KÍXNUU 3
Lá gajkhun rí náa Dios eʼkha̱ ajngáa rí májánʼ ráʼ.
1. Tsáa ñajunʼ bi̱ phú niʼni Biblia rá.
Ra̱ʼkhá tháán májánʼ ajngáa rí nigumaraʼmáʼ náa Biblia numuu rí ikhí naʼthí makuwáanʼ kámuu mbiʼi náa tsu̱du̱u̱ Ku̱ba̱ʼ (Salmo 37:29). Biblia gíʼdoo mbá 66 libro majkhaʼ. Dios nijmiu mbá 40 xa̱bekha bi̱ nini rí jmbu náa ikhaa mu muniraʼmáʼ Biblia. Witsu libro rí na̱ʼkha̱ ginii niʼnirámáʼ Moisés, rígi̱ niguámbá niguma nákha itháan maʼni 3,500 tsiguʼ. Libro rí námbóo ga̱jma̱a̱ Biblia niʼnirámáʼ apóstol Juan itháan dí 1,900 tsiguʼ ndáwáá. Lá niniraʼmáʼ Biblia ga̱jma̱a̱ kuma ndrígu̱ún ikhiin ráʼ. Dios nijmuu espíritu santo ndrígóo mu maʼthúún xa̱bu̱ xú káʼnii muniraʼmáʼ Biblia (2 Samuel 23:2). Ikhiin niniraʼmáʼ xó má endxa̱ʼóo edxu̱u̱ Dios, raʼkháa xóo endxaʼwa̱a̱ edxu̱ún ikhiin. Ikha jngó, Jeobá ñajunʼ bi̱ phú niʼnirámáʼ Biblia. Atraxnuu 2 Timoteo 3:16 ga̱jma̱a̱ 2 Pedro 1:20, 21.
2. Xú káʼnii gándoo gúʼyáá á mu gajkhun rí xtáa raʼthí náa Biblia rá.
Ikháanʼ nduʼyáá rí Biblia na̱ʼkha̱ náa Dios, numuu rí ikhí naʼthí kaʼwu ndiéjunʼ gárígá nda̱wa̱á. Nimbáa xa̱bu̱ xándoo maʼni rúʼko̱ (Josué 23:14). I̱ndó Dios bi̱ gíʼdoo xúgíʼ tsiakii ma̱ndoo maʼthí kaʼwu xú káʼnii gakúwi̱i̱n xa̱bu̱ nda̱wa̱á. Atraxnuu Isaías 42:9 ga̱jma̱a̱ 46:10.
I̱ndó rígi̱ ñajunʼ libro ndrígóo Dios rí phú kiejunʼ, nda̱a̱ imbo̱o̱. Ra̱ʼkhá tháán mbaʼa wéñuʼ Biblia egájnuu náa mbaʼa ajngáa. Maski ajndu wajyúúʼ má rígá Biblia mu nambánii ga̱jma̱a̱ rí eʼthí ciencia. Ga̱jma̱a̱ mbá 40 xa̱bekha bi̱ niniraʼmáʼ na̱nguá ethi mixtiʼkhu. * Náa Biblia eʼkha̱ raʼthí rí i̱ndó Dios nandoo kaʼyulúʼ wéñuʼ. Ga̱jma̱a̱ Biblia naʼngo̱o̱ naʼni rí xa̱bu̱ muriʼkhumijná mu muni rí májánʼ. Rígi̱ naʼni rí mbaʼin wéñuʼ xa̱bu̱ munimbu̱ún rí Biblia ñajunʼ Ajngá rawunʼ Dios. Atraxnuu 1 Tesalonicenses 2:13.
3. Ndiéjunʼ eʼthí náa Biblia rá.
Rí phú eʼkha̱ raʼthí náa Biblia ñajunʼ ajngáa májánʼ rí nindoo Dios maʼni ga̱jma̱a̱ numún xa̱bu̱ nákha ginii. Náa Ajngá rawunʼ Dios eʼkha̱ raʼthí xú káʼnii rí asndu nákha ginii xa̱biya̱ niʼni mandátiga̱a̱ ku̱ba̱ʼ mitsaan náa ma̱ndoo maxtáa ga̱jma̱a̱ xú káʼnii Ku̱ba̱ʼ mitsaan rígi̱ maʼganú marigá mbu̱júu̱. Atraxnuu Rí huasjŋgajma Juan 21:4, 5.
Náa Ajngá rawunʼ Dios na̱ʼkha̱ xtángoo rí tsixtiʼkhuu ga̱jma̱a̱ na̱ʼkha̱ consejo rí nambáyulúʼ má xúʼko̱. Ga̱jma̱a̱ náa Biblia na̱ʼkha̱ raʼthí xú káʼnii niʼni Dios gajmíi̱n xa̱bu̱ bi̱ nikuwa nákha ginii. Rígi̱ nasngájma xú káʼnii xa̱bu̱ nindxu̱u̱ Dios. Ikha jngó, Biblia ma̱ndoo mambáyaʼ matatsiʼniiʼ Dios. Ma̱ngaa naʼthí xú káʼnii gándoo matani mu mambáxa̱ʼ gajma̱ʼ ikhaa. Atraxnuu Salmo 19:7, 11; Santiago 2:23, ga̱jma̱a̱ 4:8.
4. Xú gándoo gákruaʼaʼ rí naʼthí náa Biblia rá.
Índo̱ Jesús niʼsngúún xa̱bu̱ ga̱jma̱a̱ Ajngá rawunʼ Dios, ginii niguxnuu rí eʼthí náa Biblia. Nda̱wa̱á niʼni rí makru̱ʼu̱u̱n xa̱bu̱ rí guámbóo niguxnuu. Ma̱ngaa folleto rígi̱, mambáyaʼ makruaʼaʼ rí eʼkha̱ raʼthí náa Biblia. Atraxnuu Lucas 24:27, 45.
Itháan májánʼ ajngáa rí na̱ʼkha̱ náa Dios. Mú tikhuun xa̱bu̱ na̱nguá eñún gúdxuun o asndu nakiʼníin rí marathu̱u̱n ga̱jma̱a̱ numuu Ajngá rawunʼ Dios. Mú xátani dí rígi̱ maʼñaʼ matatsiʼñáanʼ ratanigajmaa. Bi̱ gájmañún ga̱jma̱a̱ numuu Dios ma̱ndoo maguanu makuwíin kámuu mbiʼi. Atraxnuu Juan 17:3.
^ párr. 3 Á mu nandaʼ ma̱ta̱ya̱a̱ itháan, atayáá rí eʼthí náa folleto Biblia ga̱jma̱a̱ ajngóo.
