Náa biʼyaa rí itháan gíʼdoo numuu rí ma̱ndoo mumiʼnúnʼ e̱jña̱la rá. Rígá mbaʼa enii rí nda̱ñúnʼ ikhiin, xóo rí maʼndalá ku̱ñu̱u̱n, rí muxnu̱u̱n ikha, rí muñe̱wu̱u̱n. Mú rígá mbóo rí gíʼdoo wéñuʼ numuu rí ma̱ndoo muxnu̱u̱n e̱jña̱la, ku̱ma̱ ndrígóo Jeobá ga̱jma̱a̱ rí gajkhun rí na̱ʼkha̱ náa Ajngá rawunʼ rí nagumbiʼyuu Biblia (Juan 17:3). Ku̱ma̱ rúʼko̱ gámbañun maʼndún kuyáá Jeobá ma̱ngaa muni ñajunʼ ikhaa ga̱jma̱a̱ xúgíʼ a̱jkiún, maski ajndu ikhiin majkhinʼ (Mateo 21:16).

Mbaʼin xa̱bu̱ bi̱ guáʼdiin e̱ji̱n niguánu ndiyáá dí e̱ji̱n najmañún itháan á mu ra̱mingíjyúuʼ dí rasngúún ga̱jma̱a̱ dí narathúún muni. Ikha jngó nadxuxu wéñuʼ rí muxnaxíxu̱ i̱yi̱i̱ʼ rígi̱, Nagíʼdu̱u̱ najmañuʼ numuu Biblia. Kiʼsngáa dí ra̱mingíjyúuʼ rí na̱ʼkha̱ náa i̱yi̱i̱ʼ rígi̱ mambáñún xa̱bu̱ wanii mu musngúún e̱jñún. Xtiʼkhu ga̱jma̱a̱ dí na̱ʼkha̱ raʼthí gi̱i̱ ki̱ʼni̱ mu makru̱ʼu̱u̱n e̱ji̱n bi̱ guáʼdáá ajtsú tsiguúnʼ o itháan majkhinʼ. Ma̱ngaa na̱ʼkha̱ rí najuiʼthún muni. I̱yi̱i̱ʼ rígi̱ raʼkháa rí mutsijmúnʼ e̱ji̱n. Ki̱ʼni̱ mu muraxnuu náa e̱jña̱la mu xúʼko̱ gambáyalá mu mutamijná gajmiála.

Ndu̱ya̱a̱xu májánʼ rí i̱yi̱i̱ʼ rígi̱ mambáyala mu musngúún e̱jña̱la rí gajkhun rí na̱ʼkha̱ náa Biblia ‹asndu nákha majkhinʼ› (2 Timoteo 3:14, 15).

A̱ngia̱la,

Cuerpo Gobernante ndrígu̱ún bi̱ nutaraʼa numuu Jeobá