Dios bi̱ Niʼniáanʼ itháan ndaʼyoo wéñuʼ raʼkháa xóo ikháanʼ. Ikhaa ñajunʼ xóo mbáa Anu̱lú bi̱ nandoo kaʼyulúʼ ga̱jma̱a̱ naxmiéjunʼ kaʼyulúʼ mámbáa rí ikháanʼ. Ma̱ngaa ikhaa na̱nguá nindoo rí i̱ndó ikháanʼ gúraʼwí muʼni á mu ikhaa tsimbayulú (Jeremías 10:23). Xóo mbáa ada̱ ndayóoʼ rí anu̱u̱ maxnúu ikha, xúʼko̱ má mangáanʼ ndayulu consejo ndrígóo Dios (Isaías 48:17, 18). Consejo ndrígóo Dios naxnulu ikha, ikha jngó consejo rúʼko̱ ñajunʼ xóo mbá regalo rí nixnulu Dios. Atraxnuu 2 Timoteo 3:16.

Xtángoo ga̱jma̱a̱ consejo ndrígóo Jeobá naʼsngúlúʼ xú káʼnii gándoo makuwán itháan májánʼ rí mbiʼi xúgi̱ ga̱jma̱a̱ naʼtulúʼ xú káʼnii gáʼni tsajkurámáánʼ nda̱wa̱á. Numuu rí Dios niʼniáanʼlu, itháan májánʼ muʼdxawíín, muʼnimbulúʼ ga̱jma̱a̱ muxnáa núma̱aʼ numuu rí naxnulu ikha. Atraxnuu Salmo 19:7, 11 ga̱jma̱a̱ Rí huasjŋgajma Juan 4:11.

Náa Biblia rígá consejo rí tsixtiʼkhuu. Xtángoo ñajunʼ mixtiʼkhu numuu rí tsimbayulú xúgíʼ rí nuʼni (Deuteronomio 22:8). Gíʼmáanʼ mundxaʼwáá májánʼ edxu̱lúʼ xú káʼnii consejo ndrígóo Biblia najmaa mu maxnulúʼ ikha índo̱ nandulúʼ mbá rí muʼni (Proverbios 2:10-12). Mbá xkri̱da, náa Biblia naʼsngáa rí Dios niʼni makuwáanʼ. Consejo rígi̱ rí gíʼdoo wéñuʼ numuu ma̱ndoo maxnulúʼ ikha náa nuñajunʼ, náa guʼulúʼ, ga̱jma̱a̱ índo̱ nagájnuluʼ najkua. Naxnulu ikha ga̱jma̱a̱ nambáyulúʼ mu munewumíjna̱ mu nda̱a̱ rí guguaʼnii. Atraxnuu Hechos 17:28.

Jesús niʼthí dí rígá a̱jma̱ consejo rí phú itháan gíʼdoo numuu ki xóo i̱ʼwáʼ. Timbá naʼtulúʼ rí itháan gíʼdoo numuu muʼni, ikha rígi̱ ñajunʼ  rí muniʼniiʼ Dios, maʼndulú kuʼyáá, ga̱jma̱a̱ muʼni káxi̱ ñajunʼ ndrígóo. Ikhaa numuu rúʼko̱ rí nandoo nakuwáanʼ. Rígi̱ ñajunʼ timbá consejo ga̱jma̱a̱ gíʼmaa rí marmáʼáan a̱jkiu̱lú xúgíʼ mbiʼi rí nanújngoo (Proverbios 3:6). Bi̱ phú nugíiʼ nuni consejo rígi̱ naguanu nambáxuun májánʼ gajmiún Dios, nakuwa rí phú gajkhun gagi, ga̱jma̱a̱ makuwá kámuu mbiʼi. Atraxnuu Mateo 22:36-38.

