wéñuʼ ajngáa hebreo niʼthí xúʼko̱ kaʼnii ma̱ngaa ga̱jma̱a̱ numuu rí najmaa Jehovah xóo ethi náa ajngáa inglés: “Rí mbiʼi xúgi̱ mbaʼin bi̱ nuni xtángoo xóo miʼtá mbá ajngáa nuthi rí gíʼmaa muraxnuu xóo ‹Yahveh› o ‹Yahaveh›; mú nakujmaa rí JEHOVAH nuthi itháan náa ajngáa inglés, ma̱ngaa rí phú itháan gíʼdoo numuu rí mbuʼyáá rí xúʼko̱ mbiʼyuu ikhaa, tséʼniuu mu na̱nguá eʼyáá xóo phú nijuiʼthá mbiʼyuu, ma̱ngaa rí na̱nguá nindxu̱u̱ mbóo título, xóo Tátá”. Náa ajngáa xtílo̱o̱, náa Diccionario Manual Bíblico naʼthí ikhaa kayúʼ rí “mbiʼyuu Jehová niguanúu mitsaʼkhúun numuu rí xúʼko̱ ejmúún” náa tikhuu Biblia rí najmaʼnuʼ itháan.

Ndiéjunʼ eyoo gáʼthi mbiʼyuu Jeobá rá. Náa ajngáa hebreo, Jeobá na̱ʼkha̱ náa mbóʼ verbo dí nandoo gáʼthi “maʼga̱nú mani̱ndxu̱u̱”. Tikhun bi̱ najmañún wéñuʼ nindxa̱ʼwa̱míjna̱ dí ajngáa rígi̱ kama xóo verbo causativo. Rígi̱ eyoo gáʼthúu̱n rí sujeto naʼni dí mbóo o mbáa maʼni marigá rí e̱ʼkha̱ raʼthí verbo. Ikha jngó, Mbá Nguáthi̱i̱n bi̱ nuyambáá xóo Miʼtájuíi Biblia del Nuevo Mundo nindxa̱ʼwa̱míjna̱ rí mbiʼyuu Dios nandoo gáʼthúu̱n “Ikhaa Naʼni dí Marigá”. Bi̱ najmañún wéñuʼ mbaʼa eni xóo ethi, ikha jngó xándoo muʼthá xú káʼnii phú eyoo gáʼthúu̱n. Mú, nambánii má ga̱jma̱a̱ dí eyoo gáʼthúu̱n mbiʼyuu numuu dí Jeobá niʼni xúgi̱ dí rígá ga̱jma̱a̱ dí naʼnimbánuu xúgíʼ rí naʼthí maʼni. Náa numuu rá. Numuu dí ikhaa raʼkháa mbóó niʼni numbaaʼ ga̱jma̱a̱ xúgínʼ bi̱ kúwi̱i̱n ikhí mu makuwá, ma̱ngaa dí asndu ndiéjunʼ má gárígá nimbáa xárikhoo, maʼni má xúʼko̱ dí nandoo ga̱jma̱a̱ dí naʼthí maʼni.

Mú ndiéjunʼ gándoo gúʼthá ga̱jma̱a̱ numuu dí naʼthí náa Éxodo 3:14 rá. Ikhí Dios niʼthí ga̱jma̱a̱ numuu má ikhaa: “Ikhúúnʼ maʼgánú mani̱ndxu̱ʼ xóo má eyoʼ ikhúúnʼ”. Rí naʼthí gi̱i̱ najmaa mbóo verbo hebreo náa na̱ʼkha̱ mbiʼyuu Dios. Mú ajngáa rígi̱ tséʼthi káxi̱ xú káʼnii phú eyoo gáʼthúu̱n mbiʼyuu Dios. Dí phú muʼthá nasngájma mbá chíʼgíʼ dí xú káʼnii nindxu̱u̱ ikhaa: Rí ikhaa na̱jkha̱nú nanindxu̱u̱ asndu ndiéjunʼ má eyóoʼ mu xúʼko̱ maʼni mbánuu dí nagíiʼ maʼni.Mú mbiʼyuu Jeobá raʼkháa mbóó nandoo gáʼthúu̱n dí ikhaa mínaʼ na̱jkha̱nú nanindxu̱u̱ asndu ndiéjunʼ má mu maʼni mbánuu dí naʼthí maʼni. Ma̱ngaa nandoo gáʼthi dí najmuu rí niʼni mu maʼni asndu ndiéjunʼ má eyóoʼ mu maʼni mbánuu dí naʼthí.