Raga̱jma̱ consejo rí itháan gíʼdoo numuu naxnulu ikha mu mambaxulúʼ májánʼ ga̱jma̱a̱ xuguaʼdáá xkujndu gajmiulú iʼwíínʼ (1 Corintios 13:4-7). Á mu nuʼgíiʼ nuʼni̱ raga̱jma̱ consejo rígi̱ nandoo gáʼthi rí nduʼyaridáá xú káʼnii eʼni Dios gajmíi̱n iʼwíínʼ xa̱bi̱i̱. Atraxnuu Mateo 7:12 ga̱jma̱a̱ 22:39, 40.

Consejo rí na̱ʼkha̱ náa Biblia naʼsngúún bi̱ kúwi̱i̱n náa mbá guʼwíín rí xú káʼnii ikhiin makuwíin mbá kambáxu̱u̱n ga̱jma̱a̱ rí maʼndún kuyamijná (Colosenses 3:12-14). Ma̱ngaa Ajngá rawunʼ Dios nañewu̱u̱n bi̱ kúwi̱i̱n náa mbá guʼwíín numuu rí naʼsngún mbá consejo rí gíʼdoo wéñuʼ numuu. Consejo rúʼko̱ nindxu̱u̱ ga̱jma̱a̱ numún xa̱bu̱ bi̱ ninigu̱nʼ, rí ikhiin gíʼmaa makuwa mbóó kámuu mbiʼi. Atraxnuu Génesis 2:24.

Á mu nuʼnimbulúʼ xóo má eʼthe Biblia ikhú gándoo gúñewa̱a̱n xúgíʼ rí kuaʼdáá ga̱jma̱a̱ xúʼko̱ má gúñewa̱a̱n a̱jkiu̱lu ma̱ngaa. Mbá xkri̱da, xa̱bu̱ bi̱ guáʼdáá ñajunʼ nandún rí maguaʼdiin xa̱bu̱ muñajunʼ bi̱ nuni xóo má eʼthí consejo rí na̱ʼkha̱ náa Biblia, rí muni májánʼ ñajunʼ ndrígu̱ún ga̱jma̱a̱ rí muthi má xúʼko̱ rí gajkhun (Proverbios 10:4, 26; Hebreos 13:18). Ma̱ngaa Ajngá rawunʼ Dios naʼsngúlúʼ rí makuwáanʼ gagi ga̱jma̱a̱ i̱ndó rí ndayóoʼ makuwáanʼ ga̱jma̱a̱ tsejtsí mbiʼi, ga̱jma̱a̱ muʼgíiʼ mambaxulúʼ itháan gajmiulú Jeobá ki xóo rí muguaʼdáá wéñuʼ. Atraxnuu Mateo 6:24, 25, 33 ga̱jma̱a̱ 1 Timoteo 6:8-10.

Á mu nuʼni xóo má eʼthí consejo rí na̱ʼkha̱ náa Biblia mambáyuluʼ mu nda̱a̱ rí gúgiʼnii ikháanʼ (Proverbios 14:30; 22:24, 25). Mbá xkri̱da, xtángoo ndrígóo Dios naʼthí dí ragíʼmaa majngánʼlú, rígi̱ nambáyulúʼ ikháanʼ mu xáʼñulu nandii ga̱jma̱a̱ dí xákambiyuluʼ (Proverbios 23:20). Jeobá naniñuʼ rí ikháanʼ muʼwa̱a̱n mbá lájuíin iya najnga̱a̱ mú na̱nguá gíʼmaa rí asndu majngánʼ (Salmo 104:15; 1 Corintios 6:10). Consejo ndrígóo Dios nambáyulúʼ, numuu rí naʼsngúlúʼ muñawumíjna̱, raʼkháa i̱ndó rí nuʼni, ma̱ngaa naʼsngúlúʼ muñewa̱a̱n rí xú káʼnii endxaʼwa̱míjna̱ (Salmo 119:97-100). Mú, bi̱ cristianos nunimbu̱u̱n consejo ndrígóo Dios, raʼkháa i̱ndó numuu dí makuwa májánʼ, ikhiin nunimbu̱ún numuu rí phú nduyamajkuíí Jeobá. Atraxnuu Mateo 5:14-16.